Padma Purana · Chapter 4.17

śaunaka uvāca/
viṣṇupādodakasyāpi māhātmyaṃ pāpanāśanam /
kathayasva mahāprājña samūlaṃ me kṛpārṇava

sūta uvāca/
samastapātakadhvaṃsi viṣṇupādodakaṃ śubham /
kaṇamātraṃ vahedyastu sarvatīrthaphalaṃ labhet

viṣṇupādodakaṃ brahmansparśataḥ pāpanāśanam /
akālamaraṇaṃ nāsti gaṃgāsnānaphalaṃ labhet

viṣṇupādodakaṃ pāpī yaḥ pibettasya kilbiṣam /
śarīrasthaṃ kṣayaṃ yāti kṛtaṃ brahmanna saṃśayaḥ

tulasīparṇasaṃyuktaṃ viṣṇupādodakaṃ dvija /
yo vahecchirasā bhaktyā cāṃte yāti harergṛham

merutulyasuvarṇāni dattvā yatphalamāpyate /
haripādodakaṃ spṛṣṭvā prāpyate tatphalaṃ naraiḥ

dhenukoṭisahasrāṇi yatphalaṃ labhate naraiḥ /
datvā pādodakaṃ spṛṣṭvā tatphalaṃ prāpyate dhruvam

yajñakoṭisahasrāṇi kṛtvā yatphalamāpyate /
haripādodakaṃ spṛṣṭvā tasmātkoṭiguṇaṃ naraiḥ

koṭikanyāpradānena yatphalaṃ labhyate janaiḥ /
viṣṇupādodakaṃ spṛṣṭvā phalaṃ tasmāddvijādhikam

daṃtikoṭipradānena saptikoṭipradānataḥ /
yatphalaṃ labhate martyaḥ spṛṣṭvā pādodakaṃ hareḥ

datvā martyaḥ saptadvīpāṃ sasasyāṃ yatphalaṃ labhet /
viṣṇupādodakaṃ spṛṣṭvā tasmādviprādhikaṃ labhet

śṛṇu vipra pravakṣyāmi saṃkṣepeṇādhikaṃ kimu /
viṣṇupādodakaṃ spṛṣṭvā pāpī yāti harergṛham

śaunaka uvāca/
spṛṣṭvā pītvā purā kena prāṇinā prāpi vai gṛham /
kathayasva hareḥ sūta mama tvaṃ cānukaṃpayā

sūta uvāca/
purā tretāyuge pāpī nāmnā vipraḥ sudarśanaḥ /
janārddanadine nityamaśnīyātsa dvijottama

śāstraniṃdākaro nityaṃ vrataniṃdākaraḥ sadā /
asāvanyaṃ na jānāti kevalaṃ svodaraṃ vinā

ekadā prāptakālastu nidhanaṃ prāptavāndvija /
yamadūtāḥ samāyātā baddhvā nīto yamālayam

taṃ dṛṣṭvā yamunābhrātā papraccha sacivaṃ ruṣā /
bho'mātya cāsya yatpuṇyaṃ pāpaṃ vada samūlataḥ

asau vipro mahāpāpī krūrakarmmeva dṛśyate

citragupta uvāca/
ākarṇaya cāsya pāpaṃ puṇyaṃ nāstyaṇumātrakam /
vāsare'pi harernityamakarodbhojanaṃ vibho

vāsare kamalābhartuścāśnīyādyo narādhamaḥ /
purīṣaṃ so'śnīyādrājannirayaṃ yāti dāruṇam

manvaṃtaraśataṃ dehi sthānaṃ tu niraye'pyamum /
grāmakroḍasya yonau hi tato janma bhaviṣyati

sūta uvāca/
yamājñayā tato vipra tasya dūtairbhayaṃkaraiḥ /
pātitastu purīṣe vai manvaṃtaraśatādhikam

tato mukto'bhavaccāsau pṛthivyāṃ grāmasūkaraḥ /
ciraṃ narakamaśnīyāddharivāsarabhojanāt

tato vipra prāptakālaḥ paṃcatvaṃ sa jagāma ha /
kākayonau punarjanma lebhe'sau viḍbhujaḥ sadā

ekasmindivase vipra śrīhareścaraṇodakam /
dvāradeśesthitaṃ pītvā sarvapāpavivarjitaḥ

tasminneva dine kākaḥ patitaḥ śabarasya ca /
kāle mṛtyudaśāṃ prāpto vyādhena vāyasopi ca

āgate syaṃdane divye rājahaṃsayute śubhe /
āruhya balibhugvipra yayau sa harimaṃdiram

pādodakasya māhātmyaṃ kathitaṃ pāpanāśanam /
yaḥ śṛṇoti naraḥ pāpī tasya pāpaṃ vinaśyati

iti śrīpādme mahāpurāṇe brahmakhaṃḍe sūtaśaunakasaṃvāde caraṇodakamāhātmye saptadaśo'dhyāyaḥ