Padma Purana · Chapter 5.28

śeṣa uvāca/
atha putraṃ samālokya patitaṃ vyasumuddhatam /
vilalāpa bhṛśaṃ rājā sutaduḥkhena duḥkhitaḥ

mūrdhni saṃtāḍayāmāsa pāṇibhyāmatiduḥkhitaḥ /
kampamāno bhṛśaṃ cāśrūṇyamuñcannayanābjayoḥ

gṛhītvā patitaṃ vaktraṃ caṃdrabiṃbamanoramam /
puṣkaleṣu kṣatāsṛgbhiḥ klinnaṃ kuṃḍalaśobhitam

kuṭilabhrūyugaṃ śreṣṭhaṃ saṃdaṣṭādharapallavam /
sa cuṃbanmukhapadmena vilapannidamabravīt

hā putra vīra kathamutsukacetasaṃ māṃ /
kiṃ nekṣase viśadanetrayugena śūra /
kiṃ madvinodakathayārahitastvameva /
roṣodadhiplutamanāḥ kila lakṣyase ca

vada putra kathaṃ māṃ tvaṃ prabrūṣe na hasanpunaḥ /
amṛtairmadhurāsvādairvinodayasi putraka

śatrughnāśvaṃ gṛhāṇa tvaṃ sitacāmaraśobhitam /
svarṇapatreṇa śobhāḍhyaṃ tyaja nidrāṃ mahāmate

eṣa pratāpaviśadaḥ pratāpāgryaḥ paraṃtapaḥ /
dhanurbibhratpuro bhāti puṣkalaḥ paravīrahā

enaṃ vāraya sattīkṣṇairbāṇaiḥ kodaṃḍanirgataiḥ /
kathaṃ tvaṃ raṇamadhye vai śete vīravimohitaḥ

hastinaḥ pattayaścaiva rathārūḍhā bhayārditāḥ /
śaraṇaṃ tvāṃ samāyāṃti tānīkṣasva mahāmate

putra tvayā vinā soḍhuṃ kathaṃ śakto raṇāṃgaṇe /
śatrughnasāyakāṃstīkṣṇāṃścaṃḍakodaṃḍanirgatān

ato māṃ tu tvayā hīnaṃ ko vā pālayituṃ kṣamaḥ /
yadi tyakṣyasi nidrā tvaṃ jayāyāhaṃ kṣamastadā

itthaṃ vilapya subhṛśaṃ tatāḍa hṛdayaṃ svakam /
bahuśaḥ pāṇinā rājā putraduḥkhena duḥkhitaḥ

tadā vicitra damanau sva sva syaṃdanasaṃsthitau /
pituścaraṇayornatvā ūcatuḥ samayocitam

rājannasmāsu jīvatsu kiṃ duḥkhaṃ hṛdi tadvada /
vīrāṇāṃ pradhane mṛtyurvāṃcchito jāyate mahān

dhanyo'yaṃ bata citrāṃgo yo vīra bhuvi śobhate /
sakirīṭastu saṃdaṣṭadaṃtacchadayugaḥ prabhuḥ

kathayāśu kimadyaiva kurvaste kāryamīpsitam /
śatrughnavāhinīṃ sarvāṃ hanva āvāmanāthinīm

adyaiva puṣkalaṃ bhrāturvadhakāriṇamāhave /
pātayāvo rathācchittvā śiromukuṭamaṃḍitam

tyaja śokaṃ suduḥkhārtaḥ kathaṃ bhāsi mahāmate /
ājñāpayāvāṃ mānārha kuru yuddhe matiṃ tathā

iti vākyaṃ samākarṇya putrayorvīramāninoḥ /
śokaṃ tyaktvā mahārājo yuddhāya matimādadhāt

tāvapi pratiyoddhāraṃ vāṃcchaṃtau raṇadurmadau /
jagmatuḥ kaṭake śatroranaṃtabhaṭapūrite

riputāpena damano nīlaratnena cetaraḥ /
yuyudhāte raṇe vīrau prāvṛṣīva balāhakau

rājā kanakasannaddhe rathe maṇivicitrite /
ratnakūbaraśobhāḍhye tiṣṭhaṃścāpadharo balī

yayau yoddhuṃ tu śatrughnaṃ vīrakoṭabhirāvṛtam /
tṛṇīkurvanmahāvīrāndhanurvidyāviśāradān

taṃ yoddhumāgataṃ dṛṣṭvā subāhuṃ roṣapūritam /
putranāśena kurvaṃtaṃ sarvasainyavadhādikam

śatrughnapārśvasaṃcārī hanūmāṃstamupādravat /
nakhāyudho mahānādaṃ kurvanmegha ivāhave

subāhustaṃ hanūmaṃtamāgacchaṃtaṃ mahāravam /
uvāca prahasanvākyaṃ roṣapūritalocanaḥ

kva gataḥ puṣkalo hatvā matputraṃ raṇamaṃḍale /
pātayāmyadya tasyāśu śiro jvalitakuṃḍalam

kva śatrughno vāhapālaḥ kva ca rāmaḥ kuto bhaṭāḥ /
prāṇahaṃtāramāyāṃtaṃ paśyaṃtu pradhane tu mām

iti tadvākyamākarṇya hanūmānnijagāda tam /
śatrughno lavaṇacchettā vartate sainyapālakaḥ

sa kathaṃ pradhane yudhyetsevake'gre sthite nṛpa /
māṃ vijitya raṇe taṃ ca tvaṃ gaṃtāsi nararṣabha

ityuktavaṃtaṃ tarasā vivyādha daśasāyakaiḥ /
hṛdi vānaramatyugraṃ parvatāgryamivasthitam

sabāṇānāgatāṃstāṃśca gṛhītvā karasaṃpuṭe /
cūrṇayāmāsa tilaśaḥ śitānvairividāraṇān

cūrṇayitvā śarāṃstāṃstu ninadanghanagarjitaiḥ /
pucchenāveṣṭya tasyoccai rathaṃ ninye mahābalaḥ

tadā taṃ nṛpavaryo'sāvākāśe sthita eva saḥ /
lāṃgūlaṃ tāḍayāmāsa śitāgraiḥ sāyakairmuhuḥ

sa tāḍitastu pucchāgre śaraiḥ sannataparvabhiḥ /
mumoca tadrathaṃ divyaṃ kanakena vicitritam

sa muktastena tarasā śaraistīkṣṇairjaghāna tam /
hanūmaṃtaṃ kapivaraṃ roṣasaṃpūritekṣaṇaḥ

hanūmānbāṇavicchinnaḥ sarvatrarudhirāplutaḥ /
mahāroṣaṃ samādhatta nṛpopari kapīśvaraḥ

gṛhītvā tasya daṃṣṭrābhī rathaṃ hayasamanvitam /
cūrṇayāmasa vegena tadadbhutamivābhavat

svarathaṃ bhajyamānaṃ tu dṛṣṭvā rājā tvaranbalī /
anyaṃ rathaṃ samāsthāya yuyudhe taṃ mahābalam

pucche mukhe'thorasi ca bhuje caraṇayornṛpaḥ /
jaghāna śarasaṃdhānakovidaḥ paramāstravit

tadā kruddhaḥ kapivarastāḍayāmāsa vakṣasi /
pādenotplutya vegena rājñaḥ subhaṭaśobhinaḥ

sa padā prahato bhūmau papāta kila mūrcchitaḥ /
mukhādvamannasṛkcoṣṇaṃ śvāsapūrapravepitaḥ

tadā prakupito'tyaṃtaṃ hanūmānpradhanāṃgaṇe /
aśvānvīrāngajāṃścāpi cūrṇayāmāsa vegataḥ

tadā suketustadbhrātā tathā lakṣmīnidhirnṛpaḥ /
ubhāvapi susannaddhau yuddhāya samupasthitau

rājānaṃ mūrcchitaṃ dṛṣṭvā prapalāyya gatā narāḥ /
itastato bāṇasaṃghaiḥ kṣatāḥ puṣkalavarṣitaiḥ

tadbhajyamānaṃ svabalaṃ vīkṣya rājātmajo balī /
damanaḥ staṃbhayāmāsa seturvārdhimivoccalam

tadā tu mūrcchito rājā svapnamekaṃ dadarśa ha /
raṇamadhye kapivaraprapadāghātatāḍitaḥ

rāmacaṃdrastvayodhyāyāṃ sarayūtīramaṃḍape /
brāhmaṇairyājñikaśreṣṭhairbahubhiḥ parivāritaḥ

tatra brahmādayo devāstatra brahmāṃḍakoṭayaḥ /
kṛtaprāñjalayastaṃ vai stuvaṃti stutibhirmuhuḥ

rāmaṃ śyāmaṃ sunayanaṃ mṛgaśṛṃgaparigraham /
gāyaṃti nāradādyāśca vīṇollasitapāṇayaḥ

nṛtyaṃtyapsarasastatra ghṛtācī menakādayaḥ /
vedā mūrtidharā bhūtvā upatiṣṭhaṃti rāghavam

yacca kiṃcidvastujātaṃ sarvaśobhāsamanvitam /
tasya dātāramakhilaṃ bhaktānāṃ bhogadāyakam

ityevamādisaṃpaśyañjāgratsaṃjñāmavāpa saḥ /
brahmaśāpahatajñānaḥ kiṃ dṛṣṭamiti vai vadan

utthāya prayayau padbhyāṃ śatrughnacaraṇaṃ prati /
bhṛtyakoṭiparīvāro rathakoṭiparīvṛtaḥ

suketuṃ tu samāhūya vicitraṃ damanaṃ tathā /
yuddhaṃ kartuṃ samudyuktānvārayāmāsa dharmavit

uvāca tānmahārājo dharmātmā dharmasaṃyutaḥ /
bhrātaḥputrau śṛṇuta me vākyaṃ dharmasamanvitam

mā yuddhaṃ kuruta kṣipramanayastu mahānabhūt /
yadrāmacaṃdravāhaṃ tvamagṛhṇāddamanorjjitam

eṣa rāmaḥ paraṃbrahma kāryakāraṇataḥ param /
carācarajagatsvāmī na mānuṣavapurdharaḥ

etaddhi brahmavijñānamadhunā jñātavānaham /
purāsitāṃgaśāpena hṛtajñānadhano'naghāḥ

ahaṃ purā tīrthayātrāṃ gatastattvavivitsayā /
tatrāneke mayā dṛṣṭā munayo dharmavittamāḥ

asitāṃgaṃ munimahaṃ gatavāñjñātumicchayā /
tadā provāca māṃ vipraḥ kṛpāṃ kṛtvā mamopari

yo'sāvayodhyādhipatiḥ sa parabrahmaśabditaḥ /
tasya yā jānakī devī sākṣātsā cinmayī smṛtā

enaṃ tu yoginaḥ sākṣādupāsate yamādibhiḥ /
dustarā pārasaṃsāravāridhiṃ saṃtitīrṣavaḥ

smṛtamātro mahāpāpahārī sa garuḍadhvajaḥ /
ya enaṃ sevate vidvānsa saṃsāraṃ tariṣyati

tadāhamahasaṃ vipraṃ ko'yaṃ rāmastu mānuṣaḥ /
keyaṃ sā jānakī devī harṣaśokasamākulā

ajanmanaḥ kathaṃ janma akartuḥ kṛtyamatra kim /
janmaduḥkhajarātītaṃ kathayasva mune mama

ityuktavaṃtaṃ māṃ kruddhaḥ śaśāpa sa munīśvaraḥ /
ajñātvā tatsvarūpaṃ tvaṃ pratibrūṣe mamādhama

enaṃ niṃdasi rāmaṃ tvaṃ mānuṣo'yamidaṃ hasan /
tasmāttvaṃ tattvasaṃmūḍho bhaviṣyasyudaraṃbhariḥ

tadāhaṃ tasya caraṇāvagṛhṇaṃ sadayā yutaḥ /
dṛṣṭvā me vinayaṃ māṃ tu prāvocatkaruṇānidhiḥ

tvaṃ rāmasya makhe vighnaṃ kariṣyasi yadā nṛpa /
tadā hanūmānaṃghriṃ tvāṃ tāḍayiṣyati vegataḥ

tadā tvaṃ jñāsyase rājannānyathā svamanīṣayā /
purāhamuktastenaivaṃ taddṛṣṭamadhunā mayā

yadā māṃ hanumānkruddhastāḍayāmāsa vakṣasi /
tadā'darśaṃ ramānāthaṃ pūrṇabrahmasvarūpiṇam

tasmādaśvaṃ tu śobhāḍhyamānayaṃtu mahābalāḥ /
dhanāni caiva vāsāṃsi rājyaṃ cedaṃ samarpaye

rāmaṃ dṛṣṭvā kṛtārthaḥ syāmahaṃ yajñeti puṇyade /
ānayaṃtu hayaṃ mahyaṃ rocate tu tadarpaṇam

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe subāhuparājayonāma aṣṭāviṃśatitamo'dhyāyaḥ