Padma Purana · Chapter 4.21

śaunaka uvāca/
kathayasva mune sūta sarvamāsottamasya ca /
kārtikasya vidhiṃ samyaṅniyamānvaktumarhasi

sūta uvāca/
āśvinasya dvijaśreṣṭha paurṇamāsyāṃ samāhitaḥ /
kārtikasya vrataṃ kuryādyāvadudbodhinī bhavet

divā vipra naraḥ kuryānmalamūtramudaṅmukhaḥ /
bhavenmaunī ca sarvajña rātrau ceddakṣiṇāmukhaḥ

pathyaṃbhasi ca goṣṭheṣu śmaśāne valmike dvija /
kuryādutsarjanaṃ naiva vratī mūtrapurīṣayoḥ

atyuttameṣu sthāneṣu malamūtraṃ na kārayet /
śuddhāṃ mṛdaṃ gṛhītvātha vāmaṃ prakṣālayetkaram

adbhirmṛdāpi śuddhyarthaṃ pūrvaṃ viṃśatisaṃkhyayā /
ekā liṃge gude paṃca tathā vāmakare daśa

ubhayordaśa dātavyā pādayośca tribhistribhiḥ /
mukhaśuddhiṃ tataḥ kuryyātsaṃkalpaṃ snapanasya ca

hṛdi dāmodaraṃ dhyātvā imaṃ maṃtraṃ tato vadet /
kārtikehaṃ kariṣyāmi prātaḥsnānaṃ janārddana

dāmodarasya prītyarthaṃ rādhayā pāpanāśanaṃ /
namaḥ paṃkajanābhāya śrīkṛṣṇajalaśāyine

namaste rādhayā sārddhaṃ gṛhāṇārghaṃ prasīda me /
snānaṃ kuryyāttato vipra tilakaṃ tu yathāvidhi

ūrdhvapuṃḍravihīnastu kiṃcitkarmakaroti yaḥ /
niṣphalaṃ karma tatsarvaṃ satyametanmayocyate

yaccharīraṃ manuṣyāṇāmūrdhvapuṃḍraṃ vinā kṛtam /
taddarśanaṃ na kartavyaṃ dṛṣṭvā sūryaṃ nirīkṣayet

ūrdhvapuṃḍraṃ mṛdā śubhraṃ lalāṭe yasya dṛśyate /
cāṃḍālo'pi viśuddhātmā pūjya eva na saṃśayaḥ /
acchidramūrdhvapuṃḍraṃ tu ye kurvaṃti narādhamāḥ

teṣāṃ lalāṭe satataṃ śunaḥpādo na saṃśayaḥ /
prātaḥkāloditaṃ karmma samāpya harivallabhām

pūjayedbhaktito vipra tulasīṃ pāpanāśinīm /
paurāṇīṃ tu kathāṃ śrutvā śrīhareḥ sthiramānasaḥ

tato vipraṃ vratī bhaktyā pūjayettaṃ yathāvidhi /
parāsanaṃ parānnaṃ ca paraśayyāṃ parāṃganām

sarvadā varjayedvipra kārttike ca viśeṣataḥ /
sauvīrakaṃ tathā māṣānāmiṣaṃ ca tathā madhu

rājamāṣādikaṃ nityaṃ varjayetkārtike vratī /
jaṃbīramāmiṣaṃ cūrṇamannaṃ paryyuṣitaṃ dvija

dhānye masūrikā proktā gavāṃ dugdhamanāmiṣam /
lavaṇaṃ bhūmijaṃ vipra prāṇyaṅgamāmiṣaṃ khalu

dvijakrītā rasāḥ sarve jalaṃ cālpasaraḥ sthitam /
brahmacaryaṃ turyakāle patrāvalyāṃ ca bhojanam

kuryādvai dvijaśārdūla tailābhyaṃgaṃ ca varjayet /
chatrākaṃ nālikaṃ hiṃguṃ palāṃḍuṃ pūtikādalam

laśunaṃ mūlakaṃ śigruṃ tathaiva tuṃbikāphalam /
kapitthaṃ caiva vṛṃtākaṃ kūṣmāṃḍaṃ kāṃsyabhojanam

dvipācitaṃ sūtikānnaṃ matsyaṃ śayyāṃ rajasvalām /
dvistriścānnaṃ striyaḥ saṃgaṃ varjayetkārtikavratī

dhātrīphalaṃ gṛhī vipra ravau tatsarvadā tyajet /
kūṣmāṃḍe dhanahāniḥ syātbṛhatyāṃ na smareddharim

paṭole tu na vṛddhiḥ syādbalahāniśca mūlake /
kalaṃkī jāyate bilve tiryagyoniśca niṃbuke

tāle śarīranāśaḥ syānnārikele ca mūrkhatā /
tuṃbī gomāṃsatulyā syādgovadhaṃ syātkaliṃdake

śiṃbī pāpakarā proktā pūtikā brahmaghātikā /
vārtākyāṃ sutanāśaḥ syāccirarogī ca māṣake

māṃse ca bahupāpaṃ syādvarjayetpratipadādiṣu /
yatkiṃcidvarjayedyo'nnaṃ śrīhare prītaye dvija

tatpunarbhūsure datvā vratāṃte tasya bhojanam /
kārtikavratinaṃ vipra yathoktakāriṇaṃ naram

yamadūtāḥ palāyaṃte siṃhaṃ dṛṣṭvā yathā gajāḥ /
śreṣṭhaṃ viṣṇuvrataṃ vipra tattulyā na śataṃ makhāḥ

kṛtvā kratuṃ vrajetsvargaṃ vaikuṃṭhaṃ kārtikavratī /
yatkiṃcidduṣkṛtaṃ vipra manovākkāyakarmajam

dṛṣṭvā tu vilayaṃ yāti kārtikavratinaṃ kṣaṇāt /
kārttikavratinaḥ puṇyaṃ brahmā caiva caturmukhaḥ

na samartho bhavedvaktuṃ yathoktavratakāriṇaḥ /
yatkṛtvā kaluṣaṃ sarvaṃ vrajedvipra daśo diśaḥ

kva gacchāmi kva tiṣṭhāmi kārttikavratino bhayāt /
paurṇamāsyāṃ yathāśakti cānnavastrādikaṃ dvija

dadyādvai śrīhareḥ prītyai brāhmaṇānapi bhojayet /
rātrau jāgaraṇaṃ kuryānnṛtyagītādibhirvratī /
ya idaṃ śṛṇuyādbhaktyā tasya pāpaṃ praṇaśyati

iti śrīpādme mahāpurāṇe sūtaśaunakasaṃvāde brahmakhaṃḍe ekaviṃśo'dhyāyaḥ