Mokṣopāyaṭīkā · Chapter 1.10

evaṃ cet tan mahāprājñam bhavanto raghunandanam /
ihānayantu tvaritaṃ hariṇaṃ hariṇā iva //

eṣa moho raghupater nāpadbhyo na ca rāgataḥ /
vivekavairāgyakṛto bodha eṣa Ś4: eva mahodayaḥ //

ihāyātu kṣaṇād rāmas tad ihaiva vayaṃ kṣaṇāt /
mohaṃ tasyāpaneṣyāmo maruto 'drer ghanaṃ yathā //

etasmin mārjite yuktyā mohe ca raghunandanaḥ /
viśrāntim Ś4: °śrātim eṣyati pade tasmin vayam ivottame //

satyatām muditām prajñāṃ viśrāntiṃ ca sametya saḥ /
pīnatāṃ varavarṇatvam pītāmṛta ivaiṣyati //

nijāṃ ca prakṛtām eva vyavahāraparamparām /
paripūrṇamanā mānya ācariṣyaty akhaṇḍitām //

bhaviṣyati mahāsattvo jñātalokaparāvaraḥ /
sukhaduḥkhadaśāhīnaḥ samaloṣṭāśmakāñcanaḥ //

ity ukte munināthena rājā sampūrṇamānasaḥ /
prāhiṇod rāmam ānetum bhūyo dūtaparamparām //

etāvatā ca kālena rāmo nijagṛhāsanāt /
pituḥ sakāśam āgantum utthito 'rka ivācalāt //

vṛtaḥ katipayair bhṛtyair bhrātṛbhyāṃ cājagāma ha /
tat puṇyam pitur āsthānaṃ svargaṃ surapater iva //

dūrād eva dadarśāsau rāmo daśarathaṃ tadā /
vṛtaṃ rājasamūhena devaugheneva vāsavam //

vasiṣṭhaviśvāmitrābhyāṃ sevitam pārśvayor dvayoḥ /
sarvaśāstrārthatajjñena mantrivṛndena pālitam //

cārucāmarahastābhiḥ kāntābhiḥ samupāsitam |
kakubbhir iva mūrtābhiḥ saṃsthitābhir yathocitam ||

vasiṣṭhaviśvāmitrādyās tathā daśarathādayaḥ /
dadṛśū rāghavaṃ dūrād upāyāntaṃ guhopamam //

sattvāvaṣṭambhagarveṇa śaityeneva himālayam /
śritaṃ sakalasevyena gambhīreṇa svareṇa ca //

saumyaṃ samaśubhākāraṃ N11: sam(ā)aśubh*ā*° vinayodāram ūrjitam /
kāntopaśāntavapuṣam parasyārthasya bhājanam //

samudyadyauvanārambham udyogaśamaśobhitam /
anudvignam anāyāsam pūrṇaprāyamanoratham //

vicāritajagadyātram Ś4: °jagatraṃ; N11: °gady*ā*° pavitraguṇagocaram /
mahāsattvaikalobhena Ś4: °sattvena lo° guṇair iva samāśritam //

udārasāram āpūrṇam antaḥkaraṇakoṭaram /
avikṣubhitayā vṛttyā darśayantam anuttamam //

evam guṇagaṇākīrṇo dūrād eva raghūdvahaḥ /
parimeyasitācchācchasvahārāmbarapallavaḥ //

praṇanāma calaccārucūḍāmaṇimarīcinā /
śirasā vasudhākampalolamānācalaśriyā //

prathamam pitaram paścān munīn mānyaikam ānataḥ /
tato viprāṃs tato bandhūṃs tato 'dhikaguṇān gurūn //

jagrāha cātmanā dṛṣṭvā manāk svādugirā tathā /
rājalokena vihitāṃ sa praṇāmaparasparām //

vihitāśīr munibhyāṃ tu rāmaḥ saśamamānasaḥ /
āsasāda pituḥ puṇyaṃ samīpaṃ surasundaraḥ //

pādābhivandanarataṃ tam athāsau mahīpatiḥ /
śirasy abhyāliliṅgāśu N11, Ś4: ābhyā° cucumba ca punaḥ punaḥ //

śatrughnaṃ lakṣmaṇaṃ caiva tathaiva paravīrahā /
āliliṅga ghanasnehaṃ rājahaṃso 'mbujaṃ yathā //

utsaṅge vatsa tiṣṭheti vadaty atha mahīpatau /
bhūmau parijanāstīrṇe so 'ṃśuke 'tha nyavikṣata //

putra prāptavivekas tvaṃ kalyāṇānāṃ ca bhājanam /
janavaj jīrṇayā buddhyā khedāyātmā na dīyate //

vṛddhavipraguruproktaṃ tvādṛśenānutiṣṭhatā /
padam āsādyate puṇyaṃ na moham anudhāvatā //

tāvad evāpado dūre tiṣṭhanti paripelavāḥ /
yāvad eva na mohasya prasaraḥ putra dīyate //

rājaputra mahābāho śūras tvaṃ vijitās tvayā /
durucchedā durārambhā apy amī viṣayārayaḥ //

kim atajjña ivājñānāṃ yogye vā mohasāgare /
vinimajjasi kallolagahane jāḍyaśālini //

calannīlotpalavyūhasamalocana lolatām N11, Ś4: lolu° /
brūhi cetaḥkṛtāṃ tyaktvā hetunā kena muhyasi //

kiṃniṣṭhāḥ kiyatā kena kiyantaḥ kāraṇena te /
ādhayo nu vilumpanti mano geham ivākhavaḥ //

manye nānucitānāṃ tvam ādhīnām padam uttamaḥ /
āpatsu cāpto yo dhīro nirjitās tena cādhayaḥ //

yathābhimatam āśu tvam brūhi prāpsyasi cānagham /
sarvam eva punar yena tava bhetsyanti nādhayaḥ //

ity uktam asya sa mune raghuvaṃśaketur ākarṇya vākyam ucitārthavilāsagarbham /
tatyāja khedam abhigarjati vārivāhe barhī yathābhyanumitābhimatārthasiddhiḥ //