Padma Purana · Chapter 2.96

subāhuruvāca-
kīdṛśaiḥ karmabhiḥ pretya gacchaṃti narakaṃ narāḥ /
svargaṃ tu kīdṛśaiḥ pretya tanme tvaṃ vaktumarhasi

jaiminiruvāca-
brāhmaṇyaṃ puṇyamutsṛjya ye dvijā lobhamohitāḥ /
kukarmāṇyupajīvaṃti te vai nirayagāminaḥ

nāstikā bhinnamaryādāḥ kaṃdarpaviṣayonmukhāḥ /
dāṃbhikāśca kṛtaghnāśca te vai nirayagāminaḥ

brāhmaṇebhyaḥ pratiśrutya na prayacchaṃti ye dhanam /
brahmasvānāṃ ca hartāro narā nirayagāminaḥ

puruṣāḥ piśunāścaiva mānino'nṛtavādinaḥ /
asaṃbaddhapralāpāśca te vai nirayagāminaḥ

ye parasvāpahartāraḥ paradūṣaṇasūcakāḥ /
parastrīgāmino ye ca te vai nirayagāminaḥ

prāṇināṃ prāṇahiṃsāyāṃ ye narā niratāḥ sadā /
paraniṃdāratā ye vai te vai nirayagāminaḥ

sukūpānāṃ taḍāgānāṃ prapānāṃ ca paraṃtapa /
sarasāṃ caiva bhettāro narā nirayagāminaḥ

viparyasyaṃti ye dārāñchiśūnbhṛtyātithīṃstathā /
utsannapitṛdevejyā narā nirayagāminaḥ

pravrajyādūṣakā rājanye caivāśramadūṣakāḥ /
sakhīnāṃ dūṣakāścaiva te vai nirayagāminaḥ

ādyaṃ puruṣamīśānaṃ sarvalokamaheśvaram /
na ciṃtayaṃti ye viṣṇuṃ te vai nirayagāminaḥ

prayājānāṃ makhānāṃ ca kanyānāṃ suhṛdāṃ tathā /
sādhūnāṃ ca gurūṇāṃ ca dūṣakā nirayagāminaḥ

kāṣṭhairvā śaṃkubhirvāpi śūnyairaśmabhireva vā /
ye mārgānuparuṃdhaṃti te vai nirayagāminaḥ

sarvabhūteṣvaviśvastāḥ kāmenārtāstathaiva ca /
sarvabhūteṣu jihmāśca te vai nirayagāminaḥ

āgatānbhojanārthaṃ tu brāhmaṇānvṛttikarśitān /
pratiṣedhaṃ ca kurvaṃti te vai nirayagāminaḥ

kṣetravṛttigṛhacchedaṃ prīticchedaṃ ca ye narāḥ /
āśācchedaṃ prakurvaṃti te vai nirayagāminaḥ

śastrāṇāṃ caiva karttāraḥ śalyānāṃ dhanuṣāṃ tathā /
vikretāraśca rājeṃdra narā nirayagāminaḥ

anāthaṃ viklavaṃ dīnaṃ rogārttaṃ vṛddhameva ca /
nānukaṃpaṃti ye mūḍhāste vai nirayagāminaḥ

niyamānpūrvamādāya ye paścādajiteṃdriyāḥ /
atikrāmaṃti cāṃcalyātte vai nirayagāminaḥ

ityete kathitā rājannarā nirayagāminaḥ /
svargalokasya gaṃtāro ye janāstānnibodha me

satyena tapasā kṣāṃtyā dānenādhyayanena ca /
ye dharmamanuvartaṃte te narāḥ svargagāminaḥ

ye ca homaparā dhyānadevatārcanatatparāḥ /
ādadānā mahātmānaste narāḥ svargagāminaḥ

śucayaśca śucau deśe vāsudevaparāyaṇāḥ /
paṭhaṃti viṣṇuṃ gāyaṃti te narāḥ svargagāminaḥ

mātāpitrośca śuśrūṣāṃ ye kurvaṃti sadādṛtāḥ /
varjayaṃti divāsvapnaṃ te narāḥ svargagāminaḥ

sarvahiṃsānivṛttāśca sādhusaṃgāśca ye narāḥ /
sarvasyāpi hite yuktāste narāḥ svargagāminaḥ

sarvalobhanivṛttāśca sarvasāhāśca ye narāḥ /
sarvasyāśrayabhūtāśca te narāḥ svargagāminaḥ

śuśrūṣābhistapobhiśca gurūṇāṃ mānadā narāḥ /
pratigrahanivṛttā ye te narāḥ svargagāminaḥ

sahasrapariveṣṭārastathaiva ca sahasradāḥ /
trātāraśca sahasrāṇāṃ te narāḥ svargagāminaḥ

bhayātpāpāttapācchokāddāridryavyādhikarśitān /
vimuṃcaṃti ca ye jaṃtūṃste narāḥ svargagāminaḥ

ātmasvarūpavaṃtaśca yauvanasthāśca bhārata /
ye vai jiteṃdriyā dhīrāste narāḥ svargagāminaḥ

suvarṇasya ca dātāro gavāṃ bhūmeśca bhārata /
annānāṃ vāsasāṃ caiva te narāḥ svargagāminaḥ

ye yācitāḥ prahṛṣyaṃti priyaṃ datvā vadaṃti ca /
tyaktadānaphalecchāśca te narāḥ svargagāminaḥ

niveśanānāṃ dhānyānāṃ narāṇāṃ ca paraṃtapa /
svayamutpādya dātāraḥ puruṣāḥ svargagāminaḥ

dviṣatāmapi ye doṣānna vadaṃti kadācana /
kīrtayaṃti guṇānye ca te narāḥ svargagāminaḥ

ye pareṣāṃ śriyaṃ dṛṣṭvā na vitapyaṃti matsarāt /
prahṛṣṭāścābhinaṃdaṃti te narāḥ svargagāminaḥ

pravṛttau ca nivṛttau ca śrutiśāstroktameva ca /
ācaraṃti mahātmānaste narāḥ svargagāminaḥ

ye narāṇāṃ vaco vaktuṃ na jānaṃti ca vipriyam /
priyavākyaikavijñātāste narāḥ svargagāminaḥ

ye nāmabhāgānkurvaṃti kṣuttṛṣṇā śramapīḍitāḥ /
haṃtakārasya kartāraste narāḥ svargagāminaḥ

vāpīkūpataḍāgānāṃ prapānāṃ caiva veśmanām /
ārāmāṇāṃ ca kartāraste narāḥ svargagāminaḥ

asatyeṣvapi ye satyā ṛjavo nārjaveṣvapi /
ripuṣvapihitā ye ca te narāḥ svargagāminaḥ

yasminkasminkule jātā bahuputrāḥ śatāyuṣaḥ /
sānukrośāḥ sadācārāste narāḥ svargagāminaḥ

kurvaṃtyavaṃdhyaṃ divasaṃ dharmeṇaikena sarvadā /
vrataṃ gṛhṇaṃti ye nityaṃ te narāḥ svargagāminaḥ

ākrośaṃtaṃ stuvaṃtaṃ ca tulyaṃ paśyaṃti ye narāḥ /
śāṃtātmāno jitātmānaste narāḥ svargagāminaḥ

ye cāpi bhayasaṃtrastānbrāhmaṇāṃśca tathā striyaḥ /
sārthānvā parirakṣaṃti te narāḥ svargagāminaḥ

gaṃgāyāṃ puṣkare tīrthe gayāyāṃ ca viśeṣataḥ /
pitṛpiṃḍapradātāraste narāḥ svargagāminaḥ

na vaśe ceṃdriyāṇāṃ ca ye narāḥ saṃyamasthitāḥ /
tyaktalobhabhayakrodhāste narāḥ svargagāminaḥ

yūkā matkuṇadaṃśādīnye jaṃtūṃstudatastanum /
putravatparirakṣaṃti te narāḥ svargagāminaḥ

ajñānācca yathoktena vidhinā saṃcayaṃti ca /
sarvadvaṃdvasahā loke te narāḥ svargagāminaḥ

ye pūtāḥ paradārāṃśca karmaṇā manasā girā /
ramayaṃti na satvasthāste narāḥ svargagāminaḥ

niṃditāni na kurvaṃti kurvaṃti vihitāni ca /
ātmaśaktiṃ vijānaṃti te narāḥ svargagāminaḥ

evaṃ te kathitaṃ sarvaṃ mayā tattvena pārthiva /
durgatiḥ sadgatiścaiva prāpyate karmabhiryathā

naraḥ pareṣāṃ pratikūlamācaranprayāti ghoraṃ narakaṃ sudāruṇam /
sadānukūlasya narasya jīvinaḥ sukhāvahā muktiradūrasaṃsthitā

iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre ṣaṇṇavatitamo'dhyāyaḥ