પદ્મ પુરાણ · અધ્યાય 1.26

ભીષ્મ ઉવાચ।
દીર્ઘાયુરારોગ્યકુલાતિવૃદ્ધિભિર્યુક્તઃ પુમાન્રૂપકુલાન્વિતઃ સ્યાત્।
મુહુર્મુહુર્જન્મનિ યેન સમ્યક્વ્રતં સમાચક્ષ્વ ચ શીતરશ્મેઃ

પુલસ્ત્ય ઉવાચ।
ત્વયા પૃષ્ટમિદં સમ્યગક્ષયસ્વર્ગકારકમ્।
રહસ્યં તુ પ્રવક્ષ્યામિ યત્પુરાણવિદો વિદુઃ

રોહિણીચંદ્રશયનં નામવ્રતમિહોચ્યતે।
તસ્મિન્નારાયણસ્યાર્ચામર્ચયેદિંદુનામભિઃ

યદા સોમદિને શુક્લા ભવેત્પંચદશી ક્વચિત્।
અથવા બ્રહ્મનક્ષત્રં પૌર્ણમાસ્યાં પ્રજાયતે

તદા સ્નાનં નરઃ કુર્યાત્પંચગવ્યેન સર્ષપૈઃ।
આપ્યાયસ્વેતિ ચ જપેદ્વિદ્વાનષ્ટશતં પુનઃ

શૂદ્રોપિ પરયા ભક્ત્યા પાષંડાલાપવર્જિતઃ।
સોમાય શાંતાય નમોસ્તુ પાદાવનંતધામ્નેતિ ચ જાનુજંઘે।
ઊરુદ્વયં ચાપિ જલોદરાય સંપૂજયેન્મેઢ્રમનંગધામ્ને

નમોનમઃ કામસુખપ્રદાય કટિઃ શશાંકસ્ય સદાર્ચનીયઃ।
તથોદરં ચાપ્યમૃતોદરાય નાભિઃ શશાંકાય નમોભિપૂજ્યા

નમોસ્તુ ચંદ્રાય મુખં ચ નિત્યં દંતા દ્વિજાનામધિપાય પૂજ્યાઃ।
હાસ્યં નમશ્ચંદ્રમસેઽભિપૂજ્યમોષ્ઠૌ તુ કૌમોદવનપ્રિયાય

નાસા ચ નાથાય વરૌષધીનામાનંદબીજાય પુનર્ભ્રુવૌ ચ।
નેત્રદ્વયં પદ્મનિભં તથેંદોરિંદીવરવ્યાસકરાય શૌરેઃ

નમઃ સમસ્તાધ્વરપૂજિતાય કર્ણદ્વયં દૈત્યનિષૂદનાય।
લલાટમિંદોરુદધિપ્રિયાય કેશાઃ સુષુમ્નાધિપતેઃ પ્રપૂજ્યાઃ

શિરઃ શશાંકાય નમો મુરારેર્વિશ્વેશ્વરાયાથ નમઃ કિરીટં।
પદ્મપ્રિયે રોહિણીનામ લક્ષ્મિ સૌભાગ્યસૌખ્યામૃતસાગરાય

દૈવીં ચ સંપૂજ્ય સુગંધિપુષ્પૈર્નૈવેદ્યધૂપાદિભિરિંદુપત્નીમ્।
સુપ્ત્વા તુ ભૂમૌ પુનરુત્થિતો યઃ સ્નાત્વા ચ વિપ્રાય હવિષ્યભુક્તઃ

દેયઃ પ્રભાતે સહિરણ્ય વારિકુંભો નમઃ પાપવિનાશનાય।
સંપ્રાશ્ય ગોમૂત્રમમાંસમન્નમક્ષારમષ્ટાવથ વિંશતિં ચ

ગ્રાસાંશ્ચ ત્રીન્સર્પિયુતાનુપોષ્ય ભુક્ત્વેતિહાસં શૃણુયાન્મુહૂર્તં ।
કદંબનીલોત્પલકેતકાનિ જાતિઃસરોજં શતપત્રિકા ચ

અમ્લાનપુષ્પાણ્યથ સિંદુવારં પુષ્પં પુનર્ભારતમલ્લિકાયાઃ।
શુક્લં ચ પુષ્પં કરવીરપુષ્પં શ્રીચંપકં ચંદ્રમસે પ્રદેયમ્

શ્રાવણાદિષુ માસેષુ ક્રમાદેતાનિ સર્વદા।
યસ્મિન્માસે વ્રતાદિઃ સ્યાત્તત્પુષ્પૈરર્ચયેદ્ધરિમ્

એવં સંવત્સરં યાવદુપોષ્ય વિધિવન્નરઃ।
વ્રતાંતે શયનં દદ્યાચ્છયનોપસ્કરાન્વિતમ્

રોહિણીચંદ્રમિથુનં કારયિત્વા તુ કાંચનમ્।
ચંદ્રઃ ષડંગુલઃ કાર્યો રોહિણી ચતુરંગુલા

મુક્તાફલાષ્ટકયુતાં સિતનેત્રસમન્વિતામ્।
ક્ષીરકુંભોપરિ પુનઃ કાંસ્યપાત્રાક્ષતાન્વિતામ્

દદ્યાન્મંત્રેણ પૂર્વાહ્ણે શાલીક્ષુફલસંયુતામ્।
શ્વેતામથ સુવર્ણાસ્યાં રૌપ્યખુરસમન્વિતામ્

સવસ્ત્રભાજનાં ધેનું તથા શંખં ચ ભાજનમ્।
ભૂષણૈર્દ્વિજદામ્પત્યમલંકૃત્ય ગુણાન્વિતં

ચંદ્રોયં વિપ્રરૂપેણ સભાર્ય ઇતિ કલ્પયેત્।
યથા તે રોહિણી કૃષ્ણ શયનં ન ત્યજેદપિ

સોમરૂપસ્ય વૈતદ્વન્ન મે ભેદો વિભૂતિભિઃ।
યથા ત્વમેવ સર્વેષાં પરમાનંદમુક્તિદઃ

ભુક્તિર્મુક્તિસ્તથા ભક્તિસ્ત્વયિ ચંદ્ર દૃઢાસ્તુ મે।
ઇતિ સંસારભીતસ્ય મુક્તિકામસ્ય ચાનઘ

રૂપારોગ્યાયુષામેતદ્વિધાયકમનુત્તમમ્।
ઇદમેવ પિતૄણાં ચ સર્વદા વલ્લભં નૃપ

ત્રૈલોક્યાધિપતિર્ભૂત્વા સપ્તકલ્પશતત્રયમ્।
ચંદ્રલોકમવાપ્નોતિ પુનરાવૃત્તિદુર્લભમ્

નારી વા રોહિણીચંદ્રશયનં યા સમાચરેત્।
સાપિ તત્ફલમાપ્નોતિ પુનરાવૃત્તિદુર્લભમ્

ઇતિ પઠતિ શૃણોતિ વા ય ઇત્થં મધુમથનાર્ચનમિંદુકીર્તનેન।
મતિમપિ ચ દદાતિ સોપિ શૌરેર્ભવનગતઃ પરિપૂજ્યતેમરૌઘૈઃ

ઇતિ શ્રીપાદ્મપુરાણે પ્રથમે સૃષ્ટિખંડે રોહિણીચંદ્રશયનવ્રતં નામ ષડ્વિંશોઽધ્યાયઃ