મૃત્યુવઞ્ચનસિતતારાસાધન · શ્લોક 1-15

મૃત્યુવઞ્ચનસિતતારાસાધન
મૃત્યુદોષૈર્ અલિપ્તઃ સ્યાત્ તારાહૃચ્ચક્રભાવકઃ ।
લાભી ચ સર્વસિદ્ધીનાં ષણ્માસાવધિ તત્પરઃ

વાગીશ્વરકૃતાદેશાન્ મૃત્યુવઞ્ચનસંગ્રહાત્ ।
ઉદ્ધૃતા સિતતારાયા ભાવના ભયનાશિની

તુર્યવર્ગાદ્યસાકારત્વિષા વિસ્ફુરિતામ્બરે ।
સિતાબ્જેન્દ્વાસનાં દૃષ્ટ્વા પુરસ્ ત્રિશરણં પઠેત્

મુહૂર્તં શૂન્યતાં પશ્યેત્ પ્રાકૃતારોપહાનયે ।
તતઃ પ્રણિધિસામર્થ્યાદ્ બોધિચિત્તાક્ષરં ભવેત્

સિતારવિન્દમધ્યસ્થચન્દ્રબિમ્બાસનોપરિ ।
આબદ્ધવજ્રપર્યઙ્કાં વરદોત્પલધારિણીમ્

શરચ્ચન્દ્રકરાકારાં પૃષ્ઠચન્દ્રસમાશ્રિતામ્ ।
સર્વાલઙ્કારસંપૂર્ણાં ષોડશાબ્દવપુષ્મતીમ્

સર્વસંબુદ્ધતત્પુત્રમાતરં કામરૂપધામ્ ।
ધ્યાત્વાર્યતારાં હૃદયે તસ્યાશ્ ચક્રં સિતદ્યુતિ

અષ્ટકોષ્ઠકમ્ અષ્ટાભિર્ અક્ષરૈઃ પરિપૂરિતમ્ ।
ઓંહાવ્યઞ્જનમધ્યસ્થસાધ્યનામાદ્યનાભિકમ્

ધ્યાયાદ્ એકાગ્રચિત્તઃ સન્ ષણ્ માસાન્ દૃઢનિશ્ચયઃ ।
જપેદ્ અખિન્નચિત્તઃ સન્ મન્ત્રમ્ એનં દશાક્ષરમ્

ઓઙ્કારમ્ આદિતો દત્ત્વા પશ્ચાત્ તારે પ્રયોજયેત્ ।
તુત્તારે સ્યાત્ તુરે પશ્ચાત્ સ્વાહાન્તઃ સાર્વકર્મિકઃ

બ્રહ્મેન્દ્રવિષ્ણુચન્દ્રાર્કરુદ્રદિક્પાલમન્મથૈઃ ।
અપ્ય્ અખણ્ડિતરોમાગ્રો મૃત્યું જયતિ મુક્તવત્

વલીપલિતદૌર્ભાગ્યવ્યાધિદારિદ્ર્યસંક્ષયઃ ।
સિંહાદ્યષ્ટમહાભીતિદુઃખસંદોહનાશનમ્

અયાચિતામ્બરપાનહર્મ્યરત્નાદિસંગમઃ ।
ખડ્ગાઞ્જનપાદલેપભદ્રકુમ્ભાદિસિદ્ધયઃ

કવિતા વક્તૃતા મેધા પ્રજ્ઞા ચૈકાન્તનિર્મલા ।
અન્યા ચ વાઞ્છિતા સિદ્ધિશ્ ચક્રાદ્ અસ્માત્ પ્રજાયતે

સાધનં સિતતારાયા મૃત્યુવ્યાધિવિનાશનમ્ ।
ઉદ્ધૃત્ય યચ્ છુભં તેન જગત્ તારા સ્વયં ભવેત્