Padma Purana · Verses 4.3-2

śaunaka uvāca-
kārttikasya ca māhātmyaṃ brūhi sūta mamāgrataḥ /
tadvratasya phalaṃ kiṃ vā doṣaṃ kiṃ tadakurvataḥ

sūta uvāca-
puraikadā muniśreṣṭha vyāsaṃ satyavatīsutam /
jaiminiḥ pṛṣṭavānetadārebhe kathitaṃ muniḥ

vyāsa uvāca-
tilatailaṃ maithunaṃ yaḥ śubhade kārttike tyajet /
bahujanmakṛtaiḥpāpairmukto yāti harergṛham

matsyaṃ ca maithunaṃ yo vai kārttike na parityajet /
pratijanmani saṃmūḍhaḥ śūkaraśca bhaveddhruvam

kārttike tulasīpatraiḥ pūjayedvai janārdanam /
patrepatre'śvamedhasya phalaṃ prāpnoti mānavaḥ

kārttike munipuṣpairyaḥ pūjayenmadhusūdanam /
devānāṃ durlabhaṃ mokṣaṃ prāpnoti kṛpayā hareḥ

kārttike muniśākaṃ vai yo'śnāti ca narottamaḥ /
saṃvatsarakṛtaṃ pāpaṃ śākenaikena naśyati

phalaṃ tasya naro'śnāti corje yo vai haripriye /
pradattvā tu harerbrahmanvṛjinaṃ koṭijanmajam

surasaṃ sarpiṣāyuktaṃ dadyādyo harayepi ca /
sarvapāpairvinirmuktaḥ sa gaccheddharimaṃdiram

kārtike yo naro dadyādekapadmaṃ harāvapi /
aṃte viṣṇupadaṃ gacchetsarvapāpavivarjitaḥ

prātaḥsnānaṃ naro yo vai kārtike śrīharipriye /
karotisarvatīrtheṣuyatsnātvātatphalaṃlabhet

kārtike yo naro dadyātpradīpaṃ nabhasi dvijaḥ /
viprahatyādibhiḥ pāpairmukto gaccheddharergṛham

muhūrtamapi yo dadyātkārttike prītaye hareḥ /
dīpaṃ nabhasi viprendra tasmiṃstuṣṭaḥ sadā hariḥ

yo dadyācca gṛhe dīpaṃ kṛṣṇasya saghṛtaṃ dvijaḥ /
kārtike cāśvamedhasya phalaṃ syādvai dinedine

pradīpasya ca māhātmyaṃ viśeṣamucyate mayā /
niśāmaya dvijaśreṣṭha setihāsaṃ samāhitaḥ

pūrvaṃ tretāyuge vipro vaikuṃṭho nāmataḥ śuciḥ /
yasya saṃgaprabhāveṇa mukto bhavati pātakī

ekadā kārtike so'pi pradīpaṃ purato hareḥ /
datvā gṛhaṃ gato vipro ghṛtapūrṇaṃ dvijarṣabhaḥ

sarpistatsvāditu cākhurāgato'pi pradīpataḥ /
yāvatkhāditumārebhe bodhito'sau pradīpakaḥ

mūṣako'gnibhayāttatra vegenāpi palāyitaḥ /
ākhośca sakalaṃ pāpaṃ vinaṣṭaṃ kṛpayā hareḥ

sarpeṇa daṃśitaścākhuḥ prāṇatyāgaṃ cakāra ha /
tato yamājñayā dūtāḥ pāśamudgarapāṇayaḥ

āgatāstaṃ samānetuṃ babaṃdhuścarmarajjubhiḥ /
yāvannetuṃ manaścakruḥ śaṃkhacakragadādharāḥ

āgatā garuḍārūḍhā viṣṇudūtāścaturbhujāḥ /
vimānaṃ gagane caiva rājahaṃsayutaṃ śubham

nirmitaṃ kanakaiḥ śuddhaiḥ kāmagaṃ kṛpayā hareḥ /
pāśaṃ chitvā tato dūtāḥ procuste yamakiṃkarān

viṣṇubhakto'pyasau mūḍhā vyarthaṃ tu baṃdhanaṃ kṛtam /
gacchadhvaṃ śamanapreṣyā yadi vāṃchāsti jīvitum

śrutvā prakaṃpitāste vai pṛcchaṃti vinayānvitāḥ /
kena puṇyaprabhāveṇa yuṣmābhirnīyate puram

asau viṣṇormahāpāpī yūyaṃ tadvaktumarhatha /
viṣṇudūtā ūcuḥ-
purato vāsudevasya pradīpabodhanaṃ kṛtam

tenaiva karmaṇā dūtā nayāmo viṣṇumaṃdiram /
anicchayāpi yaḥ kuryādviṣṇordīpasya bodhanam

koṭijanmārjitaṃ pāpaṃ tyaktvā yāti harergṛham /
bhaktyā pradīpaṃ yo dadyātkārtike tu harerdinaiḥ

tasya puṇyaṃ samākhyātuṃ na śakto hariṇā vinā /
ghṛtapūrṇapradīpaṃ yo bhaktyā dadyāddharergṛhe

aśvamedhasahasreṇa tasya kiṃ vā prayojanam /
aśvamedhaprakartā yaḥ svargaṃ yāti harerdine

kārtike dīpadātā ca sa gaccheddharimaṃdiram /
vyāsa uvāca-
iti śrutvā tato dūtā gatāste vai yathāgatāḥ

viṣṇudūtā rathe kṛtvā gatāstaṃ viṣṇumaṃdiram /
viṣṇusānnidhya evāsya manvaṃtaraśataṃ gatam

tato martye rājakanyā babhūva kṛpayā hareḥ /
putrapautrasamāyuktā ciraṃ bhogaṃ cakāra sā

itaḥ punargatā sā tu golokaṃ harisevayā /
sūta uvāca-
bhaktyā śṛṇoti yo martyo dīpamāhātmyamuttamam

sarvapāpavinirmuktaḥ sa yāti viṣṇumaṃdiram

iti śrīpādme mahāpurāṇe brahmakhaṃḍe dīpadānamāhātmyaṃ/
nāma tṛtīyo'dhyāyaḥ