Padma Purana · Chapter 3.23

nārada uvāca-
evaṃ bahutithe kāle lomaśo munisattamaḥ /
āgataśca mahābhāgastatra yādṛcchiko muni

taṃ dṛṣṭvā brāhmaṇaṃ sarve piśācāḥ kṣutsamākulāḥ /
dhāvaṃto hyattukāmāste militvā yūthavartinaḥ

dahyamānāstu tīvreṇa tejasā lomaśasya tu /
asamarthāḥ puraḥ sthātuṃ te sarve dūrataḥ sthitāḥ

tatra pūrvakarmabalātpiśācaḥ saha vai dvijaḥ /
samīkṣya lomaśaṃ rājansāṣṭāṃgaṃ praṇipatya ca

uvāca sūnṛtāṃ vācaṃ baddhvā śirasi cāṃjalim /
mahābhāgyodaye vipra sādhūnāṃ saṃgatirbhavet

gaṃgādipuṇyatīrtheṣu yo naraḥ snāti sarvathā /
yaḥ karoti satāṃ saṃgaṃ tayoḥ satsaṃgamo varaḥ

gurūṇāṃ saṃgamo vipra dṛṣṭādṛṣṭaphalo bhuvi /
svargado rogahārī ca kiṃ tamopaharo mataḥ

ityuktvā kathayāmāsa pūrvavṛttāṃtamadbhutam /
imā gaṃdharvakanyāstā mune so'haṃ dvijātmajaḥ

sarve piśācarūpeṇa mithaḥ śāpavimohitāḥ /
dīnānanāssutiṣṭhāmastavāgre munisattama

tvaddarśanena bālānāṃ nistāro no bhaviṣyati /
sūryodaye tamastomaḥ kiṃ nu līyeta puṣkare

śrutvaitallomaśo vākyaṃ kṛpārdrīkṛtamānasaḥ /
pratyuvāca mahātejā duḥkhitaṃ taṃ muneḥ sutam

matprasādācca sarveṣāṃ smṛtiḥ sapadi jāyatām /
dharme ca vartatāṃ yena mithaḥ śāpo layaṃ vrajet

piśāca uvāca-
maharṣe kathyatāṃ dharmo mucyema yena kilbiṣāt /
nāyaṃ kālo vilaṃbasya śāpāgnirdāruṇo yataḥ

lomaśa uvāca-
mayā sārddhaṃ prakurvaṃtu revāsnānaṃ vidhānataḥ /
śāpānmokṣyati vo revā nānyathā niṣkṛtirbhavet

śṛṇuṣvāvahito vipra pāpanāśo dhruvaṃ nṛṇām /
revāsnānena jāyeta iti me niścitā matiḥ

saptajanmakṛtaṃ pāpaṃ vartamānaṃ ca pātakam /
revāsnānaṃ dahetsarvaṃ tūlarāśimivānalaḥ

prāyāścittaṃ na paśyaṃti yasminpāpe piśācaka /
tatsarvaṃ narmadātoye snānamātreṇa naśyati

jñānakṛnnarmmadāsnānamato mokṣaphalā hi sā /
himavatpuṇyatīrthāni sarvapāpaharāṇi vai

iṃdralokapradaṃ hīdaṃ nirmitaṃ brahmavādibhiḥ /
sarvakāmaphalā revā mokṣadā parikīrtitā

pāpaghnī pāpahāriṇī sarvakāmaphalapradā /
viṣṇulokadaāplāvo nārmadaḥ pāpanāśanaḥ

yāmunaḥ sūryalokāya bhavedāplāva uttamaḥ /
sārasvatoghavidhvaṃsī brahmalokaphalapradaḥ

viśālaphaladā proktā viśālā hi piśācaka /
pāpeṃdhanadavāgnistu garbhahetukriyāpahaḥ

viṣṇulokāya mokṣāya nārmadaḥ parikīrtitaḥ /
sarayūgaṃḍakīsiṃdhuścaṃdrabhāgā ca kauśikī

tāpī godāvarī bhīmā payoṣṇī kṛṣṇaveṇikā /
kāverī tuṃgabhadrā ca anyāścāpi samudragāḥ

tāsu revā parā proktā viṣṇulokapradāyinī /
revā tu prāpyate puṇyaiḥ pūrvajanmakṛtairdvija /
apunarbhavadaṃ tatra majjanaṃ muniputraka

gāyaṃti devāḥ satataṃ diviṣṭhā revā kadā dṛṣṭigatā hi no bhavet /
snātā narā yatra na garbhavedanāṃ paśyaṃti tiṣṭhaṃti ca viṣṇusannidhau

majjaṃti ye pratyahamatra mānavā revāsuto ye bahupāpakaṃcukāḥ /
majjaṃti te no nirayeṣu dharmmataḥ svarge tu te cārucaraṃti devavat

tīvrairvratairdānatapobhiradhvaraiḥ sārdhaṃ vidhātrā tulayā dhṛtā purā /
revāpiśācāśu tayordvayorabhūdrevā varā tatra ca mokṣasādhikā

nārada uvāca-
etacchrutvā vacastasya lomaśasya piśācakāḥ /
tena sārddhaṃ yayuḥ śīghraṃ revāmajjanahetave

tato daivātsamutpanno revārodhasi mārutaḥ /
teṣāṃ pravāhaspṛṣṭānāṃ gātre jalakaṇapradaḥ

revājalakaṇasparśātpaiśācyātte vimocitāḥ /
tatkṣaṇāddivyavapuṣaḥ praśaśaṃsuśca narmadām

tato lomaśavākyena tāśca gaṃdharvakanyakāḥ /
pariṇītāḥ sukhaṃ tena vipreṇa narmadātaṭe

uvāsa suciraṃ kālaṃ snānapānāvagāhanaiḥ /
arcitvā narmadāmatra viṣṇulokaṃ gatāśca te

evaṃ te kathito rājannarmadāguṇasaṃśrayaḥ /
itihāso mahāpuṇyaḥ śravaṇātpāpanāśanaḥ

iti śrīpādme mahāpurāṇe svargakhaṃḍe trayoviṃśo'dhyāyaḥ