Padma Purana · Chapter 1.21

pulastya uvāca//
āsītpurā bṛhatkalpe dharmamūrtirjanādhipaḥ//
suhṛcchakrasya nihatā yena daityāssahasraśaḥ

somasūryādayo yasya tejasā vigataprabhāḥ//
bhavaṃti śataśo yena dānavāśca parājitāḥ

yatheccharūpadhārī ca mānuṣopyaparājitaḥ//
tasya bhānumatī bhāryā satī trailokyasuṃdarī

lakṣmīsadṛśarūpeṇa nirjitāmarasuṃdarī//
rājñastasyāgramahiṣī prāṇebhyopi garīyasī

daśanārīsahasrāṇāṃ madhye śrīriva rājate//
nṛpakoṭisahasreṇa na kadācitsamucyate

kadācidāsthānagataḥ papraccha svapurohitam//
vismayenāvṛto natvā vasiṣṭhamṛṣisattamam

bhagavankena dharmeṇa mama lakṣmīranuttamā//
kasmācca vipulaṃ tejo maccharīre sadottamam

vasiṣṭha uvāca//
purā līlāvatī nāma veśyā śivaparāyaṇā//
tayā dattaścaturdaśyāṃ puṣkare lavaṇācalaḥ

hemavṛkṣāmaraiḥ sārddhaṃ yathāvadvidhipūrvakaṃ//
śūdraḥ suvarṇakāraśca karmakṛtso'bhavattadā

bhṛtyo līlāvatīgehe tena haimā vinirmitāḥ//
taravo hemapuṣpāśca śraddhāyuktena pārthiva

atirūpeṇa saṃpannā ghaṭitāste suśobhanāḥ//
dharmakāryamiti jñātvā na gṛhītaṃ ca vetanam

ujjvālitāśca te patnyā suvarṇamayapādapāḥ//
līlāvatīgṛhe cāpi paricaryā ca pārthiva

kṛtā tābhyāmaśāṭhyena dvijaśuśrūṣaṇādikā//
sā ca līlāvatī veśyā kālena mahatānagha

sarvapāpavinirmuktā jagāma śivamaṃdiram//
yo'sau suvarṇakāraśca daridropyatisattvavān

na mūlyamādādveśyātaḥ sa bhavāniha sāṃpratam//
saptadvīpapatirjātaḥ sūryāyutasamaprabhaḥ

yayā suvarṇakārasya taravo hemanirmitāḥ//
samyagujjvalitāḥ patnyā seyaṃ bhānumatī tava

tasmānnṛlokeṣvaparājitastvamārogyasaubhāgyayutā ca lakṣmīḥ//
tasmāttvamapyatra vidhānapūrvaṃ dhānyācalādīnnṛpate kuruṣva

pulastya uvāca//
tatheti saṃpūjya sudharmamūrtirvaco vasiṣṭhasya dadau ca sarvān//
dhānyācalādīnvidhināsmarārerlokaṃ gatosau surapūjyamānaḥ

paśyedyadīmānupanīyamānānspṛśenmanuṣyairiha dīyamānān//
śṛṇoti bhaktyātha matiṃ dadāti vikalmaṣaḥ sopi divaṃ prayāti

duḥsvapnapraśamamupaiti paṭhyamānaiḥ śaileṃdrairbhavabhayabhedanairmanuṣyaḥ//
yaḥ kuryātkimu nṛpapuṃgaveha samyakśāṃtātmā sakalagirīṃdrasaṃpradānam

bhīṣma uvāca//
kimabhīṣṭaviyogaśokasaṃdhānalamuddhartumupoṣaṇaṃ vrataṃ vā//
vibhavadhruvakāribhūtalesminbhavabhīterapi sūdanaṃ ca puṃsaḥ

pulastya uvāca//
paripṛṣṭamidaṃ jagatpriyaṃ te vibudhānāmapi durlabhaṃ mahattvāt//
tava bhaktimatastathāpi vakṣye vratamiṃdrāsuramānaveṣu guhyam

puṇyamāśvayuje māsi viśokadvādaśīvratam//
daśamyāṃ laghubhugvidvānprārabheta yamena tu

udaṅmukhaḥ prāṅmukho vā daṃtadhāvanapūrvakam//
ekādaśyāṃ nirāhāraḥ samyagabhyarcya keśavam

śriyaṃ cābhyarcya vidhivadbhokṣye'haṃ cāparehani//
evaṃ niyamakṛtsuptvā prātarutthāya mānavaḥ

snānaṃ sarvauṣadhaiḥ kuryātpaṃcagavyajalena tu//
śubhramālyāṃbaradharaḥpūjayecchrīśamutpalaiḥ

viśokāya namaḥ pādau jaṃghe ca varadāya vai//
śrīśāya jānunī tadvadūrū ca jalaśāyine

kaṃdarpāya namo guhyaṃ mādhavāya namaḥ kaṭiṃ//
dāmodarāyetyudaraṃ pārśve ca vipulāyavai

nābhiṃ ca padmanābhāya hṛdayaṃ manmathāya vai//
śrīdharāya vibhorvakṣaḥ karau madhubhide namaḥ

vaikuṇṭhāya namaḥ kaṃṭhamāsyaṃ padmamukhāyavai//
nāsāmaśokanidhaye vāsudevāya cākṣiṇī

lalāṭaṃ vāmanāyeti haraye ca punarbhruvau//
alakaṃ mādhavāyeti kirīṭaṃ viśvarūpiṇe

namaḥ sarvātmane tadvacchira ityabhipūjayet//
evaṃ saṃpūjya goviṃdaṃ dhūpamālyānulepanaiḥ

tatastu maṃḍalaṃ kṛtvā sthaṃḍilaṃ kārayenmṛdā//
caturaśraṃ samaṃtācca ratnimātramudakplavam

ślakṣṇaṃ hṛdyaṃ ca parito vapratrayasamāvṛtam//
triraṃgulocchritāvaprāstadvistāro dviraṃgulaḥ३४ (pā. – cchitā)//
sthaṃḍilasyopariṣṭāttu bhittiraṣṭāṃgulā bhavet//
nadī vālukayā sūrye lakṣmyāḥ pratikṛtiṃ nyaset

sthaṃḍile sūryamadhyastha lakṣmīmabhyarcayedbudhaḥ//
namo devyai namaḥ śāṃtyai namo lakṣmyai namaḥ śriye

namastuṣṭyai namaḥ puṣṭyai sṛṣṭyai dṛṣṭyai namo namaḥ//
viśokā duḥkhanāśā yaviśokā varadāstu te

viśokā mestu saṃpattyai viśokā sarvasiddhaye//
tataḥ śubhrāṃbaraiḥ sūryaṃ veṣṭya saṃpūjayetphalaiḥ

bhakṣyairnānāvidhaistadvatsuvarṇakamalena ca//
rājatīṣu ca pātrīṣu nyaseddarbhodakaṃ budhaḥ

tatastu nṛtyagītāni kārayetsakalāṃ niśām//
yāmatraye vyatīte tu tata utthāya mānavaḥ

abhigamya ca viprāṇāṃ mithunāni ca pūjayet//
śaktitastrīṇi caikaṃ vā vastramālyānulepanaiḥ

śayanasthāni pūjyāni namostu jalaśāyine//
tatastu gītavādyena rātryāṃ jāgaraṇe kṛte

prabhāte ca tataḥ snānaṃ kṛtvā dāṃpatyamarcayet//
bhojayecca yathāśakti vittaśāṭhyena varjitaḥ

bhaktyāśrutvāpurāṇānitaddinaṃcātivāhayet//
anena vidhinā sarvaṃ māsimāsi samācaret

vratāṃte śayanaṃ dadyādguḍadhenusamanvitaṃ//
sopadhānaṃ saviśrāmaṃ svāstarāvaraṇaṃ śubhaṃ

yathālakṣmīrnareśa tvāṃ na parityajya gacchati//
tathā surūpatārogyamaśokaṃ cāstu me sadā

yathā devena rahitā na lakṣmīrjāyate kvacit//
tathā viśokatā me'stu bhaktiragyrā ca keśave

maṃtreṇānena śayanaṃ guḍadhenusamanvitaṃ//
sūryaśca lakṣmyā sahito dātavyo bhūtimicchatā

utpalaṃ karavīraṃ vāpyamlānaṃ caiva kuṃkumaṃ//
ketakaṃ siṃdhuvāraṃ ca mallikāgaṃdhapāṭalā

kadaṃbaṃ kubjakaṃ jātī śastānyetāni sarvadā//
bhīṣma uvāca//
guḍadhenuvidhānaṃ ca samācakṣva munīśvara५०

kiṃ rūpā kena maṃtreṇa dātavyā tadihocyatāṃ//
pulastya uvāca//
guḍadhenuvidhānasya yadrūpamiha yatphalam

tadidānīṃ pravakṣyāmi sarvapāpavināśanam//
kṛṣṇājinaṃ caturhastaṃ prāggrīvaṃ vinyasedbhuvi

gomayenānuliptāyāṃ darbhānāstīrya sarvataḥ//
laghveṇakājinaṃ tadvatvatsaṃ ca parikalpayet

prāṅmukhīṃ kalpayeddhenuṃ mṛdā vā gāṃ savatsakāṃ//
uttamā guḍadhenuḥ syātsadā bhāracatuṣṭayaṃ

vatsaṃ bhāreṇa kurvīta bhārābhyāṃ madhyamā smṛtā//
arddhabhāreṇa vatsassyātkaniṣṭhā bhārakeṇa tu

caturthāṃśe navatsaḥ syādgṛhavittānusārataḥ//
dhenuvatsau kṛtau cobhau sitasūkṣmāṃbarāvṛtau

śuktikarṇāvikṣupādau śucimuktāphalekṣaṇau//
sitasūtrasirājālau sitakaṃbalakaṃbalau

tāmragaṃḍakapṛṣṭhau dvau sitacāmaralomakau//
vidrumabhrūyugāvetau navanītastanānvitau

kāñcanākṣiyugopetāvindranīlakanīnikau//
kṣaumapucchau kāṃsyadohau śubhrātikamanīyakau

suvarṇaśṛṃgābharaṇau rājatāḍhya khurau ca tau//
nānāphalasamāyuktau ghrāṇagaṃdhakaraṃḍakau

ityevaṃ racayitvā tu dhūpadīpaistathārcayet//
yā lakṣmīssarvabhūtānāṃ yā ca deveṣvavasthitā

dhenurūpeṇa sā devī mama pāpaṃ vyapohatu//
viṣṇorvakṣasi yā lakṣmīḥ svāhā yā ca vibhāvasau

caṃdrārkaśakraśaktiryā sā dhenurvaradāstu me//
svadhā tvaṃ pitṛmukhyānāṃ svāhā yajñabhujāṃ yataḥ

sarvapāpaharā dhenustasmādbhūtiṃ prayaccha me//
evamāmaṃtrya tāṃ dhenuṃ brāhmaṇāya nivedayet

vidhānametaddhenūnāṃ sarvāsāmapi paṭhyate//
yāstu pāpavināśinyaḥ paṭhyaṃte daśa dhenavaḥ

tāsāṃ svarūpaṃ vakṣyāmi nāmāni ca narādhipa//
prathamā guḍadhenuḥ syādghṛtadhenurathāparā

tiladhenustṛtīyā ca caturthī jalanāmikā//
kṣīradhenuḥ paṃcamī ca madhudhenustathāparā

saptamī śarkarādhenuraṣṭamī dadhikalpitā//
rasadhenuśca navamī daśamī syātsvarūpataḥ

kuṃbhāssyū rasadhenūnāmitarāsāṃ svarāśayaḥ//
suvarṇadhenuṃ cāpyatra kecidicchaṃti mānavāḥ

navanītena tailaiśca tathānyepi maharṣayaḥ//
etadevavidhānaṃ syātta evopaskarāssmṛtāḥ

maṃtrāvāhanasaṃyuktāḥ sadā parvaṇi parvaṇi//
yathā śrāddhaṃ pradātavyā bhuktimuktiphalapradāḥ

guḍadhenuprasaṃgena sarvāstava mayoditāḥ//
aśeṣayajñaphaladāḥ sarvapāpaharāḥ śubhāḥ

vratānāmuttamaṃ yasmādviśokadvādaśīvratam//
tadaṃgatvena caivātra guḍadhenuḥ praśasyate

ayane viṣuve puṇye vyatīpāte tathā punaḥ//
guḍadhenvādayo deyā uparāgādiparvasu

viśokadvādaśī caiṣā sarvapāpaharā śubhā//
yāmupoṣya naro yāti tadviṣṇoḥ paramaṃ padam

ihaloke sa saubhāgyamāyurārogyameva ca//
vaiṣṇavaṃ puramāpnoti maraṇe smaraṇaṃ hareḥ

navārbudasahasrāṇi daśa cāṣṭau ca dharmavit//
na śokaduḥkhadaurgatyaṃ tasya saṃjāyate nṛpa

nārī vā kurute yā tu viśokadvādaśīmimāṃ//
nṛtyagītaparā nityaṃ sāpi tatphalamāpnuyāt

yasmādagre harernṛtyamanantaṃ gītavādanam//
iti paṭhati ya itthaṃ yaḥ śṛṇotīha samyak//
madhumuranarakārerarcanaṃ vātha paśyet

matimapi ca janānāṃ yo dadātīndraloke//
sa vasati vibudhaughaiḥ pūjyate kalpamekam//
bhīṣma uvāca//
bhagavanśrotumicchāmi dānamāhātmyamuttamam

yadakṣayaṃ pare loke devarṣigaṇapūjitam//
pulastya uvāca//
meroḥ pradānaṃ vakṣyāmi daśadhā nṛpasattama

yatpradātānaṃtalokānprāpnoti surapūjitān//
purāṇeṣu ca vedeṣu yajñeṣvāyataneṣu ca

na tatphalamadhīteṣu kṛteṣviha yadaśnute//
tasmāddānaṃ pravakṣyāmi parvatānāmanukramāt

prathamo dhānyaśailaḥ syādidvatīyo lavaṇācalaḥ//
guḍācalastṛtīyastu caturtho hemaparvataḥ

paṃcamastilaśailassyātṣaṣṭaḥ kārppāsaparvataḥ//
saptamo ghṛtaśailaḥ syādratnaśailastathāṣṭamaḥ

rājato navamastadvaddaśamaḥ śarkarācalaḥ//
vakṣye vidhānameteṣāṃ yathāvadanupūrvaśaḥ

ayano vepuṇye vyatīpāte dinakṣaye//
śuklapakṣe tṛtīyāyāmuparāgeśa śikṣaye

vivāhotsavayajñeṣu dvādaśyāmathavā punaḥ//
śuklāyāṃ paṃcadaśyāṃ vā puṇyarkṣe vā vidhānataḥ

dhānyaśailādayo deyāḥ kārtikyāṃ jyeṣṭhapuṣkare//
tīrtheṣvāyatane vāpi goṣṭhe vā bhavanāṃgaṇe

maṃḍapaṃ kārayedbhaktyā caturaśramudaṅmukham//
prāgudakpravaṇaṃ puṇyaṃ prāṅmukhaṃ vā vidhānataḥ

gomayenānuliptāyāṃ bhūmāvāstīrya vai kuśān//
tanmadhye parvataṃ kuyādviṣkaṃbhaṃ parvatānvitam

dhānyadroṇasahasreṇa bhavedgiririhottamaḥ//
madhyamaḥ paṃcaśatakaiḥ kaniṣṭhaśca tribhiḥ śataiḥ

merurmahāvrīhimayastu madhye suvarṇavṛkṣatrayasaṃyutaḥ syāt//
mūrddhanyavasthānamathāṃbareṇa kāryaṃ tvanekaṃ ca punardvijāgryaiḥ

catvāri śṛṃgāṇi ca rājatāni nitaṃbabhāgā api rājatāssyuḥ//
pūrveṇa muktāphalavajrayukto yāmyena gomedakapadmarāgaiḥ

paścācca gārutmatanīlaratnaiḥ saumyena vaiḍūryakapuṣparāgaiḥ//
śrīkhaṃḍakhaṃḍairabhitaḥ pravālairlatānvito mauktikaprastarāḍhyaḥ

brahmātha viṣṇurbhagavānpurārirdivākaropyatra hiraṇmayaḥ syāt//
tathekṣuvaṃśāvṛtakaṃdarastu ghṛtodakaprasravaṇo diśāsu

śubhrāṃbarāṇyaṃbudharāvalisyātpūrveṇa pītāni ca dakṣiṇena//
vāsāṃsi paścādatha karburāṇi raktāni caivottarato ghanāni

raupyānmaheṃdrapramukhāṃstathā'ṣṭau saṃsthāpya lokādhipatīnkrameṇa//
nānāvanālī ca samaṃtataḥ syānmanoramammālyavilepanaṃ ca

vitānakaṃ copari paṃcavarṇamamlānapuṣpābharaṇaṃ sitaṃ ca//
itthaṃ niveśyāmaraśailamagryaṃ merostu viṣkaṃbhagirīnkrameṇa

turīyabhāgena caturdiśaṃ ca saṃsthāpayetpuṣpavilepanāḍhyam//
pūrveṇa maṃdaramanekaphalaiścayuktaṃ kāmena kāṃcanamayena virājamānam१००

yāmyena gaṃdhamadano viniveśanīyo godhūmasaṃcayamayaḥ kaladhautavāṃśca//
haimena yajñapatinā ghṛtamānasena vastreṇarājatavanaiśca sa saṃyutaḥ syāt

paścāttilācalamanekasugaṃdhapuṣpasauvarṇapippalahiraṇmayahaṃsayuktam//
ākārayedrajatapuṣpavanena tadvadvastrānvitaṃ dadhisitodasarastathāgre

saṃsthāpyataṃ vipulaśailamathottareṇa śailaṃ supārśvamapi māṣamayaṃ savastram//
puṣpaiśca hemavaṭapādapaśekharaṃ tamākārayetkanakaketuvirājamānam

mākṣīkabhadrasarasā ca vanena tadvadraupyeṇa bhāsuravitānayutaṃ vidhāya//
homaścaturbhiratha vedapurāṇavidbhirdāṃtairaniṃdyacaritākṛtibhirdvijeṃdraiḥ

pūrveṇa hastamitamatra vidhāya kuṃḍaṃ kāryastilairyavaghṛtena samitkuśaiśca//
rātrau ca jāgaramanuddhatagītarūpairāvāhanaṃ ca kathayāmi śiloccayānām

tvaṃ sarvadevagaṇadhāmanidhe viruddhamasmadgṛheṣvamaraparvata nāśayāśu//
kṣemaṃ vidhatsva kuru śāṃtimanuttamāṃ ca saṃpūjitaḥ paramabhaktimatā mayā hi

tvameva bhagavānīśo brahmā viṣṇurdivākaraḥ//
mūrtāmūrtamayaṃ bījamataḥ pāhi sanātana

yasmāttvaṃ lokapālānāṃ viśvamūrteśca maṃdiram//
rudrādityavasūnāṃ ca tasmācchāntiṃ prayaccha me

yasmādaśūnyamamarairnārībhiśca śirastava//
tasmānmāmuddharāmuṣmādduḥkhasaṃsārasāgarāt

evamabhyarcya taṃ meruṃ maṃdaraṃ cābhipūjayet//
yasmāccaitrarathena tvaṃ bhadrāśvena ca parvata

śobhase maṃdara kṣipramatastuṣṭikaro bhava//
yasmāccūḍāmaṇirjaṃbūdvīpe tvaṃ gaṃdhamādana

gaṃdharvagaṇaśobhāvāṃstataḥ kīrtirdṛḍhāstu me//
yasmāttvaṃ ketumālena vaibhrājena vanena ca

hiraṇmayāśmaśobhāvāṃstasmātpuṣṭirdhruvāstu me//
uttaraiḥ kurubhiryasmātsāvitreṇa vanena ca

supārśva rājase nityamataḥ śrīrakṣayāstu me//
evamāmaṃtrya tānsarvānprabhāte vimale punaḥ

snātvā tu gurave dadyānmadhyamaṃ parvatottamaṃ//
viṣkaṃbhaparvatāndadyādṛtvigbhyaḥ kramaśo nṛpa

gāvo deyāścaturviṃśadathavā daśa pārthiva//
śaktitaḥ saptacāṣṭau vā paṃca dadyādaśaktimān

ekāpi gurave deyā kapilātha payasvinī//
parvatānāmaśeṣāṇāmeṣa eva vidhiḥ smṛtaḥ

ta eva pūjane maṃtrāsta evopaskarāḥ smṛtāḥ//
grahāṇāṃ lokapālānāṃ brahmādīnāṃ ca sarvataḥ

svamaṃtreṇaiva sarveṣu homaḥ śaileṣu paṭhyate//
upavāsī bhavennityamaśaktau naktamiṣyate

vidhānaṃ sarvaśailānāṃ kramaśaḥ śṛṇu pārthiva//
dāneṣu caiva ye maṃtrāḥ parvateṣu yathā phalam

annaṃ brahma yataḥ proktamannaṃ prāṇāḥ prakīrtitāḥ//
annādbhavaṃti bhūtāni jagadannena vardhate

annameva yato lakṣmīrannameva janārdanaḥ//
dhānyaparvatarūpeṇa pāhi tasmānnagottama

anena vidhinā yastu dadyāddhānyamayaṃ girim//
manvaṃtaraśataṃ sāgraṃ devaloke mahīyate

apsarogaṇagaṃdharvairākīrṇena virājitaḥ//
vimānena divaḥ pṛṣṭhamāyāti nṛpasattama

karmakṣaye rājarājyamāpnotīha na saṃśayaḥ//
athātaḥ saṃpravakṣyāmi lavaṇācalamuttamam

yatpradānānnaro lokamāpnoti śivasaṃyutam//
uttamaḥ ṣoḍaśadroṇaiḥ kartavyo lavaṇācalaḥ

madhyamaśca tadardhena caturbhiradhamassmṛtaḥ//
vittahīno yathāśakti droṇādūrddhvaṃ ca kārayet

caturthāṃśena viṣkaṃbhaparvatānkārayetpṛthak//
vidhānaṃ pūrvavatkuryādbrahmādīnāṃ ca sarvadā

tadvaddhemamayaṃ sarvalokapālaniveśanam//
sarāṃsi vanavṛkṣādi tadvaccānyānniniveśayet

kuryājjāgaramatrāpi dānamaṃtrānnibodhata//
saubhāgyarasasaṃyukto yatoyaṃ lavaṇe rasaḥ

tadātmakatvena ca māṃ pāhyāpannaṃ nagottama//
yasmādanye rasāḥ sarve notkaṭā lavaṇaṃ vinā

priyaśca śivayornityaṃ tasmācchāṃtiprado bhava//
viṣṇudehasamudbhūto yasmādārogyavardhanaḥ

tasmātparvatarūpeṇa pāhi saṃsārasāgarāt//
anena vidhinā yastu dadyāllavaṇaparvatam

umāloke vasetkalpaṃ tato yāti parāṃ gatim//
ataḥ paraṃ pravakṣyāmi guḍaparvatamuttamam

yatpradānānnaraḥ svargaṃ prāpnoti surapūjitaḥ//
uttamo daśabhirbhārairmadhyamaḥ paṃcabhirmataḥ

tribhirbhāraiḥ kaniṣṭhaḥ syāttadardhenālpavittavān//
tadvadāmaṃtraṇaṃ pūjāṃ haimavṛkṣānsurārcanaṃ

viṣkaṃbhaparvatāṃstadvatsarāṃsi vanadevatāḥ//
homaṃ jāgaraṇaṃ tadvallokapālādhivāsanam

dhānyaparvatavatkuryādimaṃ maṃtramudīrayet//
yathā deveṣu viśvātmā pravaroyaṃ janārdanaḥ

sāmavedastu vedānāṃ mahādevastu yogināṃ//
praṇavaḥ sarvamaṃtrāṇāṃ nārīṇāṃ pārvatī yathā

tathā rasānāṃ pravaraḥ sadaivekṣuraso mataḥ//
mama tasmātparāṃ lakṣmīṃ dadātu guḍaparvataḥ

yasmātsaubhāgyadāyinyā dhāma tvaṃ guḍaparvata//
nirmitaścāsi pārvatyā tasmānmāṃ pāhi sarvadā

anena vidhinā yastu dadyādguḍamayaṃ girim//
saṃpūjyamāno gaṃdharvairgaurīloke mahīyate

punaḥ kalpaśatāṃte ca saptadvīpādhipo bhavet//
āyurārogyasaṃpannaḥ śatrubhiścāparājitaḥ

atha pāpaharaṃ vakṣye suvarṇācalamuttamam//
yasya pradānādbhavanaṃ vairiṃcaṃ yāṃti mānavāḥ

uttamaḥ palasāhasro madhyamaḥ paṃcabhiḥ śataiḥ//
tadardhenādhamastadvadalpavittopi mānavaḥ

dadyādekapalādūrddhvaṃ yathāśakti vimatsaraḥ//
dhānyaparvatavatsarvaṃ vidadhyādrājasattama

viṣkaṃbhaśailāṃstadvacca ṛtvigbhyaḥ pratipādayet//
namaste sarvabījāya brahmagarbhāya vai namaḥ

yasmādanaṃtaphaladastasmātpāhi śiloccaya//
yasmādagnerapatyaṃ tvaṃ yasmātputro jagatpateḥ

hemaparvatarūpeṇa tasmātpāhi nagottama//
anena vidhinā yastu dadyātkanakaparvatam

sa yāti paramaṃ brahma lokamānaṃdakārakam//
tatra kalpaśataṃ tiṣṭhettato yāti parāṃ gatim१५०

athātaḥ saṃpravakṣyāmi tilaśailaṃ vidhānataḥ//
yatpradānānnaro yāti viṣṇulokamanuttamam

uttamo daśabhirdroṇairmadhyamaḥ paṃcabhiḥ smṛtaḥ//
tribhiḥ kaniṣṭho rājeṃdra tilaśailaḥ prakīrtitaḥ

pūrvavaccāparaṃ sarvaṃ viṣkaṃbhaparvatādikam//
dānamaṃtraṃ pravakṣyāmi yathā ca nṛpapuṃgava

yasmānmadhuvadhe viṣṇordehasvedasamudbhavāḥ//
tilāḥ kuśāśca māṣāśca tasmācchāṃtiprado bhava

havyakavyeṣu yasmācca tilā eva hi rakṣaṇam//
lakṣmīṃ ca kuru śaileṃdra tilācala namostu te

ityāmaṃtrya ca yo dadyāttilācalamanuttamam//
sa vaiṣṇavaṃ padaṃ yāti punarāvṛttidurlabham

kārpāsaparvataścaiva viṃśadbhārairihottamaḥ//
daśabhirmadhyamaḥ proktaḥ kaniṣṭhaḥ paṃcabhirmataḥ

bhāreṇālpadhano dadyādvittaśāṭhyavivarjitaḥ//
dhānyaparvatavatsarvamāsādyaṃ rājasattama

prabhātāyāṃ ca śarvaryāṃ dadyādidamudīrayet//
tvamevāvaraṇaṃ yasmāllokānāmiha sarvadā

kārpāsādre namastasmādaghaugha dhvaṃsano bhava//
iti kārpāsaśaileṃdraṃ yo dadyāccharvasaṃnidhau

rudraloke vasetkalpaṃ tato rājā bhavediha//
athātaḥ saṃpravakṣyāmi ghṛtācalamanuttamam

tejomayaṃ ghṛtaṃ puṇyaṃmahāpātakanāśanam//
viṃśatyā ghṛtakuṃbhānāmuttamaḥ syādghṛtācalaḥ

daśabhirmadhyamaḥ proktaḥ paṃcabhistvadhamaḥ smṛtaḥ//
alpavittopi kurvīta dvābhyāmiha vidhānataḥ

viṣkambhaparvatāṃstadvaccaturbhāgena kalpayet//
śālitaṃḍulapātrāṇi kuṃbhopari niveśayet

kārayetsaṃhatānuccānyathāśobhaṃ vidhānataḥ//
veṣṭayecchuklavāsobhirikṣudaṃḍaphalādikaiḥ

dhānyaparvatavatsaṃrvaṃ vidhānamiha paṭhyate//
adhivāsanapūrvaṃ hi tadvaddhomasurārcanam

prabhātāyāṃ ca śarvaryāṃ gurave vinivedayet//
viṣkaṃbhaparvatāṃstadvadṛtvigbhyaḥ śāṃtamānasaḥ

saṃyogādghṛtamutpannaṃ yasmādamṛtatejasi//
tasmādghṛtārcirviśvātmā prīyatāmatra śaṃkara

yasmāttejomayaṃ brahma ghṛte caiva vyavasthitam//
ghṛtaparvatarūpeṇa tasmānnaḥ pāhi bhūdhara

anena vidhinā dadyādghṛtācalamanuttamam//
mahāpātakayuktopi lokamāyāti śāṃbhavam

haṃsasārasayuktena kiṃkiṇījālamālinā//
vimānenāpsarobhiśca siddhavidyādharairvṛtaḥ

vicaretpitṛbhiḥ sārdhaṃ yāvadābhūtasaṃplavam//
athātaḥ saṃpravakṣyāmi ratnācalamanuttamam

muktāphalasahasreṇa parvatassyādanuttamaḥ//
madhyamaḥ paṃcaśatikastriśatenādhamaḥ smṛtaḥ

caturthāṃśena viṣkaṃbha parvatāḥ syuḥ samantataḥ//
pūrveṇa vajragomedairdakṣiṇeneṃdranīlakaiḥ

puṣyarāgairyutaḥ kāryo vidvadbhirgaṃdhamādanaḥ//
vaiḍūryavidrumaiḥ paścātsaṃmiśro vipulācalaḥ

padmarāgaiḥ sa sauvarṇairuttareṇāpi vinyaset//
dhānyaparvatavatsarvamatrāpi parikalpayet

tadvadāvāhanaṃ kṛtvā vṛkṣāndevāṃśca kāṃcanān//
pūjayetpuṣpagandhādyaiḥ prabhāte syādvisarjanam

pūrvavadguruṛtvigbhya imaṃ maṃtramudīrayet//
yathā devagaṇāḥ sarve sarvaratneṣvavasthitāḥ

tvaṃ ca ratnamayo nityamataḥ pāhi mahācala//
yasmādratnapradānena tuṣṭimeti janārdanaḥ

pūjāmaṃtraprasādena tasmānnaḥ pāhi parvata//
anena vidhinā yastu dadyādratnamayaṃ girim

sa yāti vaiṣṇavaṃ lokamamareśvarapūjitaḥ//
yāvatkalpaśataṃ sāgraṃ vasettatra narādhipa

rūpārogyaguṇopetaḥ saptadvīpādhipo bhavet//
brahmahatyādikaṃ kiṃcidatrāmutrāthavā kṛtam

tatsarvaṃ nāśamāyāti girirvajrāhato yathā//
athātaḥ saṃpravakṣyāmi raupyācalamanuttamam

yatpradānānnaro yāti somalokaṃ narottama//
daśabhiḥ palasāhasrairuttamo rajatācalaḥ

paṃcabhirmadhyamaḥ proktastadardhenādhamaḥ smṛtaḥ//
aśakto viṃśaterūrddhvaṃ kārayecchaktitaḥ sadā

viṣkaṃbhaparvatāṃstadvatturīyāṃśena kalpayet//
pūrvavadrājatānkuryānmaṃdarādīnvidhānataḥ

kaladhautamayāṃstadvallokeśānkārayedbudhaḥ//
brahmaviṣṇvarkavānkāryo nitaṃbotra hiraṇmayaḥ

rājataṃ syāttadanyeṣāṃ parvatāṃnā ca kāṃcanam//
śeṣaṃ ca pūrvavatkuryāddhomajāgaraṇādikam

dadyāttadvatprabhāte tu gurave raupyaparvatam//
viṣkaṃbhaśailānṛtvigbhyaḥ pūjya vastravibhūṣaṇaiḥ

imaṃ maṃtraṃ paṭhandadyāddarbhapāṇirvimatsaraḥ//
pitṝṇāṃ vallabhaṃ yasmādindorvā śaṃkarasya ca

rajataṃ pāhi tasmānnaḥ śokasaṃsārasāgarāt//
itthaṃ niveśya yo dadyādrajatācalamuttamam

gavāmayutasāhasraphalamāpnoti mānavaḥ//
somaloke sagaṃdharvaiḥ kinnarāpsarasāṃgaṇaiḥ

pūjyamāno vasedvidvānyāvadābhūtasaṃplavam//
athātaḥ saṃpravakṣyāmi śarkarācalamuttamam

yasya pradānādviṣṇvarkarudrāstuṣyaṃti sarvadā//
aṣṭabhiḥ śarkarābhārairuttamaḥ syānmahācalaḥ

caturbhirmadhyamaḥ prokto bhārābhyāmadhamaḥ smṛtaḥ//
bhāreṇa cārddhabhāreṇakuryādyaḥ svalpavittavān

viṣkaṃbhaparvatānkuryātturīyāṃśena mānavaḥ//
dhānyaparvatavatsarvaṃ haimāṃbarasusaṃyutam

meroruparitaḥ sthāpyaṃ haimaṃ tatra tarutrayam//
maṃdāraḥ pārijātaśca tṛtīyaḥ kalpapādapaḥ

etadvṛkṣatrayaṃ mūrdhni sarveṣvapi niveśayet//
haricaṃdanasaṃtānau pūrvapaścimabhāgayoḥ

niveśyau sarvaśaileṣu viśeṣāccharkarācale//
maṃdare kāmadevastu pratyagvaktraḥ sadā bhavet

gaṃdhamādanaśṛṃge tu dhanadaḥ syādudaṅmukhaḥ//
prāṅmukho vedamūrttistu haṃsaḥ syādvipulācale२००

haimī bhavetsupārśve tu surabhī dakṣiṇāmukhī//
dhānyaparvatavatsarvamāvāhanamakhādikam

kṛtvātha gurave dadyānmadhyamaṃ parvatottamam//
ṛtvigbhyaścaturaḥ śailānimānmaṃtrānudīrayet

saubhāgyāmṛtasāroyaṃ paramaḥ śarkarācalaḥ//
tasmādānaṃdakārī tvaṃ bhavaśaileṃdra sarvadā

amṛtaṃ pibatāṃ ye tu patitā bhuvi śīkarāḥ//
devānāṃ tatsamutthastvaṃ pāhi naḥ śarkarācala

manobhavadhanurmadhyādudbhūtā śarkarā punaḥ//
tanmayosi mahāśaila pāhi saṃsārasāgarāt

yo dadyāccharkarāśailamanena vidhinā naraḥ//
sarvapāpavinirmuktaḥ prayāti brahmamaṃdiram

caṃdrasūryapratīkāśamadhiruhyānujīvibhiḥ//
sahaiva yānamuttiṣṭhettato viṣṇuprabho divi

tataḥ kalpaśatāṃte tu saptadvīpādhipo bhavet//
āyurārogyasaṃpanno yāvajjanmāyutatrayam

bhojanaṃ śaktitaḥ kuryātsarvaśaileṣvamatsaraḥ//
svayaṃ cākṣāralavaṇamaśnīyāttadanujñayā

parvatopaskarānsarvānprāpayedbrāhmaṇālayam//
etatte sarvamākhyātaṃ śailadānamanuttamam

yadanyadrocate tubhyaṃ tanmāṃ pṛcchasva pārthiva//
bhīṣma uvāca//
bhagavanbhavasaṃsārasāgarottārakārakam

kiṃcidvrataṃ samācakṣva svargārogyaphalapradam//
pulastya uvāca//
sauradharmaṃ pravakṣyāmi nāmnā kalyāṇasaptamīm

viśokasaptamīṃ tadvattṛtīyāṃ phalasaptamīm//
śarkarāsaptamīṃ kuryāttathā kamalasaptamīm

maṃdārasaptamīṃ ṣaṣṭhīṃ saptamīṃ śubhasaptamīm//
sarvāḥ puṇyaphalāḥ proktāḥ sarvā devarṣipūjitāḥ

vidhānamāsāṃ vakṣyāmi yathāvadanupūrvaśaḥ//
yadā tu śuklasaptamyāmādityasya dinaṃ bhavet

sā tu kalyāṇinī nāma vijayā ca nigadyate//
prātargavyena payasā snānaṃ nadyāṃ samācaret

śuklāṃbaradharaḥ padmamakṣataiḥ parikalpayet//
prāṅmukhoṣṭadalaṃ madhye tadvadvṛttāṃ ca karṇikām

puṣpākṣatādbhirdeveśaṃ vinyasetsarvataḥ kramāt//
pūrveṇa tapanāyeti mārtaṃḍāyeti vai tataḥ

yāmye divākarāyeti vidhātra iti nairṛte//
paścime varuṇāyeti bhāskarāyeti cānile

saumye vikartanāyeti devāyetyaṣṭame dale//
ādāvaṃte ca madhye canamostu paramātmane

maṃtrairetaissamabhyarcya namaskārāṃta dāpitaiḥ//
śuklairvastraiḥ phalairbhakṣyairdhūpamālyānulepanaiḥ

sthaṃḍile pūjayedbhaktyā guḍena lavaṇena vai//
tato vyāhṛtimaṃtreṇa visṛjya dvijapuṃgavān

śaktitastarpayedbhaktyā guḍakṣīraghṛtādibhiḥ//
tilapātraṃ hiraṇyaṃ ca brāhmaṇāya nivedayet

evaṃ niyamakṛtsuptvā prātarutthāya mānavaḥ//
kṛtasnānajapo vipraiḥ sahaiva ghṛtapāyasam

bhuktvā ca vedaviduṣi vaiḍālavratavarjite//
ghṛtapātraṃ sakanakaṃ sodakuṃbhaṃ nivedayet

prīyatāmatra bhagavānparamātmā divākaraḥ//
anena vidhinā sarvaṃ māsimāsi samācaret

tatastrayodaśe māsi gāśca dadyāttrayodaśa//
vastrālaṃkārasaṃyuktāḥ svarṇaśṛṃgāḥ payasvinīḥ

ekāmapi pradadyācca vittahīno vimatsaraḥ//
na vittaśāṭhyaṃ kurvīta yato mohātpatatyadhaḥ

anena vidhinā yastu kuryātkalyāṇasaptamīṃ//
sarvapāpavinirmuktaḥ sūryaloke mahīyate

āyurārogyamaiśvaryamanaṃtamiha jāyate//
sarvapāpaharā ceyaṃ sarvadaivatapūjitā

sarvaduṣṭopaśamanī sadā kalyāṇasaptamī//
imāmanaṃtaphaladāṃ yastu kalyāṇasaptamīṃ

śṛṇoti yaḥ paṭhedvāpi sa ca pāpaiḥ pramucyate//
viśokasaptamīṃ tadvadvakṣyāmi nṛpasattama

yāmupoṣya naraḥ śokaṃ na kadācidihāśnute//
māghe kṛṣṇatilai snātaḥ paṃcamyāṃ śuklapakṣataḥ

kṛtāhāraḥ kṛsarayā daṃtadhāvanapūrvakam//
upavāsavrataṃ kṛtvā brahmacārī niśi svapet

tataḥ prabhāta utthāya kṛtasnānajapaḥ śuciḥ//
kṛtvā tu kāṃcanaṃ padmamarkāyeti prapūjayet

karavīreṇa raktena raktavastrayugena ca//
yathā viśokaṃ bhuvanaṃ tvayaivāditya sarvadā

tathā viśokatā me syāttvadbhaktiḥ pratijanma ca//
evaṃ sapūjya ṣaṣṭhyāṃ tu bhaktyā saṃpūjayeddvijān

svayaṃ saṃprāśya gomūtramutthāya kṛtanaityakaḥ//
saṃpūjya viprānyatnena guḍapātrasamanvitam

sadvastrayugmaṃ padmaṃ ca brāhmaṇāya nivedayet//
atailalavaṇaṃ bhuktvā saptamyāṃ maunasaṃyutaḥ

tataḥ purāṇaśravaṇaṃ karttavyaṃ bhūtimicchatā//
anena vidhinā sarvamubhayorapi pakṣayoḥ

kuryādyāvatpunarmāghaśuklapakṣasya saptamī//
vratāṃte kalaśaṃ dadyātsuvarṇakamalānvitam

śayyāṃ sopaskarāṃ dadyātkapilāṃ ca payasvinīṃ//
anena vidhinā yastu vittaśāṭhyena varjitaḥ

viśokasaptamīṃ kuryātsa yāti paramāṃ gatim//
yāvajjanmasahasrāṇāṃ sāgraṃ koṭiśataṃ bhavet

tāvanna śokamāpnoti rogadaurgatyavarjitaḥ//
yaṃ yaṃ kāmayate kāmaṃ taṃ taṃ prāpnoti puṣkalam

niṣkāmaṃ kurute yastu sa paraṃ brahma gacchati//
yaḥ paṭhecchṛṇuyādvāpi viśokākhyāṃ tu saptamīm

sopīṃdralokamāsādya na duḥkhī jāyate kvacit//
anyāmapi pravakṣyāmi nāmnā tu phalasaptamīm

yāmupoṣya naraḥ pāpairvimuktaḥ svargabhāgbhavet//
mārgaśīrṣe śubhe māsi paṃcamyāṃ niyatavrataḥ

ṣaṣṭhīmupoṣya kamalaṃ kārayitvā tu kāṃcanam//
śarkarāsaṃyutaṃ dadyādbrāhmaṇāya kuṭuṃbine

rūpaṃ ca kāṃcanaṃ kṛtvā phalasyaikasya dharmavit//
dadyāddvikālavelāyāṃ bhānurme prīyatāmiti

śaktyā tu viprānsaṃpūjya saptamyāṃ kṣīrabhojanam//
kṛtvā kuryātphalatyāgaṃ yāvatsyātkṛṣṇasaptamī२५०

tāmupoṣyātha vidhivadanenaiva krameṇa tu//
tadvaddhemaphalaṃ datvā suvarṇakamalānvitam

śarkarāpātrasaṃyuktaṃ vastramālāsamanvitam//
saṃvatsaramanenaiva vidhinobhayasaptamīm

upoṣya dadyātkramaśaḥ sūryamaṃtramudīrayet//
bhānurarko ravirbrahmā sūryaḥ śukro hariḥ śivaḥ

śrīmānvibhāvasustvaṣṭā varuṇaḥ prīyatāmiti//
pratimāsaṃ ca saptamyāmekaikaṃ nāma kīrttayet

pratipakṣaṃ phalatyāgametatkurvansamācaret//
vratāṃte vipramithunaṃ pūjayedvastrabhūṣaṇaiḥ

śarkarākalaśaṃ dadyāddhemapadmaphalānvitam//
yathā na viphalaḥ kāmastvadbhaktānāṃ sadā bhavet

tathānaṃtaphalāvāptirastu me janmajanmani//
imāmanaṃtaphaladāṃ yaḥ kuryātphalasaptamīm

bhūtabhavyāṃśca puruṣāṃstārayedekaviṃśatim//
yaḥ śṛṇoti paṭhedvāpi sopi kalyāṇabhāgbhavet

sarvapāpaviśuddhātmā sūryaloke mahīyate//
surāpānādikaṃ kiṃñcidatrāmutra ca vā kṛtam

tatsarvaṃ nāśamāyāti yaḥ kuryātphalasaptamīm//
śarkarāsaptamīṃ vakṣye tadvatkalmaṣanāśinīm

āyurārogyamaiśvaryaṃ yayānaṃtaṃ prajāyate//
mādhavasya site pakṣe saptamyāṃ niyatavrataḥ

prātaḥ snātvā tilaiḥ śubhraiḥ śuddhamālyānulepanaḥ//
sthaṃḍile padmamālikhya kuṃkumena sakarṇikam

tasminnamaḥ savitreti gaṃdhapuṣpaṃ nivedayet//
sthāpayedudakuṃbhaṃ ca śarkarāpātrasaṃyutam

śuklavastrairalaṃkṛtya śuklamālyānulepanaiḥ//
svarṇapuṣpasamāyuktaṃ maṃtreṇānena pūjayet

viśvavedamayo yasmāttvaṃ vedeṣu ca paṭhyase//
tvamevāmṛtasarvasvamataḥ śāṃtiṃ prayaccha me

paṃcagavyaṃ tataḥ pītvā svapettatpārśvataḥ kṣitau//
saurasūktaṃ japannāste purāṇaśravaṇena ca

ahorātre gate paścādaṣṭamyāṃ kṛtanaityakaḥ//
tatsarvaṃ vedaviduṣe brāhmaṇāya nivedayet

bhojayecchaktito viprānśarkarāghṛtapāyasaiḥ//
bhuṃjītātailalavaṇaṃ svayamapyatha vāgyataḥ

anena vidhinā sarvaṃ māsimāsi samācaret//
saṃvatsarāṃte śayanaṃ śarkarākalaśānvitam

sarvopaskarasaṃyuktaṃ tathaikāṃgāṃ payasvinīm//
gṛhaṃ ca śaktimāndadyātsamastopaskarānvitam

sahasreṇātha niṣkāṇāṃ kṛtvā dadyācchatena vā//
daśabhirvā tribhirvāpi niṣkeṇaikena vā punaḥ

padmaṃ svaśaktito dadyātpūrvavanmaṃtrapāṭhanam//
vittaśāṭhyaṃ na kurvīta kurvandoṣānsamaśnute

amṛtaṃ pibato vaktrātsūryasyāmṛtabiṃdavaḥ//
samutpeturddharaṇyāṃ ye śālimudgekṣavastu te

śarkarāyārasastasmādikṣusāromṛtātmavān//
iṣṭāraverataḥ puṇyā śarkarā havyakavyayoḥ

śarkarāsaptamī ceyaṃ vājimedhaphalapradā//
sarvaduṣṭopaśamanī putrapautravivardhinī

yaḥ kuryātparayā bhaktyā sa paraṃ brahma gacchati//
kalpamekaṃ vasetsvarge tato yāti paraṃ padam

idamanagha śṛṇoti yaḥ smaredvā paripaṭhatīha sureśvarasya loke//
matimapi ca dadāti sopi devairamarapure paripūjyate munīndraiḥ

ataḥ paraṃ pravakṣyāmi tadvatkamalasaptamīm//
yasyāssaṃkīrttanādeva tuṣyatīha divākaraḥ

vasaṃtāmalasaptamyāṃ susnāto gaurasarṣapaiḥ//
tilapātre ca sauvarṇaṃ nidhāya kamalaṃ śubham

vastrayugmāvṛtaṃ kṛtvā gaṃdhapuṣpairathārcayet//
namaste padmahastāya namaste viśvadhāriṇe

divākara namastestu prabhākara namostute//
tato dvikālavelāyāmudakuṃbhasamanvitam

viprāya dadyātsaṃpūjya vastramālyavibhūṣaṇaiḥ//
śaktitaḥ kapilāṃ dadyādalaṃkṛtya vidhānataḥ

ahorātre gate paścādaṣṭamyāṃ bhojayeddvijān//
yathāśakti ca bhuṃjīta vimāṃsaṃ tailavarjitaṃ

anena vidhinā śuklasaptamyāṃ māsi māsi ca//
sarvaṃ samācaredbhaktyā vittaśāṭhyavivarjitaḥ

vratāṃte śayanaṃ dadyātsuvarṇakamalānvitam

gāśca pradadyācchaktyā tu suvarṇasya payasvinīḥ//
bhājanāsanadīpādīndadyādiṣṭānupaskarān

anena vidhinā yastu kuryātkamalasaptamīm//
lakṣmīmanaṃtāmabhyeti sūryaloke ca modate

kalpekalpe tato lokānsapta gatvā pṛthakpṛthak//
apsarobhiḥ parivṛtastato yāti parāṃ gatiṃ

paśyedimāṃ yaḥ śṛṇuyānmuhūrte paṭhecca bhaktyātha matiṃ dadāti//
sopyatra lakṣmīmamalāmavāpya gaṃdharvavidyādharalokameti

ataḥ paraṃ pravakṣyāmi sarvapāpapraṇāśinīm//
sarvakāmapradāṃ puṇyāṃ nāmnā maṃdārasaptamīṃ

māghasyāmalapakṣe tu paṃcamyāṃ laghubhuṅnaraḥ//
daṃtakāṣṭhaṃ tataḥ kṛtvā ṣaṣṭhīmupavasedbudhaḥ

viprānsaṃpūjayitvā tu maṃdāraṃ prārthayenniśi//
tataḥ prabhāta utthāya kṛtvā snānaṃ punardvijān

bhojayecchaktitaḥ kuryānmaṃdārakusumāṣṭakaṃ//
sauvarṇaṃ puruṣaṃ tadvatpadmahastaṃ suśobhanaṃ

padmaṃ kṛṣṇatilaiḥ kṛtvā tāmrapātreṣṭapatrakaṃ//
hemamaṃdārakusumairbhāskarāyeti pūrvataḥ

namaskāreṇa tadvacca sūryāyetyamale dale//
dakṣiṇe tadvadarkāya tathāryamṇe ca nairṛte

paścime vedadhāmne ca vāyavye caṃḍabhānave//
pūṣṇe cottarataḥ pūjya ānaṃdāyeti tatparam

karṇikāyāṃ ca puruṣaḥ sthāpyaḥ sarvātmanepi ca//
śuklavastraiḥ samāveṣṭya bhakṣyairmālyaphalādibhiḥ

evamabhyarcya tatsarvaṃ dadyādvedavide punaḥ//
bhuṃjītātailalavaṇaṃ vāgyataḥ prāṅmukho gṛhī

anena vidhinā sarvaṃ saptamyāṃ māsimāsi ca//
kuryātsaṃvatsaraṃ yāvadvittaśāṭhyavivarjitaḥ

etadeva vratāṃte tu nidhāya kalaśopari//
gobhirvibhavataḥ sārddhaṃ dātavyaṃ bhūtimicchatā३००

namo maṃdāranāthāya maṃdārabhavanāya ca//
tvaṃ rave tārayasvāsmānasmātsaṃsārasāgarāt

anena vidhinā yastu kuryānmaṃdārasaptamīm//
vipāpmā sa sukhī martyaḥ kalpaṃ ca divi modate

imāmaghaughapaṭalabhīṣaṇadhvāṃtadīpikāṃ//
gacchansaṃgṛhya saṃsāraśarvaryāṃ na skhalennaraḥ

maṃdārasaptamīmetāmīpsitārthaphalapradāṃ//
yaḥ paṭhecchṛṇuyādvāpi sopi pāpaiḥ pramucyate

athānyāmapi vakṣyāmi śobhanāṃ śubhasaptamīṃ//
yāmupoṣya naro rogaśokaughāttu pramucyate

puṇyamāśvayuje māsi kṛtasnānajapaḥ śuciḥ//
vācayitvā tato viprānārabhecchubhasaptamīṃ

kapilāṃ pūjayedbhaktyā gaṃdhamālyānulepanaiḥ//
namāmi sūryasaṃbhūtāmaśeṣabhuvanālayāṃ

tvāmahaṃ śubhakalyāṇi svaśarīraviśuddhaye//
atha kṛtvā tilaprasthaṃ tāmrapātreṇasaṃyutam

kāṃcanaṃ vṛṣabhaṃ tadvadvastramālyaguḍānvitaṃ//
sopadhānaṃ ca viśrāmabhājanāsanasaṃyutam

phalairnānāvidhairbhakṣyaiḥ ghṛtapāyasasaṃyutaiḥ//
dadyāddvikālavelāyāmaryamā prīyatāmiti३१० vikāla//
paṃcagavyaṃ ca saṃprāśya svapedbhūmāvasaṃstare//
tataḥ prabhāte saṃjāte bhaktyā saṃtarpayeddvijān

anena vidhinā dadyānmāsimāsi sadā naraḥ//
vāsasī vṛṣabhaṃ haimaṃ tadvadgāṃ kāṃcanodbhavām

saṃvatsarāṃte śayanamikṣudaṃḍaguḍānvitam//
tāmrapātre tilaprasthaṃ sauvarṇaṃ vṛṣabhaṃ tathā

dadyādvedavide sarvaṃ viśvātmā prīyatāmiti//
anena vidhinā vidvānkuryādyaḥ śubhasaptamīm

tasya śrīrvimalā kīrttirbhavejjanmani janmani//
apsarogaṇagaṃdharvaiḥ pūjyamānaḥ surālaye

vasedgaṇādhipo bhūtvā yāvadābhūtasaṃplavam//
kalpādāvavatīrṇaśca saptadvīpādhipo bhavet

bhrūṇahatyāsahasrasya brahmahatyāśatasya ca//
nāśāyālamiyaṃ puṇyā paṭhyate śubhasaptamī

imāṃ paṭhedyaḥ śṛṇuyānmuhūrtaṃ paśyetprasaṃgādapi dīyamānam//
sopyatra sarvāghavimuktadehaḥ prāpnoti vidyādharanāyakatvam

yāvatsamāssapta naraḥ karoti yaḥ saptamīṃ saptavidhānayuktām//
sa saptalokādhipatiḥ krameṇa bhūtvā padaṃ yāti paraṃ murāreḥ

//
iti śrīpādmapurāṇe prathame sṛṣṭikhaṃḍe puṣkaramāhātmye ekaviṃśo'dhyāyaḥ