Padma Purana · Chapter 1.80

vaiśaṃpāyana uvāca-
śruto graheśvarasyaiṣa prabhāvastvatprasādataḥ/
ravyādīnāṃ grahāṇāṃ ca sādhanaṃ no vada dvija

ke te ravyādayasteṣāṃ kathaṃ toṣaḥ kathaṃ priyam/
kāle deśe tu saṃprāpte darśanaṃ tacchivāśivam

vyāsa uvāca-/
grahādayo ye loke tu bhuṃjaṃti puṇyapātakam/
śivāśivaṃ ca kurvaṃti viśvakarmakṣayāya vai

sūraḥ kāloṃtako jñeyo janeṣu ca graheṣu ca/
tigmasaumyācca yogātsa nigrahānugrahe prabhuḥ

grahabhāvācca tasyaiva saṃtoṣaṃ nigadāmyaham/
udumbarapalāśābhyāṃ pallavābhyāṃ juhoti yaḥ

ākṛṣṇeneti maṃtreṇa mūlakenātha śāṃtaye/
juhuyādājyayuktābhyāmabhīṣṭaphalahetave

śāṃtaye sarvarogāṇāṃ vadhabaṃdhavimocane/
ekaikena tu maṃtreṇa hotavyaṃ ca śataṃśatam

śitaṃ cacchāgalaṃ dadyātsūrāyādityavāsare/
bhojayedbrāhmaṇānśaktyā havyakavyairmanoharaiḥ

saptamyāṃ ca site pakṣe paṃcadaśyāṃ tathaiva ca/
rogādvimucyate rogī na rogātkṛcchrameṣyati

paramaṃ cāmaraṃ satvamābrahmastaṃbamātrake/
brahmāṃḍe cāṇumātre ca sūraḥ saṃbhāvayiṣyate

saṃhārāṃtaṃ kramātsarvamutpattisthitikāraṇāt/
prāṇasarge janānāṃ sa pātā viśvacarastanau

mṛtyukāle tanormadhyātprāṇena saha gacchati/
śīrṣāntasthaḥ sadā caṃdro dviraṣṭakalayā yutaḥ

aharniśaṃ sudhāvṛṣṭiṃ dehe varṣatyadhomukhaḥ/
jaṃtavastena jīvaṃti mahāsatvānumātrakāḥ

urvyāṃ sasyāni puṣṇāti tathā sthāvarajaṃgamān/
etābhyāṃ puṣpavadbhyāṃ ca dhāritaṃ janitaṃ jagat

tayorārādhanātpuṣṭiḥ sadā puṇyāparārdhikā/
sādhayetsarvakāryāṇi sādhakaḥ sarvadā śuciḥ

na pūjayati yo mohātsudhāṃśuṃ mānavādhamaḥ/
āyustasya kṣayaṃ yāti narakaṃ cādhigacchati

niṣkalaṃka kalādhāra gaṃgādhara śiromaṇe/
dvitīyāyāṃ jagannātha tubhyaṃ caṃdra namostu te

tithimanyāmanuprāpya namaskāraṃ vidhorapi/
prakaroti naro yastu sobhīṣṭaṃ phalamāpnuyāt

atrinetrodbhava śrīmankṣīroda mathanodbhava/
maheśamukaṭāvāsa tubhyaṃ caṃdra namostute

divyarūpa namastubhyaṃ sudhākara jagatpate/
śuklapakṣe tathā kṛṣṇe triyāmāyāṃ vidurbudhāḥ

ūm̐ hrāṃ hrīṃ somāya namaḥ iti japyamaṃtraḥ/
prabhāte japanīyaḥ-/
evaṃ yaḥ pūjayetsomaṃ śrāvayecca śṛṇoti vā/
sa pīyūṣasamo loke bhavejjanmani janmani

evaṃ sahasranāmnā yaḥ stauti pūjayate bhuvi/
so'kṣayaṃ labhate svargaṃ punarāvṛttidurlabham

iti somapūjā-/
pittale bhājane kāṃsye dadhipūrṇe ghṛte śive/
nyūno'dhikastu vibhavācchrutvā karmavimatsaraḥ

svarṇe vā rājate vāre saumye kṛṣṇabhave budham/
saṃsthāpya sarvasaṃsthāne dadyādbahusutāya ca

paraṃ bhavati saubhāgyaṃ pīyūṣādadhikaṃ bhṛśam/
strīṇāṃ ca puruṣāṇāṃ ca na daurbhāgyaṃ kadācana

rūpasaubhāgyakāmohaṃ dadhipūrṇaṃ ca bhājanam/
dadāmi kāṃsyapātrasthaṃ dehi saubhāgyarūpakam

dvijāya vākyapūrveṇa dadyādvimatsaro naraḥ/
śaktito dakṣiṇā deyā tathā vastrādikaṃ navam

bhojyānnaṃ sarvasampūrṇaṃ tāṃbūlaṃ sumanoharam/
puṣpamālādikaṃ dadyādrūpasaubhāgyahetave

evaṃ yaḥ kurute dānaṃ somoddiṣṭaṃ dvijātaye/
svarloke naraloke vā rūpasaubhāgyabhugbhavet

iti śrīpādmapurāṇe prathame sṛṣṭikhaṃḍe somārcanaṃ/
nāmāśītitamo'dhyāyaḥ