Padma Purana · Chapter 3.21

nārada uvāca-
tato gaccheta rājeṃdra vihageśvaramuttamam /
darśanāttasyarājeṃdra mucyate sarvapātakaiḥ

tato gaccheta rājendra narmadeśvaramuttamam /
tatra snātvā naro rājansvargaloke mahīyate

aśvatīrthaṃ tato gacchetsnānaṃ tatra samācaret /
subhago darśanīyaśca bhogavānjāyate naraḥ

pitāmahaṃ tato gacchedbrahmaṇā nirmitaṃ purā /
tatra snātvā naro bhaktyā pitṛpiṃḍaṃ tu dāpayet

tiladarbhavimiśraṃ tu udakaṃ tu pradāpayet /
tasya tīrthaprabhāveṇa sarvaṃ bhavati cākṣayam

sāvitrī tīrthamāsādya yastu snānaṃ samācaret /
vidhūya sarvapāpāni brahmaloke mahīyate

manoharaṃ ca tatraiva tīrthaṃ paramaśobhanam /
tatra snātvā naro rājanpitṛloke mahīyate

tato gaccheta rājeṃdra mānasaṃ tīrthamuttamam /
tatra snātvā naro rājanrudraloke mahīyate

tato gaccheta rājeṃdra kratutīrthamanuttamam /
vikhyātaṃ sarvalokeṣu sarvapāpapraṇāśanam

yānyānprārthayate kāmānpaśuputradhanāni ca /
prāpnuyāttāni sarvāṇi tatra snātvā narādhipa

tato gaccheta rājeṃdra tridaśadyoti viśrutam /
tatra tā ṛṣikanyāstu tapastapyaṃti suvratāḥ

bharttā bhavatu sarvāsāmīśvaraḥ prabhuravyayaḥ /
prītasteṣāṃ mahādevaścaṃḍarūpadharo haraḥ

vikṛtānana bībhatsastacca tīrthamupāgataḥ /
tatra kanyā mahārāja varāya parameśvaraḥ

kanyāṛddhiṃ ca yaḥ sevetkanyādānaṃ prayacchati /
tīrthaṃ tatra mahārāja daśakanyeti viśrutam

tatra snātvārccayeddevaṃ sarvapāpaiḥ pramucyate /
tato gaccheta rājeṃdra svargabiṃduriti śrutam

tatra snātvā naro rājandurgatiṃ ca na paśyati /
apsareśaṃ tato gacchetsnānaṃ tatra samācaret

krīḍate nāgalokastho'psarobhiḥ saha modate /
tato gaccheta rājeṃdra narakaṃ tīrthamuttamam

tatra snātvārccayeddevaṃ narakaṃ ca na gacchati /
bhārabhūtaṃ tato gacchedupavāsaparāyaṇaḥ

etattīrthaṃ samāsādya avatāraṃ tu śāṃbhavam /
arcayitvā virūpākṣaṃ rudraloke mahīyate

tasmiṃstīrthe naraḥ snātvā bhārabhūte mahātmanaḥ /
yatratatra mṛtasyāpi dhruvaṃ gāṇeśvarī gatiḥ

kārtikasya tu māsasya arcayitvā maheśvaram /
aśvamedhācchataguṇaṃ pravadaṃti manīṣiṇaḥ

dīpakānāṃ śataṃ kṛtvā ghṛtapūrṇaṃ tu dāpayet /
vimānaiḥ sūryasaṃkāśairvrajate yatra śaṃkaraḥ

vṛṣabhaṃ yaḥ prayaccheta śaṃkhakuṃdeṃdu saṃnibham /
vṛṣayuktena yānena rudralokaṃ sa gacchati

carumekaṃ tu yo dadyāttasmiṃstīrthe narādhipa /
pāyasaṃ madhusaṃyuktaṃ bhakṣyāṇi vividhāni ca

yathāśaktyanurājeṃdra bhojayetsahadakṣiṇam /
tasyatīrthaprabhāveṇa sarvaṃ koṭiguṇaṃ bhavet

narmadāyā jalaṃ siktvā arcayitvā vṛṣadhvajam /
durgatiṃ ca na paṃśyaṃti tasya tīrthaprabhāvataḥ

etattīrthaṃ samāsādya yastuprāṇānparityajet /
sarvapāpaviśuddhātmā vrajate yatra śaṃkaraḥ

jalapraveśaṃ yaḥ kuryāttasmiṃstīrthe narādhipa /
haṃsayuktena yānena rudralokaṃ sa gacchati

yāvaccaṃdraśca sūryaśca himavāṃśca mahodadhiḥ /
gaṃgādyāḥ sarito yāvattāvatsvarge mahīyate

anāśanaṃ tu yaḥ kuryāttasmiṃstīrthe narādhipa /
garbhavāse tu rājeṃdra na punarjāyate naraḥ

tato gaccheta rājeṃdra aṭavītīrthamuttamam /
tatra snātvā naro rājanniṃdrasyārddhāsanaṃlabhet

śṛṃgatīrthaṃ tato gacchetsarvapāpapraṇāśanam /
tatrāpi snātamātrasya dhruvaṃ gāṇeśvarī gatiḥ

eraṃḍīnarmadāyāśca saṃgamaṃ lokaviśrutam /
tatra tīrthaṃ mahāpuṇyaṃ sarvapāpapraṇāśanam

upavāsaparo bhūtvā nityaṃ brahmaparāyaṇaḥ /
tatra snātvā tu rājeṃdra mucyate brahmahatyayā

tato gaccheta rājendra narmadodadhisaṃgamam /
jamadagniriti khyātaṃ siddho yatra janārdanaḥ

yatreṣṭvā bahubhiryajñairiṃdro devādhipobhavat /
tatra snātvā naro rājannarmadodadhisaṃgame

triguṇasyāśvamedhasya phalaṃ prāpnoti mānavaḥ /
paścimodadhisāyujyaṃ muktidvāravighāṭanam

tatra devāḥ sagaṃdharvā ṛṣayaḥ siddhacāraṇāḥ /
ārādhayaṃti deveśaṃ trisaṃdhyaṃ vimaleśvaram

sarvapāpaviśuddhātmā rudraloke mahīyate /
vimaleśvaraparaṃ tīrthaṃ na bhūtaṃ na bhaviṣyati

tatropavāsaṃ kṛtvā ye paśyaṃti vimaleśvaram /
sarvapāpaviśuddhātmā rudralokaṃ vrajaṃti te

tato gaccheta rājeṃdra keśinītīrthamuttamam /
tatra snātvā naro rājannupavāsaparāyaṇaḥ

upoṣya rajanīmekāṃ niyato niyatāśanaḥ /
tatra tīrthaprabhāveṇa mucyate brahmahatyayā

sarvatīrthābhiṣekaṃ ca yaḥ paśyetsāgareśvaram /
yojanābhyaṃtare tiṣṭhedāvarte saṃsthitaḥ śivaḥ

taṃ dṛṣṭvā sarvatīrthāni dṛṣṭāni syurna saṃśayaḥ /
sarvapāpavinirmukto yatra rudra saḥ gacchati

narmadāsaṃgamaṃ yāvadyāvaccāmarakaṃṭakam /
tatrāṃtare mahārājantīrthakoṭyodakasthitāḥ

tīrthāttīrthāṭanaṃ caryā ṛṣikoṭiniṣevitā /
agnihotraiśca divyāṃśaiḥ sarvairjñānaparāyaṇaiḥ

sevitāstena rājeṃdra īpsitārthapradāyikāḥ /
yaścedaṃ vai paṭhennityaṃ śṛṇuyādvāpi bhaktitaḥ

taṃ tu tīrthāni sarvāṇi abhiṣiṃcaṃti pāṃḍava /
narmadā ca sadā prītā bhavedvai nātra saṃśayaḥ

prītastasya bhavedrudro mārkaṃḍeyo mahāmuniḥ /
vaṃdhyā ca labhate putrāndurbhagā subhagābhavet

kumārīṃ labhate bharttā yacca yo vāñchate phalam /
tadeva labhate sarvaṃ nātra kāryā vicāraṇā

brāhmaṇo vedamāpnoti kṣatriyo vijayī bhavet /
vaiśyastu labhate dhānyaṃ śūdraḥ prāpnoti sadgatim

mūrkhastu labhate vidyāṃ trisaṃdhyaṃ yaḥ paṭhennaraḥ /
narakaṃ ca na paśyeta viyoniṃ ca na gacchati

iti śrīpādmemahāpurāṇe svargakhaṃḍe ekaviṃśo'dhyāyaḥ