Padma Purana · Chapter 1.57

saptapañcāśattamo'dhyāyaḥ/
dvijā ūcuḥ-
kīrtirdharmotha lokeṣu sarvāṇi pravarāṇi ca/
vada no muniśārdūla yadi no'sti tvanugrahaḥ

vyāsa uvāca-
yasya khāte vane gāvastṛpyaṃti māsameva ca/
yadvā saptadinātpūtaḥ sarvadevaiḥ sa pūjitaḥ

puṣkariṇyā viśeṣeṇa pūtā yā yajñakarmaṇā/
yatphalaṃ jaladānena sarvamatrāsyi(?) tacchṛṇu

hāyane hāyane caiva kalpaṃ kalpaṃ vidhīyate/
dānātsvargamavāpnoti toyadaḥ sarvado bhuvi

meghe varṣati khāte ca jāyaṃte ye tu śīkarāḥ/
tāvadvarṣasahasrāṇi divamaśnāti mānavaḥ

toyairannādipākaiśca prasanno mānavo bhavet/
prāṇānāṃ ca vinānnaiśca dhāraṇannaiva jāyate

pitṝṇāṃ tarpaṇaṃ śaucaṃ rūpaṃ vai gaṃdhyanāśanam/
bījaṃ tvihārjitaṃ sarvaṃ sarvaṃ toye pratiṣṭhitam

vastrasya dhāvanaṃ rucyaṃ bhājanānāṃ tathaiva ca/
tenaiva sarvakāryaṃ ca pānīyaṃ medhyameva ca

tasmātsarvaprayatnena vāpīkūpataṭākakam/
kārayecca balaiḥ sarvaistathā sarvadhanena ca

tato vinirjale deśo(deśe?) yo dadāti jalāśayam/
vāsare vāsare tasya kalpaṃ svargaṃ vinirdiśet

triviṣṭapāccyuto vipro vedaśāstrārthapāragaḥ/
lokabaṃdhuḥ sa dharmātmā tapastaptvā divaṃ vrajet

evaṃ janmāṣṭakaṃ prāpya ekasyākṣayamiṣyate/
kṣattriyāṇāṃ kule jātaḥ sārvabhaumo bhavennṛpaḥ

viśo'kṣayaṃ dhanaṃ vidyājjanmajanmasu yatpriyam/
śūdrādayontyajāścānye labhaṃte svargatiṃ muhuḥ

caturhastapramāṇaṃ tu kūpaṃ khanati yaḥ pumān/
paropakārakaṃ nityaṃ kalpaṃ svargaṃ tu hāyane

dviguṇe dviguṇaṃ vidyācchataṃ caiva caturguṇe/
viṃśatkiṣkupramāṇāṃ tu dadyātpuṣkariṇīṃ tu yaḥ

viṣṇordhāma labhetsopi divyabhogaṃ tathaiva ca/
anaṃtaraṃ nṛpo jāto dhanī vāgīśvaro bhavet

evaṃ dvistriścaturvāpi guṇato bhogyamiṣyate/
vistīrṇe pracuraṃ viddhi sahasreṇācyuto divaḥ

sahasrāddviguṇenaiva surapūjyo bhavennaraḥ/
jaṃtavastatra ye saṃti yāvaṃto jīvanaṃ yayuḥ

tatsaṃkhyākā janāstasya kiṃkarāḥ pṛṣṭalagnakāḥ/
bhavaṃti satataṃ gehe pure janapadeṣu ca

vihāya pitaraṃ bhogyā dhane kṣīṇe yathā vanam/
pakṣiṇassūkaraścaiva mahiṣī kariṇī tathā

upadeṣṭā ca karttā ca ṣaḍete svargagāminaḥ/
divyaṃ ca pakṣiṇāṃ caiva śataṃ svargaṃ vinirdiśet

kroḍo varṣasahasraṃ tu mahiṣyayutahāyanam/
devarūpaṃ samāsthāya kariṇyā lakṣamucyate

koṭyekamupadeṣṭuśca karturakṣayameva ca/
purā dhanisutenaiva kṛtaḥ khyāto jalāśayaḥ

ayutadhanavyayenaiva prāṇenaiva balena ca/
sarvasatvopakārāya śivaśraddhāyutena ca

kālena kiyatā cāpi kṣīṇavitto'bhavatkila/
kaścidarthī dhanī tasya mūlyadānāya codyataḥ

vimṛśya dhaninā coktaṃ vyāhāraṃ śṛṇutādhunā/
dīnārasyāyutaṃ vā te dāsyāmyasyāśca kāraṇāt

labdhaṃ te puṣkariṇyāśca puṇyaṃ lābhātpramanyase/
śaktyā datvātha mūlyaṃ tāṃ svīyāṃ kartuṃ vyavasthitaḥ

evamukte sa taṃ prāha vāsarepyayutaṃ punaḥ/
phalaṃ bhavati vai nityaṃ puṇyaṃ puṇyavido viduḥ

etasminnirjale deśe śivaṃ khātaṃ kṛtaṃ ca me/
snānapānādikaṃ karma sarve kurvaṃtyabhīṣṭataḥ

tasmānmepyayutārthasya naityakaṃ phalamiṣyate/
tatastasyābhavaddhāsyaṃ tathaiva ca sabhāsadām

hriyā ca pīḍitaḥ sopi vākyametaduvāca ha/
satyametadvacosmākaṃ parīkṣāṃ kuru dharmataḥ

matsarātsa tu taṃ prāha śṛṇu me vacanaṃ pitaḥ/
dīnārāyuta me tatte datvā cānīya prastaram

pātayiṣyāmi te khāte yathāyogaṃ pramajjatu/
unmajjati ca yatkāle prastaraḥ saṃtaratyapi

kṣayaṃ yāsyati no vittaṃ nocenme dharmato hi sā/
bāḍhamuktvāyutaṃ tasya gṛhītvā svagṛhaṃ gataḥ

sākṣiṇāmagratastena prastaraḥ pātitastathā/
puṣkariṇyāṃ mahatyāṃ ca dṛṣṭaṃ narasurāsuraiḥ

tato dharmatulāyāṃ tu tulitaṃ dharmasākṣiṇā/
dīnārāyutadānasya puṣkariṇyā jalasya tu

na samaṃ tu dinaikaṃ tu jalasya dharmato bhṛśam/
dhanino mānasaṃ duḥkhaṃ moghārthaṃ ca pare'hani

śiloccayo'bhavattīrṇo dvīpavacca jalopari/
tataḥ kolāhalaḥ śabdo janānāṃ samupasthitaḥ

tacchrutvādbhutavākyaṃ ca mudā tau cāgatau tataḥ/
dṛṣṭvā śailaṃ tathābhūtaṃ kṛtaṃ tenāyutaṃ tathā

tataḥ khātādhipenaiva śailaṃ dūre nipātitam/
puṇyaṃ khātasya cotkhāte praluptasya sutena hi

sopi nākaṃ samāruhya janmajanmasu nirvṛtaḥ/
gotramātṛgaṇānāṃ ca nṛpāṇāṃ suhṛdāṃ tathā

sakhīnāṃ copakartṝṇāṃ khātaṃ khātvā'kṣayaṃ phalam/
tapasvināmanāthānāṃ brāhmaṇānāṃ viśeṣataḥ

khātaṃ tu janayitvā tu svargaṃ cākṣayamaśnute/
tasmātkhātādikaṃ viprāḥ śaktito yaḥ kariṣyati

sarvapāpakṣayātpuṇyaṃ mokṣaṃ yāyānna saṃśayaḥ/
ya idaṃ śrāvayelloke dharmākhyānaṃ mahotkaṭam

sarvakhātapradānasya phalamaśnāti dhārmikaḥ/
grahaṇe bhāskarasyaiva bhāgīrathyāṃ taṭe vare

gavāṃ koṭipradānasya phalaṃ śrutvā labhennaraḥ/
na ca dāridratāmeti na śokaṃ vyādhisaṃcayam

asaṃmānaṃ mahadduḥkhamubhayornādhigacchati/
iti śrīpādmapurāṇe prathame sṛṣṭikhaṃḍe khātādikīrtanaṃnāma saptapaṃcāśattamo'dhyāyaḥ