Narada Purana · Chapter 1.88

iti śrībṛhannāradīyapurāṇe pūrvabhāge bṛhadupākhyāne tṛtīyapāde durgāmantracatuṣṭayavarṇanaṃ nāma saptāśītitamo 'dhyāyaḥ
sūta uvāca
śrutvetthaṃ yajanaṃ viprā mantradhyānapuraḥsaram /
sarvāsāmavatārāṇāṃ nārado devadarśanaḥ

sarvādyāyā jaganmātuḥ śrīrādhāyāḥ samarcanam /
avatārakalānāṃ hi papraccha vinayānvitaḥ

nārada uvāca
dhanyo 'smikṛtakṛtyo 'smi jāto 'haṃ tvatprasādataḥ /
pajjaganmātṛmantrāṇāṃ vaibhavaṃ śrutavānmune

yathā lakṣmīmukhānāṃ tu avatārāḥ prakīrtitāḥ /
tathā rādhāvatārāṇāṃ śrotumicchāmi vaibhavam

yatsaṃkhyākāśca yadrūpā yatprabhāvā vidāṃvara /
rādhāvatārāstānsatyaṃ kīrtayāśeṣasiddhidān

etacchutvā vacastasya nāradasya vidheḥ sutaḥ /
sanatkumāraḥ provāca dhyātvā rādhāpadāṃbujam

sanatkumāra uvāca
śṛṇu vipra pravakṣyāmi rahasyātirahasyakam /
rādhāvatāracaritaṃ bhajatāmiṣṭisiddhidam

candrāvalī ca lalitā dve sakhyau supriye sadā /
mālāvatīmukhāṣṭānāṃ candrāvalyadhipāsmṛtā

kalāvatīmukhāṣṭānāmīśvarī lalitā matā /
rādhācaraṇapūjāyāmuktā mālāvatīmukhāḥ

lalitādhīśvarīṇāṃ tu nāmāni śṛṇu sāṃpratam /
kalāvatī madhumatī viśākhā śyāmalābhidhā

śaibyā vṛndā śrīdharākhyā sarvāstuttulyavigrahāḥ /
suśīlāpramukhā ścānyāḥ sakhyo dvātriṃśadīritāḥ

tāḥ śṛṇuṣva mahābhāga nāmataḥ pravadāmi te /
suśīlāṃ śaśilekhā ca yamunā mādhavī ratiḥ

kadambamālā kuntī ca jāhnavī ca svayaṃprabhā /
candrānanā padmamukhī sāvitrī ca sudhāmukhī

śubhā padmā pārijātā gauriṇī sarvamaṅgalā /
kālikā kamalā durgā virajā bhāratī surā

gaṅgā madhumatī caiva sundarī candanā satī /
aparṇā manasānandā dvātriṃśadrādhikāpriyāḥ

kadācidchalilā devī puṃrūpā kṛṣṇavigrahā /
sasarja ṣoḍaśakalāstāḥ sarvāstatsamaprabhāḥ

tāsā mantraṃ tathā dhyānaṃ yantrārcādikramaṃ tathā /
varṇaye sarvatantreṣu rahasyaṃ munisattama

vāto maruccāgrivahnī dharākṣme jalacāriṇī /
vimukhaṃ caraśucivibhū vanasvaśaktayaḥ svarāḥ

prāṇastejaḥ sthirā vāyurvāyuścāpi prabhā tathā /
jyakumabhraṃ tathā nādo dāvakaḥ pātha ityatha

vyomarayaḥ śikhī gotrā toyaṃ śūnyajavīdyutiḥ /
bhūmī raso namo vyāptaṃ dāhaścāpi rasāṃbu ca

viyatsparśaśca hṛddhaṃsahalāgrāso halātmikāḥ /
candrāvalī ca lalitā haṃselā nāyake mate

grāsasthitā svayaṃ rādhā svayaṃ śaktisvarūpiṇī /
śeṣāstu ṣoḍaśakalā dvātriṃśattatkalāḥ smṛtāḥ

vāṅmayaṃ nikhilaṃ vyāptamābhireva munīśvara /
lalitāpramukhāṇāṃ tu ṣoḍaśītvamupāgatā

śrīrādhā sundarī devī tāntrikaiḥ parikīrtyate /
kurukullā ca vārāhī candrālilalite ubhe

saṃbhūte mantravargaṃ te 'bhidhāsye 'haṃ yathātatham /
hṛtprāṇelāhaṃsadāvahnisvairlaliteritā

trividhā haṃsabhedeva śṛṇu tāṃ ca yathākramam /
haṃsādyayādyā madhyā syādādimadhyasthahaṃsayā

tṛtīyā prakṛtiḥ saiva turyā tairantyamāyayā /
āsu turyābhavanmuktyai tisro 'nyāḥ syuścasaṃpade

iti tripurasuṃdaryā vidyā sarumatasamīritā /
dāhabhūmīrasākṣmāsvairvaśinībījamīritam

prāṇo rasāśaktiyutaḥ kāmeśvaryakṣaraṃ mahat /
śūnyamaṃburasāvahnisvayogānmohanīmanuḥ

vyāptaṃ rasākṣmāsvayutaṃ vimalābījamīritam /
jyānabhodāhavahnisvayogaiḥ syādaruṇāmanuḥ

jayinyāstu samuddiṣṭaḥ sarvatra jayadāyakaḥ /
kaṃ nabhodāhasahitaṃ vyāptakṣmāsvayutaṃ manuḥ

sarveśvaryāḥ samākhyātaḥ sarvasiddhikaraḥ paraḥ /
grāso nabhodāhavahnisvairyuktaḥ kaulinīmanuḥ

etairmanubhiraṣṭābhiḥ śaktibhirvargasaṃyuktaiḥ /
vāgdevatāntairnyāsaḥ syādyena devyātmako bhavet

randhre bhāle tathājñāyāṃ gale hṛdi tathā nyaset /
nābhāvādhārake pādadvaye mūlāgrakāvadhi

ṣaḍdīrghāḍhyena bījena kuryāścaiva ṣaḍaṅgakam /
lohitāṃ lalitāṃ bāṇacāpapāśasṛṇīḥ karaiḥ

dadhānāṃ kāmarājāṅke yantrītāṃ mudutāṃ smaret /
madhyasthadevī tvekaiva ṣoḍaśākārataḥ sthātā

yatastasmāttanau tasyāstvanyāḥ pañcadaśārcayet /
ṛṣiḥ śivaśchanda uktā devatā lalitādikāḥ

sarvāsāmapi nityānāmāvṛtīrnāmasaṃcaye /
paṭale tu prayogāṃśca vakṣyāmyagre savistaram

atha ṣoḍaśanityāsu dvitīyā yā samīritā /
kāmeśvarīti tāṃ sarvakāmadāṃ śṛṇu nārada

śuciḥ svena yutastvādyo lalitā syāddvitīyakaḥ /
śūnyamagniyutaṃ paścādrayovyāptena saṃyutam

prāṇo rasāgnisahitaḥ śūnyayugmaṃ carānvitam /
nabhogotrā punaścaiṣāṃ dāhena samayojitā

aṃbu syāccarasaṃyuktaṃ navaśaktiyutaṃ ca hṛt /
eṣā kāmeśvarī nityā kāmadaikādaśākṣarī

mūlavidyākṣaraireva kuryādaṅgāni ṣaṭ kramāt /
ekena hṛdayaṃ śīrṣaṃ tāvatātho dvayaṃ dvayāt

caturbhirnayanaṃ tadvadastramekena kīrtitam /
dṛkśrotranāsādvitaye jihvāhṛnnābhiguhyake

vyāpakatvena sarvāṅge mūrddhādiprapadāvadhi /
nyasedvidyākṣarāṇyeṣu sthāneṣu tadanantaram

samastena vyāpakaṃ tu kuryāduktakrameṇa tu /
atha dhyānaṃ pravakṣyāmi nityapūjāsu coditam

yena devī suprasannā dadātīṣṭamayatnataḥ /
bālārkakoṭisaṃkāśāṃ māṇikyamukuṭojjvalām

hāragraiveyakāñcībhirūrmikānūpurādibhiḥ /
maṇḍitāṃ raktavasanāṃ ratnābharaṇaśobhitām

ṣaḍbhujāṃ trīkṣaṇāmindukalākalitamaulikām /
pañcāṣṭaṣoḍaśadvandvaṣaṭkoṇacaturasragām

mandasmitalasadvaktrāṃ dayāmantharavīkṣaṇām /
pāśāṅkuśau ca puṇḍrekṣucāpaṃ puṣpaśilīmukham

ratnapātraṃ sīdhupūrṇaṃ varadaṃ bibhratīṃ karaiḥ /
tataḥ prayogānkurvīta siddhe matre tu sādhakaḥ

tṛtīyāmatha vakṣyāmi nāmnā tu bhagamālinī /
kāmeśvaryādirādiḥ syādrasaścāpasthirārasaḥ

dharāyuksacarā paścātsthirā paścādrasaḥ smṛtaḥ /
sthirāśūnye 'gnisaṃyukte rasaḥ syāttadanantaram

sthirā bhūsahitā gotrā sadāho 'gnirasaḥ sthirā /
nabhaśca marutā yuktaṃ rasavarṇasamanvitam

tato rasaḥ sthirā paścānmarutā saha yojitā /
aṃbahaṃsacaro 'thikto raso 'tha syātsthirā punaḥ

sthirādharānvitā haṃso vyāptena ca careṇa ca /
rasaḥ sthirā tato vyāptaṃ bhūyutaṃ śūnyamagniyuk

rasaḥ sthirā tataḥ sāgniśūnyaṃ taviyuto marut /
rayaḥ śūnyaṃ cāgniyutaṃ hṛdāhaṃsācca tatparam

rasaḥ sthirāṃbu ca viyatsvayutaṃ prāṇa eva ca /
dāho 'griyugrasastasmāsthirākṣmā dāhasaṃyutā /
sacaraḥ syājjavīpūrvavidyā tartīyataḥ kramāt

catuṣṭayamathārṇānāṃ rasastadanu ca sthirā /
hṛdaṃbuyuk kṣmayā dāhaḥ sacaraḥ syājjavī ca hṛt

dāho 'ṃbumarutā yukto vyomni sāgnirasastutaḥ /
sthirā tu marutā yuktā śūnyaṃ sāgninabhaścarau

haṃso vyāptamarudyuktaḥ śūnyaṃ vyāptamatoṃ'bu ca /
dāho gotrācarayutā tathā dāhastathā rayaḥ

hṛddharāsahitaṃ dāharayau carasamanvitau /
rasaḥ sthirā tataḥ prāṇo rasāgnisahito bhavet

śūnyayugmaṃ carayutaṃ tataḥ pūrvamataḥ param /
śūnyayugmaṃ ca gotrā syādvāhayuktāṃbunā caraḥ

prāṇo rasā carayuto gotravyasimataḥ param /
gotrādāhamarudyuktā tvaṃbunyāsamato bhavet

yuktonāṃbhaśca bhūyuktaṃ vāścareṇa samanvitam /
grāso dharāyutaḥ paścādrasaḥ śaktyā samanvitaḥ

grāso bhūsahito vipra raso vyāptaṃ tataśca hṛt /
dāhonāṃbu ca hṛtpaścādrayeṃ'bumarudanvitaḥ

śūnyaṃ ca kevalaṃ caiva rasaśca sacarasthirā /
viyadaṃbuyutaṃ dāhastvagniyuksayutaḥ śuciḥ

bhūmī rasākṣmāsvayutā pañcaikāntaritāḥ sthirāḥ /
tadantarita bījāni svasaṃyuktāni pañca vai

tāni kramājjyāsacaro raso bhūśca nabhoyutā /
haṃsaścarayuto dviḥ syāttataḥ prāṇo rasāgniyuk

śūnyayugmaṃ carayutaṃ hṛddāho 'mbumarudyutaḥ /
vyomāgnisahitaṃ paścādrasaśca marutā sthirā

śūnyaṃ sāgninabhaścaiva careṇa sahitaṃ tathā /
aṃbu paścādviyattasmānnabhaśca marudanvitam

śūnyaṃ vyāptaṃ ca dadyuktaṃ rayadāhasvavahnibhiḥ /
haṃsaḥ sadāho 'mbagurasā carasvaiḥ saṃyuto bhavet

haṃsaḥ sadāhavahnisvairyuktamantyamudīritam /
saptatriṃśacchatārṇaiḥ syānnityā saubhāgamālinī

aṅgāni mantravarṇaiḥ syurādyena hṛdudīritam /
tataścatṛrbhiḥ śīrṣaṃ syācchikhā tribhirudīritā

guṇavedākṣaraiḥ śeṣāṇyaṅgāni ṣaḍiti kramāt /
aruṇāmaruṇākalpāṃ suṃdarīṃ susmitānanām

trinetrāṃ bāhubhiḥ ṣaḍbhirupetāṃ kamalāsanām /
kahlārapāśapuṇḍrekṣukodaṇḍānvāmabāhubhiḥ

dadhānāṃ dakṣiṇaiḥ padmamaṅkuśaṃ puṣpasāyakam /
tathāvidhābhiḥ parito yutāṃ śaktigaṇaiḥ stutaiḥ

akṣaroktābhiranyābhiḥ smaronmādamadātmabhiḥ /
eṣā tṛtīyā kathitā vanitā janamohinī

caturthīṃ śṛṇu viprendra nityaklinnāsamāhvayām /
haṃsastu dāhavahnisvairyuktaḥ prathamamucyate

kāmeśvaryāstṛtīyādivarṇānāmaṣṭakaṃ bhavet /
hṛdaṃbumarutā yuktaḥ sa evaikādaśākṣaraḥ

ekādaśākṣarī ceyaṃ vidyārṇairaṅgakalpanam /
ādyena mantravarṇena hṛdayaṃ samudīritam

dvābhyāṃ dvābhyāṃ tu śeṣāṇi aṅgāni parikalpayet /
nyasedaṅguṣṭhamūlādikaniṣṭhāgrāntamūrddhvagam

śeṣaṃ tadvalaye nyasya hṛddṛkchrotre nasordvayoḥ /
tvaci dhvaje ca pāyau ca pādayo rarṇakānnyaset

aruṇāmaruṇākalpāmaruṇāṃśukadhāriṇīm /
aruṇasragvilepāṃ tāṃ cārusmeramukhāṃbujām

netratrayollasadvaktrāṃ bhālegharmāṃbumauktike /
virājamānāṃ mukuṭalasadarddhenduśekharām

caturbhirbāhubhiḥ pāśamaṅkuśaṃ pānapātrakam /
abhayaṃ bibhratīṃ padmamadhyāsīnāṃ madālasām

dhyātvaivaṃ pūjayennityakkinnāṃ nityāṃ svaśaktibhiḥ /
puṇyā caturthī gaditā nityākkinnāhvayā mune

vanitā navanītasya dāvikāgnirjayādinā /
bhūḥ svena yuktā prathamaṃ prāṇo dāhena tadyutaḥ

raso dāhena tadyuktaṃ prabhādāhena tadyutā /
jyā ca dāhena tadyuktā nityāklinnāntagadvayam

eṣā navākṣarī nityā bheruṇḍā sarvasiddhidā /
praṇavaṃ ṭhadvayaṃ tyaktvā madhyasthaiḥ ṣaḍbhirakṣaraiḥ

ṣaḍaṅgāni prakurvīta varṇanyāsaṃ tataḥ param /
randhrādyāmukhakaṇṭheṣu hannābhyāṃ dhārayadvayam

nyasenmantrārṇanavakaṃ mātṛkānyāsapūrvakam /
atha dhyānaṃ pravakṣyāmi devyāḥ sarvārthasiddhidam

taptakāñcanasaṃkāśadehāṃ netratrayānvitām /
cārusmitāṃ citamukhīṃ divyālaṅkārabhūṣitām

tāṭaṅkahārakeyūraratnastabakamaṇḍitām /
rasanānūpurormyādibhūṣaṇairatisundarīm

pāśāṅkuśau carmakhaṅgau gadāvahnidhanuḥśarān /
karairdadhānāmāsīnā pūjāyāṃ matpasasthitām

śaktīśca tatsamākāratejohetibhiranvitāḥ /
pūjayettadvadabhitaḥ smitāsyā vijayādikāḥ

pañcamīya samākhyātā bheruṇḍākhyā munīśvara /
yasyāḥ smaraṇato naśyedgaralaṃ trividhaṃ kṣaṇāt

yā tu ṣaṣṭhī dvijaśreṣṭha sā nityā vahnivāsinī /
tadvidhānaṃ śṛṇuṣvādya sādhakānāṃ susiddhidam

bheruṇḍādyamihādyaṃ syānnityaklinnādyanantaram /
tatoṃ'buśūnye haṃsāgnihyuttamaṃbumarudyutam

hṛdagninā yutaṃ śūnyaṃ vyāptena śucinā ca yuk /
śūnyaṃ nabhaḥ śaktiyutaṃ navārṇeyamudāhṛtā

vidyā dvitīyabījena svarāndīrghānniyojayet /
māyāntānṣaḍbhirevāṃ gānyācaretsakarāṅgayoḥ

navākṣarāṇi vidyāyā navarandhreṣu vinyaset /
vyāpakaṃ ca samastena kuryādevātmasiddhaye

sarvāsvapi ca vidyāsu vyāpakanyāsamācaret /
taptakāñcanasaṃkāśāṃ navayauvanasundarīm

cārusmeramukhāṃbhojāṃ vilasannayanatrayām /
aṣṭābhirbāhubhiryuktāṃ māṇikyābharaṇojjvalām

padmarāgakirīṭāṃśusaṃbhedāruṇitāṃbarām /
pītakauśeyavasanāṃ ratnamañjīramekhalām

raktamauktikasakaṃbhinnastabakābharaṇojjvalām /
ratnābjakaṃbupuṇḍrekṣucāpapūrṇendumaṇḍalam

dadhānāṃ bāhubhirvāmaiḥ kahlāraṃ hemaśṛṅgakam /
puṣpeṣuṃ mātuliṅgaṃ ca dadhānāṃ dakṣiṇaiḥ karaiḥ

svasvanāmābhirabhitaḥ śaktibhiḥ parivāritām /
evaṃ dhyātvārcayedvahnivāsinīṃ vahnivigraham

yasyāḥ smarapato vaśyaṃ jāyate bhuvanatrayam /
atha yā saptamī nityā mahāvajreśvarī mune

tasyā vidyāṃ pravakṣyāmi sādhakānāṃ susiddhidām /
dvitīyaṃ vahvivāsinyā nityaklinnā caturthakam

pañcamaṃ bhagamālādyaṃ bheruṇḍāyā dvitīyakam /
nityaklinnādvitīyaṃ ca tṛtīyaṃ ṣaṣṭhasaptamau

aṣṭamaṃ navamaṃ cāpi pūrvaṃ syādantimaṃ punaḥ /
dvayamekaikamatha ca dvayadvayamatha dvayam

māyayā puṭitaṃ kṛtvā kuryādaṅgāni ṣaṭ kramāt /
pratyekaṃ śaktipuṭutairmantrārṇairdaśabhirnyaset

dṛkchrotranāsāvāgvakṣonābhiguhyeṣu ca kramāt /
raktāṃ raktāṃbarāṃ raktagaṅghamālāvibhūṣaṇām

caturbhujāṃ trinayanāṃ māṇikyamukuṭojjvalām /
pāśāṅkuśāmikṣucāpaṃ dāḍimīśāyakaṃ tathā

dadhānāṃ bāhubhirnetrairdayāsuprītiśītalaiḥ /
paśyantī sādhake astraṣaṭkoṇābjamahīpure

cakramadhye sukhāsīnāṃ smeravaktrasaroruhām /
śaktibhiḥ svasvarūpābhirāvṛtāṃ pītamadhyagām

siṃhāsane 'bhitaḥ preṅkhatpotasthābhiśca śaktibhiḥ /
vṛtāṃ tābhirvinodāni yātāyātādibhiḥ sadā

kurvāṇāmaruṇāṃbhodhau cintayenmantranāyakam /
eṣā tu saptamīproktā dūtiṃ cāpyaṣṭamīṃ śṛṇu

vajreśvaryādyamādyaṃ syādviyadagniyutaṃ tataḥ /
aṃbu syānmarutā yuktaṃ gotrā kṣmāsaṃyutā tataḥ

rayovyāsena śucinā yutaḥ syāttadanantaram /
atyārṇāṃ vahnivāsinyā dūtī nityā samīritāḥ

ṣaḍdīrghasvarayuktena vidyāyāḥ syātṣaḍaṅgakam /
tenaiva puṭitairarṇairnyasecchrotrādipañcasu

ṣaṣṭhakaṃ nasi vinyasya vyāpakaṃ vidyayā nyaset /
nidāghakālamadhyāhnadivākarasamaprabhām

navaratnakirīṭāṃ ca trīkṣaṇāmaruṇāṃbarām /
nānābharaṇasaṃbhinnadehakāntivirājitām

śucismitāmaṣṭabhujā stūyamānāṃ maharṣibhiḥ /
pāśaṃ kheṭaṃ gadāṃ ratnacaṣakaṃ vāmabāhubhiḥ

dakṣiṇairaṅkuśaṃ khaḍgaṃ kaṭṭāraṃ kamalaṃ tathā /
dadhānāṃ sādhakābhīṣṭadānodyamasamanvitām

dhyātvaivaṃ pṛnayeddevīṃ dūtīṃ durnnītināśinīm /
ityeṣā kathitā tubhyaṃ samastāpannivāriṇī

śrīkarī śivatāvāsakāriṇī sarvasiddhidā /
atha te navamīṃ nityāṃ tvaritāṃ nāma nārada

pravakṣyāmi yaśovidyādhanārogyasukhapradām /
ādyaṃ tu vahnivāsinyā dūtyādistadanantaram

haṃso dharā svayaṃ yuktastejaścarasamanvitam /
vāyuḥ prabhācarayutā grāsaśaktisamanvitaḥ

hṛdāra yeṇa dāhena vahnisvāṣṭamaṃ tathā /
haṃsaḥ kṣmākhaṃyuto grāsaścarayukto dvitīyakaḥ

dvitirnādayutā nityā tvaritā dvādaśākṣarī /
vidyā caturthavarṇādisaptabhistvakṣaraistathā

kuryādaṅgāni yugmārṇaiḥ ṣaṭkrameṇa karāṅgayoḥ /
śirolalāṭakaṇṭheṣu hṛnnābhyādhārake tathā

ūruyugme tathā jānudvaye jaṅghādvaye tathā /
pādayugme tathā varṇānmantrajāndaśa vinyaset

dvitīyopāntyamadhyasthairmantrārṇairitarairapi /
tārādyaiḥ śṛṇu taddhyānaṃ sarvasiddhividhāyakam

śyāmavarṇaśubhākārāṃ navayauvanaśobhitām /
dvidvikramādaṣṭanāgaiḥ kalpitābharaṇojjvalaiḥ

tāṭaṅkamaṅgadaṃ tadvadrasanā nūpuraṃ ca taiḥ /
viprakṣatriyaviṭśūdrajātibhirbhīmavigrahaiḥ

pallavāṃśukasaṃvītāṃ śikhipicchakṛtaiḥ śubhaiḥ /
valayairbhūṣitabhujāṃ māṇikyamukuṭojjvalām

barhibarhikṛtāpīḍāṃ tacchatrāṃ tatpatākinīm /
guñjāguṇalasadvakṣaḥ kucakuṅkumamaṇḍalām

trinetrāṃ cāruvadanāṃ mandasmitamukhāṃbujām /
pāśāṅkuśavarābhītilasadbhujacatuṣṭayām

dhyātvaivaṃ totalāṃ devīṃ pūjayecchaktibhirvṛtām /
tadagrasthā lu phaṭkārī śaracāpakarojjvalā

prasīdetphaladāne ca sādhakānāṃ tvarānvitāṃ /
eṣā tu navamī nityā tvaritoktā munīśvara

vidhnaduḥsvapraśamanī sarvābhīṣṭapradāyinī /
śuciḥ svena yutastvādyo rasāvahnisamanvitaḥ

prāṇo dvitīyaḥ svayuto vanaducchaktibhiḥ paraḥ /
itīritā tryakṣarākhyā nityeyaṃ kulasuṃdarī

yasyāḥ smaraṇa mātreṇa sarvajñatvaṃ prajāyate /
tribhistairuditairmūlavarṇaiḥ kuryyātṣaḍaṅgakam

ādimadhyāvasāneṣu pūjājapavidhikramāt /
pratyeka taistribhirbījairdīrghasvarasamanvitaiḥ

kuryātkarāṅgavaktrāṇāṃ nyāsaṃ proktaṃ yathāvidhi /
ūrddhvaprāgdakṣiṇodakca paścimādhasnāgnabhiḥ

suvinadyantarasthaistannadātmasu yathākramam /
ādhārarandhrahṛtsvekaṃ dvitīyaṃ locanatraye

tṛtīyaṃ śrotracibuke caturthaṃ ghrāṇatāluṣu /
pañcamaṃ cāṃsanābhīṣu tataḥ pāṇipadadvaye

mūlamadhyāgrato nyasyennavadhā mūlavarṇakaiḥ /
lohitāṃ lohitākāraśaktiṃbṛdaniṣevitām

lohitāṃśukabhūṣāsraglepanāṃ ṣaṇmukhāṃbujām /
anardhyaratnaghaṭitamāṇikyamukuṭojvalām

ratnastabakasaṃbhinnalasadvakṣaḥsthalāṃ śubhām /
kāruṇyānandaparamā maruṇāṃbujaviṣṭarām

bhujairdvādaśabhiryuktāṃ sarveṣāṃ sarvavāḍhmayīm /
pravālākṣasrajaṃ padmaṃ kuṇḍikāṃ ratnanirmitām

ratnapūrṇaṃ tu caṣakaṃ luṅgīṃ vyākhyānamudrikām /
dadhānāṃ dakṣiṇairvāmaiḥ pustakaṃ cāruṇotpalam

haimīṃ ca lekhanīṃ ratnamālāṃ kaṃbuvaraṃ bhujaiḥ /
abhitaḥ stūyamānāṃ ca devagandharvakinnaraiḥ

yakṣarākṣasadaityarṣisiddhavidyādharādibhiḥ /
dhyātvaivamarcannityāṃ vāglakṣmīkāntisiddhaye

sitāṃ kevalavāksiddhyai lakṣmyai hemaprabhāmapi /
dhūmābhāṃ vairividviṣṭyai mṛtaye nigrahāya ca

nīlāṃ ca mūkīkaraṇe smarettattadapekṣayā /
ityeṣā daśamī nityāproktā te kulasundarī

nityānityāṃ tu daśamīṃ trikuṭāṃ vacmi sāṃpratam /
haṃsaśca hṛtprāṇarasādāhakarṇaiḥ samanvitaḥ

vidyayā kulasuṃdaryā yojitaḥ saṃpradāyataḥ /
nityānityatrivarṇeyaṃ ṣaḍbhiḥ kūṭākṣarairyutā

pratilomādibhī rūpairdvisaptatibhidā matā /
yasyā bhajanataḥ siddho naraḥ syātkhecaraḥ sukhī

nigrahānugrahau kartuṃ kṣamaḥ syādbhuvanatraye /
dīrghasvarasametābhyāṃ haṃsahṛbhdyāṃ ṣaḍaṅgakam

bhrūmadhye kaṇṭhahṛnnābhiguhyādhāreṣu ca kramāt /
vidyākṣarāṇi kramaśo nyasedvinduyutāni ca

vyāpakaṃ ca samastena vidhāya vidhinā punaḥ /
dhyāyetsamastasaṃpattihetoḥ sarvātmikāṃ śivām

udyadbhāskarabiṃbābhāṃ māṇikyamukuṭojjvalām /
padmarāgakṛtākalpāmaruṇāṃśukadhāriṇīm

cārusmitalasadvaktraṣaṭsarojavirājitām /
prativaktraṃ trinayanāṃ bhujairdvādaśabhiryutām

pāśākṣaguṇapuṇḍrekṣucāpakheṭatriśūlakān /
karairvāmairdadhānāṃ ca aṅkuśaṃ pustakaṃ tathā

puṣpeṣumaṃbujaṃ caiva nṛkapālābhaye tathā /
dadhānāṃ dakṣiṇairhastairdhyāyeddevīmananyadhīḥ

ityeṣaikā daśī proktā dvādaśīṃ śṛṇu nārada /
tvaritoyāntyamādyaṃ syādyutidohacarasvayuk

hṛñca dāhakṣmāsvayutaṃ vajreśīpañcamaṃ tathā /
marutsvayukto madhyāḍhyo daśamyāḥ parataḥ punaḥ

bhūmī rasākṣmāsvayutā vajreśītyaṣṭamaḥ kramāt /
ṣaḍakṣarāṇi tvaritā tṛtīyaṃ tadanantaram

dyutirdāhacarasvena asyā ādyamanantaram /
uktā nīlapatākākhyā nityā saptadaśākṣarī

dvidvipakṣākṣiṣaḍvarṇairmantrotthairaṅgakalpanam /
śrotrādināsāyugale vāci kaṇṭhe hṛdi kramāt

nābhāvādhārake 'thāpi pādasaṃdhiṣu ca kramāt /
mantrākṣarāṇi kramaśo nyasetsaptadaśāpi ca

vyāpakaṃ ca samastena vidadhyāñca yathāvidhi /
indranīlanibhāṃ bhāsvanmaṇimaulivirājitām

pañcavaktrāṃ trinayanāmaruṇāṃśukadhāriṇīm /
daśahastāṃ lasanmuktāmaṇyābharaṇamaṇḍitām

ratnastabakasaṃpannadehāṃ cārusmitānanām /
pāśaṃ patākāṃ carmāpi śārṅgacāpaṃ varaṃ karaiḥ

dadhānāṃ vāmapārśvasthaiḥ sarvābharaṇabhūṣitaiḥ /
aṅkuśe ca tathā śarkti khaṅgaṃ bāṇaṃ tathābhayam

dadhānāṃ dakṣiṇairhastairāsīnāṃ padmaviṣṭare /
svākāravarṇaveṣāsyapāṇyāyudhavibhūṣaṇaiḥ

śaktivṛndairvṛtāṃ dhyāyeddevīṃ nityārcanakrame /
triṣaṭkoṇayutaṃ padmamaṣṭapatraṃ tato bahiḥ

aṣṭāsraṃ bhūpuradvandvāvṛtaṃ tatpurayugmakam /
caturdvārayutaṃ dikṣu śākhābhiśca samanvitam

kṛtvā nāmāvṛtāṃ śaktiṃ gaṇaistatrārcayecchivām /
eṣā te dvādaśī nityā proktā nīlapatākinī

samare vijayaṃ khaṅgapādukāñjanasiddhidā /
vetālayakṣiṇīceṭapiśācādiprasādhinī

nidhānabilasiddhānnasādhinī kāmacoditā /
atha trayodeśīṃ nityāṃ vakṣyāmi śṛṇu nārada

raso nabhastathā dāho vyāptakṣmāvanapūrvikā /
khena yuktā bhavennityā vijayaikākṣarā mune

vidyāyā vyañjanairdīrghasvarayuktaiścatuṣṭayam /
śeṣābhyāṃ ca dvayaṃ kuryātṣaḍaṅgāni karāṅgayoḥ

jñānendriyeṣu śrotrādiṣvatha citte ca vinyaset /
akṣarāṇi kramādbinduyutānyanyattu pūrvavat

pañca vaktrāṃ daśabhujāṃ prativaktraṃ trilocanām /
bhāsvanmukuṭavinyāsacandralekhāvirājitām

sarvābharaṇasaṃyuktāṃ pītāṃbarasamujjvalām /
udyadbhāsvadbiṃbatulyadehakāntiṃ śucismitām

śaṅkhaṃ pāśaṃ kheṭacāpau kahlāraṃ vāmabāhubhiḥ /
cakraṃ tathāṅkuśaṃ khaṅgaṃ sāyakaṃ mātuluṃ gakam

dadhānāṃ dakṣiṇairhastaiḥ prayoge bhīmadarśanām /
upāsaneti saumyāṃ ca siṃhopari kṛtāsanām

vyāghrārūḍhābhirabhitaḥ śaktibhiḥ parivāritām /
samare pūjane 'nyeṣu prayogeṣu sukhāsanām

śaktayaścāpi pūjāyāṃ sukhāsanasamanvitāḥ /
sarvā devyāḥ samākāramukhapāṇyāyudhā api

caturasradvayaṃ kṛtvā caturdvāropaśobhitam /
śākhaṣṭakasamopetaṃ tatra prāgvatsamarcayet

tadantarvṛtayugmāntaraṣṭakoṇaṃ vidhāya tu /
tadantaśca tathā padmaṃ ṣoḍaśacchadasaṃyutam

tathaivāṣṭacchada padmaṃ vidhāyāvāhya tatra tām /
tattacchaktyā vṛtāṃ samyagupacāraistathārcayet

eṣā traghayodaśī proktā vādeyuddhe jayapradā /
caturdaśīṃ pravakṣye 'tha nityāṃ vai sarvamaṅgalām

hṛdaṃbuvanayuktaṃ khaṃ nityā syātsarvamaṅgalā

ekākṣaryanayā siddho jāyate khecaraḥ kṣaṇāt /
ṣaḍdīrghāḍhyāṃ mūlavidyāṃ ṣaḍaṅgeṣu pravinyaset

tāṃ nityāṃ jātarūpābhāṃ muktāmāṇikyabhūṣaṇām /
māṇikyamukuṭāṃ netradvayapreṅkhaddayāparām

dvibhujāṃ śāsanāṃ padme tvaṣṭaṣoḍaśataddvayaiḥ /
patrairupete sacatudvāraṃbhūsadmayugmake

mātuluṅgaphalaṃ dakṣe dadhānāṃ karapaṅkaje /
vāmena nijabhaktānāṃ prayacchantīṃ dhanādikam

svasamānābhirabhitaḥ śaktibhiḥ parivāritām /
ṣaṭsaptātībhiranyābhirapsarotthābhiranvitām

prayogeṣvanyadā nityaṃ saparyāsūktaśaktikām /
eṣā caturdaśī proktā tathā pañcadaśīṃ śṛṇu

bhūḥ śūnyaṃ nabhasā bhūśca rasaścātha sthirāṃbu ca /
rayogninā yutījyāṃbumarudyuktārasā marut

nabhaśca marutā yuktaṃ rasā śūnye 'pi saṃyute /
gotrā careṇa sahitā aṃbupūrvākṣarastathā

aṃbvagnī hṛñca dāhāṃburasakṣmārayahṛtsvayuk /
haṃsaśca marutā dāhaḥ prāṇaśca marutā yutaḥ

dāhaḥ sāgniprāṇacarau jyāmarutsahitārayaḥ /
careṇāṃbu ca gotrāhṛtsāgnirjyāṃburasā svayuk

rayaḥ sāgnirjyāṃburasā punarete javī tataḥ /
dāhenānena te dviḥ syādbhasvo dāhamarutsvayuk

haṃsaḥ sadāhavahnisvo dāhakṣmāsvayutaśca saḥ /
saptadāhāstato 'syāḥ syuraṣṭamādyāstu pañca te

upāntyādhaḥ sthitaṃ nīlapatākāyā anantaram /
tvaritā tvaṃ ca bheruṇḍāṣṭamaṃ ca navanaṃ tathā

sā jvālāmālinīnityā triṣaṣṭyarṇā samīritā /
ekadvayacatuḥpañcacatuṣṭayadaśākṣaraiḥ

kuryādaṅgāni mūlārṇairāditaḥ ṣaṭkarāṅgayoḥ /
śeṣaistu vyāpakaṃ kuryāttato dhyāyetsanātanīm

jvalajjvalanasaṃkāśāṃ māṇikyamukuṭojjvalām /
ṣaḍvaktrāṃ dvādaśabhujāṃ sarvābharaṇabhūṣitām

pāśāṅkuśau khaṅgakheṭau cāpabāṇau gadādarau /
śūlavahnī varābhītī dadhānāṃ kapapaṅkajaiḥ

svapramāṇābhirabhitaḥ śaktibhiḥ parivāritām /
cārusmitalasadvaktra sarojāṃ trīkṣaṇānvatām

dhyātvaivamupacāraistairarcayettāṃ tu nityaśaḥ /
caturasradvayaṃ kṛtvā caturdvārasamanvitam

saśākhamaṣṭapatrābjamantarā tryasrakaṃ tataḥ /
ṣaṭkoṇaṃ madhyatastryasraṃ vidhāyātra śivāṃ jayet

eṣā pañcadaśī proktā ṣoḍaśīṃ śṛṇu nārada /
vāyupraṇavatattvaistu citrāsyādakṣaradvayā

yā siddhā dhanadhānyātmanidhilābhāya kalpyate /
vidyādyavāyunā kuryāddīrghasvarayujā kramāt

ṣaḍaṅgāni yathāpūrvaṃ mātṛkāṃ vidyayā nyaset /
udyadādityabiṃbābhāṃ navaratnavibhūṣaṇām

navaratnakirīṭāṃ ca citrapaṭṭāṃśukojjvalām /
caturbhujāṃ trinayanāṃ śucismitalasanmukhīm

sarvānandamayīṃ nityāṃ samastepsitadāyinīm /
caturbhujeṣu vai pāśamaṅkuśaṃ varadābhaye

dadhānāṃ maṅgalāṃ padmakarṇikāyonimadhyagām /
tacchaktibhiśca taccakre tathaivārcanamīritam

prāṇadāhau dharāyukto punarādyaṃ rase marut /
vyāsaṃ marucchaktiyutaṃ bhūḥ svayuktā tatastrayam

asyā ādyāṃ rasāyugmaṃ caraṇena prayojitam /
dāhena vahniśaktibhyāṃ yuto haṃsastataḥ param

nabhodirhṛtsadāhāṃbujyā śūnyaṃ svena saṃyutam /
aṃbu paścādviṣayuktaṃ marutā tu nabhoyutam

śūnyaṃ vyāptaṃ bhuvā haṃsaḥ pūrvāntyau syānmanutrayam /
asyāḥ ṣaṣṭhādipañcārṇā daityāsyādādya īritaḥ

ekādaśākṣarādantyā dvitīyaḥ khaṇḍa īritaḥ /
tṛtīyaḥ pañcaviṃśārṇaḥ proktā mantrā iti kramāt

bālā bījatrayādyairdvistribhirmantraiḥ ṣaḍagaṅkam /
vikīrṇakuntalāṃ nagrāṃ raktāmānandavigrahām

dadhānāṃ cintayedbāṇacāpapāśasṛṇīkaraiḥ /
tatsamānāyudhākāravarṇā devyāstu vā

ṛtusrātāḥ sphuradyonyaḥ sadānandāruṇekṣaṇāḥ /
ityeṣā kurukullānte proktā candrāvalīsvayam

vārāhīmabhidhāsyāmi lalitāyāḥ parā tanuḥ /
śuciḥ svenātha śūnyaṃ syānnabhasābhrarasisthirā

aṃbu paścādrayaḥ sāgnirmarutāṃburayau tathā /
ilasāyuto 'gniretāni punaraṃbumarudyutam

dāhāṃbumarutāhaṃsastvagninaitattrayaṃ punaḥ /
ambudāhau marudyuktau haṃso 'tha dharayā nabhaḥ

tejogninā punaḥ pañca vātaḥ svena samāyutaḥ /
toyaṃ careṇa tatpūrvaṃ toyamagniyutaṃ tataḥ

śūnyaṃ vyāptena śucinā śūnyaṃ śaktyā nabho yutam /
dāho dharā svasaharitastoyaṃ carasamanvitam

etatpūrvamadhuḥ proktaṃ catuṣṭayamataḥ param /
jyākhyena yuktā sacaro rabhaścaitasya pūrvakam

raso 'gninā punaḥ proktaṃ catuṣkā apayaṃ tataḥ /
śubhobhratā careṇāpi haṃsaḥ svena sapūrvakam

haṃso 'gninā prāk tritayaṃ hṛdayaṃ svasamāyutam /
rasaścareṇa tatpūrvamagninā ca raso yutaḥ

paścāduktastrayaṃ vāto dharayā ca nabhonvitam /
prāṇaḥ svena yutaḥ paścāddhṛdayasvayutaṃ rasaḥ

vyāptametattrayaṃ paścāddāhenāṃbu samanvitam /
gotrābharāyutā sparśo nādayukto javīyutaḥ

dāhena pūrvapūrvaṃ ca pūrvaṃ ca marutā yutam /
śūnyaṃ marutsvasahitaṃ hṛddāhenāṃbunā caraḥ

sparśo marutsvasahito hṛddāhenāṃbusaṃyutam /
jyāgniḥ svasaṃyuto haṃsastathāṃbu marutā saha

hṛdrūpreṇa svena yutaṃ rasaśca svena saṃyutaḥ /
prāṇadāhau dharāyuktau punastau vahninā viyat

vārddāhayuktamaṃbu syādiṣaṣṭyāsasvasaṃyutam /
pūrvadviruktavarṇau ca śuddhiḥ svena yutastathā

sthirā rasā vatasvena dāvau haṃsau dharā svayuk /
yutirnādavatī paścāddhṛdaṃbumarutā yutam

haṃsaśca marutā vidyaḥ daśottaraśatākṣarī /
vārāhī pañcamī viśvavijayā bhadrakaumudī

vārtālīti ca vikhyātā staṃbhanādyakhileṣṭadā /
aṅgāni kuryānmantrārṇaiḥ saptabhiṣaḍbhireva ca

daśabhiḥ saptabhiḥ saptasaṃkhyairjātibhirditāḥ /
trikoṇavṛttaṣaṭkoṇavṛttadvayasamanvitam

vidhāya cakraṃ tatraiva svanāmālikhyapūjayet /
dhyāyecca devīṃ kīlāsyāṃ tataḥ kāñcanasannibhām

ākaṇṭhaṃ vanitārūpāṃ jvalatpiṅgasaroruhām /
trinetrāmaṣṭahastāṃ ca cakraṃ śaṅkhamathāṅkuśam

pāśaṃ ca muśalaṃ śīrṣamabhayaṃ varadaṃ tathā /
dadhānāṃ garuḍaskandhe sukhāsīnāṃ vicintayet

nityapūjāsu tacchaktīstatsamānāḥ smarenmune /
prayogeṣu smareddevīṃ siṃhasthāṃ vyāghragāmapi

gajārūḍhāṃ hayārūḍhāṃ tarśyārūḍhāṃ ca śaktibhiḥ /
śyāmāmapyaruṇāṃ pītāmasitāṃbhojavigrahām

tattattprayogeṣu tathā dhyāyettattadavāptaye /
aruṇāṃ pañcamīṃ vaśye pītāṃ staṃbhanake smaret

śyāmāṃ ca durgame mārge sitāṃ yuddhe 'rinaṣṭaye /
dhūmrāmuccāṭane dhyāyetsādhako dvijasattamaḥ

etāḥ ṣoḍaśa nityāste saṃkṣapātsamudīritāḥ /
bhajatāmiṣṭadāḥ sadyaḥ sarvapāpakṣayaṅkarāḥ