નાદબિન્દૂપનિષદ્ · શ્લોક 1-20

નાદબિન્દૂપનિષત્
ઓં
અકારો દક્ષિણઃ પક્ષ ઉકારસ્ તૂત્તરઃ સ્મૃતઃ ।
મકારસ્ તસ્ય પુચ્છં વા અર્ધમાત્રા શિરસ્ તથા

પાદૌ રજસ્ તમસ્ તસ્ય શરીરં સત્ત્વમ્ ઉચ્યતે ।
ધર્મશ્ ચ દક્ષિણં ચક્ષુર્ અધર્મશ્ ચોત્તરં સ્મૃતમ્

ભૂર્ લોકઃ પાદયોસ્ તસ્ય ભુવર્ લોકસ્ તુ જાનુનોઃ ।
સ્વર્ લોકઃ કટિદેશે તુ નાભિદેશે મહર્ જગત્

જનલોકસ્ તુ હૃદયે કણ્ઠદેશે તપસ્ તતઃ ।
ભ્રુવોર્ લલાટમધ્યે તુ સત્યલોકો વ્યવસ્થિતઃ

સહસ્રમ્ ઇતિ ચાત્ર મન્ત્ર એવ પ્રદર્શિતઃ ।
એવમ્ એનં સમારૂઢો હંસં યોગવિચક્ષણઃ

ન બધ્યતે કર્મચારી પાપકોટિશતૈર્ અપિ ।
આગ્નેયી પ્રથમા માત્રા વાયવ્યૈષા વશાનુગા

ભાનુમણ્ડલસંકાશા ભવેન્ માત્રા તથોત્તરા ।
પરમા ચાર્ધમાત્રા ચ વારુણીં તાં વિદુર્ બુધાઃ

કલાત્રયાનના વાપિ તાસાં માત્રાપ્રતિષ્ઠિતા ।
એષ ઓંકાર આખ્યાતો ધારણાભિર્ નિબોધત

યોષિણી પ્રથમા માત્રા વિદ્યુન્માલા તથાપરા ।
પતંગી ચ તૃતીયા સ્યાચ્ ચતુર્થી વાયુવેગિની

પઞ્ચમીનામ્ અધેયા ચ ષષ્ઠી ચૈન્દ્રી વિધીયતે ।
સપ્તમી વૈષ્ણવી નામ શંકરી ચ તથાષ્ટમી

નવમી મહતી નામ ધ્રુવેતિ દશમી મતા ।
એકાદશી ભવેન્ મૌની બ્રાહ્મીતિ દ્વાદશી મતા

પ્રથમાયાં તુ માત્રાયાં યદિ પ્રાણૈર્ વિયુજ્યતે ।
સ રાજા ભારતે વર્ષે સાર્વભૌમઃ પ્રજાયતે

દ્વિતીયાયાં સમુત્ક્રાન્તો ભવેદ્ યક્ષો મહાત્મવાન્ ।
વિદ્યાધરસ્ તૃતીયાયાં ગન્ધર્વસ્ તુ ચતુર્થિકામ્

પઞ્ચમ્યામ્ અથ માત્રાયાં યદિ પ્રાણૈર્ વિયુજ્યતે ।
ઉષિતઃ સહદેવત્વં સોમલોકે મહીયતે

ષષ્ઠ્યામ્ ઇન્દ્રસ્ય સાયુજ્યં સપ્તમ્યાં વૈષ્ણવં પદમ્ ।
અષ્ટમ્યાં વ્રજતે રુદ્રં પશૂનાં ચ પતિં તથા

નવમ્યાં ચ મહર્લોકં દશમ્યાં ચ ધ્રુવં વ્રજેત્ ।
એકાદશ્યાં તપોલોકં દ્વાદશ્યાં બ્રહ્મ શાશ્વતમ્

તતઃ પરં શુદ્ધં વ્યાપકં નિષ્કલં શિવમ્ ।
સદોદિતં પરં બ્રહ્મ જ્યોતિષામ્ ઉદયો યતઃ

અતીન્દ્રિયં ગુણાતીતં મનો લીનં યદા ભવેત્ ।
અનૌપમ્યમ્ અભાવં ચ યોગયુક્તં તદાદિશેત્

તદ્ભક્તસ્ તત્સમાસક્તઃ શનૈર્ મુઞ્ચેત્ કલેવરમ્ ।
સુસ્થિતો યોગચારેણ સર્વસઙ્ગવિવર્જિતઃ

તતો વિલીનપાશો ઽસૌ વિમલઃ કેવલઃ પ્રભુઃ ।
તેનૈવ બ્રહ્મભાવેન પરમાનન્દમ્ અશ્નુતે