Narada Purana · Chapter 1.98

iti śrībṛhannāradīyapurāṇe pūrvabhāge bṛhadupākhyāne caturthapāde nāradīyapurāṇānukramaṇīkathanaṃ nāma saptanavatitamo 'dhyāyaḥ
śrībrahmovāca
atha te saṃpravakṣyāmi mārkaṇḍeyābhidhaṃ mune /
purāṇaṃ sumahatpuṇyaṃ paṭhatāṃ śṛṇvatāṃ sadā

yatrādhikṛtya śakunīnsarvadharmanirūpaṇam /
mārkaṇḍeyapurāṇaṃ tannavasāhasramīritam

mārkaṇḍeyamuneḥ praśno jaimineḥ prāksamīritaḥ /
pakṣiṇāṃ dharmasaṃjñānaṃ tato janmanirūpaṇam

pūrvajanmakathā caiṣāṃ vikriyā cā divaspateḥ /
tīrthayātrā balasyātha draupadeyakathānakam

hariścandrakathā puṇyā yuddhamāḍībakābhidham /
pitāputrasamākhyānaṃ dattātreyakatha tataḥ

haihasasyātha caritaṃ mahākhyānasamanvitam /
madālakasākathā proktā hyalarkacaritānvitā

sṛṣṭisaṃkīrtanaṃ puṇyaṃ navadhāpārikīrtitam /
kalpāntakālanirdeśo yakṣasṛṣṭinirūpaṇam

rudrādisṛṣṭirapyuktā dvīpacaryānukīrtanam /
manūnāṃ ca kathā nānākīrtitāḥ pāpahārikāḥ

tāsu durgākathātyantaṃ puṇyadā cāṣṭameṃ'tare /
tatpaścātpraṇavotpattistrayītejaḥ samudbhavā

mārtaṇḍasya ca janmākhyātanmāhātmyasamanvitā /
vaivasvatānvayaścāpi vatsaprīścaritaṃ tataḥ

khanitrasya tataḥ proktā kathā puṇyā mahātmanaḥ /
avikṣiccaritaṃ caiva kimicchavratakīrttanam

nariṣyantasya caritaṃ ikṣvākucaritaṃ tataḥ /
nalasya caritaṃ paścādrāmacandrasya satkathā

kuśavaṃśasamākhyānaṃ somavaṃśānukīrttanam /
pururavaḥ kathā puṇyā nahuṣasya kathādbhutā

yayāticaritaṃ puṇyaṃ yaduvaṃśānukīrttanam /
śrīkṛṣṇabālacaritaṃ māthuraṃ caritaṃ tataḥ

dvārakācaritaṃ cātha kathā sarvāvatārajā /
tataḥ sāṃkhyasamuddeśaḥ prapañcāsattvakīrtanam

mārkaṇḍeyasya caritaṃ purāṇaśravaṇe phalam /
yaḥ śṛṇoti naro bhaktyā purāṇamidamādarāt

mārkaṇḍeyābhidhaṃ vatsa sa labhetparamāṃ gatim /
yastu vyākurute caitacchaivaṃ sa labhate padam

tatprayacchellikhitvā yaḥ sauvarṇakarisaṃyutam /
kārtikyāṃ dvijavaryāya sa labhendbrahmaṇaḥ padam

śṛṇoti śrāvayedvāpi yaścānukramaṇīmimām /
mārkaṇḍeyapurāṇasya sa labhedvāñchitaṃ phalam