Padma Purana · Chapter 2.122

viṣṇuruvāca-
kuṃjalo dharmapakṣī sa ityuktvā tānsutānprati /
virarāma mahāprājñaḥ kiṃcinnovāca tānprati

vaṭādhaḥstho dvijaśreṣṭhastamuvāca mahāśukam /
ko bhavāndharmavaktā hi pakṣirūpeṇa vartate

kiṃ vā devo'tha gaṃdharvaḥ kiṃ vā vidyādharo bhavān /
kasya śāpādimāṃ prāpto yoniṃ kīrasya pātakīm

kasmātte īdṛśaṃ jñānaṃ vartate'tīdriyaṃ śuka /
supuṇyasya tu kasyāpi kasya vai tapasaḥ phalam

kiṃ vā cchannena rūpeṇa anenāpi mahāmate /
kastvaṃ siddho'si devo vā tanme kathaya kāraṇam

kuṃjala uvāca-
bhoḥ siddha tvāmahaṃ jāne kulaṃ te gotramuttamam /
vidyāṃ tapaḥprabhāvaṃ ca yasmādbhramasi medinīm

sarvaṃ vipra pravakṣyāmi svāgataṃ tava suvrata /
upaviśyāsane puṇye chāyāmāśrayaśītalām

avyaktaprabhavo brahmā tasmājjajñe prajāpatiḥ /
brāhmaṇastu guṇairyukto bhṛgurbrahmasamo dvijaḥ

bhārgavo nāma tasyāsītsarvadharmārthatatvavit /
tasyānvaye bhavānvipra cyavanaḥ khyātimānbhuvi

nāhaṃ devo na gaṃdharvo nāhaṃ vidyādharaḥ punaḥ /
yohaṃ vipra pravakṣyāmi tanme nigadataḥ śṛṇu

kaśyapasya kule jātaḥ kaścidbrāhmaṇasattamaḥ /
vedavedāṃgatattvajñaḥ sarvakarmaprakāśakaḥ

vidyādhareti vikhyātaḥ kulaśīlaguṇairyutaḥ /
rājamānaḥ śriyā vipra ācāraistapasā tadā

saṃbabhūvuḥ sutāstasya vidyādharasya te trayaḥ /
vasuśarmā nāmaśarmā dharmaśarmā ca te trayaḥ

teṣāmahaṃ dharmaśarmā kaniṣṭho guṇavarjitaḥ /
vasuśarmā mama bhrātā vedaśāstrārthakovidaḥ

ācāreṇa susaṃpanno vidyādisuguṇaiḥ punaḥ /
nāmaśarmā mahāprājñastadvaccāsīdguṇādhikaḥ

ahameko mahāmūrkhaḥ saṃjātaḥ śṛṇu sattama /
vidyānāmuttamaṃ vipra bhāvamarthaṃ śubhaṃ kadā

na śṛṇomi na vai yāmi gurugehamanuttamam /
tatastu janako me tu māmevaṃ pariciṃtayet

dharmaśarmeti putrasya nāmāsya tu nirarthakam /
saṃjātaḥ kṣitimadhye tu na vidvānme guṇākaraḥ

iti saṃciṃtya dharmātmā māmuvāca suduḥkhitaḥ /
vraja putra gurorgehaṃ vidyārthaṃ parisādhaya

evamākarṇya tattasya piturvākyaṃ mayāśubham /
nāhaṃ tāta gamiṣyāmi gurorgehaṃ suduḥkhadam

yatra vai tāḍanaṃ nityaṃ bhrūbhaṃgādi ca krośanam /
annaṃ na dṛśyate tatra karmaṇā śṛṇusattama

divārātrau na nidrāsti nāsti sukhasya sādhanam /
tasmādduḥkhamayaṃ tāta na yāsye gurumaṃdiram

vidyākāryaṃ kariṣye na krīḍārthamahamutsukaḥ /
bhokṣye svapsye prasādātte kariṣye krīḍanaṃ pitaḥ

ḍiṃbhaiḥ sārddhaṃ sukhenāpi divārātramataṃdritaḥ /
māmuvāca sa dharmātmā mūḍhaṃ jñātvā suduḥkhitaḥ

vidyādhara uvāca-
mā putra sāhasaṃ kārṣīrvidyārthamudyamaṃ kuru /
vidyayā prāpyate saukhyaṃ yaśaḥ kīrtistathātulā

jñānaṃ svargaśca mokṣaśca tasmādvidyāṃ prasādhaya /
pūrvaṃ suduḥkhamūlā tu paścādvidyā sukhapradā

tasmātsādhaya putra tvaṃ vidyāṃ gurugṛhaṃ vraja /
piturvākyamakurvāṇo ahamevaṃ dinadine

yatrayatra sthito nityamarthahāniṃ karomyaham /
upahāsaḥ kṛto lokairmamavipra prakutsanam

mama lajjā samutpannā jīvanāśakarī tadā /
vidyārthamudyato vipra kaṃ guruṃ prārthayāmyaham

iti ciṃtāparo jāto duḥkhaśokasamākulaḥ /
kathaṃ vidyāmahaṃ jāne kathaṃ viṃdāmyahaṃ guṇān

kathaṃ me jāyate svargaḥ kathaṃ mokṣaṃ vrajāmyaham /
ityevaṃ ciṃtayanvipra vārddhakyamagamaṃ punaḥ

devatāyatane duḥkhī upaviṣṭastvahaṃ kadā /
madbhāgyaiḥ preritaḥ kaścitsiddha ekaḥ samāgataḥ

nirāśrayo jitāhāraḥ sadānaṃdastu niḥspṛhaḥ /
ekāṃtamāsthito vipra yogayukto jiteṃdriyaḥ

parabrahmaṇi saṃlīno jñānadhyānasamādhimān /
tamahaṃ saṃśrito vipra jñānarūpaṃ mahāmatim

ahaṃ śuddhena bhāvena bhaktyā namitakaṃdharaḥ /
namaskṛtya mahātmānaṃ puratastasya saṃsthitaḥ

dīnarūpo hyahaṃ jāto maṃdabhāgyastathā punaḥ /
tenāhaṃ pṛcchito vipra kasmādbhavānpraśocati

kenābhiprāyabhāvena duḥkhameva bhunakti vai /
tenetyuktosmi vipreṃdra jñāninā yoginā tadā

sumūḍhena mayā tasya pūrvavṛttāṃtameva hi /
tamevaṃ śrāvitaṃ sarvaṃ sarvajñatvaṃ kathaṃ vrajet

etadarthaṃ mahāduḥkhī bhavānmama gatiḥ sadā /
sa covāca mahātmā me sarvaṃ jñānasya kāraṇam

iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre dvāviṃśatyadhikaśatatamo'dhyāyaḥ