પદ્મ પુરાણ · અધ્યાય 4.17

શૌનક ઉવાચ।
વિષ્ણુપાદોદકસ્યાપિ માહાત્મ્યં પાપનાશનમ્ ।
કથયસ્વ મહાપ્રાજ્ઞ સમૂલં મે કૃપાર્ણવ

સૂત ઉવાચ।
સમસ્તપાતકધ્વંસિ વિષ્ણુપાદોદકં શુભમ્ ।
કણમાત્રં વહેદ્યસ્તુ સર્વતીર્થફલં લભેત્

વિષ્ણુપાદોદકં બ્રહ્મન્સ્પર્શતઃ પાપનાશનમ્ ।
અકાલમરણં નાસ્તિ ગંગાસ્નાનફલં લભેત્

વિષ્ણુપાદોદકં પાપી યઃ પિબેત્તસ્ય કિલ્બિષમ્ ।
શરીરસ્થં ક્ષયં યાતિ કૃતં બ્રહ્મન્ન સંશયઃ

તુલસીપર્ણસંયુક્તં વિષ્ણુપાદોદકં દ્વિજ ।
યો વહેચ્છિરસા ભક્ત્યા ચાંતે યાતિ હરેર્ગૃહમ્

મેરુતુલ્યસુવર્ણાનિ દત્ત્વા યત્ફલમાપ્યતે ।
હરિપાદોદકં સ્પૃષ્ટ્વા પ્રાપ્યતે તત્ફલં નરૈઃ

ધેનુકોટિસહસ્રાણિ યત્ફલં લભતે નરૈઃ ।
દત્વા પાદોદકં સ્પૃષ્ટ્વા તત્ફલં પ્રાપ્યતે ધ્રુવમ્

યજ્ઞકોટિસહસ્રાણિ કૃત્વા યત્ફલમાપ્યતે ।
હરિપાદોદકં સ્પૃષ્ટ્વા તસ્માત્કોટિગુણં નરૈઃ

કોટિકન્યાપ્રદાનેન યત્ફલં લભ્યતે જનૈઃ ।
વિષ્ણુપાદોદકં સ્પૃષ્ટ્વા ફલં તસ્માદ્દ્વિજાધિકમ્

દંતિકોટિપ્રદાનેન સપ્તિકોટિપ્રદાનતઃ ।
યત્ફલં લભતે મર્ત્યઃ સ્પૃષ્ટ્વા પાદોદકં હરેઃ

દત્વા મર્ત્યઃ સપ્તદ્વીપાં સસસ્યાં યત્ફલં લભેત્ ।
વિષ્ણુપાદોદકં સ્પૃષ્ટ્વા તસ્માદ્વિપ્રાધિકં લભેત્

શૃણુ વિપ્ર પ્રવક્ષ્યામિ સંક્ષેપેણાધિકં કિમુ ।
વિષ્ણુપાદોદકં સ્પૃષ્ટ્વા પાપી યાતિ હરેર્ગૃહમ્

શૌનક ઉવાચ।
સ્પૃષ્ટ્વા પીત્વા પુરા કેન પ્રાણિના પ્રાપિ વૈ ગૃહમ્ ।
કથયસ્વ હરેઃ સૂત મમ ત્વં ચાનુકંપયા

સૂત ઉવાચ।
પુરા ત્રેતાયુગે પાપી નામ્ના વિપ્રઃ સુદર્શનઃ ।
જનાર્દ્દનદિને નિત્યમશ્નીયાત્સ દ્વિજોત્તમ

શાસ્ત્રનિંદાકરો નિત્યં વ્રતનિંદાકરઃ સદા ।
અસાવન્યં ન જાનાતિ કેવલં સ્વોદરં વિના

એકદા પ્રાપ્તકાલસ્તુ નિધનં પ્રાપ્તવાન્દ્વિજ ।
યમદૂતાઃ સમાયાતા બદ્ધ્વા નીતો યમાલયમ્

તં દૃષ્ટ્વા યમુનાભ્રાતા પપ્રચ્છ સચિવં રુષા ।
ભોઽમાત્ય ચાસ્ય યત્પુણ્યં પાપં વદ સમૂલતઃ

અસૌ વિપ્રો મહાપાપી ક્રૂરકર્મ્મેવ દૃશ્યતે

ચિત્રગુપ્ત ઉવાચ।
આકર્ણય ચાસ્ય પાપં પુણ્યં નાસ્ત્યણુમાત્રકમ્ ।
વાસરેઽપિ હરેર્નિત્યમકરોદ્ભોજનં વિભો

વાસરે કમલાભર્તુશ્ચાશ્નીયાદ્યો નરાધમઃ ।
પુરીષં સોઽશ્નીયાદ્રાજન્નિરયં યાતિ દારુણમ્

મન્વંતરશતં દેહિ સ્થાનં તુ નિરયેઽપ્યમુમ્ ।
ગ્રામક્રોડસ્ય યોનૌ હિ તતો જન્મ ભવિષ્યતિ

સૂત ઉવાચ।
યમાજ્ઞયા તતો વિપ્ર તસ્ય દૂતૈર્ભયંકરૈઃ ।
પાતિતસ્તુ પુરીષે વૈ મન્વંતરશતાધિકમ્

તતો મુક્તોઽભવચ્ચાસૌ પૃથિવ્યાં ગ્રામસૂકરઃ ।
ચિરં નરકમશ્નીયાદ્ધરિવાસરભોજનાત્

તતો વિપ્ર પ્રાપ્તકાલઃ પંચત્વં સ જગામ હ ।
કાકયોનૌ પુનર્જન્મ લેભેઽસૌ વિડ્ભુજઃ સદા

એકસ્મિન્દિવસે વિપ્ર શ્રીહરેશ્ચરણોદકમ્ ।
દ્વારદેશેસ્થિતં પીત્વા સર્વપાપવિવર્જિતઃ

તસ્મિન્નેવ દિને કાકઃ પતિતઃ શબરસ્ય ચ ।
કાલે મૃત્યુદશાં પ્રાપ્તો વ્યાધેન વાયસોપિ ચ

આગતે સ્યંદને દિવ્યે રાજહંસયુતે શુભે ।
આરુહ્ય બલિભુગ્વિપ્ર યયૌ સ હરિમંદિરમ્

પાદોદકસ્ય માહાત્મ્યં કથિતં પાપનાશનમ્ ।
યઃ શૃણોતિ નરઃ પાપી તસ્ય પાપં વિનશ્યતિ

ઇતિ શ્રીપાદ્મે મહાપુરાણે બ્રહ્મખંડે સૂતશૌનકસંવાદે ચરણોદકમાહાત્મ્યે સપ્તદશોઽધ્યાયઃ