પદ્મ પુરાણ · અધ્યાય 5.91

નારદ ઉવાચ-।
દેવશર્મા મહાપ્રાજ્ઞઃ સમં સુમનસા તયા ।
તીર્થે કનખલે પુણ્યે ગંગાયામતિવિશ્રુતે

વૈશાખે વિધિના સ્નાનં ચક્રે મેષસ્થિતે રવૌ ।
પૂજયામાસ વિધિવન્મધુસૂદનમચ્યુતમ્

યમૈઃ સનિયમૈર્યુક્તઃ શક્ત્યા કિંચિદ્દદૌ તતઃ ।
હવિષ્યભુગ્ભૂમિશાયી બ્રહ્મચર્યવ્રતસ્થિતઃ

કૃચ્છ્રાદિ તપસા ક્ષામો ધ્યાયન્નારાયણં હૃદિ ।
તત્ર પ્રાપ્ય સ વૈશાખીં દત્વા મધુતિલાદિકમ્

વિપ્રેભ્યો ભોજનં દત્વા ભક્ત્યા ધેનું સદક્ષિણામ્ ।
અચ્છિદ્રં પ્રાર્થયામાસ તત્ર સ્નાનસ્ય ભૂસુરાન્

સાપિ સાધ્વી ચ સુશ્રોણી પતિભક્તિપરાયણા ।
પતિં શુશ્રૂષતે નિત્યં સ્નાત્વા સંપૂજ્ય કેશવમ્

તૌ દંપતી તતો યાતૌ સ્વગેહં સાધુહર્ષિતમ્ ।
કૃતકૃત્યાવથાત્માનૌ મન્યમાનાવસંશયમ્

તેન પુણ્યપ્રભાવેણ કાલેન કિયતા કિલ ।
બભૂવુરમિતાસ્તસ્ય ધનધાન્યાનિ સંપદઃ

તનયા વિનયોપેતાશ્ચત્વારઃ શ્રુતિકોવિદાઃ ।
ધર્મજ્ઞા વૈષ્ણવા નિત્યં પિતૃમાતૃપરાયણાઃ

બભૂવુરમિતપ્રજ્ઞાઃ પુરુષાર્થાય બોધિતાઃ ।
વિખ્યાતા વિધિતત્ત્વજ્ઞા બ્રહ્મજ્ઞા બ્રહ્મતત્પરાઃ

સમગ્રગુણસંપન્નાઃ સંપ્રતિષ્ઠંતિ કીર્તયઃ

તૌ દંપતી સુતસમગ્રસમૃદ્ધસૌખ્યં પુણ્યોદયં સમુપયુજ્ય તતશ્ચિરેણ ।
સ્થાનં પરં પરમમીયતુરસ્ય ભક્ત્યા શ્રીમાધવે ચ સુકૃતસ્ય નૃપપ્રસાદાત્

યથૈવ માધવઃ સાક્ષાદ્વિદ્યાલક્ષ્મી ધવઃ સ્મૃતઃ ।
તથૈવ માધવો માસો મધુસૂદનવલ્લભઃ

ઇદં માધવમાહાત્મ્યં કિંચિત્સંક્ષેપતોઽનઘ ।
મયા તે કથિતં વીર યત્પુરા ચ પિતુઃ શ્રુતમ્

ઇતિ શ્રીપદ્મપુરાણે પાતાલખંડે નારદાંબરીષસંવાદે વૈશાખમાસમાહાત્મ્યે એકનવતિતમોઽધ્યાયઃ