Padma Purana · Chapter 5.91

nārada uvāca-/
devaśarmā mahāprājñaḥ samaṃ sumanasā tayā /
tīrthe kanakhale puṇye gaṃgāyāmativiśrute

vaiśākhe vidhinā snānaṃ cakre meṣasthite ravau /
pūjayāmāsa vidhivanmadhusūdanamacyutam

yamaiḥ saniyamairyuktaḥ śaktyā kiṃciddadau tataḥ /
haviṣyabhugbhūmiśāyī brahmacaryavratasthitaḥ

kṛcchrādi tapasā kṣāmo dhyāyannārāyaṇaṃ hṛdi /
tatra prāpya sa vaiśākhīṃ datvā madhutilādikam

viprebhyo bhojanaṃ datvā bhaktyā dhenuṃ sadakṣiṇām /
acchidraṃ prārthayāmāsa tatra snānasya bhūsurān

sāpi sādhvī ca suśroṇī patibhaktiparāyaṇā /
patiṃ śuśrūṣate nityaṃ snātvā saṃpūjya keśavam

tau daṃpatī tato yātau svagehaṃ sādhuharṣitam /
kṛtakṛtyāvathātmānau manyamānāvasaṃśayam

tena puṇyaprabhāveṇa kālena kiyatā kila /
babhūvuramitāstasya dhanadhānyāni saṃpadaḥ

tanayā vinayopetāścatvāraḥ śrutikovidāḥ /
dharmajñā vaiṣṇavā nityaṃ pitṛmātṛparāyaṇāḥ

babhūvuramitaprajñāḥ puruṣārthāya bodhitāḥ /
vikhyātā vidhitattvajñā brahmajñā brahmatatparāḥ

samagraguṇasaṃpannāḥ saṃpratiṣṭhaṃti kīrtayaḥ

tau daṃpatī sutasamagrasamṛddhasaukhyaṃ puṇyodayaṃ samupayujya tataścireṇa /
sthānaṃ paraṃ paramamīyaturasya bhaktyā śrīmādhave ca sukṛtasya nṛpaprasādāt

yathaiva mādhavaḥ sākṣādvidyālakṣmī dhavaḥ smṛtaḥ /
tathaiva mādhavo māso madhusūdanavallabhaḥ

idaṃ mādhavamāhātmyaṃ kiṃcitsaṃkṣepato'nagha /
mayā te kathitaṃ vīra yatpurā ca pituḥ śrutam

iti śrīpadmapurāṇe pātālakhaṃḍe nāradāṃbarīṣasaṃvāde vaiśākhamāsamāhātmye ekanavatitamo'dhyāyaḥ