પદ્મ પુરાણ · અધ્યાય 5.18

બ્રાહ્મણ ઉવાચ।
રાજંસ્ત્વં શૃણુ યદ્વૃત્તં નીલે પર્વતસત્તમે ।
યચ્છ્રદ્દધાનાઃ પુરુષા યાંતિ બ્રહ્મ સનાતનમ્

મયા પર્યટતા તત્ર ગતં નીલાભિધે ગિરૌ ।
ગંગાસાગરતોયેન ક્ષાલિતપ્રાંગણે મુહુઃ

તત્ર ભિલ્લા મયા દૃષ્ટાઃ પર્વતાગ્રે ધનુર્ભૃતઃ ।
ચતુર્ભુજા મૂલફલૈર્ભક્ષ્યૈર્નિર્વાહિતક્લમાઃ

તદા મે મનસિ ક્ષિપ્રં સંશયઃ સુમહાનભૂત્ ।
ચતુર્ભુજાઃ કિમેતે વૈ ધનુર્બાણધરા નરાઃ

વૈકુંઠવાસિનાં રૂપં દૃશ્યતે વિજિતાત્મનામ્ ।
કથમેતૈરુપાલબ્ધં બ્રહ્માદ્યૈરપિ દુર્લ્લભમ્

શંખચક્રગદાશાર્ઙ્ગપદ્મોલ્લસિતપાણયઃ ।
વનમાલાપરીતાંગા વિષ્ણુભક્તા ઇવાંતિકે

સંશયાવિષ્ટચિત્તેન મયા પૃષ્ટં તદા નૃપ ।
યૂયં કે બત યુષ્માભિર્લબ્ધં ચાતુર્ભુજં કથમ્

તદા તૈર્બહુ હાસ્યં તુ કૃત્વા માં પ્રતિભાષિતમ્ ।
બ્રાહ્મણોઽયં ન જાનાતિ પિંડમાહાત્મ્યમદ્ભુતમ્

ઇતિ શ્રુત્વાઽવદં ચાહં કઃ પિંડઃ કસ્ય દીયતે ।
તન્મમ બ્રૂત ધર્મિષ્ઠાશ્ચતુર્ભુજશરીરિણઃ

તદા મદ્વાક્યમાકર્ણ્ય કથિતં તૈર્મહાત્મભિઃ ।
સર્વં તત્ર તુ યદ્વૃત્તં ચતુર્ભુજભવાદિકમ્

કિરાતા ઊચુઃ।
શૃણુ બ્રાહ્મણ વૃત્તાંતમસ્માકં પૃથુકઃ શિશુઃ ।
નિત્યં જંબૂફલાદીનિ ભક્ષયન્ક્રીડયા ચરન્

એકદા રમમાણસ્તુ ગિરિશૃંગં મનોરમમ્ ।
સમારુરોહ શિશુભિઃ સમંતાત્પરિવારિતઃ

તદા તત્ર દદર્શાહં દેવાયતનમદ્ભુતમ્ ।
ગારુત્મતાદિમણિભિઃ ખચિતં સ્વર્ણભિત્તિકમ્

સ્વકાંત્યાતિમિરશ્રેણીં દારયદ્રવિવદ્ભૃશમ્ ।
દૃષ્ટ્વા વિસ્મયમાપેદે કિમિદં કસ્ય વૈ ગૃહમ્

ગત્વા વિલોકયામીતિ કિમિદં મહતાં પદમ્ ।
ઇતિ સંચિંત્ય ગેહાંતર્જગામ બહુભાગ્યતઃ

દદર્શ તત્ર દેવેશં સુરાસુરનમસ્કૃતમ્ ।
કિરીટહારકેયૂરગ્રૈવેયાદ્યૈર્વિરાજિતમ્

મનોહરાવતંસૌ ચ ધારયંતં સુનિર્મલૌ ।
પાદપદ્મે તુલસિકા ગંધમત્તષડંઘ્રિકે

શંખચક્રગદાશાર્ઙ્ગ પદ્માદ્યૈર્મૂર્તિસંયુતૈઃ ।
ઉપાસિતાંઘ્રિં શ્રીમૂર્તિં નારદાદ્યૈઃ સુસેવિતમ્

કેચિદ્ગાયંતિ નૃત્યંતિ હસંતિ પરમાદ્ભુતમ્ ।
પ્રીણયંતિ મહારાજં સર્વલોકૈકવંદિતમ્

હરિં વીક્ષ્ય મદીયોર્ભસ્તત્ર સંજગ્મિવાન્મુને ।
દેવાસ્તત્ર વિધાયોચ્ચૈઃ પૂજાં ધૂપાદિસંયતામ્

નૈવેદ્યં શ્રીપ્રિયસ્યાર્થે કૃત્વા નીરાજનં તતઃ ।
જગ્મુઃ સ્વં સ્વં ગૃહં રાજન્કૃપાં પશ્યંત આદરાત્

મહાભાગ્યવશાત્તેન પ્રાપ્તં નૈવેદ્યસિક્થકમ્ ।
પતિતં બ્રહ્મદેવાદ્યૈર્દુર્લ્લભં સુરમાનુષૈઃ

તદ્ભક્ષણં ચ કૃત્વાથો શ્રીમૂર્તિમવલોક્ય ચ ।
ચતુર્ભુજત્વમાપ્તં વૈ પૃથુકેન સુશોભિના

તદાસ્માભિર્ગૃહં પ્રાપ્તો બાલકો વીક્ષિતો મુહુઃ ।
ચતુર્ભુજત્વં સંપ્રાપ્તઃ શંખચક્રાદિધારકઃ

અસ્માભિઃ પૃષ્ટમેતસ્ય કિમેતજ્જાતમદ્ભુતમ્ ।
તદા પ્રોવાચ નઃ સર્વાન્બાલકઃ પરમાદ્ભુતમ્

શિખરાગ્રે ગતઃ પૂર્વં તત્ર દૃષ્ટઃ સુરેશ્વરઃ ।
તત્ર નૈવેદ્યસિક્થં તુ મયા પ્રાપ્તં મનોહરમ્

તસ્ય ભક્ષણમાત્રેણ કારણેન તુ સાંપ્રતમ્ ।
ચતુર્ભુજત્વં સંપ્રાપ્તો વિસ્મયેન સમન્વિતઃ

તચ્છ્રુત્વા તુ વચસ્તસ્ય સદ્યઃ સંપ્રાપ્તવિસ્મયૈઃ ।
અસ્માભિરપ્યસૌ દૃષ્ટો દેવઃ પરમદુર્લ્લભઃ

અન્નાદિકં તત્ર ભુક્તં સર્વસ્વાદસમન્વિતમ્ ।
વયં ચતુર્ભુજા જાતા દેવસ્ય કૃપયા પુનઃ ।
ગત્વા ત્વમપિ દેવસ્ય દર્શનં કુરુ સત્તમ

ભુક્ત્વા તત્રાન્નસિક્થં તુ ભવ વિપ્ર ચતુર્ભુજઃ ।
ત્વયા પૃષ્ટં યદાશ્ચર્યં તદુક્તં વાડવર્ષભ

ઇતિ શ્રીપદ્મપુરાણે પાતાલખંડે શેષવાત્સ્યાયનસંવાદે રામાશ્વમેધે બ્રાહ્મણોપદેશોનામાષ્ટાદશોઽધ્યાયઃ