Padma Purana · Chapter 2.23

ṛṣaya ūcuḥ-
vicitreyaṃ kathā puṇyā dhanyā yaśovidhāyinī /
sarvapāpaharā proktā bhavatā vadatāṃ vara

sṛṣṭisaṃbaṃdhametannastadbhavānvaktumarhati /
pūrvameva yathāsṛṣṭirvistarātsūtanaṃdana

sūta uvāca-
vistareṇa pravakṣyāmi sṛṣṭisaṃhārakāraṇam /
śrutamātreṇa yasyāpi naraḥ sarvajñatāṃ vrajet

hiraṇyakaśyapenāpi vyāpitaṃ bhuvanatrayam /
tapasārādhya prabahmāṇaṃ varaṃ prāptaṃ sudurlabham

tasmāddevānmahābhāgādamaratvaṃ tathaiva ca /
devām̐llokānsa saṃvyāpya prabhutvaṃ svayamarjitam

tato devāḥ sagaṃdharvā munayo vedapāragāḥ /
nāgāśca kinnarāḥ siddhā yakṣāścaiva tathāpare

brahmāṇaṃ tu puraskṛtya jagmurnārāyaṇaṃ prabhum /
kṣīrasāgarasaṃsuptaṃ yoganidrāṃ gataṃ prabhum

taṃ saṃbodhya mahāstotrairdevāḥ prāṃjalayastathā /
saṃbuddhe sati deveśe vṛttaṃ tasya durātmanaḥ

ācacakṣurmahāprājña samākarṇya jagatpatiḥ /
nṛsiṃharūpamāsthāya hiraṇyakaśipuṃ vyahan

punarvārāharūpeṇa hiraṇyākṣo mahābalaḥ /
uddhṛtā vasudhā puṇyā asuro ghātitastadā

anyāṃścaghātayāmāsa dānavānghoradarśanān /
evaṃ caiteṣu naṣṭeṣu dānaveṣu mahatsu ca

anyeṣu teṣu naṣṭeṣu ditiputreṣu vai tadā /
punaḥ sthāneṣu prāpteṣu deveṣu ca mahatsu ca

yajñeṣveva pravṛtteṣu sarveṣu dharmakarmasu /
sustheṣu sarvalokeṣu sā ditirduḥkhapīḍitā

putraśokena saṃtaptā hāhābhūtā vicetanā /
bhartāraṃ sūryasaṃkāśaṃ tapastejaḥ samanvitam

dātāraṃ ca mahātmānaṃ bhartāraṃ kaśyapaṃ tadā /
bhaktyā praṇamya viprendra tamuvāca mahāmatim

bhagavannaṣṭaputrāhaṃ kṛtā devena cakriṇā /
daiteyā dānavāḥ sarve devaiścaiva nipātitāḥ

putraśokānalenāhaṃ saṃtaptā munisattama /
mamānaṃdakaraṃ putraṃ sarvatejoharaṃ vibho

subalaṃ cārusarvāṃgaṃ devarājasamaprabham /
buddhimaṃtaṃ susarvajñaṃ jñātāraṃ sarvapaṃḍitam

tapastejaḥ samāyuktaṃ sabalaṃ cārulakṣaṇam /
brahmaṇyaṃ jñānavettāraṃ devabrāhmaṇapūjakam

jetāraṃ sarvalokānāṃ mamānaṃdakaraṃ dvija /
sarvalakṣaṇasaṃpannaṃ putraṃ me dehi tvaṃ vibho

evamākarṇya vai tasyāḥ kaśyapo vākyamuttamam /
kṛpāviṣṭamanāstuṣṭo duḥkhitāyā dvijottama

tāmuvāca mahābhāga kṛpaṇāṃ dīnamānasām /
tasyāḥ śirasi saṃnyasya svahastaṃ bhāvatatparaḥ

bhaviṣyati mahābhāge yādṛśo vāṃchitaḥ sutaḥ /
evamuktvā jagāmāsau meruṃ girivarottamam

tapastepe nirālaṃbaḥ sādhayanparamavrataḥ /
etasminnaṃtare sā tu dadhāra garbhamuttamam

sā ditiḥ sarvadharmajñā cārukarmā manasvinī /
śatavarṣapramāṇaṃ sā śuci svāṃtā babhūva ha

tayā vai janitaḥ putro brahmatejaḥ samanvitaḥ /
atha kaśyapa āyāto harṣeṇa mahatānvitaḥ

cakāra nāma medhāvī tasya putrasya sattamaḥ /
balamityabravītputraṃ nāmataḥ sadṛśo mahān

evaṃ nāma cakārātha vratabaṃdhaṃ cakāra saḥ /
prāha putra mahābhāga brahmacaryaṃ prasādhaya

evamevaṃ kariṣyāmi tava vākyaṃ dvijottama /
vedasyādhyayanaṃ kuryāṃ brahmacaryeṇa sattama

evaṃ varṣaśataṃ sāgraṃ gataṃ tasya tapasyataḥ /
mātuḥ samakṣamāyātastapastejaḥ samanvitaḥ

tapovīryamayaṃ divyaṃ brahmacaryaṃ mahātmanaḥ /
ditiḥ paśyati putrasya harṣeṇa mahatānvitā

tamuvāca mahātmānaṃ balaṃ putraṃ tapasvinam /
medhāvinaṃ mahātmānaṃ prajñājñānaviśāradam

tvayi jīvati medhāvinprajīvaṃti sutā mama /
hiraṇyakaśipādyāste ye hatāścakrapāṇinā

vairaṃ sādhaya me vatsa jahi devānripūnraṇe /
sā danustamuvācedaṃ balaṃ putraṃ mahābalam

ādāviṃdraṃ hi deveṃdraṃ drutaṃ sūdaya putraka /
paścāddevā nipātyaṃtāṃ tato garuḍavāhanaḥ

tayorākarṇya sā devī aditiḥ patidevatā /
duḥkhena mahatāviṣṭā putramiṃdramabhāṣata

ditiputro mahākāyo varddhate brahmatejasā /
devānāṃ hi vadhārthāya tapastepe niraṃjane

evaṃ jānīhi deveśa yadi kṣemamihecchasi /
evamākarṇya tadvākyaṃ sa mātuḥ pākaśāsanaḥ

ciṃtāmavāpa duḥkhena mahatīṃ devarāṭtadā /
mahābhayena saṃtrastaściṃtayāmāsa vai tataḥ

kathamenaṃ haniṣyāmi devadharmavidūṣakam /
iti niścitya deveśo balasya nidhanaṃ prati

ekadā hi balaḥ sopi saṃdhyārthaṃ siṃdhumāśritaḥ /
kṛṣṇājinena divyena daṃḍakāṣṭhena rājitaḥ

amalenāpi puṇyena brahmacaryeṇa tena saḥ /
sāgarasyopakaṃṭhe taṃ saṃdhyāsanamupāgatam

japamānaṃ suśāṃtaṃ taṃ dadṛśe pākaśāsanaḥ /
vajreṇa tena divyena tāḍito ditinaṃdanaḥ

balaṃ nipatitaṃ dṛṣṭvā gatasatvaṃ gataṃ bhuvi /
harṣeṇa mahatāviṣṭo devarāṇmumude tadā

evaṃ nipātya taṃ daityaṃ ditinaṃdanameva ca /
rājyaṃ cakāra dharmātmā sukhena pākaśāsanaḥ

iti śrīpadmapurāṇe paṃcapaṃcāśatsahasrasaṃhitāyāṃ bhūmikhaṃḍe baladaityavadhonāma trayoviṃśo'dhyāyaḥ