પદ્મ પુરાણ · અધ્યાય 4.16

શૌનક ઉવાચ ।
કર્મણા કેન ભોઃ સૂત ચૈનસાં સંક્ષયો ભવેત્ ।
શ્રીહરેશ્ચ કૃપા ભૂયાત્તદ્વદસ્વાનુકંપયા

સૂત ઉવાચ ।
શૃણુ શૌનક વક્ષ્યામિ શૃણ્વતાં પાપનાશનમ્ ।
યેન વિષ્ણોઃ કૃપા સ્યાદ્વૈ વૃજિનક્ષયકારિણી

પૌર્ણમાસ્યાં તુ યો વિપ્ર ભક્તિભાવસમન્વિતઃ ।
કુર્ય્યાન્નાનાવિધાનેન સપર્ય્યાં શ્રીજગદ્વિભોઃ

કલુષં તસ્ય નશ્યેત કોટિજન્માર્જિતં મુને ।
તસ્મિન્શ્રીરમણસ્યાસ્ય કૃપા જાતા ભવેદ્ધ્રુવમ્

દ્વાદશ્યામન્નદાનં યો ભક્ત્યા કુર્યાદ્દ્વિજાતયે ।
તસ્ય નશ્યંતિ પાપાનિ તમાંસી વારુણોદયે

યો નરઃ શ્રીહરિં કુર્યાત્સ્નપનં પયસા દ્વિજ ।
તત્પ્રીતિઃ શ્રીહરેઃ સદ્યો દ્વાદશ્યાં શર્કરાદિભિઃ

મંત્રં વિના તુ યો વિપ્ર દદ્યાચ્છ્રીહરયે કિલ ।
પાષાણસદૃશં પુષ્પં દાતા યાતિ અધોગતિમ્

ક્ષ્માસુરાય ચ મૂર્ખાય પાષાણસદૃશં તુ યત્ ।
દદ્યાદ્દાનં નરો યો વૈ તસ્ય પુણ્યં ન વિદ્યતે

વિદ્યાહીનો દ્વિજો મોહાદ્દાનં ગૃહ્ણાતિ મૂઢધીઃ ।
કાલાનલં યથા જીર્ણં તેન સ નિરયં વ્રજેત્

યથા દારુમયો હસ્તી મૃગશ્ચિત્રમયો યથા ।
વિદ્યાહીનો દ્વિજો વિપ્ર ત્રયસ્તે નામધારકાઃ

યથાધ્વનિસ્થિતં વારિ પવનાર્કેણ શુદ્ધ્યતિ ।
ભક્ત્યા તુ પાર્ષદં દૃષ્ટ્વા તસ્ય નશ્યતિ કલ્મષમ્

યો નરશ્ચાશ્વિને માસિ સઘૃતાન્પૂર્ણિમા દિને ।
દદ્યાચ્છ્રીહરયે લાજાન્ક્રીડાર્થં તુ વરાટિકામ્

ભક્ત્યા યાતિ હરેઃ સ્થાનં પુનરાવૃત્તિવર્જિતઃ ।
ન દદ્યાદ્યો નરો મોહાત્તસ્મિન્ન તુષ્ટિદો હરિઃ

વરાટિકાં યાવતીં યો હરયે પૌર્ણિમાદિને ।
તાવદ્દિનં હરેઃ સ્થાનં ચાશ્વિને સંવસેદ્ધ્રુવમ્

કરવીરપુરે હ્યાસીત્પુરા શૂદ્રોઽપિ નિર્દ્દયઃ ।
કાલદ્વિજો દ્વિજશ્રેષ્ઠ નામ્ના પાપી ભયંકરઃ

સ્વકાર્યનિરતઃ સોઽપિ સ્વામિકાર્યપ્રણાશકઃ ।
એકદા પંચતાં યાતો યમદૂતા ભયંકરાઃ

આગતાસ્તં સમાનેતું યમસ્યતુ નિકેતનમ્ ।
બદ્ધ્વા નિન્યુશ્ચ તં દૃષ્ટ્વા પૃષ્ટવાન્સચિવં યમઃ

યમ ઉવાચ ।
અસ્ય કિં વિદ્યતેઽમાત્ય કર્માપિ ચ શુભાશુભમ્ ।
કથયસ્વ સમૂલં તુ ચિત્રગુપ્ત વિચક્ષણ

ચિત્રગુપ્ત ઉવાચ।
અસૌ પાપી દુરાચારઃ સ્વામિકાર્યપ્રણાશકઃ ।
નાસ્તિ પુણ્યં ચાણુમાત્રં નરકે પરિપચ્યતામ્

શતમન્વન્તરં રાજન્નાગયોનૌ ચ નિષ્ઠુરઃ ।
પાષાણે જન્મ ચાસાદ્ય ગૃહે સ્થાતું નિરંતરમ્

સૂત ઉવાચ ।
તાવત્કાલં તતો વિપ્ર નિરયે સ પપાત હ ।
તતોઽપ્યશ્મગૃહે નાગયોનૌ જાતઃ સુદુઃખિતઃ

એકદા ચાશ્વિને માસિ પૌર્ણમાસીદિને દ્વિજ ।
લાજાન્વરાટિકા નાગો બિલાત્પ્રાક્ષેપયદ્બહિઃ

પતિતા સા હરેરગ્રે પાપમસ્ય સ્વયં હરિઃ ।
તૂર્ણં તુ નાશયામાસ દયાલુર્દુઃખનાશકઃ

કદાચિત્પ્રાપ્તકાલસ્તુ પંચત્વં સ જગામ હ ।
યમદૂતાસ્તમાનેતું ચાગતા બહુશો દ્વિજ

બદ્ધ્વા નેતું યદા ચક્રુર્યમસ્ય સદનં પ્રતિ ।
તદાગતા વિષ્ણુદૂતાઃ શંખચક્રગદાધરાઃ

પાશં છિત્ત્વા રથે દિવ્યે તમાશુગતકિલ્બિષમ્ ।
તત્ર ચારોપયામાસુઃ યમદૂતાઃ પલાયિતાઃ

તતો નિકેતનં વિષ્ણોર્નાગસ્તૈર્વેષ્ટિતો યયૌ ।
તત્ર તસ્થૌ હરેરગ્રે પુનરાવર્ત્તિવર્જિતઃ

ભક્ત્યા યો હરયે દદ્યાલ્લાજાંશ્ચ સઘૃતાન્દ્વિજ ।
વરાટિકાં તસ્ય પુણ્યં ન જાને કિં ભવેદ્ધ્રુવમ્

ય ઇમં શૃણુયાદ્વિપ્ર ચાધ્યાયં પાપનાશનમ્ ।
તસ્ય નશ્યંતિ પાપાનિ શ્રીહરેઃ કૃપયાપિ ચ

ઇતિ શ્રીપાદ્મેમહાપુરાણે બ્રહ્મખંડે સૂતશૌનકસંવાદે ષોડશોઽધ્યાયઃ