Padma Purana · Chapter 1.79

vyāsa uvāca-
madhyadeśe svarāṭ samrāṭ bhadreśvara iti śrutaḥ/
tapobhirbahubhiḥ pūto vratairnānāvidhairapi

devāṃstu pūjayennityaṃ subhāvena sadā khalu/
tasya savye'bhavatkuṣṭhaṃ kare śvetamajāyata

tato bhiṣakprayogācca lakṣaṇaṃ dṛśyate purā/
āhūya dvijamukhyāṃśca maṃtriṇaḥ sobravīdvacaḥ

rājovāca-/
kilbiṣaṃ me kare viprā duḥsahaṃ lokagarhitaṃ/
tasmātpuṇyaṃ mahākṣetraṃ yatra tyakṣyāmi vigrahaṃ

ājñāpayata dharmajñāḥ paralokahitāya vai/
vaṃśahīnasya me vīrāḥ pretyāmutra hitaṃ ca yat

tadbrūta suprasannā ma uddiṣṭaṃ yatkaromyahaṃ/
dvijā ūcuḥ/
parityakte tvayā rāṣṭre dharmaśīlena dhīmatā

naṣṭaṃ jagadidaṃ rājaṃstasmānno vaktumarhasi/
ayamasya pratīkāro hyasmābhiravagamyate

sūraṃ maṃtrairmahādevaṃ yatnādārādhaya prabho/
rājovāca-
kenopāyena vipreṃdrāstoṣayiṣyāmi bhāskaraṃ

amedhyenātha kuṣṭhena lokānāṃ garhitena ca/
adṛśyaḥ sarvabhūtānāṃ garhitosmi dvijātayaḥ

kiṃ kariṣyāmi rājyaṃ ca kiṃ syādārādhanena tu/
dvijā ūcuḥ-/
atra sthitvā svarājye tu samupāsya virocanaṃ

pramucya kilviṣādghorātsvargaṃ mokṣaṃ ca lapsyase/
etacchrutvā tu rājeṃdraḥ praṇipatya dvijottamān

ākārṣīttasya sūryasya paramārādhanaṃ ca yat/
nityapūjāṃ tathā maṃtrairupahārairvilepanaiḥ

phalairnānāvidhairarghairakṣatātapa taṃḍulaiḥ/
japāpuṣpārkaparṇaiśca karavīrakaraṃjakaiḥ

raktakuṃkumasindūraistathā vāsaṃtikādibhiḥ/
sugaṃdhakadalīpatraistatphalaiḥ sumanoharaiḥ

arghyamauduṃbare kṛtvā sadā sūryāya pārthivaḥ/
ādityasaṃmukho datte sadā maṃtripurohitaiḥ

mahiṣībhistathā cārgho bhoginībhiḥ samaṃtataḥ/
sarvairaṃtaḥpurasthaiśca sapatnīkaiśca rakṣibhiḥ

ceṭavargaistathānyaiśca dīyate'rgho dinedine/
arkaśāṃtibhiratyugraiḥ stotramaṃtrādibhiḥ paraiḥ

mūlamaṃtrānyamaṃtraiśca yajaṃti sma divākaraṃ/
tathārkāṃgavrataṃ cānyatkṛtaṃ taiḥ susamāhitaiḥ

kramātsamāṃsamāsādya rogasyāṃtaṃ gato nṛpaḥ/
bādhite cāmaye ghore sa rājā nikhilaṃ jagat

niyamya kārayāmāsa kalye ca yājanavratam/
evameva japāpuṣpaṃ sugaṃdhaṃ kadalīphalam

bāṇairjāyābhirālabhyamarkaparṇānyapuṣpakaṃ/
evameva mahāpuṇyaṃ kṛtvā sarvajanapriyaṃ

haviṣyānno nirāhāro jano yajati bhāskaram/
evameva tribhirvargairarcitastairvibhākaraḥ

saṃtuṣṭo bhūpamāgamya kṛpayā cābravīdvacaḥ/
varaṃ varaya cābhīṣṭaṃ yaste manasi vartate

sarveṣāṃ vo hitārthāya sānugaḥ puravāsinām/
rājovāca-/
yadīcchasi varaṃ dātuṃ sarvalocanamatpriyam

sarveṣāṃ naḥ paraṃ svargaṃ tvatsakāśe bhavatviti/
sūrya uvāca-/
amātyāste dvijā viprāḥ sadārāssaparicchadāḥ

navīnayauvanāḥ śuddhā yāvadābhūtasaṃplavam/
tiṣṭhaṃtu matpure ramye sarvabhogairnirāmayāḥ

suradrumaiḥ susaṃpūrṇaiḥ prāsādairdrumakalpakaiḥ/
pramadābhirmahābhāga nṛtyagītādibhiḥ paraiḥ

paṃcakalpāṃtare rājā manvādau tvaṃ bhaviṣyasi/
amī te manujā bhūpa purasthāśca purodhasaḥ

tathā janapadasthāśca vidvāṃso dhanino narāḥ/
tatra matto varaṃ labdhvā sukhaṃ svargamavāpsyatha

evamuktvā jagaccakṣustatraivāṃtaradhīyata/
tato bhadreśvaro rājā sapuro divi modate

tatra kīṭādayo ye ca te pītāḥ sasutādayaḥ/
svarge devadrume bhogyaṃ kurvaṃti mahadadbhutam

evameva nṛpā viprā munayaśśaṃsitavratāḥ/
ye ca kṣatrādayo varṇāssūra svargaṃ yayurdrutam

kaiścidabhyarthitaṃ vittaṃ putradārāstathāparaiḥ/
sukhaṃ svargaṃ tathārogyaṃ bhāskarasya prasādataḥ

puṇyakūṭamidaṃ bhadraṃ yaḥ paṭhenmānavaḥ śuciḥ/
sarvapāpakṣayastasya rudravatpūjito bhuvi

sarvasākṣī bhavetsvarge varado bhāskarapriyaḥ/
śṛṇoti saṃyato martyaḥ sobhīṣṭaṃ phalamāpnuyāt

pāragaḥ sarvapāpānāṃ bhāskarasyaiva saṃsadi/
vāvadūko bhavennityaṃ śravaṇātpuṇyavāndhanī

idaṃ guhyātiguhyaṃ ca bhāskareṇa pracāritaṃ/
idaṃ yamāya kathitaṃ kṣitau vyāsena kīrtitam

iti śrīpādmapurāṇe prathame sṛṣṭikhaṃḍe bhadreśvarākhyānaṃ nāmaikonāśītitamo'dhyāyaḥ