Padma Purana · Chapter 1.65

vyāsa uvāca-/
nāṃdīmukheṣu sarveṣu pūjayedyo gaṇādhipam/
tasya sarvo bhavedvaśyaḥ puṇyaṃ bhavati cākṣayam

gaṇānāṃ tveti maṃtreṇa sarvayajñaghaṭeṣu ca/
sarvasiddhimavāpnoti svargaṃ mokṣaṃ labhennaraḥ

mṛṇmaye pratimāyāṃ ca citre cātha dṛṣaṇmaye/
dvāradāruṇi pātre ca heraṃbaṃ lekhayedbudhaḥ

anyasminnapi deśe tu satataṃ dṛṣṭigocare/
sthāpayitvā tu heraṃbaṃ śaktyā yaḥ pūjayedbudhaḥ

tasya kāryāṇi siddhyaṃti dayitāni samaṃtataḥ/
na vighnaṃ jāyate kiṃcittrailokyaṃ vaśamānayet

vidyārthī labhate vidyāṃ vedaśāstrasamudbhavām/
anyāṃ ca śilpividyāṃ ca vijayāṃ svargadāyinīm

dhanārthī vipulaṃ vittaṃ kanyāṃ sādhvīṃ manoramām/
aiśvaryaṃ dharmasādhyaṃ ca tanayaṃ kulamokṣadam

na rogaiḥ pīḍyate kaścinna grahaiḥ pretayonibhiḥ/
śṛṃgibhirnāpi rakṣobhirvidyudbhirvanataskaraiḥ

na rājā kupyati gṛhe na ca mārī pravartate/
na daurbhikṣyaṃ na daurbalyaṃ pūjayitvā vināyakam

abhipretārthasiddhyarthaṃ pūjito yaḥ surairapi/
sarvavighnachide tasmai gaṇādhipataye namaḥ

maṃtraścāyaṃ ॐ namo gaṇapataye/
nārāyaṇapriyaiḥ puṣpairanyaiścāpi sugaṃdhibhiḥ/
modakaiḥ phalamūlaiśca dravyaiḥ kālodbhavaistathā

dadhidugdhaiḥ priyairvādyairapi dhūpasugaṃdhibhiḥ/
pūjayedgaṇapaṃ yastu sarvasiddhimavāpnuyāt

viśeṣāttasya liṃge tu yo dadāti vasupriyam/
pūjopakaraṇaṃ vastraṃ sarvaṃ lakṣaguṇaṃ bhavet

deśe ca bhārate varṣe vanitā pūrvasannidhau/
lauhityadakṣiṇe tīre liṃgarūpo vināyakaḥ

haragaurīsamādeśāddevānāṃ saṃmatena ca/
sthito lokapraśāṃtyarthaṃ sarvavighnavināśanāt

pūjayitvā tu taṃ devaṃ śaktito dravyasaṃcayaiḥ/
vināyakatvamāpnoti vedaśāstrārthapāragaḥ

sakṛtpradakṣiṇaṃ kṛtvā dṛṣṭvā spṛṣṭvā tu mānavaḥ/
akṣayaṃ labhate svargaṃ sadā devaiḥ prapūjyate

saṃsargiṇāṃ ca mlechānāṃ gatyarthaṃ sutapasvinām/
putrārthaṃ sarvalokānāṃ tatra śaṃbhurvināyakaḥ

kṛtvābhiṣekaṃ lauhitye spṛśedyastu gaṇādhipam/
saptajanmakṛtātpāpānmucyate nātra saṃśayaḥ

na vaidhavyaṃ na kārpaṇyaṃ na śokaṃ na tu matsaram/
vināyakaṃ samāsādya janmajanmani saṃlabhet

punaḥ siddhiḥ punarbhogyaṃ punaḥ kīrtiḥ punarbalam/
pūjayitvā tu gaṇapaṃ narasya nātra saṃśayaḥ

asya pūjāmakṛtvā ca sarvābhīṣṭaṃ vinaśyati/
tatra devāśca suprītā brahmaviṣṇuharādayaḥ

maghono gaṇapasyātha pūjāvirahitasya ca/
athāsurairmahāvīryairhiraṇyākṣamukhai raṇe

maghavā tu jito vīryāddhiraṇyākṣeṇa vai tadā/
tatassurāśca nirvīryā yāvadvarṣaśataṃ purā

daivāsure mahāyuddhe surāṇāṃ ca parājayaḥ/
tato devādhideve tu śive devairniveditam

bhagavannasurairno hi jitaṃ rājyaṃ gatā makhāḥ/
etasminnaṃtare śaṃbhurdevānvacanamabravīt

heraṃbāya varo datta umayā prītayā mayā/
pūjayā te parā siddhirdevādīnāṃ bhavatviti

avajānāti yo mohātpuruṣastu mahotsave/
na bhavettasya siddhiśca raṇe cāpi parājayaḥ

mahāmakhena yuṣmābhiḥ pūjā gaṇapateḥ kṛtā/
helayā na kṛtā mohāttasmātprāptaḥ parājayaḥ

śīghraṃ gacchata vai puṇyāṃ gaṇapasya mahātmanaḥ/
pūjāṃ kuruta dharmajñā jayastūrṇaṃ bhaviṣyati

tato haramukhācchrutvā vacaḥ kṣemaparaṃ hitam/
prahṛṣṭā vibudhāssarve gaṇapasya puraḥ sthitāḥ

devā ūcuḥ-/
gaṇādhipa namastubhyaṃ sarvadevaikapālaka/
svargabhogaprada prītyā heraṃba tvāṃ natāḥ sma ha

jayadaṃ sarvayuddheṣu siddhidaṃ sarvakarmasu/
mahāmāyaṃ mahākāyaṃ heraṃba tvāṃ natāḥ sma ha

ekadaṃtaṃ mahāprājñaṃ laṃbatuṃḍaṃ vināyakam/
devaṃ maharṣidevānāṃmiṃdrasya ca natāḥ sma ha

yatte purārcanaṃ yajñe na kṛtaṃ tatkṣamasva naḥ/
surāṇāṃ ca giraḥ śrutvā gaṇapo vākyamabravīt

yuṣmābhirvriyatāṃ devā varo matto hi vāṃcchitaḥ/
tataḥ śakrādayaḥ sarve bṛhaspatipurogamāḥ

ūcurgaṇapatiṃ devā jayosmākaṃ bhavatviti/
devānāṃ vacanaṃ śrutvā gaṇeśo vākyamabravīt

bāḍhameva suraśreṣṭhā jayo vo bhavatu drutam/
tato devagaṇāssarve harṣanirbharamānasāḥ

gaṇeśaṃ pūjayāmāsurgaṃdhasāraistu maṇḍanaiḥ/
divyadhūpaiḥ suvastraiśca kusumairnandanodbhavaiḥ

pārijātādibhiḥ puṣpairanyairdevamanoharaiḥ/
pūjito gaṇapo devairuvāca surasattamān

gacchadhvaṃ vibudhā devaṃ viṣṇumadbhutasāhasam/
sa vidhāsyati vaḥ kāmaṃ vāṃcchitaṃ ca tataḥ surāḥ

svaṃsvaṃ rathaṃ samāruhya gatāste harimavyayam/
pītāṃbaraṃ namaskṛtya ūcurdevagaṇā mudā

harātmajaṃ tu saṃprāpya pūjayitvā gaṇādhipam/
āgatāstvatsakāśaṃ vai mahātmannadya keśava

etacchrutvā tu devānāṃ vacanaṃ hariravyayaḥ/
yathātathyamuvācedaṃ haniṣye daityapuṃgavān

śrutvā vāgamṛtaṃ devā nārāyaṇamukhāccyutam/
hṛṣṭāśca sumudāviṣṭā dravyairiṣṭaiḥ samarcayan

punarviṣṇuruvācedaṃ devāniṃdrapurogamān/
svaṃsvaṃ balaṃ samāhṛtya sajjī bhavata vijvarāḥ

hariṣye tāndurācārānbalaṃ caiva samaṃtataḥ/
astravṛṃdaṃ tu saṃgṛhya yūyaṃ tiṣṭhata nirbhayāḥ

mādhavasya vacaḥ śrutvā pragatāḥ surapuṃgavāḥ/
vimānāni samāruhya sarve divyāstradhāriṇaḥ

devānāṃ harṣavākyāni daityacāraiḥ śrutāni vai/
rājānaṃ kathayāmāsurhiraṇyākṣaṃ mahābalam

śrutvā daityapatistatra cukopāti mahābalaḥ/
sacivāṃstu samāhūya kruddho vacanamabravīt५०

adhuneṃdrādidevāśca nikhilāḥ krūrabuddhayaḥ/
mādhavaṃ ca parīpsantaḥ śaṃbhau sarvaṃ nyavedayan

kathaṃ jayaṃ ca lapsyāmo daityavṛṃdetidāruṇe/
tripurāriruvācedaṃ gaṇeśaṃ yajatāmarāḥ

pūjayitvā tu taṃ devaṃ jeṣyathāsuradānavān/
tato devagaṇairhṛṣṭaiḥ pūjito gaṇanāyakaḥ

gaṇādhipena tuṣṭena krūro datto varo mahān/
jeṣyathādyāsurānsarvāṃstato devā mudānvitāḥ

hariṃ nivedayāmāsurasmadvadhaparīpsavaḥ/
harerbāḍhamupaśrutya rathinaḥ śastrapāṇayaḥ

yuddhārthamadhitiṣṭhaṃti nirjarāstvabhayāmayi/
yasya yā śaktirastīha devāñjetuṃ vadatvalam

tato rājñovacaḥ śrutvā madhurvacanamabravīt/
jeṣyāmi ca hariṃ rājansahāyaṃ me niyojaya

jite nārāyaṇe devāḥ sabhayāstridaśā dhruvam/
tasmānnārāyaṇo'smākaṃ bhāgaḥ sarvapuraṃjayaḥ

tato dhuṃdhuśca suṃdaśca kālakeyo mahābalaḥ/
sahāyaśca madhostasya jeṣyāmo mādhavaṃ nṛpa

sarvadaityabale mukhyāścatvāro dṛḍhavikramāḥ/
kālamṛtyusamā vīrāḥ sarvāstravidhipāragāḥ

balastatrābravīdvākyaṃ yasminjaya upasthitaḥ/
taṃ ca jeṣyāmi jiṣṇuṃ ca pratijñā me dṛḍhā nṛpa

namuciśca muciścaiva bhrātarau baladarpitau/
ūcatustau nṛpaṃ hyāvāṃ jeṣyāvo vai balādbalau

jambhaścaivābravīdvākyamiṃdramiṃdrapurogamān/
jeṣyāmi nātra saṃdeho daityā bhavata vijvarāḥ

tripuraścābravīdvākyaṃ jeṣyāmi ca vināyakam/
tāvadūce'tha senānīrmayo devāṃtako balī

kuberaṃ pratirakṣobhiḥ sarvāṃścaiva hiraṇyakān/
etasminnaṃtare tatra nārado munisattamaḥ

gatvovāca hiraṇyākṣaṃ jiṣṇudūtohamāgataḥ/
rājyaṃ tyaja svavācā naḥ prāṇeṣu yadi te hitam

na cedyudhyasva māmadya na vā gaccha rasātalam/
tataḥ kopāduvācedaṃ nāradaṃ munisattamam

ahiṃsyastvaṃ brāhmāṇādya gaccha tūrṇaṃ mamāgrataḥ/
devānāṃ ca vipattiṃ ca kadanaṃ nidhanaṃ puraḥ

paśya vipra kṣaṇenāṃtaṃ prāptaṃ hariharādikam/
evamuktvā sa daityeṃdro balādhyakṣamuvāca ha

sajjīkṛtya balaṃ sarvānrathāṃścānayata drutam/
daityarājavacaḥ śrutvā balādhyakṣaḥ samaṃtataḥ

balānyāhūya sahasā saṃtrastāstūrṇamāgatāḥ/
koṭikoṭisahasrāṇi akṣauhiṇyo balāni ca

ekaikasya ca vīrasya vāhanāni mahāṃti ca/
syaṃdanāni vicitrāṇi gajoṣṭrāśvakharānapi

siṃhavyāghralulāyāṃśca samāruhya yayustadā/
vādyaiḥ sarvaiśca bhūyiṣṭhaiḥ siṃhanādairbhayānakaiḥ

diśastu pūrayāmāsussindhuvelācalā dharāḥ/
sarvalokāśca vitresuḥ samudrāśca cakaṃpire

devaduṃdubhayo neduḥ sarvadevaiḥ samīritāḥ/
vādyaiśca vividhairanyairvāyupūrṇairghanasvanaiḥ

sarvalokābhayatrastā ye ca trailokyavāsinaḥ/
bhraṣṭakāmāgatākāśaṃ ghoraṃ tīvraṃ mahāhavam

parighaiḥ pāśaśūlaiśca khaḍgayaṣṭiparaśvadhaiḥ/
śaraiśca niśitairghorairjaghnuranyonyamāhave

śastrāstrairbahudhāmuktairdiśaḥ sarvā niraṃtaram/
vigṛheṣu dharaṇyāṃ ca parvateṣu jaleṣu ca

devasthāne tathākāśe parvatāgreṣu sānuṣu/
gahvareṣu mahāraṇye tayoryuddhamavartata

puṣkalādi ghanānāṃ ca varṣadhārā jalaṃ yathā/
pataṃtyastrāṇi sainyeṣu śataśotha sahasraśaḥ

kecitpetuḥ pṛthivyāṃ tu śaraiḥ saṃbhinnavigrahāḥ/
śaktibhirmusalaiścānye chatraśūlaparaśvadhaiḥ

patitāḥ saṃmukhe śūrā yuddheṣu nyāyavartinaḥ/
gacchaṃti surasadmāni svāmyarthe ye tvabhīravaḥ

ye cānye kātarāḥ pāpā haṃtāro vimukhānraṇe/
anyāyairye ca yoddhāraste yānti yamamaṃdiraṃ

tridivasthā gajārohāḥ saindhavasthāstathāparān/
rathasthāṃśca rathārohāḥ padagāṃśca padātayaḥ

parasparaṃ vinighnaṃti śūrā yuddhābhikāṃkṣiṇaḥ/
muditāḥ satvasaṃpannā dharmiṣṭhā balasaṃvṛtāḥ

keṣāṃcidvāhavaśchinnā musalairbhinnamastakāḥ/
keśāśśirāṃsi vastrāṇi nipeturdharaṇītale

madhyacchinnāstathā bhinnāḥ petururvyāṃ mahābalāḥ/
khaḍgapātaistathā cograiśchrinnabhinnāḥ paraśvadhaiḥ

gāmeva patitā dhīrā divyālaṃkārabhūṣitāḥ/
pradīptobhūddharādeśo vīrairnāgairhayai rathaiḥ

vividhābharaṇairnaṣṭaiḥ patākābhiśca ketubhiḥ/
tato vasuṃdharā sarvā saśailavanakānanā

rudhiraughaplutā tatra vibudhāsurayoryudhi/
kravyādairbahubhistatra khādito dravyasaṃcayaḥ

lohitaṃ pracuraṃ pītaṃ rakṣobhiśca vṛkādibhiḥ/
anyairmahāgaṇaireva kṣatajaṃ pavanānvitam

khāditaṃ prītimadbhiśca pherugṛdhragaṇairmudā/
etasminnaṃtare sūriḥ surapūjyo bṛhaspatiḥ

mṛtasaṃjīvanīvidyāṃ surāṇāṃ saṃjajāpa ha/
viśalyakaraṇīṃ divyāṃ brahmavidyāṃ mahābalāṃ

tato dhanvaṃtarirvidvānsuravaidyo manojavaḥ/
auṣadhaistatprayogaiśca raṇe paryaṭate mudā

tatra devāśca jīvaṃti ye mṛtāśca mahāhave/
avraṇā balasaṃpannāḥ prayudhyaṃti bhṛśaṃ punaḥ

evaṃ śatasahasraṃ tu gaṇaṃ daityasya coddhatam/
patitaṃ puṇyayogācca śarairnirbhinnakaṃdharam

tatastu jayaśabdena naṃdaṃti siddhacāraṇāḥ/
ṛṣayaḥ khecarāścānye ye caivāpsarasāṃ gaṇāḥ

gītiṃ gāyaṃti gaṃdharvāḥ śaśaṃsuḥ paramarṣayaḥ/
atha kruddho mahātejā daityamukhyo mahābalaḥ

kālakeya iti khyātaḥ senānīrdaityapasya ca/
syandanastho mahāvīryo dhanurādāya tatra ca

jaghāna surasaṃghāṃstānnartayāmāsa bhūtale/
niraṃtaraśaraugheṇa cchāditaṃ gaganaṃ tadā१००

nipataṃti śarāḥ sainye koṭikoṭi sahasraśaḥ/
nipataṃti tato devāḥ saṃyugeṣvanivartinaḥ

rudhirodgāriṇassarve siddhagaṃdharvakinnarāḥ/
viśikhaiḥ pīḍitā devā nipeturdharaṇītale

keciccharaśatairbhinnāssahasrairayutaistathā/
petururvyāṃ mahāvīryā ye raṇe surapuṃgavāḥ

vyathitāścābhavansarve syaṃdanasthā divaukasaḥ/
śaraiḥ pravyathitāste tu sthātuṃ śaktā na saṃmukhe

tenāvagāhitaṃ sainyaṃ gajeneva sarovanam/
śaraistasyārditā devā vajrānalasamaprabhaiḥ

na śekuḥ samare sthātuṃ maghavaṃtaṃ yayustadā/
citraratha iti khyāto devaśśastrabhṛtāṃ varaḥ

yayau syaṃdanamāruhya yuddhaṃ prati dhanurdharaḥ/
abravīdvacanaṃ sopi senānyaṃ tu mahāsuram

yathā haṃsi mahāśūra surasenāṃ mudānvitaḥ/
sa tvaṃ praśaṃsanīyaśca śūrosi surasaṃmataḥ

hiraṇyākṣapriyaṃ karma kṛtaṃ yuddhe tvayādhunā/
idānīṃ mama bāṇaiśca gacchasva yamamaṃdiram

tataśca kālakeyastu smito vacanamabravīt/
puraiva vijito deva gaṇaḥ sarvaḥ pralīlayā

idānīṃ tu sthitaṃ yuddhe balaṃ sarvaṃ tu helayā/
yadi te nidhane prītirastīha surapuṃgava

ebhistvāṃ niśitairbāṇairnayāmi yamamaṃdiram/
ityuktvā paramakruddho bāṇamaṃtakasannibham

jaghāna samare vīrastribhiściccheda soṃbare/
punarbāṇāṃśca samare yojayitvā drutaṃ ruṣā

jaghāna pracurāndaityāṃstāṃścakartta sa lāghavāt/
tatonyonyaṃ śaraistīkṣṇaiḥ kālānalasamaprabhaiḥ

yuddhe dhanuṣmatāṃ śreṣṭhaściccheda bhuvi vegataḥ/
tadyuddhamabhavaddevadaityayordharmato bhṛśam

draṣṭukāmāgatāḥ pārśvamṛṣi devāḥ suroragāḥ/
evaṃ śatasahasrāṇi bāṇānāṃ vidhṛtāni ca

anyonyaṃ samare vīrau vijayāya virejatuḥ/
atha kruddho mahātejā gaṃdharvāṇāṃ patistadā

tribhirbibheda bāṇaiśca lalāṭe hṛdi paṃcabhiḥ/
saptabhirjaṭhare nābhau bastau tasya sa paṃcabhiḥ

śaraiḥ saṃpātito daityo mugdhaḥ kaśmalatāṃ gataḥ/
śithilīkṛtacāpaśca lebhe saṃjñāṃ cirādbalī

madhusaṃjñaṃ tribhirbāṇaissa bibheda surottamam/
cakartta dhanurastraiśca daityarājasya paśyataḥ

tato bāṇasahasraistu kālāṃtakasamaprabhaiḥ/
bibheda daityasiṃhaṃ tu surāṇāmuttamo balī

hatacetāḥ sa daityeṃdro bahuśoṇitasaṃsravaḥ/
vihvalo bahubāṇārtaḥ śūlaṃ jagrāha dānavaḥ

śūlahastasya tasyaiva caturbhisturagānśaraiḥ/
hatvā ca pātayāmāsa tribhiryaṃtārameva ca

jaghāna śūlamurvīṣṭhastato gaṃdharvasattamam/
vicakartta tribhirbāṇaiḥ śūlaṃ citraratho balī

śūlaṃ ca naṣṭakaṃ dṛṣṭvā hatabhogamivoragam/
gṛhītvā mudgaraṃ ghoraṃ pradudrāva suraṃ balī

sa mudgaraṃ samāyātaṃ daityasenādhipaṃ tadā/
vicakartta śiro dehādardhacaṃdreṇa saṃbhramāt

sa papāta mahīpṛṣṭhe saṃcacāla vasuṃdharā/
tato daityagaṇāḥ sarve vimukhā vipradudruvuḥ

iti śrīpādmapurāṇe prathame sṛṣṭikhaṃḍe kālakeyavadhonāma paṃcaṣaṣṭitamo'dhyāyaḥ