પદ્મ પુરાણ · અધ્યાય 6.131

પાર્વત્યુવાચ।
શાલગ્રામશિલા શુદ્ધા મૂર્ત્તયઃ સંતિ ભૂતલે ।
તાસાં ચૈવ તુ મૂર્તીનાં પૂજનં કતિધા સ્મૃતમ્

બ્રાહ્મણૈઃ કતિ પૂજ્યાસ્તાઃ ક્ષત્રિયૈર્વા સુરેશ્વર ।
વૈશ્યૈર્વાપિ કથં શૂદ્રૈઃ સ્ત્રીભિર્વાપિ સમાદિશ

મહાદેવ ઉવાચ।
શાલગ્રામશિલા પુણ્યા પવિત્રા ધર્મકારિણી ।
યસ્યા દર્શનમાત્રેણ બ્રહ્મહા શુધ્યતે નરઃ

તદ્ગૃહં સર્વતીર્થાનાં પ્રવરં શ્રુતિનોદિતમ્ ।
યત્રેયં સર્વદા મૂર્તિઃ શાલગ્રામશિલા શુભા

બ્રાહ્મણૈઃ પંચપૂજ્યા સ્યુશ્ચતસ્રઃ ક્ષત્રિયૈસ્તથા ।
વૈશ્યૈસ્તિસ્રસ્તથાપૂજ્યાએકાપૂજ્યાપ્રયત્નતઃ

તસ્યાદર્શનમાત્રેણશૂદ્રો મુક્તિમવાપ્નુયાત્ ।
અનેન વિધિના દેવિ યે નરાઃ પૂજયંતિ વૈ

ભોગાન્સર્વાંસ્તત્ર ભુક્ત્વા યાંતિ વિષ્ણોઃ સનાતનમ્ ।
ઇયં સા મહતી મૂર્તિઃ સર્વદા પાપહારિણી

કૈલાસાદ્યં ફલં દેવિ જાયતે પૂજનાદ્યતઃ ।
તત્ર ગંગા ચ યમુના ગોદાવરી સરસ્વતી

તિષ્ઠતે ચ શિલા યત્ર સર્વં તત્ર ન સંશયઃ ।
કિમત્ર બહુનોક્તેન ભૂયોભૂયો વરાનને

પૂજનં મનુજૈઃ સમ્યક્કર્ત્તવ્યં મુક્તિમિચ્છુભિઃ ।
ભક્તિભાવેન દેવેશિ યેઽર્ચયંતિ જનાર્દનમ્

તેષાં દર્શનમાત્રેણ બ્રહ્મહા શુધ્યતે જનઃ ।
દાસભાવેન યે શૂદ્રાઃ સ્વર્ચનં કુર્વતે સદા

તેષાં પુણ્યં ન જાનંતિ બ્રહ્માદ્યાશ્ચ સુરેશ્વરિ ।
ભક્તિભાવેન યે વિપ્રા હરિમભ્યર્ચયંતિ વૈ

એકવિંશતિકુલં તૈસ્તુ તારિતં તેષુ જન્મસુ ।
શંખચક્રાંકિતો યસ્તુ વિપ્રઃ પૂજનમાચરેત્

પૂજિતં તુ જગત્સર્વં તેન વિષ્ણુપ્રપૂજનાત્ ।
પિતરઃ સંવદંત્યસ્મત્કુલે જાતાશ્ચ વૈષ્ણવાઃ

તત્કુલં તારિતં તૈસ્તુ યાવદાભૂતસંપ્લવમ્ ।
તે તુ ચાસ્માન્સમુદ્ધૃત્ય નયંતે વિષ્ણુમંદિરમ્

સ એવ દિવસો ધન્યો ધન્યા માતાઽથ બાંધવાઃ ।
પિતા તસ્ય ચ વૈ ધન્યો ધન્યા વૈ સુહૃદસ્તથા

સર્વે ધન્યતમા જ્ઞેયા વિષ્ણુભક્તિપરાયણાઃ ।
તેષાં દર્શનમાત્રેણ મહાપાપાત્પ્રમુચ્યતે

ઉપપાતકાનિ સર્વાણિ મહાંતિ પાતકાનિ ચ ।
તાનિ સર્વાણિ નશ્યંતિ વૈષ્ણવાનાં ચ દર્શનાત્

પાવકા ઇવ દીપ્યંતે યે નરા વૈષ્ણવા ભુવિ ।
વિમુક્તાઃ સર્વપાપેભ્યો મેઘેભ્ય ઇવ ચંદ્રમાઃ

આર્દ્રશુષ્કં લઘુસ્થૂલં વાઙ્મનઃ કર્મભિઃ કૃતમ્ ।
તત્સર્વં નાશમાયાતિ વૈષ્ણવાનાં ચ દર્શનાત્

હિંસાદિકં ચ યત્પાપં જ્ઞાનાજ્ઞાનં કૃતં ચ યત્ ।
તત્સર્વં નાશમાયાતિ દર્શનાદ્વૈષ્ણવસ્ય ચ

નિઃપાપાસ્ત્રિદિવં યાંતિ પાપિષ્ઠા યાંતિ શુદ્ધિતામ્ ।
દર્શનાદેવ સાધૂનાં સત્યં તુભ્યં મયોદિતમ્

સંસારકર્દમાલેપપ્રક્ષાલનવિશારદઃ ।
પાવનઃ પાવનાનાં ચ વિષ્ણુભક્તો ન સંશયઃ

પ્રત્યહં વિષ્ણુભક્તા યે સ્મરંતિ મધુસૂદનમ્ ।
તે તુ વિષ્ણુમયા જ્ઞેયા વિષ્ણુસ્તત્ર ન સંશયઃ

નવનીલઘનશ્યામં નલિનાયતલોચનમ્ ।
શંખચક્રગદાપદ્મધરં પીતાંબરાવૃતમ્

કૌસ્તુભેન વિરાજંતં વનમાલાધરં હરિમ્ ।
ઉલ્લસત્કુંડલજ્યોતિઃ કપોલવદનશ્રિયા

વિરાજિતં કિરીટેન વલયાંગદનૂપુરૈઃ ।
પ્રસન્નવદનાંભોજં ચતુર્બાહું શ્રિયાન્વિતમ્

એવં ધ્યાયંતિ યે વિપ્રા વિષ્ણું ચૈવ તુ પાર્વતિ ।
તે વિપ્રા વિષ્ણુરૂપાશ્ચ વૈષ્ણવાસ્તે ન સંશયઃ

તેષાં દર્શનમાત્રેણ ભક્ત્યા વા ભોજનેન વા ।
પૂજનેન ચ દેવેશિ વૈકુંઠં લભતે ધ્રુવમ્

ઇતિ શ્રીપાદ્મે મહાપુરાણે પંચપંચાશત્સહસ્રસંહિતાયામુત્તરખંડે શાલગ્રામશિલાપૂજનમાહાત્મ્યંનામૈકત્રિંશાધિકશતતમોઽધ્યાયઃ