Nādabindūpaniṣad · Verses 1-20

Nādabindūpaniṣat
oṃ
akāro dakṣiṇaḥ pakṣa ukāras tūttaraḥ smṛtaḥ /
makāras tasya pucchaṃ vā ardhamātrā śiras tathā

pādau rajas tamas tasya śarīraṃ sattvam ucyate /
dharmaś ca dakṣiṇaṃ cakṣur adharmaś cottaraṃ smṛtam

bhūr lokaḥ pādayos tasya bhuvar lokas tu jānunoḥ /
svar lokaḥ kaṭideśe tu nābhideśe mahar jagat

janalokas tu hṛdaye kaṇṭhadeśe tapas tataḥ /
bhruvor lalāṭamadhye tu satyaloko vyavasthitaḥ

sahasram iti cātra mantra eva pradarśitaḥ /
evam enaṃ samārūḍho haṃsaṃ yogavicakṣaṇaḥ

na badhyate karmacārī pāpakoṭiśatair api /
āgneyī prathamā mātrā vāyavyaiṣā vaśānugā

bhānumaṇḍalasaṃkāśā bhaven mātrā tathottarā /
paramā cārdhamātrā ca vāruṇīṃ tāṃ vidur budhāḥ

kalātrayānanā vāpi tāsāṃ mātrāpratiṣṭhitā /
eṣa oṃkāra ākhyāto dhāraṇābhir nibodhata

yoṣiṇī prathamā mātrā vidyunmālā tathāparā /
pataṃgī ca tṛtīyā syāc caturthī vāyuveginī

pañcamīnām adheyā ca ṣaṣṭhī caindrī vidhīyate /
saptamī vaiṣṇavī nāma śaṃkarī ca tathāṣṭamī

navamī mahatī nāma dhruveti daśamī matā /
ekādaśī bhaven maunī brāhmīti dvādaśī matā

prathamāyāṃ tu mātrāyāṃ yadi prāṇair viyujyate /
sa rājā bhārate varṣe sārvabhaumaḥ prajāyate

dvitīyāyāṃ samutkrānto bhaved yakṣo mahātmavān /
vidyādharas tṛtīyāyāṃ gandharvas tu caturthikām

pañcamyām atha mātrāyāṃ yadi prāṇair viyujyate /
uṣitaḥ sahadevatvaṃ somaloke mahīyate

ṣaṣṭhyām indrasya sāyujyaṃ saptamyāṃ vaiṣṇavaṃ padam /
aṣṭamyāṃ vrajate rudraṃ paśūnāṃ ca patiṃ tathā

navamyāṃ ca maharlokaṃ daśamyāṃ ca dhruvaṃ vrajet /
ekādaśyāṃ tapolokaṃ dvādaśyāṃ brahma śāśvatam

tataḥ paraṃ śuddhaṃ vyāpakaṃ niṣkalaṃ śivam /
sadoditaṃ paraṃ brahma jyotiṣām udayo yataḥ

atīndriyaṃ guṇātītaṃ mano līnaṃ yadā bhavet /
anaupamyam abhāvaṃ ca yogayuktaṃ tadādiśet

tadbhaktas tatsamāsaktaḥ śanair muñcet kalevaram /
susthito yogacāreṇa sarvasaṅgavivarjitaḥ

tato vilīnapāśo 'sau vimalaḥ kevalaḥ prabhuḥ /
tenaiva brahmabhāvena paramānandam aśnute