પદ્મ પુરાણ · અધ્યાય 1.79

વ્યાસ ઉવાચ-
મધ્યદેશે સ્વરાટ્ સમ્રાટ્ ભદ્રેશ્વર ઇતિ શ્રુતઃ।
તપોભિર્બહુભિઃ પૂતો વ્રતૈર્નાનાવિધૈરપિ

દેવાંસ્તુ પૂજયેન્નિત્યં સુભાવેન સદા ખલુ।
તસ્ય સવ્યેઽભવત્કુષ્ઠં કરે શ્વેતમજાયત

તતો ભિષક્પ્રયોગાચ્ચ લક્ષણં દૃશ્યતે પુરા।
આહૂય દ્વિજમુખ્યાંશ્ચ મંત્રિણઃ સોબ્રવીદ્વચઃ

રાજોવાચ-।
કિલ્બિષં મે કરે વિપ્રા દુઃસહં લોકગર્હિતં।
તસ્માત્પુણ્યં મહાક્ષેત્રં યત્ર ત્યક્ષ્યામિ વિગ્રહં

આજ્ઞાપયત ધર્મજ્ઞાઃ પરલોકહિતાય વૈ।
વંશહીનસ્ય મે વીરાઃ પ્રેત્યામુત્ર હિતં ચ યત્

તદ્બ્રૂત સુપ્રસન્ના મ ઉદ્દિષ્ટં યત્કરોમ્યહં।
દ્વિજા ઊચુઃ।
પરિત્યક્તે ત્વયા રાષ્ટ્રે ધર્મશીલેન ધીમતા

નષ્ટં જગદિદં રાજંસ્તસ્માન્નો વક્તુમર્હસિ।
અયમસ્ય પ્રતીકારો હ્યસ્માભિરવગમ્યતે

સૂરં મંત્રૈર્મહાદેવં યત્નાદારાધય પ્રભો।
રાજોવાચ-
કેનોપાયેન વિપ્રેંદ્રાસ્તોષયિષ્યામિ ભાસ્કરં

અમેધ્યેનાથ કુષ્ઠેન લોકાનાં ગર્હિતેન ચ।
અદૃશ્યઃ સર્વભૂતાનાં ગર્હિતોસ્મિ દ્વિજાતયઃ

કિં કરિષ્યામિ રાજ્યં ચ કિં સ્યાદારાધનેન તુ।
દ્વિજા ઊચુઃ-।
અત્ર સ્થિત્વા સ્વરાજ્યે તુ સમુપાસ્ય વિરોચનં

પ્રમુચ્ય કિલ્વિષાદ્ઘોરાત્સ્વર્ગં મોક્ષં ચ લપ્સ્યસે।
એતચ્છ્રુત્વા તુ રાજેંદ્રઃ પ્રણિપત્ય દ્વિજોત્તમાન્

આકાર્ષીત્તસ્ય સૂર્યસ્ય પરમારાધનં ચ યત્।
નિત્યપૂજાં તથા મંત્રૈરુપહારૈર્વિલેપનૈઃ

ફલૈર્નાનાવિધૈરર્ઘૈરક્ષતાતપ તંડુલૈઃ।
જપાપુષ્પાર્કપર્ણૈશ્ચ કરવીરકરંજકૈઃ

રક્તકુંકુમસિન્દૂરૈસ્તથા વાસંતિકાદિભિઃ।
સુગંધકદલીપત્રૈસ્તત્ફલૈઃ સુમનોહરૈઃ

અર્ઘ્યમૌદુંબરે કૃત્વા સદા સૂર્યાય પાર્થિવઃ।
આદિત્યસંમુખો દત્તે સદા મંત્રિપુરોહિતૈઃ

મહિષીભિસ્તથા ચાર્ઘો ભોગિનીભિઃ સમંતતઃ।
સર્વૈરંતઃપુરસ્થૈશ્ચ સપત્નીકૈશ્ચ રક્ષિભિઃ

ચેટવર્ગૈસ્તથાન્યૈશ્ચ દીયતેઽર્ઘો દિનેદિને।
અર્કશાંતિભિરત્યુગ્રૈઃ સ્તોત્રમંત્રાદિભિઃ પરૈઃ

મૂલમંત્રાન્યમંત્રૈશ્ચ યજંતિ સ્મ દિવાકરં।
તથાર્કાંગવ્રતં ચાન્યત્કૃતં તૈઃ સુસમાહિતૈઃ

ક્રમાત્સમાંસમાસાદ્ય રોગસ્યાંતં ગતો નૃપઃ।
બાધિતે ચામયે ઘોરે સ રાજા નિખિલં જગત્

નિયમ્ય કારયામાસ કલ્યે ચ યાજનવ્રતમ્।
એવમેવ જપાપુષ્પં સુગંધં કદલીફલમ્

બાણૈર્જાયાભિરાલભ્યમર્કપર્ણાન્યપુષ્પકં।
એવમેવ મહાપુણ્યં કૃત્વા સર્વજનપ્રિયં

હવિષ્યાન્નો નિરાહારો જનો યજતિ ભાસ્કરમ્।
એવમેવ ત્રિભિર્વર્ગૈરર્ચિતસ્તૈર્વિભાકરઃ

સંતુષ્ટો ભૂપમાગમ્ય કૃપયા ચાબ્રવીદ્વચઃ।
વરં વરય ચાભીષ્ટં યસ્તે મનસિ વર્તતે

સર્વેષાં વો હિતાર્થાય સાનુગઃ પુરવાસિનામ્।
રાજોવાચ-।
યદીચ્છસિ વરં દાતું સર્વલોચનમત્પ્રિયમ્

સર્વેષાં નઃ પરં સ્વર્ગં ત્વત્સકાશે ભવત્વિતિ।
સૂર્ય ઉવાચ-।
અમાત્યાસ્તે દ્વિજા વિપ્રાઃ સદારાસ્સપરિચ્છદાઃ

નવીનયૌવનાઃ શુદ્ધા યાવદાભૂતસંપ્લવમ્।
તિષ્ઠંતુ મત્પુરે રમ્યે સર્વભોગૈર્નિરામયાઃ

સુરદ્રુમૈઃ સુસંપૂર્ણૈઃ પ્રાસાદૈર્દ્રુમકલ્પકૈઃ।
પ્રમદાભિર્મહાભાગ નૃત્યગીતાદિભિઃ પરૈઃ

પંચકલ્પાંતરે રાજા મન્વાદૌ ત્વં ભવિષ્યસિ।
અમી તે મનુજા ભૂપ પુરસ્થાશ્ચ પુરોધસઃ

તથા જનપદસ્થાશ્ચ વિદ્વાંસો ધનિનો નરાઃ।
તત્ર મત્તો વરં લબ્ધ્વા સુખં સ્વર્ગમવાપ્સ્યથ

એવમુક્ત્વા જગચ્ચક્ષુસ્તત્રૈવાંતરધીયત।
તતો ભદ્રેશ્વરો રાજા સપુરો દિવિ મોદતે

તત્ર કીટાદયો યે ચ તે પીતાઃ સસુતાદયઃ।
સ્વર્ગે દેવદ્રુમે ભોગ્યં કુર્વંતિ મહદદ્ભુતમ્

એવમેવ નૃપા વિપ્રા મુનયશ્શંસિતવ્રતાઃ।
યે ચ ક્ષત્રાદયો વર્ણાસ્સૂર સ્વર્ગં યયુર્દ્રુતમ્

કૈશ્ચિદભ્યર્થિતં વિત્તં પુત્રદારાસ્તથાપરૈઃ।
સુખં સ્વર્ગં તથારોગ્યં ભાસ્કરસ્ય પ્રસાદતઃ

પુણ્યકૂટમિદં ભદ્રં યઃ પઠેન્માનવઃ શુચિઃ।
સર્વપાપક્ષયસ્તસ્ય રુદ્રવત્પૂજિતો ભુવિ

સર્વસાક્ષી ભવેત્સ્વર્ગે વરદો ભાસ્કરપ્રિયઃ।
શૃણોતિ સંયતો મર્ત્યઃ સોભીષ્ટં ફલમાપ્નુયાત્

પારગઃ સર્વપાપાનાં ભાસ્કરસ્યૈવ સંસદિ।
વાવદૂકો ભવેન્નિત્યં શ્રવણાત્પુણ્યવાન્ધની

ઇદં ગુહ્યાતિગુહ્યં ચ ભાસ્કરેણ પ્રચારિતં।
ઇદં યમાય કથિતં ક્ષિતૌ વ્યાસેન કીર્તિતમ્

ઇતિ શ્રીપાદ્મપુરાણે પ્રથમે સૃષ્ટિખંડે ભદ્રેશ્વરાખ્યાનં નામૈકોનાશીતિતમોઽધ્યાયઃ