પદ્મ પુરાણ · અધ્યાય 2.48

બ્રાહ્મણ્યુવાચ-
માથુરે વિષયે રમ્યે મથુરાયાં નૃપોત્તમઃ ।
ઉગ્રસેનેતિ વિખ્યાતો યાદવઃ પરવીરહા

સર્વધર્માર્થતત્ત્વજ્ઞો વેદજ્ઞઃ શ્રુતવાન્બલી ।
દાતા ભોક્તા ગુણગ્રાહી સદ્ગુણાન્વેત્તિ ભૂપતિઃ

રાજ્યં ચકાર મેધાવી પ્રજા ધર્મેણ પાલયેત્ ।
એવં સ ચ મહાતેજા ઉગ્રસેનઃ પ્રતાપવાન્

વૈદર્ભે વિષયે પુણ્યે સત્યકેતુઃ પ્રતાપવાન્ ।
તસ્ય કન્યા મહાભાગા પદ્માક્ષી કમલાનના

નામ્ના પદ્માવતી નામ સત્યધર્મપરાયણા ।
સા તુ સ્ત્રીણાં ગુણૈર્યુક્તા દ્વિતીયેવ સમુદ્રજા

વૈદર્ભી શુશુભે રાજન્સ્વગુણૈઃ સત્યકારણૈઃ ।
માથુર ઉગ્રસેનસ્તુ ઉપયેમે સુલોચનામ્

તયા સહ મહાભાગ સુખં રેમે પ્રતાપવાન્ ।
અતિપ્રીતો ગુણૈસ્તસ્યાસ્તયા સહ સુખીભવેત્

તસ્યાઃ સ્નેહેન પ્રીત્યા ચ સંમુગ્ધો માથુરેશ્વરઃ ।
પદ્માવતી મહાભાગા તસ્ય પ્રાણપ્રિયાભવત્

તયા વિના ન બુભુજે તયા સહ પ્રક્રીડયેત્ ।
તયા વિના ન સેવેત પરમં સુખમેવ સઃ

એવં પ્રીતિકરૌ જાતૌ પરસ્પરમનુત્તમૌ ।
સ્નેહવંતૌ દ્વિજશ્રેષ્ઠ સુખસંપ્રીતિદાયકૌ

સત્યકેતુશ્ચ રાજેંદ્રઃ સસ્માર સ પદ્માવતીમ્ ।
સ્વસુતાં તાં મહાભાગો માતા તસ્યાઃ સુદુઃખિતા

સ દૂતાન્પ્રેષયામાસ વૈદર્ભો મથુરાં પ્રતિ ।
ઉગ્રસેનં નૃવીરેંદ્રં સાદરેણ દ્વિજોત્તમ

ઉગ્રસેનં મહારાજં સ દૂતો વાક્યમબ્રવીત્ ।
વિદર્ભાધિપતિર્વીરો ભક્ત્યા સ્નેહેન નંદયન્

આત્મનઃ કુશલં બ્રૂતે ભવતાં પરિપૃચ્છતિ ।
સત્યકેતુર્મહારાજ ત્વામેવં પરિપૃષ્ટવાન્

દર્શનાય પ્રેષયસ્વ સુતાં પદ્માવતીં મમ ।
યદિ ત્વં મન્યસે નાથ પ્રીતિસ્નેહં હિતસ્ય ચ

પ્રેષયસ્વ મહાભાગાં પ્રિયાં પ્રીતિકરાં તવ ।
ઔત્કણ્ઠ્યેન મહારાજ સ સોત્કંઠેન વર્તતે

સમાકર્ણ્ય તતો વાક્યમુગ્રસેનો નૃપોત્તમઃ ।
પ્રીત્યા સ્નેહેન તસ્યાપિ સત્યકેતોર્મહાત્મનઃ

દાક્ષિણ્યેન ચ વિપ્રેંદ્ર પ્રેષયામાસ ભૂપતિઃ ।
પદ્માવતીં પ્રિયાં ભાર્યામુગ્રસેનઃ પ્રતાપવાન્

પ્રેષિતાનેન રાજેંદ્ર ગતા પદ્માવતી સ્વકમ્ ।
પૂર્વં ગૃહં સતી સા તુ મહાહર્ષેણ સંકુલા

પિતૃપૂર્વં કુટુંબં તુ દદૃશે ચારુમંગલા ।
પિતુઃ પાદૌ નનામાથ શિરસા સત્યતત્પરા

આગતાયાં મહારાજા પદ્માવત્યાં દ્વિજોત્તમ ।
હર્ષેણ મહતાવિષ્ટો વિદર્ભાધિપતિર્નૃપઃ

વર્દ્ધિતા દાનમાનૈશ્ચ વસ્ત્રાલંકારભૂષણૈઃ ।
પદ્માવતી સુખેનાપિ પિતુર્ગેહે પ્રવર્તતે

સખીભિઃ સહિતા સા તુ નિઃશંકા પરિવર્તતે ।
રમતે સા તદા તત્ર યથાપૂર્વં તથૈવ ચ

ગૃહે વને તડાગેષુ પ્રાસાદે ચ તથૈવ સા ।
પુનર્બાલેવ ભૂતા સા નિર્લજ્જા સંપ્રવર્તતે

નિઃશંકા વર્તતે વિપ્ર સખીભિઃ સહ સર્વદા ।
પતિવ્રતા મહાભાગા હર્ષેણ મહતાન્વિતા

સુખં તુ પિતૃગેહસ્ય દુર્લભં શ્વશુરે ગૃહે ।
એવં જ્ઞાત્વા તદા રેમે કદા ઈદૃગ્ભવિષ્યતિ

અનેન મોહભાવેન ક્રીડાલુબ્ધા વરાનના ।
સખીભિઃ સહિતા નિત્યં વનેષૂપવને તદા

ઇતિ શ્રીપદ્મપુરાણે ભૂમિખંડે વેનોપાખ્યાને સુકલાચરિત્રેઽષ્ટચત્વારિંશોઽધ્યાયઃ