Padma Purana · Chapter 5.104

ṛṣaya ūcuḥ -
bhūyo vada mahābhāga rāmacāritramadbhutam /
rāmamāhātmyasarvasvaṃ bhaktānāṃ prītidāyakam

sūta uvāca-
aśvamedhaṃ kratuvaraṃ kṛtvā dāśarathiryathā

pravṛtto lokakṛtyeṣu śāstrakṛtyeṣu kovidaḥ /
ayodhyāṃ gaṃtukāmena śaṃkareṇa mahātmanā

pārvatyā saha devena uṣitaḥ sarayūtaṭe /
munayastaṃ samabhyetya śaṃkaraṃ viśvarūpiṇam

kaśyapādyā mahātmānaḥ papracchuramitaujasam /
svāgataṃ te muniśreṣṭha sabhāryaḥ kuta āgataḥ

kimāgamanakṛtyaṃ te kaṃ deśaṃ gaṃtumudyataḥ /
śaṃkara uvāca-
ahaṃ śaṃbhuriti khyāto vipro himagiristhitaḥ

draṣṭuṃ ca rāghavaṃ gacche mama kāryaṃ mahattataḥ /
māmāhvayati rājāsau purāṇaśravaṇe rataḥ

āgacchaṃtu bhavaṃto'pi rāghavaḥ parituṣyati /
tataste munayaḥ śaṃbhuryayū rāmadidṛkṣayā

tānāgatānvasiṣṭhastu jñātvā rāmāya coktavān /
tataḥ satvaramutthāya niryayau sa purohitaḥ

arghyapādyādikaissarvānpūjayāmāsa tānṛṣīn /
gṛharājaṃ tataḥ sarvānprāveśayadariṃdamaḥ

pratyekamāsanaṃ datvā svāgatoktyāsanasthitān /
krameṇa raghuśārdūlaḥ pūjayāmāsa tānṛṣīn

vācā madhurayā prīṇannidamāhāsanasthitān /
śrīrāma uvāca-
adya me saphalaṃ janma prāptamadya tapaḥ phalam

adyābhyāsasya vidyānāṃ phalakālo'yamāgataḥ /
adya me pitarastuṣṭā rājyaṃ ca saphalaṃ mama

adya me saphalaṃ vṛttamadya me saphalaṃ śrutam /
evaṃ vadaṃtaṃ rājānaṃ brāhmaṇāḥ kaśyapādayaḥ

ūcuḥ priyataraṃ vākyaṃ rāmaṃ rājīvalocanam /
ṛṣaya ūcuḥ
ayaṃ śaṃbhurdvijaḥ prāptaḥ sarvaśāstraviśāradaḥ

vedavedāṃgatattvajñaḥ sarvabhūtahite rataḥ /
kailāsavāsī satataṃ tapase kṛtaniścayaḥ

brahmaṇā brahmavarcaske tulyo brahmavidāṃ varaḥ /
hariṇā brahmavātsalye prasāde śaṃkaropamaḥ

evaṃvidho mahātejāḥ śaṃbhurbrāhmaṇapuṃgavaḥ /
aṣṭādaśapurāṇajño mīmāṃsā nyāyakovidaḥ

tvadbhāgyagauravādeva prāpto'yaṃ munisattamaḥ /
tvayāhūto munivaraḥ kailāsādāgataḥ prabho

ataḥ pṛccha mahābhāga purāṇākhyānamuttamam /
śrotukāmā vayaṃ prāptāstvāmadya raghunaṃdana

aṃtaṃ gatasya vedānāṃ sarvaśāstrārthavedinaḥ /
puṃso'śrutapurāṇasya na samyagyāti darśanam

sūta uvāca-
evamukto raghuśreṣṭho munibhistattvadarśibhiḥ /
praharṣamatulaṃ lebhe purāṇaśravaṇotsukaḥ

śrīrāma uvāca-
ligārcanaprakāraṃ ca liṃgamāhātmyameva ca /
maheśanāmamāhātmyaṃ pūjāmāhātmyameva ca

namaskārasya māhātmyaṃ dṛṣṭimāhātmyameva ca /
jaladānasya māhātmyaṃ dhūpadānasya sattama

dīpagaṃdhādidānasya puṣpamāhātmyameva ca /
nānākhyānetihāsānāṃ kathāṃ pāpapraṇāśinīm

dharmārthakāmamokṣāṃśca tadupāyāṃśca suvrata /
tatsarvaṃ śrotumicchāmi tvatto munivarottama

śaṃbhuruvāca-
rāmarāma mahābāho puṇyavānasi rāghava /
rājyāsaktasya te jātā purāṇaśravaṇe ratiḥ

syānmahatsevayā rāma puṇyatīrthaniṣevaṇāt /
sā jihvā yā śivaṃ gāyettaccittaṃ yattadarppitam

tāveva kevalau ślāghyau yau tatpūjākarau karau /
sujanmadehamatyarthaṃ tadevāśeṣajanmasu

yadevotpulakobhāsi hara nāmānukīrtanāt /
kṛtārtho'si mahārāja tatpraśnānugatā matiḥ

anaṃtaraṃ samājagmurjāṃghikāḥ satvaraśramāḥ /
tatkarātpatrikāṃ gṛhya papāṭha raghusattamaḥ

manasā'ciṃtayadrāmaḥ kathametadabhūditi /
rāmaṃ śaṃbhustadā prāha devyā brāhmaṇaveṣavān

kiṃ ciṃtayasi kākutstha muniṣvagre vasatsvapi /
tadvākyaṃ rāghavaḥ śrutvā papraccha munipuṃgavān

śrīrāmauvāca-
vibhīṣaṇaḥ kathamasau baddhaḥ śṛṃkhalayā nṛbhiḥ /
matsthāpitaṃ śivaṃ ligaṃ dṛṣṭvā rāmeśvaraṃ tvaho

drāviḍaiḥ kuṭilairduṣṭairātmanā tadvicāryatām /
vicārya munivaryāste neśāstajjñātumalpataḥ

na jānīma iti prāhū rāmaṃ rāmastadābravīt /
purāṇaṃ vīkṣya vidhinā tatsarvaṃ brūta sattamāḥ

bhavadajñānahetuśca vicāryastadanaṃtaram /
kiṃ kiṃ purāṇaṃ prekṣyaṃ syādvarjanīyaṃ tathaiva kim

praśastaḥ kīdṛśaḥ ślokastadanyaḥ kīdṛśo bhavet /
kīdṛśeṣu ca kāryeṣu kīdṛśaḥ pūjakastathā

pūjā ca kīdṛśairbhaktaiḥ kāryā nirṇayadarśane /
iti rāmasya vacanaṃ śrutvā te dvijasattamāḥ

pratyūcustaṃ raghuśreṣṭhaṃ ciṃtāvyākulamānasam /
na vaktāro varaṃ rāma vīkṣatāṃ tu purāṇavit

tacchrutvā rāghavaḥ śaṃbhuṃ papraccha vinayānvitaḥ /
sopi tadvākyamākarṇya pratyuvāca mahāmatiḥ

śaṃbhuruvāca-
purāṇajīvī pūjārhaḥ svaśākhādhyayanaḥ śuciḥ /
mīmāṃsātattvavijñānaḥ śrotriyo'nṛtadūṣakaḥ

deveṣu ca samasteṣu samadṛṣṭiḥ śive rataḥ /
śatarudriyajāpī ca sāgnikaścātivācakaḥ

yajurvedī viśeṣeṇa pūjayetpustakaṃ sudhīḥ /
śrītālapatralikhitaṃ devalipyanvitaṃ śubham

baṃdhādyatiprapaṃcaṃ yadyugapatpraṇavākṣaram /
prāgūrddhvaṃrekhayoḥ prāṃte praṇavasyāgrayojikā

rekhā bhavedevamekā akārastasya pārśvataḥ /
śirobhāgamupakramya sakoṇādhaḥ pralaṃbinī

ākāraḥ sa hi vijñeyaḥ paṭṭikādakṣarekhayā /
vāme ṣaḍvakrabiṃdūdvā vikāra iti kīrtitaḥ

tasya vāmaśirorekhā laṃbinyā ī udāhṛtaḥ /
sarvākṣare śirorekhā avakrā praṇavaṃ vinā

tasyāṃ tu laṃbarekhānyā tadaṃte ca lavitravat /
ukāraḥ sa hi vikhyāto lavitradvayatastadū

evamanyāni sarvāṇi akṣarāṇyāha bhāratī /
lipyānayaiva likhitaṃ purāṇaṃ tu praśasyaste

brāhmaṃ pādmaṃ vaiṣṇavaṃ ca mārtaṃḍaṃ nāraderitam /
mārkaṃḍeyamathāgneyaṃ kaurmaṃ vāmanameva ca

gāruḍaṃ laiṃgamākhyātaṃ skāṃdaṃ mātsyaṃ nṛsiṃhakam /
tathaiva gaditaṃ rāma purāṇaṃ kāpilaṃ tathā

vārāhaṃ brahmavaivartaṃ śakuneṣu praśasyate /
śaivaṃ bhāgavataṃ daurgaṃ bhaviṣyottarameva ca

bhaviṣyaṃ copasaṃjñāni tvanyāni ca vivarjayet /
vimucya pustakaṃ ratnapīṭhe nikṣipya saṃskṛtam

dhautavastradharaḥ snātvā śucirakrodhano'jvaraḥ /
ādāvātmānamabhyarcya kṛtvā saṃkalpameva ca

aṃkuśaṃ cākṣasūtraṃ ca pāśaṃ pustakameva ca /
dhārayaṃtīṃ sitāṃ dhyāyetprasannāsyāṃ sarasvatīm

gokṣīrasadṛśākāraṃ trinetraṃ vṛṣavāhanam /
sahāsavadanaṃ śāṃtaṃ śuklāṃbaradharaṃ śivam

hariṇaṃ cābhayaṃ corddhvabāhuyugmaṃ kirīṭinam /
vyākhyāmudrā caṃ dakṣedho vāmahaste varapradam

nānāratnavibhūṣāḍhyaṃ girijārddhāṃbujāsanam /
bahubhirmunimukhyaistu dhyāyamāna padāṃbujam

mūrtimadbhistathā vedaiḥ stūyamānaṃ purāṇakaiḥ /
anyaiḥ samastalokaiśca saṃsevitapadāṃbujam

dhyātvaivaṃ pūjakaḥ samyagādau pūjāṃ samārabhet /
āpo vā idamityetatkalaśasyābhimaṃtraṇam

tajjalaṃ ca gṛhītvā ca pātrasthamabhimaṃtrayet /
tatsadbrahmeti maṃtreṇa praśasya praṇavena tu

ātmānaṃ sarvapātrāṇi tata āvāhayediti /
yadvāgiti tṛcenaiva bhāratī ṣoḍaśārcanam

puruṣasūktena vā kuryādgāyatryā vā samarcayet /
ॐ namo bhagavate amuka purāṇeti purāṇamarcayet

kāṃḍāditi hi maṃtreṇa dūrvāmānīya pūjayet /
ॐ namo bhagavatyai dūrvāyai iti

salokapāla pūjā syādatha kanyā samarcanam /
vatsarātpaṃcakādūrddhvaṃ daśavarṣādadhaḥ śubhāḥ

anutpannaṛturvāpi tāṃ prayatnena pūjayet /
gaṃdhapuṣpākṣatairdhūpairdīpatāṃbūlabhūṣaṇaiḥ

pāṭhayedapyamuṃ maṃtraṃ pūjakaḥ kanyakāmimām

satyaṃ brūhi priyaṃ brūhi bhagavati sarasvati namaste namasta iti

gāyatryānukramārthāttu dūrvāyugmaṃ tu kārayet /
sannidhau pustakasyādhaḥ sahasraparametyṛcā

dūrvāyugmatrayaṃ dadyāttasyā haste vicakṣaṇaḥ /
sā prakṣipetpustasaṃdhau śalākātrayamanvanu

visṛjyatāṃ punardadyācchivābhyāṃ nama ityatha /
patrayormadhyamaḥ ślokaḥ kāryasiddherhi sūcakaḥ

pūrvapatre samāptiḥ syācchlokasya yadi rāghava /
parapatre paṭhecchlokaṃ vivicyārthamudīrayet

śanaiḥśanaiḥ paṭhetprājño vyākhyāsecca śanaiḥśanaiḥ /
tvareha na hi kartavyā kupyati tvarayā tu gīḥ

ghaṭikāyāstu pādaḥ syādatvarāsyāttatodhikā /
tvarayenna ca vaktāraṃ jñātavyāṃśamanudvijam

vivicya pāṭhaṃ ślokasya niścityārthaṃ ca mānase /
pratīpaṃ tanna vaktavyaṃ vivicya raghunaṃdana

yadi yuktamayuktaṃ vā ślokamanyaṃ paṭhedasau /
pustakasthaṃ ca hitvaiva pūjakaḥ sa dvijo yadi

tattathaiva hi vijñeyaṃ visaṃvādo na śasyate /
daivāgato hi sa śloko daivaṃ hi balavattaram

upaśrutiṣu yadvacca nāparādho dvijasya tu /
vismayo na ca kartavyo daivasya kuṭilā gatiḥ

yattatpadaviparyāse patre coparivāriṇi /
tamādeśaṃ tiraskṛtya dvitīyaṃ tu paṭhedataḥ

tatastṛtīyaṃ pāṭhyaṃ syāttataḥ kāryaṃ vivecanam /
avisargāṃtapūrvāste pavargetarapaṃcamāḥ

stutiliḍvarjitaḥ ślokaḥ śakuneṣu praśasyate /
adhyāyādiḥ samāptiśca vṛthā patraṃ vṛthā lipiḥ

uktānuvacanaṃ caiva dvyupastutamathaiva ca /
dagdhapatraṃ naṣṭalipiḥ saṃdigdhākṣarameva ca

etāni śakune nityaṃ varjanīyāni paṃḍitaiḥ /
praśno hi dvividho jñeyo dīptaśāṃta prabhedataḥ

śāṃtaṃ ca dvividhaṃ jñeyamutpattisthitivṛddhitaḥ /
tatra śāṃtaṃ praśastaṃ syāllakṣitaṃ pūrvalakṣaṇaiḥ

kāryabhedāstu varṇyaṃte kecinmartyopayoginaḥ /
kasyacitkāryamādāya kaścitpraṣṭā bhavatyapi

sa karoti tadā praśnaṃ sametya smarate'tra kim /
sa punardhārya patraṃ tattasminpatraṃ praśasyate

athavā tatkṣamopetaṃ vairāgyaṃ parameva ca /
yataḥ kutaściddṛṣṭastu stutipādakameva ca

parihṛtya paraṃ cāpi tasminnarthe śubhāvaham /
mṛto gṛhṇāti vāgarthamiti praśno'śubhapradaḥ

vivāde vijayapraśne jayadyotakamiṣyate /
sṛṣṭirapyatra śastā syātkrūrāyāṃ kleśato jayaḥ

praśāṃtāyāmupāyaistu miśrāyāṃ viḍvaro bhavet /
purādivarṇanaṃ yattu madhyamaṃ yadi cottamam

kalisaṃbhāvanāyāstu śṛṃgārasyopavarṇane /
rājyanirvāhaciṃtāyāṃ rājyaliṃgaṃśubhāvaham

yasyāpi yādṛśaṃ yogyaṃ vicārya tādṛśaṃ budhaiḥ /
stutivairāgyayoḥ kāryaṃ vilayaḥ parikīrtitaḥ

kāryālpasiddhiḥ skhalitena ca nirvāhamṛcchati /
tasyānyārthasyānyabhāvo rāma śāṃtivicāraṇe

visargāṃtaśca pūrvārddha viparyāso bhaviṣyataḥ /
saṃkalpitānyathābhāvo hyadhyāyasya samāpane

kāṃḍādestu samāptau tu syāttatkāryavināśanam /
tasmādetādṛśe doṣe śakunasya viparyayaḥ

kṣute pustakapāte ca tvāhate mastakādiṣu /
vaktā vaimānanaṃ yāti tataḥ śakunanāśanam

tasmādetādṛśe doṣe śakunaṃ parivarjayet /
upamāyāṃ bhavedrāma kāryābhāso na vastutaḥ

saṃtānaṃ bhonyatra coktā sṛṣṭirmadhyaphalapradā /
stutiḥ praśastā kutrāpi guṇavatkāryanirṇaye

vivāhe cauṣadhe dāne vyavahāre kṛṣau tathā /
yathārthā ca stutī rāma nirvāhe'pi na dūṣaṇam