Padma Purana · Chapter 1.25

bhīṣma uvāca/
upavāseṣvaśaktasya tadeva phalamicchataḥ/
anabhyāsena rogādvā kimiṣṭaṃ vratamucyatām

pulastya uvāca/
upavāseṣvaśaktānāṃ naktaṃ bhojanamiṣyate/
yasminvrate tadapyatra śrūyatāṃ vai vrataṃ mahat

ādityaśayanaṃ nāma yathāvacchaṃkarārcanam/
yeṣu nakṣatrayogeṣu purāṇajñāḥ pracakṣate

yadā hastena saptamyāmādityasya dinaṃ bhavet/
sūryasya cāpi saṃkrāṃtistithissā sārvakāmikī

umāmaheśvarasyārcāmarcayetsūryanāmabhiḥ/
sūryārcāṃ śivaligaṃ ca ubhayaṃ pūjayedyataḥ

umāpate raveścāpi na bhedaḥ kvacidiṣyate/
yasmāttasmānnṛpaśreṣṭha gṛhe bhānuṃ samarcayet

hastena sūryāya namostupādāvarkāya citrāsu ca gulphadeśaṃ/
svātīṣu jaṃghe puruṣottamāya dhātre viśākhāsu ca jānudeśam

tathānurādhāsu namobhi pūjyamuruddvayaṃ caiva sahasrabhānoḥ/
jyeṣṭhāsvanaṃgāya namostu guhyamindrā yabhīmāya kaṭiṃ ca mūle

pūrvottarāṣāḍhayuge ca nābhiṃ tvaṣṭre namaḥ saptaturaṃgamāya/
tīkṣṇāṃśave śravaṇe cātha kukṣiṃ pṛṣṭhaṃ dhaniṣṭhāsu vikartanāya

vakṣasthalaṃ dhvāṃtavināśanāya jalādhiparkṣe pratipūjanīyam/
pūrvottarā bhādrapadadvaye ca bāhūttamaścaṃḍakarāya pūjyau

sāmnāmadhīśāya karadvayaṃ ca saṃpūjanīyaṃ nṛpa revatīṣu/
nakhāni pūjyāni tathāśvinīṣu namostu saptāśvadhuraṃdharāya

kaṭhoradhāmne bharaṇīṣu kaṃṭhaṃ divākarāyetyabhipūjanīyam/
grīvāgniparkṣe dharasaṃpuṭe tu saṃpūjayedbhārata rohiṇīṣu

mṛgercanīyā rasanā purāre raudre tu daṃtā haraye namaste/
namaḥ savitre iti śaṃkarasya nāsābhi pūjyā ca punarvasau ca

lalāṭamaṃbhoruhavallabhāya puṣyelakānvedaśarīradhāriṇe/
sārpe ca maulivibudhapriyāya maghāsu karṇāviti pūjanīyau

pūrvāsu gobrāhmaṇanaṃdanāya netrāṇi saṃpūjyatamāni śaṃbhoḥ/
athottarāphālguni bhe bhruvau ca viśveśvarāyeti ca pūjanīye

namostu pāśāṃkuśapadmaśūla kapālasarpendudhanurdharāya/
gayāsurānaṅgapurāṃdhakādi vināśamūlāya namaḥ śivāya

ityādikāṃgāni ca pūjayitvā viśveśvarāyeti śirobhipūjyam/
atrāpi bhoktavyamatailamannamamāṃsamakṣāramabhuktaśeṣam

ityevaṃ nṛpa naktāni kṛtvā dadyātpunarvasau/
śāleyataṃḍulaprasthamauduṃbaramatho ghṛtam

saṃsthāpya pātre viprāya sahiraṇyaṃ nivedayet/
saptame vastrayugmaṃ tu pāraṇe tvadhikaṃ bhavet

caturdaśe tu saṃprāpte pāraṇe bhāratādike /
brāhmaṇaṃ bhojayedbhaktyā guḍakṣīraghṛtādibhiḥ

kṛtvā ca kāṃcanaṃ padmamaṣṭapatraṃ sakarṇikam/
śuddhamaṣṭāṃgulaṃ tacca padmarāgadalānvitam

śayyāṃ sulakṣaṇāṃ kṛtvā viruddhagraṃthivarjitām/
sopadhānavitānāṃ ca svāstarāvaraṇāśrayām

pādukopānahacchatra cāmarāsanadarpaṇaiḥ/
bhūpaṇairapisaṃyuktāṃ phalavastrānulepanaiḥ

tasyāṃ vidhāya tatpadmamalaṃkṛtya guṇānvitām/
kapilāṃ vastrasaṃyuktāmatiśīlāṃ payasvinīm

raupyakhurāṃ hemaśṛṃgīṃ savatsāṃ kāṃsyadohanām/
dadyānmaṃtreṇa tāṃ dhenuṃ pūrvāhṇaṃ nātilaṃghayet

yathaivāditya śayanamaśūnyaṃ tava sarvadā/
kāṃtyā dhṛtyā śriyā puṣṭyā tathā me saṃtu vṛddhayaḥ

yathā na devāḥ śreyāṃsaṃ tvadanyamanaghaṃ viduḥ/
tathā māmuddharāśeṣa duḥkhasaṃsārasāgarāt

tataḥ pradakṣiṇīkṛtya praṇamya ca visarjayet/
śayyāṃ gavādi tatsarvaṃ dvijasya bhavanaṃ nayet

naitadviśīlāya na dāṃbhikāya prakāśanīyaṃ vratamiṃdumauleḥ/
govipradevarṣivikarmayogināṃ yaścāpi niṃdāmadhikāṃ vidhatte

bhaktāya dāṃtāya ca guhyametadākhyeyamānaṃdakaraṃ śivañca/
idaṃ mahāpātakināṃ narāṇāṃ aghakṣayaṃ vedavido vadaṃti

na baṃdhuputrairna dhanairviyuktaḥ patnībhirānaṃdakaraḥ surāṇāṃ/
nābhyeti rogaṃ na ca duḥkhamohaṃ yā cāpi nārī kurutetha bhaktyā

idaṃ vasiṣṭhena purārjunena kṛtaṃ kubereṇa puraṃdareṇa/
yatkīrtanādapyakhilāni nāśamāyāṃti pāpāni na saṃśayotra

iti paṭhati śṛṇoti vā ya itthaṃ raviśayanaṃ puruhūtavallabhaḥ syāt/
api narakagatānpitṝnaśeṣānapi divamānayatīha yaḥ karoti

aśvatthaṃ ca vaṭaṃ caivoduṃbaraṃ vṛkṣameva ca/
naṃdīśaṃ jaṃbuvṛkṣaṃ ca bilvaṃ prāhurmaharṣayaḥ

mārgaśīrṣādimāsābhyāṃ dvābhyāṃ dvābhyāmatha kramāt/
ekaikaṃ daṃtadhavanaṃ vṛkṣeṣveteṣu kārayet

dadyātsamāpte dadhyannaṃ vitānadhvajacāmaram/
dvijānāmudakuṃbhāṃśca paṃcaratnasamanvitān

na vittaśāṭhyaṃ kurvīta kurvandoṣānavāpnuyāt

/
iti śrīpādmapurāṇe prathame sṛṣṭikhaṃḍe ādityaśayanavrataṃnāma paṃcaviṃśo'dhyāyaḥ