Padma Purana · Chapter 2.19

sūta uvāca-
somaśarmā mahāprājñaḥ sumanayā saha sattamaḥ /
kapilāsaṃgame puṇye revātīre supuṇyade

snātvā tatra sa medhāvī tarpayitvā surānpitṝn /
tapastepe suśāṃtātmā japannārāyaṇaṃ śivam

dvādaśākṣaramaṃtreṇa dhyānayukto mahāmanāḥ /
tasyaiva devadevasya vāsudevasya suvrataḥ

āsane śayane yāne svapne paśyati keśavam /
sadaiva niścalo bhūtvā kāmakrodhavivarjitaḥ

sā ca sādhvī mahābhāgā pativrataparāyaṇā /
sumanā kāṃtamevāpi śuśrūṣati taponvitam

dhyāyamānasya tasyāpi vighnaiḥ saṃdarśitaṃ bhayam /
sarpā viṣolbaṇāḥ kṛṣṇāstatra yāṃti mahātmanaḥ

pārśve te tapyamānasya tasya te somaśarmaṇaḥ /
siṃhavyāghragajā dṛṣṭā bhayamevaṃ pracakrire

vetālā rākṣasā bhūtāḥ kūṣmāṃḍāḥ pretabhairavāḥ /
bhayaṃ vidarśayaṃtyete dāruṇaṃ prāṇanāśanam

nānāvidhā mahābhīmāḥ siṃhāstatra samāgatāḥ /
daṃṣṭrākarālavaktrāśca jagarjuścātibhairavam

viṣṇordhyānātsa dharmātmā na cacāla mahāmatiḥ /
mahāvighnaiḥ susaṃrūḍhaiścālito munipuṃgavaḥ

evaṃ na calate dhyānātsomaśarmā dvijottamaḥ /
jhaṃjhāvātaiśca śītena mahāvṛṣṭyā supīḍitaḥ

bhaṃbhārāvamahābhīmaḥ siṃhastatra samāgataḥ /
taṃ dṛṣṭvā bhayavitrastaḥ sasmāra nṛhariṃ dvijaḥ

iṃdranīlapratīkāśaṃ pītavastraṃ mahaujasam /
śaṃkhacakradharaṃ devaṃ gadāpaṃkajadhāriṇam

mahāmauktikahāreṇa iṃduvarṇānukāriṇā /
kaustubhenāpi ratnena dyotamānaṃ janārdanam

śrīvatsāṃkena divyena hṛdayaṃ yasya rājate /
sarvābharaṇaśobhāṃgaṃ śatapatranibhekṣaṇam

susmitāsyaṃ suprasannaṃ ratnadāmābhiśobhitam /
bhrājamānaṃ hṛṣīkeśaṃ dhyānaṃ tena kṛtaṃ dhruvam

tvameva śaraṇaṃ kṛṣṇa śaraṇāgatavatsala /
namostu devadevāya kiṃ me bhayaṃ kariṣyati

yasyodare trayo lokāḥ sapta cānye mahātmanaḥ /
śaraṇaṃ tasya praviṣṭosmi kvāste bhayaṃ mamaiva hi

yasmādbhayāḥ pravartaṃte kṛtyādika mahābalāḥ /
sarvabhayaprahartāraṃ tamasmi śaraṇaṃ gataḥ

pātakānāṃ tu sarveṣāṃ dānavānāṃ mahābhayam /
rakṣako viṣṇubhaktānāṃ tamasmi śaraṇaṃ gataḥ

vṛṃdārakāṇāṃ sarveṣāṃ dānavānāṃ mahātmanām /
yo gatiḥ kṛṣṇabhaktānāṃ tamasmi śaraṇaṃ gataḥ

abhayo bhayanāśāya pāpanāśāya jñānavān /
ekaśceṃdrasvarūpeṇa tamasmi śaraṇaṃ gataḥ

vyādhīnāṃ nāśakāyaiva ya auṣadhasvarūpavān /
nirāmayo nirānaṃdastamasmi śaraṇaṃgataḥ

acalaścālayellokānapāpo jñānameva ca /
tamasmi śaraṇaṃ prāpto bhayaṃ kiṃ me kariṣyati

sādhūnāṃ cāpi sarveṣāṃ pālako yo hyanāmayaḥ /
pāti viśvaṃ ca viśvātmā tamasmi śaraṇaṃgataḥ

yo me mṛgeṃdrarūpeṇa bhayaṃ darśayategrataḥ /
tamahaṃ śaraṇaṃ prāpto narasiṃhaṃ namāmyaham

madamatto mahākāyo vanahastī samāgataḥ /
gajalīlāgatiṃ devaṃ śaraṇāgatavatsalam

gajāsyaṃ jñānasaṃpannaṃ sapāśāṃkuśadhāriṇam /
kālāsyaṃ gajatuṃḍaṃ ca śaraṇaṃ sugatosmyaham

hiraṇyākṣaprahartāraṃ vārāhaṃ śaraṇaṃgataḥ /
vāmanaṃ taṃ prapannosmi śaraṇāgatavatsalam

hrasvāstu vāmanāḥ kubjāḥ pretāḥ kūṣmāṃḍakādayaḥ /
mṛtyurūpadharāḥ sarve darśayaṃti bhayaṃ mama

amṛtaṃ taṃ prapannosmi kiṃ bhayaṃ me kariṣyati /
brahmaṇyo brahmado brahmā brahmajñānamayo hariḥ

śaraṇaṃ taṃ prapannosmi bhayaṃ kiṃ me kariṣyati /
abhayo yo hi jagato bhītighno bhītidāyakaḥ

bhayarūpaṃ prapannosmi bhayaṃ kiṃ me kariṣyati /
tārakaḥ sarvalokānāṃ nāśakaḥ sarvapāpinām

tamahaṃ śaraṇaṃ prāpto dharmarūpaṃ janārdanam /
surāraṇaṃ yo hi raṇe vapurddhārayate'dbhutam

śaraṇaṃ tasya gaṃtāsmi sadāgatirayaṃ mama /
jhaṃjhāvāto mahācaṃḍo vapurdūyati me bhṛśam

śaraṇaṃ taṃ prapannosmi sadāgatirayaṃ mama /
atiśītaṃ cātivarṣā ātapastāpadāyakaḥ

eṣāṃ rūpeṇa yo devastasyāhaṃ śaraṇaṃ gataḥ /
kālarūpā amī prāptā bhayadā mama cālakāḥ

eṣāṃ śaraṇaṃ prapannosmi hareḥ svarūpiṇāṃ sadā

yaṃ sarvadevaṃ parameśvaraṃ hi niṣkevalaṃ jñānamayaṃ pradīpam /
vadaṃti nārāyaṇamādisiddhaṃ siddheśvaraṃ taṃ śaraṇaṃ prapadye

iti dhyāyanstuvannityaṃ keśavaṃ kleśanāśanam /
bhaktyā tena samānītastadātmahṛdaye hariḥ

udyamaṃ vikramaṃ tasya sa dṛṣṭvā somaśarmaṇaḥ /
āvirbhūya hṛṣīkeśastamuvāca prahṛṣṭavān

somaśarmanmahāprājña śrūyatāṃ bhāryayā saha /
vāsudevosmi vipreṃdra varaṃ yācaya suvrata

tenokto hi sa viprendra unmīlya nayanadvayam /
dṛṣṭvā viśveśvaraṃ devaṃ ghanaśyāmaṃ mahodayam

sarvābharaṇaśobhāṃgaṃ sarvāyudhasamanvitam /
divyalakṣaṇasaṃpannaṃ puṃḍarīkanibhekṣaṇam

pītena vāsasā yuktaṃ rājamānaṃ sureśvaram /
vainateyasamārūḍhaṃ śaṃkhacakragadādharam

brahmādīnāṃ sudhātāraṃ jagatosya mahāyaśāḥ /
viśvasyāsya sadātītaṃ rūpātītaṃ jagadgurum

harṣeṇa mahatāviṣṭo daṃḍavatpraṇipatya tam /
śriyāyuktaṃ bhāsamānaṃ sūryakoṭisamaprabham

baddhāṃjalipuṭobhūtvā tayā sumanayā saha /
jayajayetyuvācainaṃ jayamādhavamānada

jaya yogīśa yogīndra jaya nāgāṃgaśāyana /
yajñāṃga jaya yajñeśa jaya śāśvatasarvaga

jaya sarveśvarānaṃta yajñarūpa namo'stu te /
jaya jñānavatāṃ śreṣṭha jaya tvaṃ jñānanāyaka

jaya sarvadasarvajña jaya tvaṃ sarvabhāvana /
jaya jīvasvarūpeśa mahājīva namostute

jaya prajñādaprajñāṃga jaya prāṇapradāyaka /
jaya pāpaghna puṇyeśa jaya puṇyapate hare

jaya jñānasvarūpeśa jñānagamyāya te namaḥ /
jaya padmapalāśākṣa padmanābhāya te namaḥ

jaya goviṃdagopāla jaya śaṃkhadharāmala /
jaya cakradharāvyakta vyaktarūpāya te namaḥ

jaya vikramaśobhāṃga jaya vikramanāyaka /
jaya lakṣmīvilāsāṃga namo vedamayāya te

jaya vikramaśobhāṃga jaya udyamadāyaka /
jaya udyamakālāya udyamāya namonamaḥ

jaya udyamaśaktāya udyamatrayadhāraka /
yuddhodyamapravṛttāya tasmai dharmāya te namaḥ

namo hiraṇyaretāya tasmai te jāyate namaḥ /
atitejaḥsvarūpāya sarvatejomayāya ca

daityatejovināśāya pāpatejoharāya ca /
gobrāhmaṇahitārthāya namostu paramātmane

namostu hutabhoktre ca namo havyavahāya te /
namaḥ kavyavahāyaiva svadhārūpāya te namaḥ

svāhārūpāya yajñāya pāvanāya namonamaḥ /
namaste śārṅgahastāya haraye pāpahāriṇe

sadasaccodanāyaiva namo vijñānaśāline /
namo vedasvarūpāya pāvanāya namonamaḥ

namostu harikeśāya sarvakleśaharāya te /
keśavāya parāyaiva namaste viśvadhāriṇe

namaḥ kṛpākarāyaiva namo harṣamayāya te /
anaṃtāya namo nityaṃ śuddhāya kleśanāśine

ānaṃdāya namo nityaṃ śuddhāya kevalāya te /
rudrairnamitapādāya viraṃcinamitāya te

surāsureṃdranamita pādapadmāya te namaḥ /
namonamaḥ pareśāya ajitāyāmṛtātmane

kṣīrasāgaravāsāya namaḥ padmāpriyāya te /
ॐkārāya ca śuddhāya acalāya namonamaḥ

vyāpine vyāpakāyaiva sarvavyasanahāriṇe /
namonamo varāhāya mahākūrmāya te namaḥ

namo vāmanarūpāya nṛsiṃhāya mahātmane /
namo rāmāya divyāya sarvakṣatravadhāya ca

sarvajñānāya matsyāya namo rāmāya te namaḥ /
namaḥ kṛṣṇāya buddhāya namo mlecchapraṇāśine

namaḥ kapilaviprāya hayagrīvāya te namaḥ /
namo vyāsasvarūpāya namaḥ sarvamayāya te

evaṃ stutvā hṛṣīkeśaṃ tamuvāca janārdanam /
guṇānāṃ tu paraṃ pāraṃ brahmā vetti na pāvana

na caiva stotuṃ sarvajñastathā rudra saḥhasradṛk /
vaktuṃ ko hi samarthastu kīdṛśī me matirvibho

nirguṇaṃ saguṇaṃ stotraṃ mayaiva tava keśava /
kṣamaśabdāpaśabdaṃ me tava dāsosmi suvrata

janmajanmani lokeśa dayāṃ me kuru pāvana

iti śrīpadmapurāṇe paṃcapaṃcāśatsahasrasaṃhitāyāṃ eṃdre sumanopākhyāne ekonaviṃśo'dhyāyaḥ