Padma Purana · Chapter 4.16

śaunaka uvāca /
karmaṇā kena bhoḥ sūta cainasāṃ saṃkṣayo bhavet /
śrīhareśca kṛpā bhūyāttadvadasvānukaṃpayā

sūta uvāca /
śṛṇu śaunaka vakṣyāmi śṛṇvatāṃ pāpanāśanam /
yena viṣṇoḥ kṛpā syādvai vṛjinakṣayakāriṇī

paurṇamāsyāṃ tu yo vipra bhaktibhāvasamanvitaḥ /
kuryyānnānāvidhānena saparyyāṃ śrījagadvibhoḥ

kaluṣaṃ tasya naśyeta koṭijanmārjitaṃ mune /
tasminśrīramaṇasyāsya kṛpā jātā bhaveddhruvam

dvādaśyāmannadānaṃ yo bhaktyā kuryāddvijātaye /
tasya naśyaṃti pāpāni tamāṃsī vāruṇodaye

yo naraḥ śrīhariṃ kuryātsnapanaṃ payasā dvija /
tatprītiḥ śrīhareḥ sadyo dvādaśyāṃ śarkarādibhiḥ

maṃtraṃ vinā tu yo vipra dadyācchrīharaye kila /
pāṣāṇasadṛśaṃ puṣpaṃ dātā yāti adhogatim

kṣmāsurāya ca mūrkhāya pāṣāṇasadṛśaṃ tu yat /
dadyāddānaṃ naro yo vai tasya puṇyaṃ na vidyate

vidyāhīno dvijo mohāddānaṃ gṛhṇāti mūḍhadhīḥ /
kālānalaṃ yathā jīrṇaṃ tena sa nirayaṃ vrajet

yathā dārumayo hastī mṛgaścitramayo yathā /
vidyāhīno dvijo vipra trayaste nāmadhārakāḥ

yathādhvanisthitaṃ vāri pavanārkeṇa śuddhyati /
bhaktyā tu pārṣadaṃ dṛṣṭvā tasya naśyati kalmaṣam

yo naraścāśvine māsi saghṛtānpūrṇimā dine /
dadyācchrīharaye lājānkrīḍārthaṃ tu varāṭikām

bhaktyā yāti hareḥ sthānaṃ punarāvṛttivarjitaḥ /
na dadyādyo naro mohāttasminna tuṣṭido hariḥ

varāṭikāṃ yāvatīṃ yo haraye paurṇimādine /
tāvaddinaṃ hareḥ sthānaṃ cāśvine saṃvaseddhruvam

karavīrapure hyāsītpurā śūdro'pi nirddayaḥ /
kāladvijo dvijaśreṣṭha nāmnā pāpī bhayaṃkaraḥ

svakāryanirataḥ so'pi svāmikāryapraṇāśakaḥ /
ekadā paṃcatāṃ yāto yamadūtā bhayaṃkarāḥ

āgatāstaṃ samānetuṃ yamasyatu niketanam /
baddhvā ninyuśca taṃ dṛṣṭvā pṛṣṭavānsacivaṃ yamaḥ

yama uvāca /
asya kiṃ vidyate'mātya karmāpi ca śubhāśubham /
kathayasva samūlaṃ tu citragupta vicakṣaṇa

citragupta uvāca/
asau pāpī durācāraḥ svāmikāryapraṇāśakaḥ /
nāsti puṇyaṃ cāṇumātraṃ narake paripacyatām

śatamanvantaraṃ rājannāgayonau ca niṣṭhuraḥ /
pāṣāṇe janma cāsādya gṛhe sthātuṃ niraṃtaram

sūta uvāca /
tāvatkālaṃ tato vipra niraye sa papāta ha /
tato'pyaśmagṛhe nāgayonau jātaḥ suduḥkhitaḥ

ekadā cāśvine māsi paurṇamāsīdine dvija /
lājānvarāṭikā nāgo bilātprākṣepayadbahiḥ

patitā sā hareragre pāpamasya svayaṃ hariḥ /
tūrṇaṃ tu nāśayāmāsa dayālurduḥkhanāśakaḥ

kadācitprāptakālastu paṃcatvaṃ sa jagāma ha /
yamadūtāstamānetuṃ cāgatā bahuśo dvija

baddhvā netuṃ yadā cakruryamasya sadanaṃ prati /
tadāgatā viṣṇudūtāḥ śaṃkhacakragadādharāḥ

pāśaṃ chittvā rathe divye tamāśugatakilbiṣam /
tatra cāropayāmāsuḥ yamadūtāḥ palāyitāḥ

tato niketanaṃ viṣṇornāgastairveṣṭito yayau /
tatra tasthau hareragre punarāvarttivarjitaḥ

bhaktyā yo haraye dadyāllājāṃśca saghṛtāndvija /
varāṭikāṃ tasya puṇyaṃ na jāne kiṃ bhaveddhruvam

ya imaṃ śṛṇuyādvipra cādhyāyaṃ pāpanāśanam /
tasya naśyaṃti pāpāni śrīhareḥ kṛpayāpi ca

iti śrīpādmemahāpurāṇe brahmakhaṃḍe sūtaśaunakasaṃvāde ṣoḍaśo'dhyāyaḥ