Padma Purana · Chapter 2.48

brāhmaṇyuvāca-
māthure viṣaye ramye mathurāyāṃ nṛpottamaḥ /
ugraseneti vikhyāto yādavaḥ paravīrahā

sarvadharmārthatattvajño vedajñaḥ śrutavānbalī /
dātā bhoktā guṇagrāhī sadguṇānvetti bhūpatiḥ

rājyaṃ cakāra medhāvī prajā dharmeṇa pālayet /
evaṃ sa ca mahātejā ugrasenaḥ pratāpavān

vaidarbhe viṣaye puṇye satyaketuḥ pratāpavān /
tasya kanyā mahābhāgā padmākṣī kamalānanā

nāmnā padmāvatī nāma satyadharmaparāyaṇā /
sā tu strīṇāṃ guṇairyuktā dvitīyeva samudrajā

vaidarbhī śuśubhe rājansvaguṇaiḥ satyakāraṇaiḥ /
māthura ugrasenastu upayeme sulocanām

tayā saha mahābhāga sukhaṃ reme pratāpavān /
atiprīto guṇaistasyāstayā saha sukhībhavet

tasyāḥ snehena prītyā ca saṃmugdho māthureśvaraḥ /
padmāvatī mahābhāgā tasya prāṇapriyābhavat

tayā vinā na bubhuje tayā saha prakrīḍayet /
tayā vinā na seveta paramaṃ sukhameva saḥ

evaṃ prītikarau jātau parasparamanuttamau /
snehavaṃtau dvijaśreṣṭha sukhasaṃprītidāyakau

satyaketuśca rājeṃdraḥ sasmāra sa padmāvatīm /
svasutāṃ tāṃ mahābhāgo mātā tasyāḥ suduḥkhitā

sa dūtānpreṣayāmāsa vaidarbho mathurāṃ prati /
ugrasenaṃ nṛvīreṃdraṃ sādareṇa dvijottama

ugrasenaṃ mahārājaṃ sa dūto vākyamabravīt /
vidarbhādhipatirvīro bhaktyā snehena naṃdayan

ātmanaḥ kuśalaṃ brūte bhavatāṃ paripṛcchati /
satyaketurmahārāja tvāmevaṃ paripṛṣṭavān

darśanāya preṣayasva sutāṃ padmāvatīṃ mama /
yadi tvaṃ manyase nātha prītisnehaṃ hitasya ca

preṣayasva mahābhāgāṃ priyāṃ prītikarāṃ tava /
autkaṇṭhyena mahārāja sa sotkaṃṭhena vartate

samākarṇya tato vākyamugraseno nṛpottamaḥ /
prītyā snehena tasyāpi satyaketormahātmanaḥ

dākṣiṇyena ca vipreṃdra preṣayāmāsa bhūpatiḥ /
padmāvatīṃ priyāṃ bhāryāmugrasenaḥ pratāpavān

preṣitānena rājeṃdra gatā padmāvatī svakam /
pūrvaṃ gṛhaṃ satī sā tu mahāharṣeṇa saṃkulā

pitṛpūrvaṃ kuṭuṃbaṃ tu dadṛśe cārumaṃgalā /
pituḥ pādau nanāmātha śirasā satyatatparā

āgatāyāṃ mahārājā padmāvatyāṃ dvijottama /
harṣeṇa mahatāviṣṭo vidarbhādhipatirnṛpaḥ

varddhitā dānamānaiśca vastrālaṃkārabhūṣaṇaiḥ /
padmāvatī sukhenāpi piturgehe pravartate

sakhībhiḥ sahitā sā tu niḥśaṃkā parivartate /
ramate sā tadā tatra yathāpūrvaṃ tathaiva ca

gṛhe vane taḍāgeṣu prāsāde ca tathaiva sā /
punarbāleva bhūtā sā nirlajjā saṃpravartate

niḥśaṃkā vartate vipra sakhībhiḥ saha sarvadā /
pativratā mahābhāgā harṣeṇa mahatānvitā

sukhaṃ tu pitṛgehasya durlabhaṃ śvaśure gṛhe /
evaṃ jñātvā tadā reme kadā īdṛgbhaviṣyati

anena mohabhāvena krīḍālubdhā varānanā /
sakhībhiḥ sahitā nityaṃ vaneṣūpavane tadā

iti śrīpadmapurāṇe bhūmikhaṃḍe venopākhyāne sukalācaritre'ṣṭacatvāriṃśo'dhyāyaḥ