Padma Purana · Chapter 4.1

atha śrīpādme mahāpurāṇe cutarthaṃ brahmakhaṇḍaṃ prārabhyate
śrīvedavyāsāya namaḥ
śaunaka uvāca-
kalau samāgate sūta prāṇināṃ kena karmaṇā /
uddhāro vai bhavettasmātkathayasva mamāgrataḥ

sūta uvāca-
sādhusādhu muniśreṣṭha puṇyātmanāṃ varo bhavān /
sarveṣāṃ ca janānāṃ ca śubhavāñcho niraṃtaram

etadvyāsaḥ purā vipraḥ sarvajñaḥ sarvapūjitaḥ /
pṛṣṭo jaimininā taṃ sa yadāha śṛṇu vaiṣṇava

daṃḍavatpraṇipatyāsau vyāsaṃ sarvārthapāragam /
guruṃ satyavatīsūnuṃ papraccha munipuṃgavaḥ

jaiminiruvāca-
kalau nṛṇāṃ bhavetkena mokṣo vai kathayasva me /
alpenāpi ca puṇyena martyāścālpāyuṣo yataḥ

vyāsa uvāca-
sādhusaṃgādbhavedvipra śāstrāṇāṃ śravaṇaṃ prabho /
haribhaktirbhavettasmāttato jñānaṃ tato gatiḥ

na rocate kathā bhūmau pāpiṣṭhāya janāya vai /
vaiṣṇavī sa tu vijñeyaḥ pāpiṣṭhapravaro dvijaḥ

śrīkṛṣṇasya kathāṃ śrutvā''naṃdī bhavati vaiṣṇavaḥ /
asatyāṃ tāṃ tu yo brūyājjñeyaḥ sa pāpināṃ guruḥ

yasminyasminsthale vipra kṛṣṇasya vartate kathā /
tasmāttasmājjagannātho yāti tyaktvā na karhicit

kṛṣṇasya yaḥ kathāraṃbhe kuryādvighnaṃ narādhamaḥ /
narakānniṣkṛtirnāsti manvaṃtaraśatāvadhi

ye purāṇakathāṃ śrutvā niṃdaṃtyupahasaṃti vai /
teṣāṃ karasthā narakā bahukleśakarāḥ sadā

janmāṃtarārjitaṃ pāpaṃ tatkṣaṇādeva naśyati /
śrīkṛṣṇacaritaṃ yo vai śrotumicchāṃ karotyapi

bhaktyā yo vai naraḥ kuryātśrīkṛṣṇacaritaṃ tathā /
na jāne śravaṇe tasya kā gatirvā bhaviṣyati

brahmahatyādikaṃ pāpaṃ akālamaraṇaṃ tathā /
surāpānaṃ tathāsteyaṃ sarvaṃ naśyati pāpinaḥ

pāpaṃ kṛtvā tu yo martyaḥ paścātpāpaṃ nivartayet /
tasya pāpaṃ vrajennāśamagninā tūlarāśivat

śrīkṛṣṇacaritaṃ vipra tiṣṭhedvai pustakaṃ gṛhe /
tasya gṛhasamīpaṃ hi nāyāṃti yamakiṃkarāḥ

jaiminiruvāca-
vadaṃti vaiṣṇavānkāṃśca vāṃcchā brūhi guro mama /
idānīṃ tānsamājñātuṃ teṣāṃ māhātmyamuttamam

vyāsa uvāca-
yo naro mastake bhaktyā vaiṣṇavāṃghrijalaṃ dvija /
karoti secanaṃ pāpī tīrthasnānena tasya kim

sādhusaṃgaṃ tu yaḥ kuryyātkṣaṇaṃ vārddhakṣaṇaṃ dvija /
tasya naśyaṃti pāpāni brahmahatyāmukhāni ca

yatrayatra kule caiva eko bhavati vaiṣṇavaḥ /
kulaṃ tasya yadā pāpairyuktaṃ tanmokṣagāmi vai

hiṃsādaṃbhakāmakrodhairvarjitāścaiva ye narāḥ /
lobhamohaparityaktā jñeyāste vaiṣṇavā dvija

pitṛbhaktā dayāyuktāḥ sarvaprāṇihite ratāḥ /
amatsarā vaiṣṇavā ye vijñeyāḥ satyabhāṣiṇaḥ

viprabhaktiratā ye ca parastrīṣu napuṃsakāḥ /
ekādaśīvrataratā vijñeyāste ca vaiṣṇavāḥ

gāyaṃti harināmāni tulasīmālyadhārakāḥ /
haryaṃghrisalilaiḥ siktā vijñeyāste ca vaiṣṇavāḥ

śrotrayormastake yeṣāṃ tulasyāḥ parṇamuttamam /
karhiciddṛśyate vipra vijñeyāste ca vaiṣṇavāḥ

pākhaṃḍasaṃgarahitā vipradveṣavivarjitāḥ /
siṃceyustulasīṃ ye ca jñātavyā vaiṣṇavā narāḥ

pūjayaṃti hariṃ ye ca tulasyā cārcayaṃti ye /
kanyādānaratā ye ca ye vai hyatithipūjakāḥ

śṛṇvaṃti viṣṇucaritaṃ vijñeyā vaiṣṇavā narāḥ /
yasya gṛhe supratiṣṭhetśālagrāmaśilāpi ca

mārjayaṃti hareḥ sthānaṃ pitṛyajñapravartakāḥ /
jane dīne dayāyuktā vijñeyāste ca vaiṣṇavāḥ

parasvaṃ brāhmaṇadravyaṃ paśyaṃti viṣavacca ye /
harinaivedyaṃ ye'śnanti vijñeyā vaiṣṇavā janāḥ

vedaśāstrānuraktā ye tulasīvanapālakāḥ /
rādhāṣṭamīvrataratā vijñeyāste ca vaiṣṇavāḥ

śrīkṛṣṇapurato ye ca dīpaṃ yacchaṃti śraddhayā /
paraniṃdāṃ na kurvaṃti vijñeyāste ca vaiṣṇavāḥ

sūta uvāca-
pṛṣṭo jaimininā vyāsa ityuktaḥ sa yathākramam /
mayedaṃ kathyate brahmanyatprasaṃgādguroḥ śrutam

adhyāyaṃ śraddhayā yuktaṃ ye śṛṇvaṃti narottamāḥ /
sarvapāpavinirmuktā yāṃti viṣṇoḥ paraṃ padam

iti śrīpādme mahāpurāṇe brahmakhaṃḍe vyāsajaiminisaṃvāde prathamo'dhyāyaḥ