Nārāyaṇīya · Chapter 3.13

hiraṇyākṣaṃ tāvad varada! bhavadanveṣaṇaparaṃ
carantaṃ sāṃvarte payasi nijajaṅghāparimite /
bhavadbhukto gatvā kapaṭapaṭudhīrnāradamuniḥ
śanairūce nandan danujamapi nindaṃstava balam //

sa māyāvī viṣṇurharati bhavadīyaṃ vasumatīṃ
prabho! kaṣṭaṃ kaṣṭaṃ kimidamiti tenābhigaditaḥ /
nadan kvāsau kvāsāviti sa muninā darśitaptho
bhavantaṃ saṃprāpad dharaṇidharamudyantamudakāt //

aho āraṇyo'yaṃ mṛga iti hasantaṃ bahutarair
duruktairvidhyantaṃ ditisutamavajñāya bhagavan! /
mahīṃ dṛṣṭvā daṃṣṭrāśirasi cakitāṃ svena mahasā
payodhāvādhāya prasabhamudayuṅkthā mṛdhavidhau //

gadāpāṇau daitye tvamapi hi gṛhītonnatagado
niyuddhena krīḍan ghaṭaghaṭaravodghuṣṭaviyatā /
raṇālokaitsukyānmilati surasaṅghe drutamamuṃ
nirundhyāḥ sandhyātaḥ prathamamiti dhātrā jagadiṣe //

gadonmarde tasmiṃstava khalu gadāyāṃ ditibhuvo
gadāghātād bhūmau jhaṭiti patitāyāmahaha bhoḥ! /
mṛdusmerāsyastvaṃ danujakulanirmūlanacaṇaṃ
mahācakraṃ smṛtvā karabhuvi dadhāno ruruciṣe //

tataḥ śūlaṃ kālapratimaruṣi daitye visṛjati
tvayicchindatyenat karakalitacakrapraharaṇāt /
samāruṣṭo muṣṭyā sa khalu vitudaṃstvāṃ samatamod
galanmāye māyāstvayi kila jaganmohanakarīḥ //

bhavaccakrajyotiṣkaṇalavanipātena vidhute
tato māyācakre vitataghanaroṣāndhamanasam /
gariṣṭhābhirmuṣṭiprahṛtibhirabhighnantamasuraṃ
karāgreṇa svena śravaṇapadamūle niravadhīḥ //

mahākāyaḥ so'yaṃ tava karasarojapramathito
galadrakto vaktrādapatadṛṣibhiḥ ślāghitahatiḥ /
tadā tvāmudāmapramadabharavidyotihṛdayā
munīndrāḥ sāndrābhiḥ stutibhiranuvannadhvaratanam //

tvaci cchando romasvapi kuśagaṇaścakṣuṣi ghṛtaṃ
caturhotāro'ṅghrau srugapi vadane codara iḍā /
grahā jihvāyāṃ te parapuruṣa! karṇe ca camasā
vibho! somo vīryaṃ varada! galadeśe'pyupasandaḥ //

munīndrairityādistavanamukharairmoditamanā
mahīyasyā mūrtyā vimalatarakīrtyā ca vilasan /
svadhiṣṇyaṃ saṃprāptaḥ sukharasavihārī madhuripo!
nirundhyā rogaṃ me sakalamapi vātālayapate! //