Mṛtyuvañcanasitatārāsādhana · Verses 1-15

Mṛtyuvañcanasitatārāsādhana
mṛtyudoṣair aliptaḥ syāt tārāhṛccakrabhāvakaḥ /
lābhī ca sarvasiddhīnāṃ ṣaṇmāsāvadhi tatparaḥ

vāgīśvarakṛtādeśān mṛtyuvañcanasaṃgrahāt /
uddhṛtā sitatārāyā bhāvanā bhayanāśinī

turyavargādyasākāratviṣā visphuritāmbare /
sitābjendvāsanāṃ dṛṣṭvā puras triśaraṇaṃ paṭhet

muhūrtaṃ śūnyatāṃ paśyet prākṛtāropahānaye /
tataḥ praṇidhisāmarthyād bodhicittākṣaraṃ bhavet

sitāravindamadhyasthacandrabimbāsanopari /
ābaddhavajraparyaṅkāṃ varadotpaladhāriṇīm

śaraccandrakarākārāṃ pṛṣṭhacandrasamāśritām /
sarvālaṅkārasaṃpūrṇāṃ ṣoḍaśābdavapuṣmatīm

sarvasaṃbuddhatatputramātaraṃ kāmarūpadhām /
dhyātvāryatārāṃ hṛdaye tasyāś cakraṃ sitadyuti

aṣṭakoṣṭhakam aṣṭābhir akṣaraiḥ paripūritam /
oṃhāvyañjanamadhyasthasādhyanāmādyanābhikam

dhyāyād ekāgracittaḥ san ṣaṇ māsān dṛḍhaniścayaḥ /
japed akhinnacittaḥ san mantram enaṃ daśākṣaram

oṅkāram ādito dattvā paścāt tāre prayojayet /
tuttāre syāt ture paścāt svāhāntaḥ sārvakarmikaḥ

brahmendraviṣṇucandrārkarudradikpālamanmathaiḥ /
apy akhaṇḍitaromāgro mṛtyuṃ jayati muktavat

valīpalitadaurbhāgyavyādhidāridryasaṃkṣayaḥ /
siṃhādyaṣṭamahābhītiduḥkhasaṃdohanāśanam

ayācitāmbarapānaharmyaratnādisaṃgamaḥ /
khaḍgāñjanapādalepabhadrakumbhādisiddhayaḥ

kavitā vaktṛtā medhā prajñā caikāntanirmalā /
anyā ca vāñchitā siddhiś cakrād asmāt prajāyate

sādhanaṃ sitatārāyā mṛtyuvyādhivināśanam /
uddhṛtya yac chubhaṃ tena jagat tārā svayaṃ bhavet