Scripture Library

Narada Purana · Chapter 1.83

1.83.1

iti śrībṛhannāradīyapurāṇe pūrvabhāge bṛhadupākhyāne tṛtīyapāde rādhākṛṣṇa sahasranāmakathanaṃ nāma vdyaśītitamo 'dhyāyaḥ
śrīśaunaka uvāca
sādhu sūta mahābhāgaḥ jagaduddhārakārakam /
mahātantravidhānaṃ naḥ kumāroktaṃ tvayoditam

1.83.2

alabhyametattantreṣu purāṇeṣvapi mānada /
yadihoditamasmabhyaṃ tvayātikaruṇātmanā

1.83.3

nārado bhagavānsūta lokoddharaṇatatparaḥ /
bhūyaḥ papraccha kiṃ sādho kumāraṃ viduṣāṃ varam

1.83.4

sūta uvāca
śrutvā sa nārado viprāḥ yugmanāmasahasrakam /
sanatkumāramapyāha praṇamya jñānināṃ varam

1.83.5

nārada uvāca
brahmaṃstvayā samākhyātā vidhayastantracoditāḥ /
tatrāpi kṛṣṇamantrāṇāṃ vaibhavaṃ hyuditaṃ mahat

1.83.6

yā tatra rādhikādevī sarvādyā samudāhṛtā /
tasyā aṃśāvatārāṇāṃ caritaṃ mantrapūrvakam

1.83.7

tantroktaṃ vada sarvajña tvāmahaṃ śaraṇaṃ gataḥ /
śaktestantrāṇyanekāni śivoktāni munīśvara

1.83.8

yāni tatsāramuddhṛtya sākalyenābhidhehi naḥ /
tacchrutvā vacanaṃ tasya nāradasya mahātmanaḥ

1.83.9

sanatkumāraḥ provāca smṛtvā rādhāpadāṃbujam /
sanatkumāra uvāca
śṛṇu nārada vakṣyāmi rādhāṃśānāṃ samudbhavam

1.83.10

śaktīnāṃ paramāścaryaṃ mantrasādhanapūrvakam /
yā tu rādhā mayā proktā kṛṣṇārddhāṅgasamudbhavā

1.83.11

golokavāsinī sā tu nityā kṛṣṇasahāyinī /
tejomaṇḍalamadhyasthā dṛśyadṛśyasvarūpiṇī

1.83.12

kadācittu tayā sārddhaṃ sthitasya munisattama /
kṛṣṇasya vāmabhāgāttu jāto nārāyaṇaḥ svayam

1.83.13

rādhikāyāśca vāmāṅgānmahālakṣmīrbabhūva ha /
tataḥ kṛṣṇo mahālakṣmīṃ dattvā nārāyaṇāya ca

1.83.14

vaikuṇṭhe sthāpayāmāsa śaśvatpālanakarmaṇi /
atha golokanāthasya gomnāṃ vivarato mune

1.83.15

jātuścāsaṃkhyagopālāstejasā vayasā samāḥ /
prāṇatulyapriyāḥ sarve babhūvuḥ pārṣadā vibhoḥ

1.83.16

rādhāṅgalomakūpebhye babhūvurgopakanyakāḥ /
rādhātulyāḥ sarvataśca rādhādāsyaḥ priyaṃvadāḥ

1.83.17

etasminnantare vipra sahasā kṛṣṇadehataḥ /
āvirbabhūva sā durgā viṣṇumāyā sanātanī

1.83.18

devīnāṃ bījarūpāṃ ca mūlaprakṛtirīśvarī /
paripūrṇatamā tejaḥ svarūpā triguṇātmikā

1.83.19

sahasrabhujasaṃyuktā nānāśastrā trilocanā /
yā tu saṃsāravṛkṣasya bījarūpā sanātanī

1.83.20

ratnasiṃhāsanaṃ tasyai pradadau rādhikeśvaraḥ /
etasminnantare tatra sastrīkastu caturmukhaḥ

1.83.21

jñānināṃ pravaraḥ śrīmān pumānoṅkāramuccaran /
kamaṇḍaludharo jātastapasvī nābhito hareḥ

1.83.22

sa tu saṃstūya sarveśaṃ sāvitryā bhāryayā saha /
niṣasādāsane ramye vibhostasyājñayā mune

1.83.23

atha kṛṣṇo mahābhāga dvidhārūpo babhūva ha /
vāmārddhāṅgo mahādevo dakṣārddho gopikāpatiḥ

1.83.24

pañcavaktrastrinetro 'sau vāmārddhāgo munīśvaḥ /
stutvā kṛṣṇaṃ samājñapto niṣasāda hareḥ puraḥ

1.83.25

atha kṛṣṇaścaturvaktraṃ prāha sṛṣṭiṃ kuru prabho /
satyaloke sthito nityaṅgaccha māṃsmara sarvadā

1.83.26

evamuktastu hariṇā praṇamya jagadīśvaram /
jagāma bhāryayā sākaṃ sa tu sṛṣṭiṃ karoti vai

1.83.27

pitāsmākaṃ muniśreṣṭha mānasīṃ kalpadaihikīm /
tataḥ paścātpañcavaktraṃ kṛṣṇaṃ prāha mahāmate

1.83.28

durgāṃ gṛhāṇa viśveśa śivaloke tapaśvara /
yāvatsṛṣṭistadante tu lokānsaṃhara sarvataḥ

1.83.29

so 'pi kṛṣṇaṃ namastṛtya śivalokaṃ jagāma ha /
tataḥ kālāntare brahmankṛṣṇasya paramātmanaḥ

1.83.30

vaktrātsarasvatī jātā bīṇāpustakadhāriṇī /
tāmādideśa bhaghagavān vaikuṇṭhaṃ gaccha mānade

1.83.31

lakṣmīsamīpe tiṣṭha tvaṃ caturbhujasamāśrayā /
sāpi kṛṣṇaṃ namaskṛtya gatā nārāyaṇāntikam

1.83.32

evaṃ pañcavidhā jātā sā rādhā sṛṣṭikāraṇam /
āsāṃ pūrṇasvarūpāṇāṃ mantradhyānārcanādikam

1.83.33

vadāmi śṛṇu vipredraṃ lokānāṃ siddhidāyakam /
tāraḥ kriyāyuk pratiśṭhā prītyāḍhyā ca tataḥ param

1.83.34

jñānāmṛtā kṣudhāyuktā vahnijāyāntakato manuḥ /
sutapāstu ṛṣiśchando gāyatrī devatā manoḥ

1.83.35

rādhikā praṇavo bījaṃ svāhā śaktirudāhṛtā /
ṣaḍakṣaraiḥ ṣaḍaṅgāni kuryādvinduvibhūṣitaiḥ

1.83.36

tato dhyāyansvahṛdaye rādhikāṃ kṛṣṇabhāminīm /
śvetacaṃpakavarṇābhāṃ koṭicandrasamaprabhām

1.83.37

śaratpārvaṇacandrāsyāṃ nīlendīvaralocanām /
suśroṇīṃ sunitaṃbāṃ ca pakvabiṃbādharāṃbarām

1.83.38

muktākundābhadaśanāṃ vahniśuddhāṃśukānvitām /
ratnakeyūravalayahārakuṇḍalaśobhitām

1.83.39

gopībhiḥ supriyābhiśca sevitāṃ śvetacāmaraiḥ /
rāsamaṇḍalamadhyasthāṃ ratnasiṃhāsanasthitām

1.83.40

dhyātvā puṣpāñjaliṃ kṣiptvā pūjayedupacārakaiḥ /
lakṣaṣaṭkaṃ japenmantraṃ taddaśāṃśaṃ hunettilaiḥ

1.83.41

ājyāktairmātṛkāpīṭhe pūjā cāvaraṇaiḥ saha /
ṣaṭkoṇeṣu ṣaḍaṅgāni tadbāhye 'ṣṭadale yajet

1.83.42

mālāvatīṃ mādhavīṃ ca ratnamālāṃ suśīlikām /
tataḥ śaśikalāṃ pārijātāṃ padmāvatīṃ tathā

1.83.43

suṃdarīṃ ca kramātprācyāṃ digvidikṣu tato bahiḥ /
indrādyānsāyudhāniṣṭvā viniyogāṃstu sādhayet

1.83.44

rādhā kṛṣṇapriyā rāseśvarī gopīgaṇādhipā /
nirguṇā kṛṣṇapūjyā ca mūlaprakṛtirīśvarī

1.83.45

sarveśvarī sarvapūjyā vairājajananī tathā /
pūrvādyāśāsu rakṣantu pāntu māṃ sarvataḥ sadā

1.83.46

tvaṃ devi jagatāṃ mātā viṣṇumāyā sanātanī /
kṛṣṇamāyādidevī ca kṛṣṇaprāṇādhike śubhe

1.83.47

kaṣṇabhaktiprade rādhe namaste maṅgalaprade /
iti samprārthya sarveśīṃ stutvā hṛdi visarjayet

1.83.48

evaṃ yo bhajate rādhāṃ sarvādyāṃ sarvamaṅgalām /
bhuktveha bhogānakhilānso 'nte golokamāpnuyāt

1.83.49

atha tubhyaṃ mahālakṣmyā vidhānaṃ vacmi nārada /
yadārādhanato bhūyātsādhako bhuktimuktimān

1.83.50

lakṣmīmāyākāmavāṇīpūrvā kamalavāsinī /
ṅeṃtā vahnipriyānto 'yaṃ mantrakalpadrumaḥ paraḥ

1.83.51

ṛṣirnārāyaṇaścāsya chando hi jagatī tathā /
devatā tu mahālakṣmīrdvidvivarṇaiḥ ṣaḍaṅgakam

1.83.52

śvetacaṃpakavarṇābhāṃ ratnabhūṣaṇabhūṣitām /
īṣaddhāsyaprasannāsyāṃ bhaktānugrahakātarām

1.83.53

bibhratīṃ ratnamālāṃ ca koṭicandrasamaprabhām /
dhyātvā japedarkalakṣaṃ pāyasena daśāṃśataḥ

1.83.54

juhuyādedhite vahnau śrīdṛkāṣṭaiḥ samarcayet /
navaśaktiyute pīṭhe hyaṅgai rāvaraṇaiḥ saha

1.83.55

vibhūtirunnatiḥ kāntiḥ sṛṣṭiḥ kīrtiśca sannatiḥ /
vyāṣṭirutkṛṣṭirṛddhiśca saṃproktā nava śaktayaḥ

1.83.56

atrāvāhya ca mūlena mūrtiṃ saṃkalpya sādhakaḥ /
ṣaṭ koṇeṣu ṣaḍaṅgāni dakṣiṇe tu gajānanam

1.83.57

vāme kusumadhanvānaṃ vasupatre tato yajet /
umāṃ śrīṃ bhāratīṃ durgāṃ dharaṇīṃ vedamātaram

1.83.58

devīmuṣāṃ ca pūrvādau digvidikṣu krameṇa hi /
jahnusūryasute pūjye pādaprakṣālanodyate

1.83.59

śaṅkhapadmanidhī pūjyau pārśvayorghṛtacāmarau /
dhṛtātapatraṃ varuṇaṃ pūjayetpaścime tataḥ

1.83.60

saṃpūjya rāśīnparito yathāsthānaṃ navagrahān /
caturdantairāvatādīn digvidikṣu tator'cayet

1.83.61

tadbahirlokapālāṃśca tadastrāṇi ca tadbahiḥ /
dūrvābhirājyasiktābhirjuhuyādāyuṣe naraḥ

1.83.62

guḍūcīmājyasaṃsiktāṃ juhuyātsaptavāsaram /
aṣaaṭottarasahasraṃ yaḥ sa jīveccharadāṃ śatam

1.83.63

hutvā tilānghṛtābhyaktāndīrghamāyuṣyamāpnuyāt /
ārabhyārkadinaṃ mantrī daśāhaṃ ghṛtasaṃplutaḥ

1.83.64

juhuyādarkasamidhaḥ śarīrārogyasiddhaye /
śālibhirjuhvato nityamaṣṭottarasahasrakam

1.83.65

acirādeva mahatī lakṣmī saṃjāyate dhruvam /
uṣājā jīnālikerarajobhirgṛtamiśritaiḥ

1.83.66

hunedaṣṭottaraśataṃ pāyasāśī tu nityaśaḥ /
maṇḍalājjāyate so 'pi kubera iva mānavaḥ

1.83.67

haviṣā guḍamiśreṇa homato hyannavānbhavet /
japāpuṣpāṇi juhuyādaṣṭottarasahasrakam

1.83.68

tāṃbūlarasasaṃmiśraṃ tadbhasmatilakaṃ caret /
caturṇāmapi varṇānāṃ mohanāya dvijottamaḥ

1.83.69

evaṃ yo bhajate lakṣmīṃ sādhakendro munīśvara /
sampadastasya jāyante mahālakṣmīḥ prasīdati

1.83.70

dehānte vaiṣṇavaṃ dhāma labhate nātra saṃśayaḥ /
yā tu durgā dvijaśreṣṭha śivalokaṃ gatā satī

1.83.71

sā śivājñāmanuprāpya divyalokaṃ vinirmame /
devīloketi vikhyātaṃ sarvalokavilakṣaṇam

1.83.72

tatra sthitā jaganmātā taponiyamamāsthitā /
vividhān svāvatārānhi trikāle kurute 'niśam

1.83.73

māyādhikā hlādinīyuk candrāḍhyā sargiṇī punaḥ /
pratiṣṭhā smṛtisaṃyuktā kṣudhayā sahitā punaḥ

1.83.74

jñānāmṛtā vahnijāyāntastārādyo manurmataḥ /
ṛṣiḥ syādvāmadevo 'sya chando gāyatramīritam

1.83.75

devatā jagatāmādirdurgā durgatināśinī /
tārādyekaikavarṇena hṛdayāditrayaṃ matam

1.83.76

tribhirvarmekṣaṇa dvābhyāṃ sarvairastramudīritam /
mahāmarakataprakhyāṃ sahasrabhujamaṇḍitām

1.83.77

nānāśastrāṇi dadhatīṃ trinetrāṃ śaśiśekharām /
kaṅkaṇāṅgadahārāḍhyāṃ kvaṇannūpurakānvitām

1.83.78

kirīṭakuṇḍaladharāṃ durgāṃ devīṃ vicintayet

1.83.79

vasulakṣaṃ japenmantraṃ tilaiḥ samadhurairhuneta /
payoṃ'dhasā vā sahasraṃ navapadmātmake yajet

1.83.80

prabhā māyā jayā sūkṣmā viśuddhānaṃ dinī punaḥ /
suprabhā vijayā sarvasiddhidā pīṭhaśaktayaḥ

1.83.81

adbhirhrasvatrayaklībarahitaiḥ pūjaye dimāḥ /
praṇavo vajranakhadaṃṣṭrāyudhāya mahāpadāt

1.83.82

siṃhāya varmāstraṃ hṛñca proktaḥ siṃhamanurmune /
dadyādāsanametena mūrtiṃ mūlena kalpayet

1.83.83

aṅgāvṛrttiṃ purābhyārcya śaktīḥ patreṣu pūjayet /
jayā ca vijayā kīrtiḥ prītiḥ paścātprabhā punaḥ

1.83.84

śraddhā medhā śrutiścaivasvanāmādyakṣarādikāḥ /
patrāgreṣvarcayedaṣṭāvāyudhāni yathākramāt

1.83.85

śaṅkhacakragadākhaḍgapāśāṅkuśaśarāndhanuḥ /
lokeśvarāṃstato bāhye teṣāmastrāṇyanantaram

1.83.86

itthaṃ japādibhirmantrī mantre siddhe vidhānavit /
kuryātprayogānamunā yathā svasvamanīṣitān

1.83.87

pratiṣṭhāpya vidhānena kalaśānnavaśobhanān /
ratnahemādisaṃyuktānghaṭeṣu navasu sthitān

1.83.88

madhyasthe pūjayeddevīmitareṣu jayādikāḥ /
saṃpūjya gandhapuṣpādyairabhiṣiñcennarādhipam

1.83.89

rājā vijayate śatrūnyo 'dhiko vijayaśriyam /
prāpnotrogo dīrghāyuḥ sarvavyādhivivarjitaḥ

1.83.90

vandhyābhiṣiktā vidhinālabhate tanayaṃ varam /
mantreṇānena saṃjaptamājyaṃ kṣudragrahāpaham

1.83.91

garbhiṇīnāṃ viśeṣeṇa japtaṃ bhasmādikaṃ tathā /
jṛṃbhaśvāse tu kṛṣṇasya praviṣṭerādhikāmukham

1.83.92

yā tu devī samudbhūtā vīṇāpustakadhāriṇī /
tasyā vidhānaṃ viprendra śṛṇu lokopakārakam

1.83.93

praṇavo vāgbhavaṃ māyā śrīḥ kāmaḥ śaktirīritā /
sarasvatī caturthyantā svāhānto dvādaśākṣaraḥ

1.83.94

manurnārāyaṇa ṛṣirvirāṭ chandaḥ samīritam /
mahāsarasvatī cāsya devatā parikīrtitā

1.83.95

vāgbhavena ṣaḍaṅgāni kṛtvā varṇānnyased budhaḥ /
brahmarandhre nyasettāraṃ lajjāṃ bhrūmadhyagāṃ nyaset

1.83.96

mukhanāsādikarṇeṣu gudeṣu śrīmukhārṇakān /
tato vāgdevatāṃ dhyāyedvīṇāpustakadhāriṇīm

1.83.97

karpūrakundadhavalāṃ pūrṇacandrojjvalānanām /
haṃsādhirūḍhāṃ bhālendudivyālaṅkāraśobhitām

1.83.98

japeddvādaśalakṣāṇi tatsahasraṃ sitāṃbujaiḥ /
nāgacaṃpakapuṣpairvā juhuyātsādhakottamaḥ

1.83.99

mātṛkokte yajetpīṭhe vakṣyamāṇakrameṇa tām /
varṇābjenāsanaṃ dadyānmūrtiṃ mūlena kalpayet

1.83.100

devyā dakṣiṇataḥ pūjyā saṃskṛtā vāṅmayī śubhā /
prākṛtā vāmataḥ pūjyā vāṅmayīsarvasiddhidā

1.83.101

pūrvamaṅgāni ṣaṭkoṇe prajñādyāḥ prayajedbahiḥ /
prajñā medhā śrutiḥ śaktiḥ smṛtirvāgīśvarī matiḥ

1.83.102

svastiśceti samākhyātā brahmādyāstadanantaram /
lokeśānarcayedbhūyastadastrāṇi ca tadbahiḥ

1.83.103

evaṃ saṃpūjya vāgdevīṃ sākṣādvāgvallabho bhavet /
brahmacaryarataḥ śuddhaḥ śuddhadantanakhā dikaḥ

1.83.104

saṃsmaran sarvavanitāḥ satataṃ devatādhiyā /
kavitvaṃ labhate dhīmān māsairdvādaśabhirdhruvam

1.83.105

pītvā tanmantritaṃ toyaṃ sahasraṃ pratyahaṃ mune /
mahākavirbhavenmantrī vatsareṇa na saṃśayaḥ

1.83.106

uromātrodake sthitvā dhyāyanmārtaṇḍamaṇḍale /
sthitāṃ devīṃ pratidinaṃ trisahasraṃ japenmanum

1.83.107

labhate maṇḍalātsiddhiṃ vācāmapratimāṃ bhuvi /
pālāśabilvakusumairjuhuyānmadhurokṣitaiḥ

1.83.108

samidbhirvā tadutthābhiryaśaḥ prāpnoti vākpateḥ /
rājavṛkṣasamudbhūtaiḥ prasūnairmadhurāplutaiḥ

1.83.109

satsamidbhiśca juhuyātkavitvamatulaṃ labhet /
atha pravakṣye viprendra sāvitrīṃ brahmaṇaḥ priyām

1.83.110

yāṃ samārādhya sasṛje brahmā lokāṃścarācarān /
lakṣmī māyā kāmapūrvā sāvitrī ṅesamanvitā

1.83.111

svāhānto manurākhyātaḥ sāvitryā vasuvarṇavān /
ṛṣirbrahmāsya gāyatrī chandaḥ proktaṃ ca devatā

1.83.112

sāvitrī sarvadevānāṃ sāvitrī parikīrtitā /
hṛdantikairbrahma viṣṇurudreśvarasadāśivaiḥ

1.83.113

sarvātmanā ca ṅeyuktairaṅgānāṃ kalpanaṃ matam /
taptakāñcanavarṇābhāṃ jvalantīṃ brahmatejasā

1.83.114

grīṣmamadhyāhnamārtaṇḍasahasrasamavigrahām /
īṣaddhāsyaprasannāsyāṃ ratnabhūṣaṇabhūṣitām

1.83.115

bahniśuddhāṃśukādhānāṃ bhaktānugrahakātarām /
sukhadāṃ muktidāṃ caiva sarvasaṃpatpradāṃ śivām

1.83.116

vedabījasvarūpāṃ ca dhyāyedvedaprasūṃ satīm /
dhyātvaivaṃ maṇḍale vidvān trikoṇojjvalakarṇike

1.83.117

saure pīṭhe yajeddevīṃ dīptādinavaśaktibhiḥ /
mūlamantreṇa kḷptāyāṃ mūrtauṃ devīṃ prapūjayet

1.83.118

koṇeṣu triṣu saṃpūjyā brāhṛyādyāḥ śaktayo bahiḥ /
ādityādyāstataḥ pūjyā uṣādisahitāḥ kramāt

1.83.119

tatataḥ ṣaḍaṅgānyabhyarcya kesareṣu yathāvidhi /
prahlādinīṃ prabhāṃ paścānnityāṃ viśvaṃbharāṃ punaḥ

1.83.120

vilāsinīprabhāvatyau jayāṃ śāntāṃ yajetpunaḥ /
kāntiṃ durgāsarasvatyau vidyārūpāṃ tataḥ param

1.83.121

viśālasaṃjñitāmīśāṃ vyāpinīṃ vimalāṃ yajet /
tamopahāriṇīṃ sūkṣmāṃ viśvayoniṃ jayāvahām

1.83.122

padnālayāṃ parāṃ śobhāṃ brahmarūpāṃ tator'cayet /
brāhmyādyāḥ śāraṇā bāhye pūjayetproktalakṣaṇāḥ

1.83.123

tato 'bhyarcyed grahānbāhye śakrādyānayudhaiḥ saha /
itthamāvaraṇairdevīḥ daśabhiḥ paripūjayet

1.83.124

aṣṭalakṣaṃ japenmantraṃ tatsahasraṃ hunettilaiḥ /
sarvapāpuvinirmukto dīrghamāyuḥ sa vindati

1.83.125

aruṇābjaistrimadhvaktairjuhuyādayutaṃ tataḥ /
mahālakṣmīrbhavettasya ṣaṇmāsānnātra saṃśayaḥ

1.83.126

brahmavṛkṣaprasūnaistu juhuyādbāhyatejase /
bahunā kimihoktena yathāvatsādhitā satī

1.83.127

sādhakānāmiyaṃ vidyā bhavetkāmadudhā mune /
atha te saṃpravakṣyāmi rahasyaṃ paramādbhutam

1.83.128

sāvitrīpañjaraṃ nāma sarvarakṣākaraṃ nṛṇām /
vyomakeśārlakāsaktāṃ sukirīṭavirājitām

1.83.129

meghabhrukuṭilākrāntāṃ vidhiviṣṇuśivānanām /
gurubhārgavakarṇāntāṃ somasūryāgnilocanām

1.83.130

iḍāpiṅgalikāsūkṣmāvāyunāsāpuṭānvitām /
saṃdhyādvijoṣṭhapuṭitāṃ lasadvāgupajihvikām

1.83.131

saṃdhyāsūryamaṇigrīvāṃ marudbāhusamanvitān /
parjanyadṛdayāsaktāṃ vasvākhyapratimaṇḍalām

1.83.132

ākāśodaravibhrāntāṃ nābhyavāntaravīthikām /
prajāpatyākhyajaghanāṃ kaṭīndrāṇīsamāśritām

1.83.133

ūrvormalayamerubhyāṃ śobhamānāṃ saridvarām /
sujānujahukuśikāṃ vaiśvadevākhyasaṃjñikām

1.83.134

pādāṅghrinakhalomākhyabhūnāgadrumalakṣitām /
graharāśyarkṣayogādimūrtāvayavasaṃjñikām

1.83.135

tithimāsartupakṣākhyaiḥ saṃketanimiṣātmikām /
māyākalpitavaicitryasaṃdhyākhyacchadanāvṛtām

1.83.136

jvalatkālānalaprakhyoṃ taḍitkīṭisamaprabhām /
koṭisūryapratīkāśāṃ śaśikoṭisuśītalām

1.83.137

sudhāmaṇḍalamadhyasthāṃ sāṃdrānandāmṛtātmikām /
vāgatītāṃ mano 'garmyā varadāṃ vedamātaram

1.83.138

carācaramayīṃ nityāṃ brahmākṣarasamanvitām /
dhyātvā svātmāvibhedena sāvitrīpañjaraṃ nyaset

1.83.139

pañcarasya ṛṣiḥ so 'haṃ chaṃndo vikṛtirucyate /
devatā ca paro haṃsaḥ parabrahmādidevatā

1.83.140

dharmārthakāmamokṣāptyai viniyoga udāhṛtaḥ /
ṣaḍaṅgadevatāmantrairaṅganyāsaṃ samācaret

1.83.141

tridhāmūlena medhāvī vyāpakaṃ hi samācaret /
pūrvoktāṃ devātāṃ dhyāyetsākārāṃ guṇasaṃyutām

1.83.142

tripadā harijā pūrvamukhī brahmāstrasaṃjñikā /
caturviśatitattvāḍhyā pātu prācīṃ diśaṃ mama

1.83.143

catuṣpadā brahmadaṇḍā brahmāṇī dakṣiṇānanā /
ṣaḍviṃśatattvasaṃyuktā pātu me dakṣiṇāṃ diśam

1.83.144

pratyaṅmukhī pañcapadī pañcāśattattvarūpiṇī /
pātu pratīcīmaniśaṃ mama brahmaśirāeṅkitā

1.83.145

saumyāsyā brahmaturyāḍhyā sātharvāṅgirasātmikā /
udīcīṃ ṣaṭpadā pātu ṣaṣṭitattvakalātmikā

1.83.146

pañcāśadvarṇaracitā navapādā śatākṣarī /
vyomā saṃpātu me vorddhvaśiro vedāntasaṃsthitā

1.83.147

vidyunnibhā brahmasandhyā mṛgārūḍhā caturbhujā /
cāpeṣucarmāsidharā pātu me pāvakīṃ diśam

1.83.148

brahmī kumārī gāyatrī raktāṅgī haṃsavāhinī /
bibhratkamaṇḍaluṃ cākṣaṃ sruvasruvau pātu nairṛtim

1.83.149

śuklavarṇā ca sāvitrī yuvatī vṛṣavāhanā /
kapālaśūlakākṣasragdhāriṇī pātu vāyavīm

1.83.150

śyāmā sarasvatī vṛddhā vaiṣṇavī garuḍāsanā /
śaṅkhacakrābhayakarā pātu śaivīṃ diśaṃ mama

1.83.151

caturbhujā devamātā gaurāṅgī siṃhavāhanā /
varābhayakhaḍgacarmabhujā pātvadharāṃ diśam

1.83.152

tattatpārśve sthitāḥ svasvavāhanāyudhabhūṣaṇāḥ /
svasvadikṣusthitāḥ pātuṃ grahaśaktyaṅgasaṃyutāḥ

1.83.153

mantrādhidevatārūpā mudrādhiṣṭhātṛdevatāḥ /
vyāpakatvena pāntvasmānāpādatalamastakam

1.83.154

idaṃ te kathitaṃ satyaṃ sāvitrīpañjaraṃ mayā /
saṃdhyayoḥ pratyahaṃ bhaktyā japakāle viśeṣataḥ

1.83.155

paṭhanīyaṃ prayatnena bhuktiṃ muktiṃ samicchatā /
bhūtidā bhuvanā vāṇī mahāvasumatī mahī

1.83.156

hiraṇyajananī nandā savisargā tapasvinī /
yaśasvinī satī satyā vedaviccinmayī śubhā

1.83.157

viśvā turyā vareṇyā ca nisṛṇī yamunā bhuvā /
modā devī variṣṭhā ca dhīśca śāntirmatī mahī

1.83.158

dhiṣaṇā yoginī yuktā nadī prajñāpracodanī /
dayā ca yāminī padmā rohiṇī ramaṇī jayā

1.83.159

senāmukhī sāmamayī bagalā doṣavārjitā /
māyā prajñā parā dogdhrī māninī poṣiṇī kriyā

1.83.160

jyotsnā tīrthamayī ramyā saumyāmṛtamayā tathā /
brāhmī haimī bhujaṅgī ca vaśinī suṃdarī vanī

1.83.161

oṅkārahasinī sarvā sudhā sā ṣaḍguṇāvatī /
māyā svadhā ramā tanvī ripughnī rakṣaṇaṇī satī

1.83.162

haimī tārā vidhugatirviṣaghnī ca varānanā /
amarā tīrthadā dīkṣā durdharṣā rogahāriṇī

1.83.163

nānāpāpanṛśaṃsaghnī ṣaṭpadī vajriṇī raṇī /
yoginī vamalā satyā abalā baladā jayā

1.83.164

gomatī jāhnavī rajāvī tapanī jātavedasā /
acirā vṛṣṭidā jñeyā ṛtatantrā ṛtātmikā

1.83.165

sarvakāmadudhā saumyā bhavāhṝṅkāravarjitā /
dvipadā yā catuṣpadā tripadā yā ca ṣaṭpadā

1.83.166

aṣṭāpadī navapadī sahasrākṣākṣarātmikā /
aṣṭottaraśataṃ nāmnāṃ sāvitryā yaḥ paṭhennaraḥ

1.83.167

sa cirāyuḥ sukhī putrī vijayī vinayī bhavet /
etatte kathitaṃ vipra pañcaprakṛtilakṣaṇam

1.83.168

mantrārādhanapūrvaṃ ca viśvakāmaprapūraṇam

Original text: Nāradapurāṇa (or Nāradīyapurāṇa) · Data entry members of the Sansknet Project · GRETIL (Göttingen) · CC BY-NC-SA 4.0