Narada Smriti · Chapter p20

yadā sākṣī na vidyate vivāde vadatāṃ nṛṇām /
tadā divyaiḥ parīkṣeta śapathaiś ca pṛthagvidhaiḥ //

satyaṃ vāhanaśastrāṇi gobījarajatāni ca /
devatāpitṛpādāś ca dattāni sukṛtāni ca //

mahāparādhe divyāni dāpayet tu mahīpatiḥ /
alpeṣu ca naraḥ śreṣṭhaḥ śapathaiḥ śāpayen naram //

ete hi śapathāḥ proktāḥ sukarās svalpasaṃśaye /
sāhaseṣv abhiśāpe ca vidhir divyaḥ prakīrtitaḥ //

saṃdigdhe 'rthe 'bhiyuktānāṃ pracchanneṣu viśeṣataḥ /
divyaḥ pañcavidho jñeya ity āha bhagavān manuḥ //

dhaṭo 'gnir udakaṃ caiva viṣaṃ kośaś ca pañcamaḥ /
uktāny etāni divyāni dūṣitānāṃ viśodhane //

saṃdigdheṣv abhiyuktānāṃ viśuddhyarthaṃ mahātmanā /
nāradena punaḥ proktāḥ satyānṛtavibhāvanāḥ /
vādino 'numatenainaṃ kārayen nānyathā budhaḥ //

caturhastau tulāpādāv ucchrayeṇa prakīrtitau /
ṣaḍḍhastaṃ tu tayor dṛṣṭaṃ pramāṇaṃ parimāṇataḥ //

pādayor antaraṃ hastaṃ bhaved adhyardham eva ca /
śikyadvayaṃ samāsajya dhaṭe karkaṭake dṛḍhe //

tulayitvā naraṃ pūrvaṃ cihnaṃ kuryād dhaṭasya tu /
kakṣāsthānena taṃ tulyam avatārya tato dhaṭāt //

samayaiḥ parigṛhyainaṃ punar āropayen naraḥ /
tasminn evaṃ kṛte sā cet kakṣe sthāpya suniścalā //

tulito yadi vardheta śuddhaḥ syān nātre saṃśayaḥ /
samo vā hīyamāno vā na viśuddho bhaven naraḥ //

dharmaparyāyavacanair dhaṭa ity abhidhīyase /
tvaṃ vetsi sarvabhūtānāṃ pāpāni sukṛtāni ca /
tvam eva dhaṭa jānīṣe na vidur yāni mānuṣāḥ //

vyavahārābhiśasto 'yaṃ mānuṣas tulyate tathā /
tad eva saṃśayāpannaṃ dharmatas trātum arhasi //

ata ūrdhvaṃ pravakṣyāmi lohasya vidhim uttamam /
dvātriṃśadaṅgulāni tu maṇḍalān maṇḍalāntaram //

aṣṭābhir maṇḍalair evam aṅgulānāṃ śatadvayam /
caturviṃśat samākhyātaṃ saṃkhyātattvārthadarśibhiḥ //

kalpitair maṇḍalair evam uṣitasya śucer api /
saptāśvatthasya pattrāṇi sūtreṇāveṣṭya hastayoḥ //

vidadhyāt taptalohasya pañcāśatpalam saṃmitam /
hastābhyāṃ piṇḍam ādāya śanaiḥ saptapadaṃ vrajet //

na maṇḍalam atikrāmen nāpy arvāk pādayet padam /
na ca pātayetāprāptaḥ yāvadbhūmir prakalpitā //

tīrtvānena vidhānena maṇḍalāni samāhitaḥ /
adagdhaḥ sarvato yas tu sa viśuddho bhaven naraḥ //

bhayād vā pātayate yas tv adagdho yo vibhāvyate /
punas taṃ hārayel lohaṃ sthitir eṣā purātanī /
anena vidhinā kāryo hutāśasamayaḥ smṛtaḥ //

tvam agne sarvabhūtānām antaścarasi sākṣivat /
sukṛtaṃ duḥkṛtaṃ loken(a) ajñātaṃ vidyate tvayā //

pracchannāni manuṣyāṇāṃ pāpāni sukṛtāni ca /
yathāvad eva jānīṣe na vidur yāni mānuṣāḥ //

vyavahārābhiśasto 'yaṃ puruṣaḥ śuddhim icchati /
tad enaṃ saṃśayāpannaṃ dharmatas trātum arhasi //

ataḥ paraṃ pravakṣyāmi toyasya vidhim uttamam /
nātikrūreṇa dhanuṣā prerayet sāyakatrayam //

madhyamas tu śaro grāhyaḥ puruṣeṇa yavīyasā /
pratyānītasya tasyātha sa viśuddho bhaven naraḥ //

anyathā na viśuddhaḥ syād ekāṅgam api darśayet /
sthānād anyatra vā gacched yasmin pūrvaṃ niveṣitaḥ //

striyas tu na balāt kāryā na pumān api durbalaḥ /
bhīrutvād yoṣito mṛtyuḥ kṛśasyāpi balāt kuryāt /
sahasā prāpnuyāt sarvāṃs tasmād etān na majjayet //

toyamadhye manuṣyasya gṛhītvorū susaṃyataḥ //

satyānṛtavibhāgasya toyāgnī spaṣṭakṛttamau /
yataś cāgnir abhūd asmāt tatas toyaṃ viśiṣyate //

kriyate dharmatattvajñair dūṣitānāṃ viśodhanam /
tasmāt satyena bhagavañ jaleśa trātum arhasi //

ataḥ paraṃ pravakṣyāmi viṣasya vidhim uttamam /
tulayitvā viṣaṃ pūrvaṃ deyam etad dhimāgame //

na pūrvāhṇe na madhyāhne na saṃdhyāyāṃ tu dharmavit /
śaradgrīṣmavasanteṣu varṣāsu ca na dāpayet //

bhagnaṃ ca dāritaṃ caiva dhūpitaṃ miśritaṃ tathā /
kālakūṭam alaṃbuṃ ca viṣaṃ yatnena varjayet //

śārṅgahaimavataṃ śastaṃ gandhavarṇarasānvitam /
mahādoṣavate deyaṃ rājñā tattvabubhutsayā //

na bālāturavṛddheṣu naiva svalpāparādhiṣu /
viṣasya tu yavān sapta dadyāc chodye ghṛtaplutān //

viṣasya palaṣaḍbhāgād bhāgo viṃśatimas tu yaḥ /
tam aṣṭabhāgahīnaṃ tu śodhye dadyād ghṛtaplutam //

yathoktena vidhānena viprān sprṣṭvānumoditaḥ /
sopavāsaś ca khādeta devabrāhmaṇasaṃnidhau //

viṣaṃ vegaklamāpetaṃ sukhena yadi jīryate /
viśuddham iti taṃ jñātvā rājā satkṛtya mokṣayet //

tvaṃ viṣa brahmaṇaḥ putraḥ satyadharmaratau sthitaḥ /
śodhayainaṃ naraṃ pāpāt satyenāsyāmṛtībhava //

ataḥ paraṃ pravakṣyāmi kośasya vidhim uttamam //

pūrvāhṇe sopavāsasya snātasyārdrapaṭasya ca /
saśūkasyāvyasaninaḥ kośapānaṃ vidhīyate //

yadbhaktaḥ so 'bhiyuktaḥ syāt taddaivatyaṃ tu pāyayet /
saptāhād yasya dṛśyate dvisaptāhena vā punaḥ /
pratyātmikaṃ tu yatkiṃcit saiva tasya vibhāvanā //

dvisaptāhāt paraṃ yasya mahad vā vaikṛtaṃ bhavet /
nābhiyojyaḥ sa viduṣāṃ kṛtakālavyatikramāt //

mahāparādhe nirdharme kṛtaghne klībakutsite /
nāstikavrātyadāseṣu kośapānaṃ vivarjayet //

yathoktena prakāreṇa pañca divyāni dharmavit /
dadyād rājābhiyuktānāṃ pretya ceha ca nandati //

na viṣaṃ brāhmaṇe dadyān na lohaṃ kṣatriyo haret /
na nimajjyāpsu vaiśyaś ca śūdraḥ kośaṃ na pāyayet //

varṣāsu na viṣaṃ dadyāt hemante nāpsu majjayet /
na lohaṃ hārayed grīṣme na kośaṃ pāyayen niśi //