Scripture Library

Padma Purana · Chapter 1.56

1.56.1

saptapañcāśattamo'dhyāyaḥ/
/
śrībhagavānuvāca-
purā śarvaḥ striyo dṛṣṭvā yuvatī rūpaśālinīḥ/
gaṃdharvakinnarāṇāṃ ca manuṣyāṇāṃ ca sarvataḥ

1.56.2

maṃtreṇa tāḥ samākṛṣya tvatidūre vihāyasi/
tapovyājaparo devastāsu saṃgatamānasaḥ

1.56.3

atiramyāṃ kuṭīṃ kṛtvā tābhiḥ saha maheśvaraḥ/
krīḍāṃ cakāra sahasā manobhava parābhavaḥ

1.56.4

etasminnaṃtare gauryāścittamudbhrāṃtatāṃ gatam/
apaśyaddhyānayogena krīḍaṃtaṃ jagadīśvaram

1.56.5

strībhiraṃtargataṃ jñātvā roṣasya vaśagābhavat/
tataḥ kṣemaṃkarī rūpā bhūtvā ca praviveśa sā

1.56.6

vyomaikāṃtetidūre ca kāmadeva samaprabham/
vāmātimadhyagaṃ śubhraṃ puruṣaṃ puruṣottamam

1.56.7

strībhiḥ saha samāligya prakrīḍaṃtaṃ muhurmuhuḥ/
cuṃbaṃtaṃ nirbharaṃ devaṃ haraṃ rāgaprapīḍitam

1.56.8

vṛttaṃ kṣemaṃkarī dṛṣṭvā nipapātāgratastadā/
tāsāṃ keśeṣu cākṛṣya cakāra caraṇāhatim

1.56.9

trapayā pīḍitaśśarvaḥ parāṅmukhamavasthitaḥ/
keśeṣvākṛṣya roṣāttāḥ pātayāmāsa bhūtale

1.56.10

striyaḥ sarvādharāṃ prāpya sahasā vikṛtānanāḥ/
umāśāpapradagdhāṃgā mlecchānāṃ vaśamāgatāḥ

1.56.11

tāścāṃḍālastriyaḥ khyātā adhavā dhavasaṃyutāḥ/
adyāpyumākṛtaṃ śāpaṃ sarvāstāśca samaśnuyuḥ

1.56.12

athomā śatadhā rūpaṃ kṛtveśaṃ saṃgatā tadā/
evaṃ prabhāvaṃ jānīhi kāmasya satataṃ dvija

1.56.13

tataścirāttayā sārddhaṃ gataḥ kailāsamaṃdiraṃ/
ataḥ kṣemaṃkarīṃ dṛṣṭvā yebhinaṃdaṃti mānavāḥ

1.56.14

teṣāṃ vittarddhi vibhavā bhavaṃtīha paratra ca/
kuṃkumāraktasarvāṃgi kuṃdendudhavalānane

1.56.15

sarvamaṃgalade devi kṣemaṃkari namostu te/
yoginīsāmyaṃ tenaiva saṃmukhā vimukhāpi vā

1.56.16

dṛṣṭvā tāṃ nābhivaṃdedyastasya yuddhe parājayaḥ/
rājagṛheṣu vidyāyāṃ namaskārājjayo bhavet

1.56.17

evaṃ kāmasya māhātmyaṃ bhavo mohavaśaṃ gataḥ/
ayaṃ devāsurāṇāṃ ca kṣamayā prabhutāṃ gataḥ

1.56.18

asyaiva sadṛśo loke na bhūto na bhaviṣyati/
rāmāmaṅkasthitāṃ ramyāṃ kṣamātalpagatena ca

1.56.19

tyaktvaiva sādhitā lokāssurāsurasudurlabhāḥ/
evaṃ vaiṣṇavamukhyaśca surāsuragaṇārcitaḥ

1.56.20

yo no dadāti bhuktyagryaṃ śeṣaṃ ca svayamaśnute/
evamabhyāsadhairyeṇa dīrghakāle sukhaṃgate

1.56.21

prāksaṃgamātsvabhāryāṃ ca dṛṣṭvā māṃ pradadau mudā/
dvādaśābdaṃ prasaṃkalpya prāgbhogo mayi veśitaḥ

1.56.22

tena tasya gṛhe nityaṃ tiṣṭhāmi gṛharakṣaṇāt/
tathā dhātrīphalasyāpi sadā svara samīhate

1.56.23

tasmādukto mayānyeṣāṃ vaiṣṇavānāṃ ca vaiṣṇavaḥ/
purā ye vipra me bhaktāssurā matpathagāminaḥ

1.56.24

taireva na kṛtaṃ yacca tadanena kṛtaṃ param/
tasmādvaiṣṇavasarvasvaṃ nāma ramyaṃ mayā kṛtam

1.56.25

asya veśmani tiṣṭhāmi muhūrtaṃ na calāmyaham/
ato ye caivamadbhaktāsteṣvahaṃ sulabho dvija

1.56.26

asmākaṃ padavīṃ tebhyo hyadya dadmi svakāraṇam/
āvayorviprasaujanyaṃ svapnabhojyādikaṃ samam

1.56.27

sāyujyaṃ ca sakhitvaṃ ca paśya bhūdevanāṃtaram/
tato mūkādayaḥ sarve svāgatā harimīśvaram

1.56.28

gaṃtukāmā divaṃ puṇyāssadārāḥ saparicchadāḥ/
ye ca teṣāṃ gṛhābhyāśepyātmano gṛhagodhikāḥ

1.56.29

nānā kīṭādayo ye ca teṣāmanuyayuḥ surāḥ/
vyāsa uvāca-
etasminnaṃtare devāḥ siddhāśca paramarṣayaḥ

1.56.30

pracakruḥ puṣpavarṣāṇi sādhusādhvityanādayan/
devaduṃdubhayo nedurvimāneṣu vaneṣu ca

1.56.31

samāruhya rathaṃ svaṃ svaṃ harivīthīpuraṃ yayuḥ/
tadadbhutaṃ samālokya vipro'vocajjanārdanam

1.56.32

upadeśaṃ ca deveśa brūhi me madhusūdana/
śrībhagavānuvāca-
gaccha svapitarau tāta śokaviklavamānasau

1.56.33

samārādhya prayatnena madgṛhaṃ prāpsyase'cirāt/
pitṛmātṛsamā devā na tiṣṭhaṃti surālaye

1.56.34

yābhyāṃ sugarhitaṃ dehaṃ śiśutve pālitaṃ sadā/
ajñānadoṣasahitaṃ prapuṣṭaṃ cāpi vardhitam

1.56.35

yābhyāṃ tayossamaṃ nāsti trailokye sacarācare/
tato devagaṇāssarve paṃcabhistairmudānvitāḥ

1.56.36

mādhavaṃ saṃstuvaṃtaśca gatāste harimaṃdiram/
khacitāṃ ca purīṃ ramyāṃ viśvakarmavinirmitām

1.56.37

ratnāḍhyāmiṣṭasaṃpūrṇāṃ kalpavṛkṣādibhiryutām/
śātakumbhamayairgehaissarvaratnaissakarburām

1.56.38

vajravaiḍūryasopānāṃ svarṇadītoyasaṃyutām/
gītavādyādisaṃpūrṇāṃ sarvadurgasamākulām

1.56.39

kokilālāpabahulāṃ siddhagaṃdharvasevitām/
rūpāḍhyaiḥ sujanaiḥ pūrṇāṃ prayāṃtīmiva khe purīm

1.56.40

tataḥ sthitvā'cyutāḥ sarve sarvalokordhvato bhṛśam/
dvijopi pitarau gatvā samārādhya prayatnataḥ

1.56.41

acireṇaiva kālena sakuṭuṃbo hariṃ yayau/
paṃcākhyānamidaṃ puṇyaṃ mayā te samudāhṛtam

1.56.42

yaḥ paṭhecchṛṇuyādvāpi tasya nāstīha durgatiḥ/
brahmahatyādibhiḥ pāpairna lipyeta kadācana

1.56.43

gavāṃ koṭipradānena yatphalaṃ labhate naraḥ/
tatphalaṃ samavāpnoti paṃcākhyānāvagāhanāt

1.56.44

snānena puṣkare nityaṃ bhāgīrathyāṃ ca sarvadā/
yatphalaṃ tadavāpnoti sakṛcchravaṇagocarāt

1.56.45

duḥsvapnaṃ nāśayetkṣipraṃ tathārogyaṃ prayacchati/
lakṣmyārogyakaraṃ caiva tasmācchrotavyameva hi

1.56.56

iti śrīpādmapurāṇe prathame sṛṣṭikhaṃḍe paṃcākhyānaṃnāma ṣaṭpaṃcāśattamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0