Padma Purana · Chapter 5.2

śeṣa uvāca/
atha taddarśanotkaṇṭhā vihvalīkṛtacetasā /
punaḥ punaḥ smṛto bhrātā bharato dhārmikāgraṇīḥ

uvāca ca hanūmaṃtaṃ balavaṃtaṃ samīrajam /
prasphuraddaśanavyāja candrakāṃtihatāṃdhakaḥ

śṛṇu vīra hanūmaṃstvaṃ madgiraṃ bhrātṛnoditām /
ciraṃtanaviyogena gadgadīkṛtavihvalām

gaccha taṃ bhrātaraṃ vīra samīraṇatanūdbhava /
madviyogakṛśāṃ yaṣṭiṃ vapuṣo bibhrataṃ haṭhāt

yo valkalaṃ parīdhatte jaṭāṃ dhatte śiroruhe /
phalānāṃ bhakṣaṇamapi na kuryādvirahāturaḥ

parastrī yasya māteva loṣṭavatkāṃcanaṃ punaḥ /
prajāḥ putrānivodrakṣedbāṃdhavo mama dharmavit

madviyogajaduḥkhāgnijvālādagdhakalevaram /
madāgamanasaṃdeśa payovṛṣṭyāśu siṃcatam

sītayā sahitaṃ rāmaṃ lakṣmaṇena samanvitam /
sugrīvādikapīṃdraiśca rakṣobhiḥ sabibhīṣaṇaiḥ

prāptaṃ nivedaya sukhātpuṣpakāsanasaṃsthitam /
yena me so'nujaḥ śīghraṃ sukhameti madāgamāt

iti śrutvā tato vākyaṃ raghuvīrasya dhīmataḥ /
jagāma bharatāvāsaṃ naṃdigrāmaṃ nideśakṛt

gatvā sa naṃdigrāmaṃ tu maṃtrivṛddhaiḥ susaṃyatam /
bharataṃ bhrātṛvirahaklinnaṃ dhīmāndadarśa ha

kathayaṃtaṃ maṃtrivṛddhānrāmacaṃdrakathānakam /
tadīya padāpāthoja makaraṃdasunirbharaḥ

namaścakāra bharataṃ dharmaṃ mūrtiyutaṃ kila /
vidhātrā sakalāṃśena sattvenaiva vinirmitam

taṃ dṛṣṭvā bharataḥ śīghraṃ pratyutthāya kṛtāṃjali /
svāgataṃ ceti hovāca rāmasya kuśalaṃ vada

ityevaṃ vadatastasya bhujo dakṣiṇato'sphurat /
hṛdayācca gataḥ śoko harṣāsraiḥ pūritānanaḥ

vilokya tādṛśaṃ bhūpaṃ pratyuvāca kapīśvaraḥ /
nikaṭe hi puraḥ prāptaṃ viddhi rāmaṃ salakṣmaṇam

rāmāgamanasaṃdeśāmṛtasiktakalevaraḥ /
prāpayaddharṣapūraṃ hi sahasrāsyo na vedmyaham

jagāda mama tannāsti yattubhyaṃ dīyate mayā /
dāso'smi janmaparyaṃtaṃ rāmasaṃdeśahārakaḥ

vasiṣṭho'pi gṛhītvārghyaṃ maṃtrivṛddhāḥ suharṣitāḥ /
jagmuste rāmacaṃdraṃ ca hanumaddarśitādhvanā

dṛṣṭvā dūrātsamāyāṃtaṃ rāmacaṃdraṃ manoramam /
puṣpakāsanamadhyasthaṃ sasītaṃ sahalakṣmaṇam

rāmo'pi dṛṣṭvā bharataṃ pādacāreṇa saṃgatam /
jaṭāvalkalakaupīna paridhānasamanvitam

amātyānbhrātṛveṣeṇa samaveṣāñjaṭādharān /
nityaṃ tapaḥ kliṣṭatayā kṛśarūpāndadarśa ha

rāmo'pi ciṃtayāmāsa dṛṣṭvā vai tādṛśaṃ nṛpam /
aho daśarathasyāyaṃ rājarājasya dhīmataḥ

putraḥ padātirāyāti jaṭāvalkalaveṣabhṛt /
na duḥkhaṃ tādṛśaṃ me'nyadvanamadhyagatasya hi

yādṛśaṃ madviyogena caitasya parivarttate /
aho paśyata me bhrātā prāṇātpriyatamaḥ sakhā

śrutvā māṃ nikaṭe prāptaṃ maṃtrivṛddhaiḥ suharṣitaiḥ /
draṣṭuṃ māṃ bharato'bhyeti vasiṣṭhena samanvitaḥ

iti bruvannarapatiḥ puṣpakānnabhasoṃ'gaṇāt /
bibhīṣaṇahanūmadbhyāṃ lakṣmaṇena kṛtādaraḥ

yānādavatatārāśu virahātklinnamānasaḥ /
bhrātarbhrātaḥ punarbhrātarbhrātarbhrātarvadanmuhuḥ

dṛṣṭvā samuttīrṇamimaṃ rāmacaṃdraṃ surairyutam /
bharato bhrātṛvirahaklinnaṃ dhīmāndadarśa ha /
harṣāśrūṇi pramuṃcaṃśca daṃḍavatpraṇanāma ha

raghunātho'pi taṃ dṛṣṭvā daṃḍavatpatitaṃ bhuvi /
utthāpya jagṛhe dorbhyāṃ harṣālokasamanvitaḥ

utthāpito'pi hi bhṛśaṃ nodatiṣṭhadrudanmuhuḥ /
rāmacaṃdrapadāṃbhojagrahaṇāsaktabāhubhṛt

bharata uvāca/
durācārasya duṣṭasya pāpino me kṛpāṃ kuru /
rāmacaṃdra mahābāho kāruṇyātkaruṇānidhe

yaste videhajā pāṇisparśaṃ krūramamanyata /
sa eva caraṇo rāma vane babhrāma matkṛte

ityuktvāśrumukho dīnaḥ parirabhya punaḥ punaḥ /
prāṃjaliḥ puratastasthau harṣavihvalitānanaḥ

raghunāthastamanujaṃ pariṣvajya kṛpānidhiḥ /
praṇamya ca mahāmaṃtrimukhyānāpṛcchya sādaram

bharatena samaṃ bhrātrā puṣpakāsanamāsthitaḥ /
sītāṃ dadarśa bharato bhrātṛpatnīmaniṃditām

anasūyāmivātreḥ kiṃ lopāmudrāṃ ghaṭodbhuvaḥ /
pativratāṃ janakajāmamanyatananāma ca

mātaḥ kṣamasva yadaghaṃ mayā kṛtamabuddhinā /
tvatsadṛśyaḥ patiparāḥ sarveṣāṃ sādhukārikāḥ

jānakyāpi mahābhāgā devaraṃ vīkṣya sādaram /
āśīrbhirabhiyujyātha samapṛcchadanāmayam

vimānavaramārūḍhāste sarve nabhasoṃ'gaṇe /
kṣaṇādālokayāṃcakre nikaṭe svapituḥ purīm

iti śrīpadmapurāṇe pātālakhaṃḍe rāmāśvamedhe śeṣavātsyāyanasaṃvāde rāmarājadhānīdarśanonāma dvitīyo'dhyāyaḥ