Narada Purana · Chapter 1.100

iti śrībṛhannāradīyapurāṇe pūrvabhāge bṛhadupākhyāne caturthapāde 'gnipurāṇānukramaṇīnirūpaṇaṃ nāmaikonaśatatamo 'dhyāyaḥ
śrībrahmovāca
atha te saṃpravakṣyāmi purāṇaṃ sarvasiddhidam /
bhaviṣyaṃ bhavataḥ sarvalokābhīṣṭapradāyakam

yatrāhaṃ sarvadevānāmādikartā samudgataḥ /
sṛṣṭyarthaṃ tatra saṃjāto manuḥ svāryabhuvaḥ purā

sa māṃ praṇamya papraccha dharmaṃ sarvāthasādhakam /
ahaṃ tasmai tadā prītaḥ prāvocaṃ dharmasaṃhitām

purāṇānāṃ yadā vyāso vyāsaṃ caktre mahāmatiḥ /
tadā tāṃ saṃhitāṃ sarvāṃ pañcadhā vyabhajanmuniḥ

adhorakalpavṛttāntaṃ nānāścaryakathanvitam /
tatrādimaṃ smṛtaṃ parvaṃ brāhmaṃ yatrāstyupakramaḥ

sūtaśaunakasaṃvāde purāṇapraśnasaṃkramaḥ /
ādityacaritaprāyaḥ sarvākhyānasamanvitaḥ

sṛṣṭyādilakṣaṇopetaḥ śāstrasarvasvarūpakaḥ /
pustalekhakalekhānāṃ lakṣaṇaṃ ca tataḥ param

saṃskārāṇāṃ ca sarveṣāṃ lakṣaṇaṃ cātra kīrtitam /
pakṣasyāditithīnāṃ ca kalpāḥ sapta ca kīrtitāḥ

aṣṭamyādyāḥ śeṣakalpā vaiṣṇave parvaṇi smṛtāḥ /
śaive ca kāyato bhinnāḥ saure cāntyakathānvayaḥ

pratisargāhvayaṃ paścānnānākhyānasamanvitam /
purāṇasyopasaṃhārasahitaṃ parva pañcamam

eṣu pañcasu pūrvasmin brahmaṇo mahimādhikāḥ /
dharme kāme ca mokṣe tu viṣṇoścāpi śivasya ca

dvitīyaṃ ca tṛtīye ca saure vargacatuṣṭaye /
pratisargāhvayaṃ tvantyaṃ proktaṃ sarvakathānvitam

sabhaviṣyaṃ vinirddiṣṭaṃ parva vyāsena dhīmatā /
caturddaśasahasraṃ tu purāṇaṃ parikīrtitam

bhaviṣyaṃ sarvadevānāṃ sāmyaṃ yatra prakīrtitam /
guṇānāṃ tāratamyena samaṃ brahmeti hi śrutiḥ

taṃ likhitvā tu yo dadyātpauṣyāṃ vidvānvimatsaraḥ /
guḍadhenuyutaṃ hemavastramālyavibhūṣaṇaiḥ

vācakaṃ pustakaṃ cāpi pūjayitvā vidhānataḥ /
gandhādyairbhojyabhakṣyaiśca kṛtvā nīrājanādikam

yo vai jitendriyo bhūtvā sopavāsaḥ samāhitaḥ /
atha vaikahaviṣyāśī kīrtayecchṛṇuyādapi

sa muktaḥ pātakairghoraiḥ prayāti brahmaṇaḥ padam /
yo 'pyanukramaṇīmetāṃ bhaviṣyasya nirūpitām

paṭhedvā śṛṇuyāccaitāṃ bhuktiṃ muktiṃ ca vindati