Padma Purana · Chapter 1.26

bhīṣma uvāca/
dīrghāyurārogyakulātivṛddhibhiryuktaḥ pumānrūpakulānvitaḥ syāt/
muhurmuhurjanmani yena samyakvrataṃ samācakṣva ca śītaraśmeḥ

pulastya uvāca/
tvayā pṛṣṭamidaṃ samyagakṣayasvargakārakam/
rahasyaṃ tu pravakṣyāmi yatpurāṇavido viduḥ

rohiṇīcaṃdraśayanaṃ nāmavratamihocyate/
tasminnārāyaṇasyārcāmarcayediṃdunāmabhiḥ

yadā somadine śuklā bhavetpaṃcadaśī kvacit/
athavā brahmanakṣatraṃ paurṇamāsyāṃ prajāyate

tadā snānaṃ naraḥ kuryātpaṃcagavyena sarṣapaiḥ/
āpyāyasveti ca japedvidvānaṣṭaśataṃ punaḥ

śūdropi parayā bhaktyā pāṣaṃḍālāpavarjitaḥ/
somāya śāṃtāya namostu pādāvanaṃtadhāmneti ca jānujaṃghe/
ūrudvayaṃ cāpi jalodarāya saṃpūjayenmeḍhramanaṃgadhāmne

namonamaḥ kāmasukhapradāya kaṭiḥ śaśāṃkasya sadārcanīyaḥ/
tathodaraṃ cāpyamṛtodarāya nābhiḥ śaśāṃkāya namobhipūjyā

namostu caṃdrāya mukhaṃ ca nityaṃ daṃtā dvijānāmadhipāya pūjyāḥ/
hāsyaṃ namaścaṃdramase'bhipūjyamoṣṭhau tu kaumodavanapriyāya

nāsā ca nāthāya varauṣadhīnāmānaṃdabījāya punarbhruvau ca/
netradvayaṃ padmanibhaṃ tatheṃdoriṃdīvaravyāsakarāya śaureḥ

namaḥ samastādhvarapūjitāya karṇadvayaṃ daityaniṣūdanāya/
lalāṭamiṃdorudadhipriyāya keśāḥ suṣumnādhipateḥ prapūjyāḥ

śiraḥ śaśāṃkāya namo murārerviśveśvarāyātha namaḥ kirīṭaṃ/
padmapriye rohiṇīnāma lakṣmi saubhāgyasaukhyāmṛtasāgarāya

daivīṃ ca saṃpūjya sugaṃdhipuṣpairnaivedyadhūpādibhiriṃdupatnīm/
suptvā tu bhūmau punarutthito yaḥ snātvā ca viprāya haviṣyabhuktaḥ

deyaḥ prabhāte sahiraṇya vārikuṃbho namaḥ pāpavināśanāya/
saṃprāśya gomūtramamāṃsamannamakṣāramaṣṭāvatha viṃśatiṃ ca

grāsāṃśca trīnsarpiyutānupoṣya bhuktvetihāsaṃ śṛṇuyānmuhūrtaṃ /
kadaṃbanīlotpalaketakāni jātiḥsarojaṃ śatapatrikā ca

amlānapuṣpāṇyatha siṃduvāraṃ puṣpaṃ punarbhāratamallikāyāḥ/
śuklaṃ ca puṣpaṃ karavīrapuṣpaṃ śrīcaṃpakaṃ caṃdramase pradeyam

śrāvaṇādiṣu māseṣu kramādetāni sarvadā/
yasminmāse vratādiḥ syāttatpuṣpairarcayeddharim

evaṃ saṃvatsaraṃ yāvadupoṣya vidhivannaraḥ/
vratāṃte śayanaṃ dadyācchayanopaskarānvitam

rohiṇīcaṃdramithunaṃ kārayitvā tu kāṃcanam/
caṃdraḥ ṣaḍaṃgulaḥ kāryo rohiṇī caturaṃgulā

muktāphalāṣṭakayutāṃ sitanetrasamanvitām/
kṣīrakuṃbhopari punaḥ kāṃsyapātrākṣatānvitām

dadyānmaṃtreṇa pūrvāhṇe śālīkṣuphalasaṃyutām/
śvetāmatha suvarṇāsyāṃ raupyakhurasamanvitām

savastrabhājanāṃ dhenuṃ tathā śaṃkhaṃ ca bhājanam/
bhūṣaṇairdvijadāmpatyamalaṃkṛtya guṇānvitaṃ

caṃdroyaṃ viprarūpeṇa sabhārya iti kalpayet/
yathā te rohiṇī kṛṣṇa śayanaṃ na tyajedapi

somarūpasya vaitadvanna me bhedo vibhūtibhiḥ/
yathā tvameva sarveṣāṃ paramānaṃdamuktidaḥ

bhuktirmuktistathā bhaktistvayi caṃdra dṛḍhāstu me/
iti saṃsārabhītasya muktikāmasya cānagha

rūpārogyāyuṣāmetadvidhāyakamanuttamam/
idameva pitṝṇāṃ ca sarvadā vallabhaṃ nṛpa

trailokyādhipatirbhūtvā saptakalpaśatatrayam/
caṃdralokamavāpnoti punarāvṛttidurlabham

nārī vā rohiṇīcaṃdraśayanaṃ yā samācaret/
sāpi tatphalamāpnoti punarāvṛttidurlabham

iti paṭhati śṛṇoti vā ya itthaṃ madhumathanārcanamiṃdukīrtanena/
matimapi ca dadāti sopi śaurerbhavanagataḥ paripūjyatemaraughaiḥ

iti śrīpādmapurāṇe prathame sṛṣṭikhaṃḍe rohiṇīcaṃdraśayanavrataṃ nāma ṣaḍviṃśo'dhyāyaḥ