Padma Purana · Chapter 5.47

śeṣa uvāca/
hayo gato hemakūṭaṃ bhāratāṃte tato dvija /
anekabhaṭasāhasrai rakṣito baddhacāmaraḥ

yo vai vistarato dairghyādyojanānāṃ samaṃ tataḥ /
ayutena suśṛṅgaiśca rājataiḥ kāṃcanādibhiḥ

tatrodyānaṃ mahacchreṣṭhaṃ pādapaiḥ pariśobhitam /
śālaistālaistamālaiśca karṇikāraiḥ samantataḥ

hiṃtālairnāgapunnāgaiḥ kovidāraiḥ sabilvakaiḥ /
campakairbakulairmeghairmadanaiḥ kuṭajādibhiḥ

jātikābhiryūthikābhirnavamālikayā tathā /
āmrairmādhavadrākṣābhirdāḍimaiḥ śobhitaṃ vanam

anekapakṣisaṃghuṣṭaṃ bhramarairninadīkṛtam /
mayūrakekāravitaṃ sarvartusukhadaṃ hayaḥ

praviveśa sa śatrughno manovegasamanvitaḥ /
svarṇapatraṃ viśāle sve bhāle bibhranmanoharam

gacchatastasya vāhasya hayamedhakratostadā /
akasmādabhavaccitraṃ tacchṛṇuṣva dvijottama

gātrastaṃbho'bhavattasya na cacāla pathisthitaḥ /
hemakūṭaivācālyo babhūva hayasattamaḥ

tadā tadrakṣakāḥ sarve kaśāghātānvitenire /
tadāhate'pi na yayau stabdhagātro hayottamaḥ

śatrughnaṃ savidhe gatvā cukruśurvāharakṣakāḥ /
svāminvayaṃ na jānīmaḥ kimabhūddhayasattame

gacchato vāhavaryasya manovegasya bhūpate /
ākasmiko'bhavattasya gātrastaṃbho mahāmate

kaśābhistāḍito'smābhiḥ paraṃ tatra cacāla na /
evaṃ vicārya yatkarma tatkuruṣva nṛpottama

tadā vismayamāpanno bhūpatiḥ saha sainikaiḥ /
jagāma sahitaḥ sarvairhayasya mahato'ntike

puṣkalo bāhunā dhṛtvā caraṇau tasya bhūtalāt /
utpāṭayāmāsa tadā paraṃ no celatustataḥ

balena balinākrāṃto nākampata hayastadā /
hanūmāṃstaṃ samuddhartuṃ matiṃ cakre mahāmanāḥ

lāṃgūlena samāveṣṭya balena balināṃ varaḥ /
ācakarṣa balādvāhaṃ na cacāla tathāpi saḥ

tadovāca kapiśreṣṭho hanūmānvismayānvitaḥ /
śatrughnaṃ balināṃ śreṣṭhaṃ vīrāṇāṃ pariśṛṇvatām

mayā droṇo lāṃgulena līlayotpāṭito'dhunā /
paramatra mahāścaryaṃ kampate na hayo'lpakaḥ

dṛṣṭamatra nidānaṃ hi vīrairbalibhiruddhataiḥ /
ākṛṣṭo'pi na ca sthānāccacāla tilamātrataḥ

kapibhāṣitamākarṇya śatrughno vismayānvitaḥ /
sumatiṃ maṃtriṇāṃ śreṣṭhamuvāca vadatāṃ varaḥ

śatrughna uvāca/
maṃtrinkimabhavadvāhe staṃbhanaṃ vapuṣo'nagha /
ko'tropāyo vidheyaḥ syādyena vāhagatirbhavet

sumatiruvāca/
svāminkaścinmunirmṛgyo'khilajñānavicakṣaṇaḥ /
deśodbhavamahaṃ jāne pratyakṣaṃ na parokṣajam

śeṣa uvāca/
iti vākyaṃ samākarṇya sumaterdharmakovidaḥ /
anveṣayāmāsa muniṃ sevakaiḥ saha śobhanam

te sarve sarvato gatvā muniṃ dharmavidaṃ bhaṭāḥ /
vyālokayaṃtaḥ sarvatra na cāpaśyanmunīśvaram

ekastvanucaro vipra gato yojanamātrataḥ /
pūrvasyāṃ diśi codyuktaḥ paśyati sma mahāśramam

yatra nirvairiṇaḥ sarve paśavo janatāstathā /
gaṃgāsnānahatāśeṣakilbiṣāḥ sumanoharāḥ

yatra kecittapaḥ śreṣṭhaṃ kurvaṃti sma hutāśanaiḥ /
dhūmairadhomukhāḥ patrairvāyubhiḥ svodaraṃbharāḥ

yatrāgnihotrajo dhūmaḥ pavitrayati sarvadā /
anekamunisaṃhṛṣṭo muktapatralatottamaḥ

tamāśramaṃ munerjñātvā śaunakasya manoharam /
nyavedayannṛpāyāsau vismayāviṣṭacetase

tacchrutvā harṣito'tyaṃtaṃ śatrughnaḥ saha sevakaiḥ /
hanūmatpuṣkalādyaiśca sayuto'gāttadāśramam

tatra vīkṣya muniśreṣṭhaṃ samyagghutahutāśanam /
praṇamya daṃḍavattasya caraṇau pāpahāriṇau

tamāgataṃ nṛpaṃ jñātvā śatrughnaṃ balināṃ varam /
arghyapādyādikaṃ cakre prītastaddarśanādabhūt

sukhopaviṣṭaṃ viśrāntaṃ nṛpaṃ prāha munīśvaraḥ /
kimarthamaṭanaṃ deva mahatparyaṭanaṃ tava

tvādṛśāḥ pṛthivīṃ sarvāṃ nṛpā vai na bhramaṃti cet /
tadā duṣṭajanāḥ sādhūnbādhaṃte vigatajvarān

kathayasva mahīpāla śatrughna balināṃ vara /
sarvaṃ śubhāyano bhūyāttava paryaṭanādikam

śeṣa uvāca/
ityuktavaṃtaṃ bhūdevaṃ pratyuvāca mahīśvaraḥ /
gadgada svarayā vāṇyā harṣita svīyavigrahaḥ

śatrughna uvāca/
akasmādabhavaccitraṃ rāmāśvasya manohṛtaḥ /
nātidūre tvadāvāsāttacchṛṇuṣva vidāṃvara

udyāne tava śobhāḍhye yadṛcchāto hayo gataḥ /
tatprāṃte tasya vāhasya gātrastaṃbho'bhavatkṣaṇāt

tadā me balino vīrāḥ puṣkalādyā madotkaṭāḥ /
balādācakṛṣurvāhaṃ na cacāla tathāpyasau

asmānapāraduḥkhābdhau magnānpratitariḥ smṛtaḥ /
daivāddṛṣṭaḥ subhāgyaistvaṃ kathayasva nidānakam

śeṣa uvāca/
evaṃ pṛṣṭo munivaraḥ kṣaṇaṃ dadhyau mahāmatiḥ /
tataḥ kāraṇasaṃyuktaṃ vicāreṇa dadhaddhayam

kṣaṇāttajjñānatāṃ prāpya vismayotphullalocanaḥ /
jagāda sa mahīpālaṃ duḥkhitaṃ saṃśayānvitam

śaunaka uvāca/
śṛṇu rājanpravakṣyāmi hayastaṃbhasya kāraṇam /
yacchrutvā mucyate duḥkhādaticitrakathānakam

gauḍadeśe mahāraṇye kāverītīrabhūṣite /
vāḍavaḥ sātvako nāmnā cacāra paramaṃ tapaḥ

ekāhaṃ payasaḥ prāśī dinaikaṃ vāyubhakṣakaḥ /
dinaikaṃ tu nirāhāra evaṃ tridinamunnayet

evaṃ vrate pravṛttasya kālaḥ sarvakṣayaṃkaraḥ /
jagrāha svasya daṃṣṭrāyāṃ mṛtiṃ prāpa mahāvratī

vimāne sarvaśobhāḍhye sarvaratnavibhūṣite /
apsarobhiḥ saha krīḍanyayau meroḥ śikhāsthitau

jaṃbūnāmamahāvṛkṣastatra sevyaraso'bhavat /
nadī jāṃbavatī saṃjñā svarṇadravasamanvitā

tasyāṃ munayaicchābhiḥ krīḍaṃte kutukānvitāḥ /
anekatapasā puṇyāḥ sarvasaukhyasamanvitāḥ

tatrāsau svecchayā krīḍannapsarobhirmudānvitaḥ /
pratīpamācaratteṣāṃ svābhimānamadoddhataḥ

tataḥ śaptaḥ sa munibhī rākṣaso bhava durmukhaḥ /
tato'tiduḥkhitaḥ prāha munīnvidyātapodhanān

anugṛhṇaṃtu māṃ sarve viprā yūyaṃ kṛpālavaḥ /
tadā tairanugṛhīto yadā rāmahayaṃ bhavān

staṃbhayiṣyati vegena tato rāmakathāśrutiḥ /
paścānmuktirbhavitrī te śāpādasmātsudāruṇāt

sa prokto munibhirdevo rākṣasatvamitaḥ prabho /
staṃbhayāmāsa rāmāśvaṃ mocayānaghakīrtanaiḥ

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe śāpakīrtanaṃnāma saptacatvāriṃśattamo'dhyāyaḥ