Mañjuśrīmūlakalpa · Chapter 53

āryamañjuśriyamūlakalpād bodhisattvapiṭakāvataṃsakānmahāyānavaipulyasūtrād ekūnapañcāśatimaḥ yamāntakakrodharājābhicārukaniyamaḥ dvitīyaḥ paṭalavisaraḥ parisamāptaḥ //
Atha dvipañcāśaḥ paṭalavisaraḥ /
atha khalu śāntamatirbodhisattvo mahāsattvaḥ tasminneva parṣatsannipāte sannipatitaḥ sanniṣaṇṇo 'bhūt / utthāyāsanāt sarvabuddhaṃ praṇamya parṣanmaṇḍalamadhye sthitvā bhagavantaṃ śākyamuniṃ triḥ pradakṣiṇīkṛtya caraṇayornipatya sa yena vajrapāṇiḥ mahāyakṣasenāpatiḥ tena vyavalokya vācamudīrayati sma / atikrūrastvaṃ vajrapāṇeḥ yastvaṃ sarvasattvānāṃ sattvopaghātikaṃ kāmopasaṃhitaṃ ca mantratantrāṃ bhāṣayase / na khalu bho jinaputra bodhisattvānāṃ mahāsattvānāmeṣa dharmaḥ / mahākaruṇāprabhāvitā hi mahābodhisattvā bodhisattvacārikāṃ carante sarvasattvānāmarthāya hitādhyāśayena pratipannā bhavabandhanānna mucyante / na ca punarbho jinaputra / sattvopaghātikāṃ dharmadeśanāṃ tathāgatārhantaḥ samyak sambuddhāḥ sarvasattvānuddiśya bhāṣante mahākaruṇāsamanvāgatatvāt / sarvasattvānāṃ hitādhyāśayena pratipannā bhavanti //
atha khalu vajrapāṇirbodhisattvo mahāsattvaḥ śāntamatiṃ bodhisattvamāmantrayate sma / evaṃ hi śāntamate bodhisattvena śikṣitavyam / evaṃ pratipattavyam / yathā tvaṃ vadasi yathā tvaṃ prakāśayasi / tathā sarvabuddhāḥ bodhisattvāśca maharddhikāḥ / tathāhaṃ nirdekṣyāmi paramārthato //
bhūtakoṭiṃ samāśṛtya dharmakoṭiṃ tu mucyate /
acintyaṃ sattvakoṭiṃ vai paripākamacintitam // Mmk_52.[1].1 //
acintyā buddhadharmāstu caryā bodhimacintikā /
vaineyasattvamāgamya acintyaṃ caritaṃ hi taiḥ // Mmk_52.[1].2 //
caryā bodhisattvānāṃ acintyā parikīrttitā /
sarvamantreṣu tantro 'yaṃ acintyatatprabhāvataḥ // Mmk_52.[1].3 //
krodharājasya mantrasya yamāntasya mahātmanaḥ /
acintyaṃ ṛddhiviṣayaṃ gatimāhātmyamacintyakam // Mmk_52.[1].4 //
acintyā hi śāntamate bodhisattvānāṃ mahāsattvānāṃ caryāniṣpanditasattvadhātunirhāram / evaṃ hi śāntamate bodhisattvena mantrajāpinā cittamutpādayitavyam / kāmamasya sattvasyārthāya bahvapuṇyaṃ prasunuyāt / mahānarakopapattiśca / na tvevāyaṃ sattvaḥ bahutaramapuṇyaskandhaṃ prasunuyāt / mā nāmāyaṃ sattvo trayāṇāṃ bodhīnāmabhavyo bhavet / evaṃ hi śāntamate bodhisattvena mantrajāpinā cittamupasthāpya upāyakauśalyaṃ cābhicārukaṃ ca karma prayoktavyam / sarvakarmiṣu ca nimittagrāhiṇā bhavitavyam / nākuśalagrāhiṇā sattvavaineyamupādāyatā ca śikṣitavyam / karuṇāviṣṭena cetasā //
api ca bho jinaputra dharmādharmaśubhāśubhaṃ kuśalākuśalagatimāhātmyasattvopāyavinayanirahāratāṃ dharmadhātunirahāratāṃ ca pratipapadyante buddhā bhagavantaḥ sarva eva dharmadeśanāsattvopāyapāyakāṃ ca pratipadyante / tathaiva bho jinaputrāsmābhiḥ śikṣitavyam / yaduta tvavinayanāya sattvapākānuśāsanāya ca tatrabhavanto jinaputrāḥ yo 'yaṃ parṣanmaṇḍalamahāsamayopaviṣṭāḥ tatra sarvaiḥ samagraiḥ śrotavyaṃ śraddhātavyaṃ ya eva kuśalākuśalagaveṣaṇairbhavitavyam / yaduta tathāgatadharmadeśanābhiratairbhavitavyam //
atha śāntamatirbodhisattvo mahāsattvaḥ vajrapāṇiṃ yakṣasenāpatiṃ vyavalokya tṛṣṇāmbhūtaḥ svake āsane niṣaṇṇo 'bhūt / acintyā buddhadharmā iti manasikṛtya buddhaṃ bhagavantaṃ vyavalokayamānaḥ //
atha vajrapāṇirguhyakādhipatiḥ sarvaṃ tat parṣanmaṇḍalamavalokya bhūyaḥ krodharājasya kalpaṃ bhāṣate sma / śṛṇvantu bhavanto devasaṅghāḥ ye sattvadhātunisṛtāśca sarve bhūtagaṇāḥ ādau tāvat kṛtarakṣaḥ taṃ paṭaṃ krodharājasya parigṛhya viveke sthāne sattvā ekaliṅge maheśvarasyāyatane taṃ liṅgaṃ viparudhirarājikākāñjikenābhyajya picumardapatrairarcayitvā mānuṣāntranālibhi ātmanā yajñopavītaṃ kṛtvā mānuṣaśirakapālena dakṣiṇahastena saprahāro bhūtvā vāmahastena liṅgaṃ tarjayamānaḥ paramakrodhābhibhūtaḥ avamānitaduṣṭarājānaiḥ mahāparibhavagatamānasaḥ anyairvā dhūrtapuruṣaiḥ mahāyakṣairmahādhanairmahāpracaṇḍaiḥ mahānāyakaiḥ śuddhāraṃ pithayitvā nagnako muktaśikhaḥ maheśvaraliṅgaṃ vāmapādenākramya krodhamantraṃ tāvajjapet yāvanmaheśvaraliṅgo madhye sphuṭita iti dvividalībhūtaṃ mahāṃśca huṅkāraḥ śrūyate / tato na bhetavyam / tadeho eva duṣṭarājñaḥ anyo vā yaḥkaścinmahāyakṣaḥ aristatkṣaṇādeva jvareṇa gṛhyate / amānuṣeṇa vā gṛhyate rākṣasādibhiḥ / tatraiva muhūrtaṃ japed yāvat kṣaṇādeva śatrorjīvitaṃ maraṇaparyavasānaṃ bhavati / yadi rātryantaṃ jape tatsarvakuṭumbo naśyati //
aparamapi karma bhavati / madhyāhne tathaiva maheśvarāyatanaṃ gatvā nimbapatrairabhyarcya mahāmāṃsadhūpaṃ dattvā mantraṃ japet / yāvacchatrorbhavanamagninā dahyate, śatrośca mahājvarakampo bhavati / yadi jāpaṃ na tyajate kruddho vā dakṣiṇamūrtaistiṣṭhate sa śatrurmṛyate gotrotsādo bhavati / atha pratyāyanaṃ karoti / bhūyo liṅgamudakena prakṣālya suśītalena kṣīreṇa snāpayet / gavyena bhūyaḥ / svastho bhavati //
aparamapi karma bhavati / maheśvaraliṅgasya dakṣiṇāmūrttau madanakaṇṭakakaṣṭhairagniṃ prajvālya vaikaṅkatasamidhānāṃ viṣarudhirarājikābhyaktānāṃ aṣṭasahasraṃ juhuyāt / sarveśatravo mahāvyādhinā gṛhyante / aśaktā bhavanti sarvakarmeṣu / dvitīye divase mahājvareṇa mahāśūlena vā gṛhyante vividhairvā rogaiḥ amānuṣairvā māraṇāntikaiḥ / tṛtīye divase tṛbhiḥ sandhyaiḥ sarveṇa sarvaṃ jīvitaṃ tyajante / pratyāyane kṣīraṃ juhuyāt / śāntirbhavati / sarvajanapadeṣu sarvaśatravaśca svasthā bhavanti / evaṃ sarvadevānāṃ sarvabhūtānāṃ yo yasya devatābhaktaḥ tamākramya kuryāt / tasya nakṣatramantrasaṃjñatāṃ pādenākramya vāmena karma kuryāt / varjayitvā tu tāthāgatiṃ vidyām / sarveṣāṃ ca pādāṅguṣṭhaṃ vāmena gṛhītvā karma kuryānna cākrameṇāpi calaṃyeyetkadā sarvalaukikamantrāścākramya kuryāt / asiddha eva krodharājā jāpamātreṇaiva karmāṇi karoti sarvamantrāṃ vināśayati sarvaśatrūṃ ghātayati sarvayantrāṃ pātayati / saṃkṣepato yathā yathā prayujyate sarvalaukikalokottaramantravidhānenāpi tat sarvaṃ karoti / sarvaṃ sādhayati / jāpamātreṇa sarvāśāṃ pāripūrayati / paṭhitasiddhā eṣa krodharājā uttamāṃ siddhimanuprayacchati / manasecchayā śatruṃ ghātayati mahāśūlamudrayā saṃyuktaḥ sarvakarmāṇi karoti //

aparamami karma bhavati / madhyāhne śmaśānaṃ citāvekarātroṣitaḥ kṛṣṇacaturdaśyāṃ śmaśānakāṣṭhairagniṃ prajvālya viṣarudhirāktāṃ rājikāṃ juhuyāt / tato hāhākāraṃ kurvantaḥ sarvapretā āgacchanti / ( Vaidya 439 ) na bhetavyam / tato vaktavyaṃ śatruṃ me ghātayeti / evamastviti kṛtvāntardhīyante / tato muhūrtamātreṇa yojanasahasramapi gatvā śatruṃ ghātayanti kulānutsādayanti / evamādīni karmāṇi kurvanti //
aparamapi karma bhavati / viveke śucau deśe śucivastraprāvṛtena śūnyagṛhaṃ praviśya karpāsāsthyāhutīnāṃ aṣṭasahasraṃ juhuyāt tato taṃ bhasma ubhābhyāṃ hastābhyāṃ gṛhya śucau vastrakhaṇḍe badhnīyā pṛthak pṛthak / dvau poṅgalikāṃ kṛtvā śarāvasampuṭe sthāpya mahākṛtarakṣāścātmano dravyaṃ ca gṛhamapraviśya mahāśmaśānaṃ gatvā rātrau kṛṣṇacaturdaśyāṃ kṛṣṇāṣṭamyāṃ vā citau sthitvā dakṣiṇābhimukhaḥ śarāvasampuṭaṃ gṛhītvā sthitako nagnako muktaśikhaḥ sa kruddho nirbhayo bhūtvā vidyā daśasahasrāṇi japet / siddho bhavati / tad bhasma yadi kaścidamānuṣo dravyaṃ prārthayate na dātavyam / haṭhaṃ karoti krodharājaṃ smṛtvā huṅkāraḥ prayoktavyaḥ / tatkṣaṇādeva naśyate / sarvabighnānāmeṣa eva vidhiḥ / vāmadakṣiṇakaragṛhītaṃ bhasma cihnaṃ kārayet / apramattena rakṣāṃ kārayitvā āgantavyam / prabhāte sūryodaye snātvā śucinā śucivastraprāvṛtena svagṛhaṃ praveṣṭavyam / asthāne vā yathābhimate gantavyam / tato yo dakṣiṇahastena gṛhītaṃ bhasma tena manuṣyādvipadacatuṣpadāṃ sarvaprāṇibhūtāṃ sadevanāgayakṣāṃ mūrdhnā tāḍayed vaśā bhavanti / yad vāmena hastena gṛhītaṃ bhasma tena sarveṣāṃ manuṣyāmanuṣyāṇāṃ sarvāsāṃ strīṇāṃ mūrdhnā tāḍayed vaśyā bhavanti / dakṣiṇena yad gṛhītaṃ bhasma tena manuṣyāṇāṃ nābhideśe tāḍayet / napuṃsakā bhavanti / aṅgajātadeśena ca cūrṇayed asamartho bhavati / grāmyadharmaniṣeviṇo yasyā striyāyāṃ abhiśakto bhavati tasyāṅgajāte guhyapradeśe bhasmanāvacūrṇayet / asamarthā sā bhavati anyapuruṣātisevane / naṣṭavraṇā bhavati yāvantaṃ tadeva puruṣaṃ prāpnuyāt / punareva tasyāḥ tadvraṇamukhaṃ prādurbhavati / kāmamithyācāramaśakto nisevitum / evaṃ puruṣasyāpi / puruṣendriyaṃ dakṣiṇahastaṃ bhasmanāvacūrṇayet / so 'pi asamartho bhavati / paradārābhigamane parimlānamiva tiṣṭhate / tasya tadaṅgajātaṃ yāvad dātravaśāt tasyaiva tat punaḥ prādurbhavati / striyasya vā puruṣaya vā yena vā tad bhasma punardattaṃ bhavati tasya vaśena varttati vā na vartati vā yatheṣṭaṃ vā taṃ karoti / yadi balāt kurvanti yeṣāṃ tu tad dattaṃ teṣāṃ guhyapradeśāni krimayaḥ prādurbhavante / yairbhakṣamānā jīvitād vyaparoṣyante / māsābhyantareṇa pūtikā vā bhavanti durgandhakuṇapasadṛśāḥ mahāpradararogādibhiḥ puruṣavyādhibhiḥ puruṣā gṛhyante / mahāśvethuścopajāyate / yena teṣāṃ tenaivābādhena kālakriyā bhavati / aśaktā vā bhavanti pratisevituṃ dāsasyecchayā / yathābhirucitaṃ tat sarvaṃ kārayati / spṛṣṭamātro yadi na prāpnoti sparśanaṃ darśanapathe sthitā adarśane vā anuvāte ca bhasmamutsṛjet / yathā tasya bhasmanā īṣidavadhūlitaḥ manasā ca cintayitvā dātā bhasmamutsṛjet / yat tena cintitaṃ bhavati tat sarvāṇi karmāṇi karoti / parahastena vātmanā vā yathābhilaṣitaṃ tat sarvāṇi karmāṇi karoti / nānyathā cāvandhyaṃ bhavati //
atha śayanāsanādīnāṃ astaraṇaprāvaraṇādīnāṃ vividhāni vālaṅkaraṇaviśeṣāṇi nānāvastrāṇi vā vāhanayānopānahacchatrādīnāṃ sarvāṇyupakaraṇaviśeṣāṇi bhojanapānabhakṣaṇādīnāṃ sarvāṇi śarīropayojyāni bhāṇḍopakaraṇāni puṣpantāmbūlaphalagandhadhūpādīnāṃ sarveṣutaistaṃ bhasmanāvacūrṇayet / arīṇāṃ yūkamatkuṇakrimibhiḥ samantāvaccharīramākīrṇaṃ bhavati / bhakṣate ca / vividhaduḥkhavihato bhavati / saptarātreṇa mṛyate / aśaktāḥ sarvavaidyāḥ sarvadevāśca nivārayitum / aśaktāḥ sarvamantrāḥ rakṣayitum / varjayitvā tu tena dattaṃ bhavati //
atha pratyāyanaṃ bhavati / yaṣṭīmadhuṃ nīlotpalaṃ śvetacandanaṃ caikīkṛtya śītalenāmbhasa pīṣayitvā taccharīraṃ mrakṣayet mūrdhnā prabhṛti yāvat pādatalam āryamañjuśriyamūlamantraṃ japatā / svastho bhavati //
aparamapi karma bhavati / strīṇāmanuvātaṃ gatvā yatrepsatā sarvaduṣṭaḍākinistrīṇāṃ garvitānāṃ ca prayoktavyaṃ nānyeṣām / tamenamanuvāte sthitvā bhasmamutsṛjet / manasā cintyayitvā sarvabhagastanānyapahṛtāni bhavanti / puruṣasyāpi puruṣendriyaṃ śmaśruromāṇi ca stanāni ca prādurbhavante //
evaṃ vividhavicitrāṇyanekāni karmāṇi karoti / pareṇa vā kārāpayati / yatra vā prītirutpadyate tena vā kārāpayati / striyā vā puruṣeṇa vā / yatra vā cittasya nirvṛttirutpadyate tasya tad bhasmāṃ datvā yatheṣṭaṃ kārāpayati / prayogataśca śikṣāpayet / evaṃ mahāvyādhibhiḥ gṛhṇāpayati / manasā cintayitvā mūrdhni sparśanānmastakaśūlaḥ mukhasparśanānmukhapākaḥ evamanūpūrvyā yāvaddhṛdayaṃ hṛcchūlakukṣiśūlaṃ vā upajāyate / evaṃ padbhyāṃ jaṅghābhiścāsṛgudbhavai rogairduṣṭaśoṇitādiṣu rogairgṛhṇāpayati / saṃkṣepato mārayati śoṣayati pācayati ākarṣayati vaśayati yathā yathā prayujyate tathā tathā tat sarvaṃ karoti / copaghātikaṃ ākarṣaṇavaśīkaraṇaṃ ca sudūre 'pi sthitaḥ karmāṇi karoti / sudurgaṃ kuḍyasamīpaṃ gatvā, anuvāte sthitvā, tadeva bhasmotsṛjet / ubhau pāṇigṛhītaṃ prākāraṃ pratolī aṭṭālāṃśca prapatante / tadādhyakṣaṃ bhavanaṃ ca mahāgnidāhamupajāyate / senābhaṅgaṃ ca bhavati / mahopadravaiścopadruto bhavati / sarvamavamucya prapalāyati vā grahaṇaṃ vādhigacchati / evaṃ parabale 'pi anuvāte bhasmamutsṛjet / mahābalasenāyā bhaṅgo bhavati / dāghajvareṇa vā gṛhyate / hastyaśvarathapatākādayaḥ senāpatiśca bhaṅgamupajāyate / grahaṇaṃ vā abhigacchati / evamanekaprakārāṇi yatheṣṭāni śatrunāśāya karmāṇi karoti / ātmano mahārakṣā ye ca svasenāyāṃ vā sakhāyānāṃ / atha pratyayanaṃ karoti / sarvataḥ sarveṣāṃ paṭasyāgrataḥ kṣīrāhutisahasraṃ juhuyāt / svasthā bhavanti adhṛṣyāśca //
atha yakṣiṇīṃ sādhayitukāmaḥ -
naṭī naṭa tathā bhaṭṭa revatī cāpi viśrutā /
tamasurī tha lokā mekhalā cāpi sumekhalā /
ityetā aṣṭa yakṣiṇyaḥ sarvakāmaprasādhikāḥ // Mmk_52.[2].1 //

naṭikāyā mantraḥ - om naṭi mahānaṭi āgacchāgaccha divyarūpiṇi svāhā / asyopacāraḥ - phalake paṭṭake vā abhilikhya māṃsāhāreṇa vā kṣīrāhāreṇa vā vidyā aṣṭasahasraṃ japtavyā / ālekhyā ca sarvālaṅkārabhūṣaṇī śyāmāvadātā vṛkṣāśṛtā ekavastrā muktakeśā, saṃraktanayanā īṣismitamukhā sādhakaṃ tarjāyamānā dakṣiṇahastena vāmena pāṇinā vṛkṣaśākhāmavalagnā sarvāṅgaśobhanā vicitrapaṭṭanivastā / tasyeva krodharājasya paṭasyāgrataḥ unmanā uttarāmukhaṃ sthitvā palāśakāṣṭhairagniṃ prajvālya gugguluguṭikānāṃ dadhimadhughṛtāktānāṃ aṣṭasahasraṃ juhuyāt trisandhyaṃ yāvat sapta divasāni / tataḥ saptame divase udārāṃ baliṃ kṛtvā ghṛtapradīpāṃśca prajvālya mantraṃ japatā tāvat tiṣṭhet yāvadardharātram / tataḥ sā yakṣiṇī svayameva mahāvabhāsaṃ kṛtvā svarūpeṇāgacchati / āgatā ca bravīti / kiṃ mayā kartavyam iti / tataḥ sādhakena vaktavyam - bhāryā me bhavasva iti / evamastviti kṛtvāntardhīyate / tataḥprabhṛti bhāryā bhavati / sarvakāmadā svabhavanaṃ nayati / rasāyanaṃ prayacchate / yat pītvā divyarūpī bhavati mahāyakṣapratispardhī / yadi nāgacchati dvitīye vāre krodharājasahitaṃ japenniyatamāgacchati / na ceducchuṣyaṃ mṛyate //
naṭṭāyā mantraḥ - om naṭṭe śuklāmbaramālyadhāriṇi maithunapriye svāhā / etasyaiṣa eva vidhiḥ /
bhaṭṭāyā mantraḥ - om bhaṭṭe bhaṭṭe ālokini kiṃ cirāyasi ehyehi āgacchāgaccha mama kāryaṃ kuru svāhā / eṣā vināpi paṭena siddhyate / śiraḥsthāne maṇḍalakaṃ kṛtvā gugguludhūpaṃ dahatā vidyāmaṣṭasahasraṃ japet / mauninā ekākinā śucinā dvāraṃ pidhāya māsena rātrau niyatāmāgacchati / āgatā ca kāmayitavyā bhāryā bhavati sarvakāmadā / yadyasau bhavanaṃ praviśate pañcavarṣasahasrāṇi jīvati / na cedatraiva jambūdvīpe vicarati / pañcavarṣaśatāni jīvati / tayā sārdhaṃ krīḍati / sarvājñāṃ sampādayati / tena saha yatreṣṭaṃ tatra gacchati / rasāyanamanuprayacchate / iṣṭabhāryevāvahitādhyāśayaṃ karoti //
revatyā mantraḥ - namaḥ sarvayakṣīṇām / om rakte raktavabhāse raktānulepane svāhā /
revatyā yakṣiṇī śreṣṭhā lalantyā maithunapriyā /
īṣid raktena vastreṇa nīlakuñcitamūrdhajā // Mmk_52.[3].1 //
sarvāṅgaśobhanā yakṣī kāmabhogaratā sadā /
kāmadā bhogadā nityaṃ varadāṃ tām abhinirdiśet // Mmk_52.[3].2 //
pūrvavat paṭamabhilikhya etasyā ayaṃ viśeṣaḥ - raktapaṭṭanivastā raktapaṭṭāṃśukottarīyā raktāvabhāsā ca varṇataḥ /
mekhalāyāḥ mantraḥ - om mekhale mahāyakṣiṇi mama kāryaṃ sampādaya svāhā //
sumekhalāyā mantraḥ - om mekhale sumekhale mahāyakṣiṇi sarvārthasādhani om samayamanusmara svāhā //
ālokinyā mantraḥ - om lokini lokavati svāhā / eteṣāmeta eva vidhiḥ //
tamasundaryāyā mantraḥ - om ghuṇu guhyake ghuṇu ghuṇu guhye ehyehi guhyake svāhā / asyopacāraḥ na / etāyā paṭavidhāno 'sti ādau tāvat śucinā śucivastraprāvṛtena pūrṇamāsyāṃ vivikte sthāne dvāraṃ pidhāyitvā andhakāre ālokavarjite vidyāṃ daśasahasrāṇi japet / pūrvasevā kṛtā bhavati / tataḥ sādhanamārabhet / pūrvamāsyādārabhya yāvadaparā pūrṇamāsī atrāntare karma bhavati / rātrau śayanakāle śayyāmārūḍhaḥ pracchanne guptapradeśe ekākinā dvāraṃ pidhayitvā saṅkucitakarṇikāṃ vānapuṣpaṃ ca kaṭutailena miśrayitvā hastau pādau prakṣālayitvā dakṣiṇaṃ bāhumaṣṭaśatābhimantṛtaṃ kṛtvā svapet monī / evaṃ pratyāhaṃ yāvat paurṇamāsyāt / tato 'rdharātre niyatamāgacchati / āgatā ca na mantrāpayitavyā / tūṣṇībhāvena kāmayitavyā ṣaḍbhiḥ māsaiḥ / yadā mantrāpayati tadā mantrayitavyam / tataḥ prabhṛti siddhā bhavati / bhāryā bhavati sarvakāmadā / divyaṃ cāsya sukhasaṃsparśam adarśanenaiva sarvakāryāṇi sampādayati / rasarasāyanāni samprayacchati / pṛṣṭhamāropya sumerumapi nayati / rātrau jambūdvīpaṃ bhrāmayati / yojanaśatasthitamapi śatruṃ ghātayate / yathājñaptā tat sarvaṃ sampādayati / varjayitvā parastriyābhigamanam / sarveṣāmayaṃ vidhāna parastrīṃ nābhigacchet / tenaiva saha saṃvaset / yadi gacchenmaraṇonmattiṃ vā prayacchante / eṣā andhārasundarī nāma yakṣiṇī / anekayakṣīśatasahasraparivṛtā / dine dine ekaikāṃ yakṣiṇīṃ kṣaviṭiṃ preṣayati / siddhā satī sarvasādhakānāṃ anekamantraparivārāṃ ca sarvayakṣīṇāṃ ca maharddhikā ttamāvṛtā / sarveṣāmeva eva vidhiḥ / kiṃ tarhi teṣāṃ darśanaṃ bhavati / etasyā darśanaṃ na bhavati //
andhāravāsinī nāma yakṣīṇāṃ maharddhikā /
guhāvāsinī naravīrā kumārī lokaviśrutā // Mmk_52.[4].1 //
madhuyakṣī manojñā ca saptamā surasundarī /
ityetāḥ sapta yakṣiṇyaḥ sattvānugrahakārikāḥ // Mmk_52.[4].2 //
paryaṭanti imaṃ lokaṃ kṛtsnāṃ caiva medinīm /
īṣit kṣaṇamātreṇa utpatanti surālayam // Mmk_52.[4].3//
saṅgrāmaṃ devadaityānāṃ yuddhyante ca maharddhikāḥ /
dharmiṣṭhā karuṇāviṣṭāḥ sattvakāmāḥ suvatsalāḥ // Mmk_52.[4].4//
sattvānāṃ hitakāmyarthaṃ paryaṭanti mahītale /
na tāsāṃ kiñci duḥsādhyaṃ sarvakarmakarāḥ śubhāḥ /
sattvānāmupabhogārthaṃ bodhisattvena bhāṣitā // Mmk_52.[4].5//

guhyavāsinyā mantraḥ - om guhile guhamati guhavāsi ānaya bhagavati mayāntikaṃ samayamanusmara svāhā / khadirakāṣṭhairagniṃ prajvālya pṛyaṅgupuṣpāṇāṃ ghṛtāktānāṃ aṣṭasahasraṃ juhuyāt trisandhyaṃ māsamekam / pūrvasevā kṛtā bhavati / tataḥ paścāt sādhanamārabhet / phalake vā paṭṭake vā kuḍyāyāṃ vā aśleṣakairvarṇakaiḥ navabhājanakūrcakaiḥ / ādau tāvat parvatarājā sumerurlikhāpayitavyaḥ ( Vaidya 443 ) caturasraḥ catuḥśṛṅgocchṛtaḥ saptaparvatapaṅktipariveṣṭitaḥ / teṣāṃ parvatānāmante guhaḥ parvataniḥśṛtaḥ ālikhitavyam / tatrasthā divyarūpiṇī sarvālaṅkārabhūṣitā ekākinī yakṣiṇī guhavāsinī nāma likhāpayitavyā paṭṭavastranivastā paṭṭāṃśukottarīyā kanakavarṇā vicitracārurūpī taṃ tādṛśaṃ paṭamabhilekhya śucau pradeśe śucinā kṣīrāhāreṇa vidyāṃ daśasahasrāṇi japet / mahāpūjāṃ kṛtvā yathāśaktito vā tato japānte mahāvabhāsaṃ kṛtvā divyarūpī yakṣiṇī svayamevāgacchati / āgatāyā jātīkusumaiḥ śvetacandanodakavyatimiśraiḥ argho deyaḥ / tataḥ sā bravīti - vatsa kiṃ karttavyam / vaktavyam - mātā me bhavasveti / kṛtvāntardhīyate / na ca tatra cittaṃ dūṣayitavyam / nāpi kāmopasaṃhitaṃ prārthayitavyam / āryā sā maharddhikā ca kāma prārthayati na siddhyate / tataḥ prabhṛti mātṛvat sarvakāryāṇi karoti / aṣṭaśataparivārasya bhaktācchādaṃ prayacchate / viṣamasthasya trāyate / mahāvanyaparvatasyoparisthitasyāpi sarvakāryāṇi sampādayati / kāmitaṃ ca bhojanamanuprayacchate / rasarasāyanādīn sarvamanuprayacchati / yatheṣṭaṃ cānuvarttate / kuṭikuṭādīmabhinirmiṇoti / suvarṇasahasramanuprayacchati dine dine / sarvaṃ vyayīkarttavyaṃ tadaha eva / yadi na karoti cchinno bhavati / sarveṇa sarvaṃ bhavati /
aparamapi karma asyā / asyaiva paṭasyāgrataḥ khadirakāṣṭhairagniṃ prajvālya vigatārcidhūmavigataiḥ aṅgāraiḥ dakṣiṇahastatale manacchilayā pratikṛtimabhilikhya nāma ca puruṣasya striyā vāmahastatale tatraivāṅgārarāśau tāpayet mantraṃ japatā / yojanaśatādapi striyamānayati / yaducyate tat sarvaṃ kārayati / rātrau etat karma / na divā //
naravīrāyā mantraḥ - om naravīre svāhā / tathaiva etasyā patamabhilikhya varjayitvā guhālayaṃ aśokavṛkṣāśṛtā likhāpayitavyā / etasyāḥ ayaṃ viśeṣaḥ - sarvaṃ tathaiva karma yathā guhavāsinyā / ayaṃ ca vaktavyā - bhaginyāsveti //
etasyāparo 'sti karma / candragrahe suvarṇagairikāṃ bhūrjapatreṇa veṣṭayitvā mukhe prakṣipya tāvajjaped yāvaccandro mukta iti / tataḥ suvarṇagairikayā yasyā nāma likhati striyasya vā āyojanaśatāsthitā apyānayati / prabhāte tatraiva nayati / bhaginīva kāryāṇi karoti / āpatsu mahārakṣāṃ karoti / sarvāṇyeva striyāṃ jāpamātreṇa vaśīkaroti / naravīrāyā eṣa vidhiḥ //
yakṣakumārikāyā mantraḥ - om yakṣakumārike svāhā / asyāayamupacāraḥ - gorocanena bhūrjapatre likhāpayitavyā / kumārī ardhabarbarāśirā sarvālaṅkārabhūṣitā ekavastrā dakṣiṇahastena bījapūrṇāvasaktaphalā vāmahastenāśokavṛkṣaśākhāvalagnā / tādṛśaṃ bhūrjapatraṃ śirāsthāne upari sthāpayitavyam / guhye pradeśe ekākinā ca svaptavyam / śvetacandanena ca maṇḍalakaṃ kṛtvā trisandhyaṃ jātīkusumairabhyavakīrya gugguludhūpaṃ dahatā vidyāmaṣṭasahasrakam japet yāvanmāsamekam / tato pūrṇamāsyāṃ jātīkusumaiḥ mahatī pūjāṃ kārayitvā ghṛtapradīpāṃśca nivedyāṃśca datvā kuśaviṇḍakopaviṣṭena rātrau tāvajjaped yāvat svarūpeṇaiva kumārī pañcaśataparivārā vaiśravaṇasya duhitṛ āgacchati / sarvaṃ taṃ diśābhāgamavalokayitvā svarūpeṇāntarikṣe tiṣṭhati / sā evamāha - kiṃ ( Vaidya 444 ) mayā karttavyam / tataḥ sādhakena vaktavyam - trayāṇāṃ vārāṇāmanyatamamekaṃ varaṃ prārthayitavyā / mātṛtve bhaginītve bhāryātve ca / yadi mātā bhavati / na cittaṃ dūṣayitavyam / dūṣayato vināśa upajāyate / mātṛvad vartayitavyā / sā ca mātā pañcaśataparivārasya bhaktācchādanamalaṅkaraṇaviśeṣāṇi ca sarvatra cintitamātreṇaiva sampādayati / dine dine dīnārasahasraṃ dadāti / atraiva jambūdvīpe vicarataḥ sarva sampādayati / bhaginī bhavati tadā yojanaśatādapi strīyamānayati / tatraiva nayate / bhaginīvat sarvakāryāṇi sampādayati / atha bhāryā bhavati svabhavanaṃ bhavate / divyaṃ varṣasahasraṃ jīvati / yadā mṛyate tadā āḍhyakulopapattiḥ / sarvājñāṃ bhāryeva sampādayati //
vadhūyakṣiṇyā mantraḥ - om niḥ / eṣā vadhuyakṣiṇī / asyā mupacāraḥ - śvetacandanena dakṣiṇāṃ bāhumupalipya vāsataḥ kuṅkumera sahasrābhimantritaṃ kṛtvā rātrau ekākinā mauninā pracchanne pradeśe dvāraṃ pidhāya pañcāṣṭau vibhītakaphalāni tilataile prakṣipya pathet / taṃ tailaṃ gṛhītvā vidhītakaphalāṃ parityajya nave māṇḍe sauvarṇe rājate tāmre mṛnmaye vā sthāpya pādānte śayyāyāṃ sahasrābhimantritaṃ kṛtvā anenaiva mantreṇa ekākṣarayakṣiṇyā andhakāre vivikte śayane puṣpābhikīrṇe svaptavyam / āgatya cāmānuṣīṃ pādau mrakṣayati / divyamukhaṃ sparśakomalahastatalā / yasya sparśanādeva divyaṃ sukhasaṃsparśanidrāmupajāyate / yena sūryodaye 'pi rātryante duḥkhena pratibudhyate / pratibuddhāpi san tadeva cintayet / na ca kāmayitavyā nāpi mantrāpayitavyā / ṣaḍbhirmāsaiḥ siddhā bhavati / tataḥ sā divyarūpī abhinavabadhvā vayātsamānā paricārikaiḥ parivāritā pradīpahastā svaprabhodyotitālokā śayanāsanaparigṛhītā vicitrābharaṇojjvalā āgatya ca mantrāpayate / kāmabhogopakaraṇaparigṛhītā āgatya ca sādhakaṃ kaṇṭhe paripvajate / tataḥprabhṛti iṣṭabhāryeva manuvarttate / āgatā ca kāmayitavyā rātrau paricarya prabhāte 'ntardhīyate / śayyāyāṃ muktāhāraṃ tyajya suvarṇasahasramūlyaṃ dine dine parityajya gacchati ca / sarvaṃ niravaśeṣaṃ vyayīkarttavyam / yadi kiñcit sthāpayati bhūyo na bhavati / na kasyacit kathitavyam / yadi kathayati bhūyo nāgacchati / anarthaṃ vā kurute / māraṇāntaṃ paramaguhyakā hyete paramagopyā na dvitīyasattvamārocanaṃ kṣamante / mātāpitṛsuhṛtsvāmibāndhavānāmapi nārocayitavyam / antaśaḥ paśusyāpi tiryaggatānāṃ prāṇināṃ nāropayitavyam / paramaguhyametat / sarvaguhyakānāṃ sarvayakṣiṇīnāṃ ca eṣa eva vidhānā / siddhā api asiddhā bhavanti / yadyārocayate / anyastrīmaithunābhigamanaṃ ca bhāryāyā ca varjayet sadā //

manojñāyā mantraḥ - om manohare madonmādakari vicitrarūpiṇi maithunāpreye svāhā / asyāmupacāraḥ - udyānavāṭikāyāṃ aśokavṛkṣasyādhastāt savibhaktāṃ kuṭiṃ kārayitvā aguptatarāṃ kṛtakavāṭārgalaprākārocchritāṃ śucinā lakṣamekaṃ japet / tataḥ karmamārabhet / mahāvasāṃ saṅgṛhya śmaśānavoṭakena vartiṃ kṛtvā dvāraṃ pighayitvā pradīpaṃ prajvālayet / sadaśaṃ ca vastraṃ keśāpagataṃ bahirdvāra sthāpayet / pratyagraṃ rātrau sā nagnikāgatya taṃ vastraṃ nivāsya praviśate mānuṣastrīrūpiṇī bhūtvā / tataḥ sādhakaḥ tena sārdhaṃ ramate yāvat pradīpaṃ jvalate / nirvṛte pradīpe 'ntardhīyate / tasmiṃ ( Vaidya 445 ) vastre suvarṇamekaṃ baddhvā vastraṃ parityajyaśayyāyāmapakramati / atha sādhakastāṃ haste gṛhṇāti / aṅguleyikaikāvamuñcyāvakramate / atha kaṇṭhā divyamuktāhārāṃ atha bāhāt kaṭakaṃ kaṭyāṃ mekhalāṃ padbhyāṃ nūpuraṃ śīrṣe maṇiṃ evamanyatarānyataraṃdivyamābharaṇamekaṃ yatra yatra gṛhyate tatra tatrānuprayacchati / avadhyāṃ gacchati cāgacchati ca / evaṃ pratyahaṃ niravaśeṣaṃ vyayīkarttavyam / evaṃ yāvadbhirmāsaiḥ mantrāpayati tadā mantrayitavyam / bhāryā bhavati / nityasthā rasāyanaṃ prayacchati yaṃ pītvā dīrghakālaṃ jīvati / manasā dhyātvā khadirakīlakaṃ bhūmau nikhānayet / divyaṃ vimānamupapadyate / uddhṛte 'ntardhīyate / asyāyā mantraḥ dvitīyamasti / om mahānagni nagnije svāhā tenaiva dīpaṃ prajvālya anena mantreṇāṣṭaśatābhimantritaṃ kṛtvā kārayet / niyatamāgacchati / kīlakaṃ cābhimantrya nikhānayet / uddhṛte dīpe nirvṛte cāntardhānaṃ kīlakaṃ mānuṣaṃ vasākīlaṃ ca so śṛṅge gavalamahiṣaśṛṅge vā śmaśāne cailavartinā voḍhavyam / deśāntare / yatreṣṭaṃ tatra dadāti / svayaṃ vā karoti / na ca mantrā dātavyā / atha dadāti chinnavidyo bhavati / yasya dadāti tasyaiva tat sampadyate / yatra bābhirucitaṃ yatra vā sthāne gupte karoti / eṣā siddhiḥ āvarttya nāpagacchati / anyāṃ vā ramāpayate / kintu taiḥ sārdhaṃ na mantrayati / anyastrīdarśanābhirucitaṃ manasepsitaṃ tadānurūpī tasyopasaṅkramato hyapūrvasya sādhakavaśāditi //
surasundaryāyā mantraḥ - om surasundari svāhā / asyāmupacāraḥ - khadirakāṣṭhairagniṃ prajvālya ghṛtāhutīnāṃ aṣṭasahasraṃ juhuyāt / trisandhyaṃ māsamekaṃ śuklapūrṇamāsyāṃ kuśaviṇḍakopaviṣṭaḥ śucinā śucau deśe mantraṃ tāvajjapedrahasi yāvadardharātre niyatamāgacchati / tato mātā bhaginī bhāryā yathaiva pūrvaṃ tata sarvaṃ karoti sarvaṃ ca vistarato vaktavyam //
ityetāḥ sapta yakṣiṇyaḥ vajrapāṇisamājñayā /
paryaṭanti mahīṃ kṛtsnāṃ trailokyaṃ ca surāsuram // Mmk_52.[5].1 //
viceruḥ kṛpālubhyo marttyānāṃ maithunapriyāḥ /
ke 'pi dāryāstathā bālā mūḍhāścāparayakṣikā // Mmk_52.[5].2 //
paryaṭanti tathā rātrau siṃhakāmyaparā hitā /
bālānāṃ jīvanāśāya lolupā māṃsabhojikā // Mmk_52.[5].3 //
tathā rudhiragandhena jambūdvīpaṃ hi māgatāḥ /
prāṇāparodhikā yakṣī nityaṃ sā śoṇitapriyā // Mmk_52.[5].4 //
paryaṭanti gṛhāṃ sarvāṃ ārakṣāmṛtakasūtakām /
teṣā nigrahamityuktaḥ samayo 'yaṃ samprakāśitaḥ // Mmk_52.[5].5 //
yathā saṅgraharāgaṃ ca nibandhyaṃ ceha bāliśām /
tathā sarvamidaṃ proktaṃ sattvānāṃ hitakāraṇāt // Mmk_52.[5].6 //
maithunārthī yathā mantrī rāgāndho mūḍhacetasaḥ /
mantrairākṛṣya bhuñjīta yakṣīṃ vā atha rākṣasī /
nāgī ca matha gandharvī daityayoṣimatha kinnarīm // Mmk_52.[5].7 //
pātālabhavanaṃ ramya asurāṇāṃ purottamam /
praviśet tatra mantrajñaḥ yatra strīṇāmasaṅkhyakam /
tatra gatvā vaset kalpa mantrajño mantrajāpinaḥ // Mmk_52.[5].8 //
maitreyo nāma sambuddhaḥ yadā buddho bhaviṣyati /
tadāsau śroṣyati saddharmaṃ śrutvā mukto bhaviṣyati // Mmk_52.[5].9 //
surakanyāsurīṃ caiva vidyādharavarāṅganām /
mantrairākṛṣya bhuñjīta divyasaukhyaratiṃ tadā // Mmk_52.[5].10 //
jambūdvīpagato mantrī tatraivānayate sadā /
śucisthāne tadā gupte śaucācārarataḥ sadā // Mmk_52.[5].11 //
mūḍhānāmuttamā siddhiḥ kadācit tena jāyate /
vinmūtramaśucisthānaṃ sadā durgandhipūtikam // Mmk_52.[5].12 //
vyādhiduḥkhaṃ tathā śokaṃ maraṇāntaṃ duḥkhabhājanam /
viyogaṃ ratisampṛktaṃ na spṛśenmānuṣīṃ striyām // Mmk_52.[5].13 //
anityaduḥkha tathā śūnyariktastucchamaśāśvatam /
vālamullāpanaṃ cāpi saṅkalpajanitodbhavet // Mmk_52.[5].14 //
na gacchet kāmato mantrī sarvakāmāmanādijām /
teṣāṃ viratimityukto vimuktiḥ teṣu siddhitām // Mmk_52.[5].15 //
sidhyante tasya mantrā vai ye viraktā tu kāmataḥ /
vinmūtrarudhirāsiktāṃ + + + caiva pūjitām // Mmk_52.[5].16 //
jarāmṛtyusuśokāṃ ca na spṛśenmānuṣīṃ tanum /
na bhejenmaithunaṃ tatra mohāndhā rāgacetasām // Mmk_52.[5].17 //
na siddhirlabhyane mantrāṃ teṣu sevī sadāśucī /
mantrajño mantrajāpī ca saprajño 'tha jitendriyaḥ /
śaucācārarato dhīraḥ sarvamantro 'pi hi sadā // Mmk_52.[5].18 //
padmoccā samodā ca ajitā cāpi jayā sadā /
śyāmāvarta tathā yakṣī ityetā yakṣimaharddhikā // Mmk_52.[5].19 //
padmoccāyā mantraḥ - om padmocce svāhā // asyāḥ kalpaḥ - gaṅgākūle samudrataṭe vā udyānapuṣpavāṭikāyāṃ madhye uḍayaṃ kṛtvā śucitaraṃ ātmanā ca śucirbhūtvā śilāpaṭṭakākāraṃ mṛṇmaye kṛtvā tatraiva rātrau dvāraṃ pidhayitvā sarvakāmabhogyādyupakaraṇānyupahṛtya tatraivātmasamīpe yakṣiṇyāṃ ( Vaidya 447 ) śayyāṃ kalpayet / tato vidyāṃ daśa sahasrāṇi japet / evaṃ yāvanmāsābhyantareṇa niyatamāgacchatīti / āgatā ca kāmopabhogyā bhavati bhāryā / divyaṃ ca muktāhāraṃ śayyāṃ parityajya prabhāte gacchati / evaṃ yāvad dinedine ṣaḍbhirmāsaiḥ nityasthā bhavati / tanmuktāhāraṃ na grahetavyam / yadiḥ gṛhṇāti tanmātra evamupapadyata / dīnāralakṣamūlyaṃ tat hāraṃ maṇiratnopaśobhitaṃ ṣaṭbhirmāsairatikrāntaiḥ nityasthā bhavati bhāryā sarvakāmadā / yathā rūpamabhilaṣitaṃ tathā rūpaṃ kṛtvāṃ upatiṣṭhate / yathābhirucitamātmānamabhinirminoti / sādhakasyecchayā sarveṣāṃ yakṣīṇāmayaṃ vidhānaḥ yathā nirdiṣṭānāṃ atra anyatra //
jayāya mantraḥ - om jaye sujaye jāpayati sarvakāryāṇi kuru me svāhā /
kanakābhā citrāṅgī nīlakuñcitamūrdhajā /
sarvāṅgaśobhanā devī bhomya ca subhagā śubhā // Mmk_52.[6].1 //
priyaṃvadā pramadāśreṣṭhā surūpā cārudarśanā /
praśastākāraruḥ śukraḥ sarvalokasupūjitā /
īṣidraktena vastreṇa jayāṃ tāmabhinirdiśet // Mmk_52.[6].2 //

asyāḥ kalpaḥ - ādau lakṣamekaṃ japet / pūrvasevā kṛtā bhavati / tato mahāraṇyaṃ praviśya phalāhāraḥ tāvajjapedyāvat svarūpeṇopatiṣṭhate / āgatā ca bravīti - kiṃ karomī ti / yadi mātā bhavati / mātṛvat sarvāśāṃ paripūrayate / rājyaṃ dadāti / mahādhanapatiṃ karoti / dīrghāyuṣkatāmadhitiṣṭhate / atha bhaginī yathepsitaṃ strīmānayati yājanasahasrasthitāmapi / dīnāralakṣaṃ dine dine dadāti / sa ca vyayīkartavyaḥ / atha bhāryā bhavati svabhavanaṃ nayate divyavimānābhirūḍho tayā sārdhaṃ ramate / dīrghakālaṃ triṃśad varṣasahasrāṇi yatheṣṭaṃ vicarate / mahāyakṣapratirūpo bhavati //
pramodāyā mantra - om ṣṭhrīḥ / hrīṃḥ mahānagni hūṃ phaṭ svāhā / asyāḥ kalpaḥ - ardharātre aparimāṇo jāpaḥ kartavyaḥ / bhūyo nidrāṃ gacchet / māsābhyantareṇa niyatamāgacchati / bhāryā bhavati sarvakāmadā / dinedine pañcaviṃśati dīnārāmanuprayacchati / ātmanā ca saṅkośaṃ dīrghakālaṃ ca jīvāpayati //
evamaparimāṇāni yakṣiṇī śatasahasrāṇi bhavanti / evaṃ piśācāḥ piśācamaharddhikāḥ nāgakanyāḥ asurakanyāḥ apsarā surayoṣid daityakanyā / evaṃ vidyādharīṇāṃ sarveṣāṃ sarvataḥ mānuṣīṇāmamānuṣīṇāṃ ca mantrāṇi bhavanti / asaṅkhyeyāni tathaiva yakṣāṇāṃ devānāṃ nāgānāṃ ṛṣīṇāṃ gandharvāṇāṃ asurāṇāṃ pretānāṃ rākṣasānāṃ ca mahābrahmaṇaḥ maheśvarasya mahāviṣṇoḥ mātarāṇāṃ aindrāṇi cāmuṇḍivārāhipramukhānāṃ mantrāṇi bhavanti pṛthakpṛthak sarve ca samaye ākṛṣṭāḥ iha krodharājena yamāntakena ānītā grastā samaye sthāpitā mañjughoṣasyopanāmitā anuparivārā anupūrvasthitā paricārikā sarveṣāṃ saṃkṣepataḥ yatra pratimā svayaṃ vā pratikṛtiṃ kṛtvā krodharājānaṃ yamāntakaṃ tāvajjapedyāvat pratibimbaṃ prakampya pracalate prasvidyati vā / ayaṃ svarūpeṇāgacchante / yaducyate tat sarvaṃ sampādayante //
evaṃ yāpi tāḥ catuḥkumāryaḥ mahāyakṣiṇyaḥ bhrātuḥ tumburusametā divyarūpiṇyaḥ amburāśisamāśritāḥ nauyānasamārūḍhāḥ sarvalo(ka)supūjitā sattvānugrahakārikāḥ teṣāmapyeṣa eva vidhiḥ / yaduta
paṭabhittiphalake samākīrṇo likhitāpi vā /
nauyānasamārūḍhā bhrāturjyeṣṭhānuneyikā // Mmk_52.[7].1 //
ambudhe antargatā kanyā caturevasamānugā /
teṣāṃ pracchannataḥ sthāpya krodhaṃ jāpya samārabhet // Mmk_52.[7].2 //
calaḥ kampaḥ tathā svedaḥ jāyateṣu ca sarvataḥ /
tataḥ siddhā iti jñātvā mantrajāpī japaṃ tyajet // Mmk_52.[7].3 //
svarūpeṇaiva rātryante kathayanti śubhāśubham /
sarvathā sādhakā te vai bhavante ha sajāpine // Mmk_52.[7].4 //
sarvaṃ kurvanti ājñaptāḥ krodhamākṛṣṭamūrcchitāḥ /
somādyairgrahavarairnityaṃ ṛṣibhiḥ rākṣasaistathā // Mmk_52.[7].5 //
piśācairgaruḍaiścāpi supūjitā te maharddhikāḥ /
maheśvarādyaistathābhūtaiḥ pūjitā te maharddhikāḥ // Mmk_52.[7].6 //
etaiśca bhāṣitā kalpā mantratantrāḥ savistarāḥ /
te tu sarve prayoktavyā sakalpā kalpavistarāḥ // Mmk_52.[7].7 //
sarve te krodharājasya vaśe tiṣṭhantyayatnataḥ /
yāvanti kecinmantrā vai ucchuṣyā kaśmalodbhavāḥ // Mmk_52.[7].8 //
sarve te krodharājasya niyuktā te prakāśitā /
āryā ye ca mantrā vai viśiṣṭā sarvatogatāḥ // Mmk_52.[7].9 //
utkṛṣṭāḥ pravarā hyagrāḥ bhāṣitā jinavaraistathā /
tathā mantradhare mantrā mayā caiva prabhāṣitā // Mmk_52.[7].10 //
ye cānye mantramukhyāstu kuleṣveva hi pañcasu /
bhāṣitā jinaputraistu laukikāścāpi maharddhikā // Mmk_52.[7].11 //
sarvāṃstāṃ samākṛṣya krodharājo maharddhikaḥ /
sarveṣāṃ mantratantrāstranibaddhāste iha śāsane // Mmk_52.[7].12 //
yo yeṣāṃ vidhirākhyātaḥ tenaivāyaṃ niyojitaḥ /
krodharājā yamāntastu utkṛṣṭaḥ sarvakarmikaḥ // Mmk_52.[7].13 //
tārāṃ ca bhṛkuṭī caiva tathā paṇḍaravāsinīm /
mahāśvetāṃ tathā vidyāṃ māmakyāṃ kuliśodbhavām // Mmk_52.[7].14 //
uṣṇīṣaprabhāṃ sarvalocanāṃ caiva devatām /
sarvāṃ tathāgatiṃ vidyāṃ mañjughoṣaṃ ca dhīmatam // Mmk_52.[7].15 //
mahāsthāmaṃ samantaṃ ca tathā padmavaraṃ prabhum /
yayāpi loke yakṣeśaṃ bodhisattvaṃ maharddhikam // Mmk_52.[7].16 //
yaduktaṃ jinaputraṃ tu sarvāṅgaṃ lokaviśrutam /
vajrasenaṃ suṣeṇaṃ ca matsutāṃ cāpi dhīmatām // Mmk_52.[7].17 //
mayā ye bhāṣitā mantrā nāvajñāṃ kārayejjapī /
te sarvā pūjayennityaṃ alaṅghyāsteṣu bhāṣitā // Mmk_52.[7].18 //
na japī yojayet tatra krodharājaṃ supūjitam /
vidyācchedaṃ na kurvīta teṣu mantreṣu sarvadā // Mmk_52.[7].19 //
sarvāṃścaiva yathā karmāṃ laukikāṃ mantradevatām /
umāśaṅkarabrahmādyāṃ hariṃ cāpi supūjitam // Mmk_52.[7].20 //
yathā tantreṣu mantrāṇāṃ sarveṣveva tathā kṛtā /
sarvaṃ ca sarvato mantrāṃ sarvaṃ caiva samārabhet /
sarvamantrapravṛttistu dṛśyate krodhasambhavā // Mmk_52.[7].21 //
eṣa mantro mahākrodhaḥ yamānto nāma nāmataḥ /
ākṛṣya ghātayet kṣipraṃ yamasyāpi mahātmane // Mmk_52.[7].22 //
vaivasvataṃ kṛtāntaṃ vai śakraścāpi mahātmanaḥ /
ākṛṣṭā vasitā ghīrā durdāntadamako prabhuḥ // Mmk_52.[7].23 //
eṣa mantro mahāmantraḥ kathito mañjubhāṇinā /
sarvakarmakaraḥ krūraḥ sarvamantraprasādhakaḥ // Mmk_52.[7].24 //
ityevamuktvā tataḥ śrīmāṃ vajrapāṇirmaharddhikaḥ /
praṇamya buddhaṃ mahāvīraṃ śākyasiṃhaṃ narottamam /
mantraṃ ca kāśrito vajrī mantraṃ bhāṣe maharddhikam // Mmk_52.[7].25 //
śṛṇvantu sarve sattvā vai sarvabhūtagaṇāḥ śubhāḥ /
sarvamaitragaṇādhyakṣā bhāṣe 'haṃ mantramuttamam // Mmk_52.[7].26 //
bhāṣitaṃ bodhisattvena mañjughoṣeṇa dhīmatā /
durdāntadamakaṃ ghoraṃ sarvaduṣṭanivāraṇam // Mmk_52.[7].27 //
vineyārthaṃ tu sattvānā bodhisattvena bhāṣitam /
ahaṃ ca bhāṣahe hyatra parṣanmadhye sudāruṇam // Mmk_52.[7].28 //
namaḥ samantabuddhānāṃ abhāvasvabhāvasamudgatānām / namaḥ pratyekabuddhāryaśrāvakāṇāṃ namo bodhisattvānāṃ daśabhūmipratiṣṭhiteśvarāṇāṃ bodhisattvānāṃ mahāsattvānām / tadyathā - om kha kha ( Vaidya 450 ) khāhi khāhi duṣṭasattvadamaka asimusalapāśaparaśuhasta caturbhuja caturmukha ṣaṭcaraṇa gaccha gaccha mahāvighnaghātaka vikṛtānana sarvabhūtabhayaṅkara aṭṭahāsanādine vyāghracarmanivasana kuru kuru sarvakarmāṃ cchinda cchinda sarvamantrāṃ ākarṣākarṣaya sarvabhūtāṃ nirmatha nirmatha sarvaduṣṭāṃ praveśaya praveśaya maṇḍalamadhye vaivasvatajīvitāntakara kuru kuru mama kāryaṃ daha daha paca paca mā vilamba mā vilamba samayamanusmara hūṃ hūṃ phaṭ phaṭ sphoṭaya sphoṭaya sarvāśāpāripūraka he bhagavaṃ kiṃ cirāyasi mama sarvārthaṃ sādhaya svāhā //

eṣa saḥ mārṣāḥ sarvadevagaṇāḥ yamāntako nāma krodharājā yamarājānamapyānayati ghātayati śoṣayati pācayati damayati / evaṃ sarvamantrāṃ sarvadevāṃ kiṃ punarmānuṣaṃ prati duḥkhitam / daśabhūmipratiṣṭhitāmapi bodhisattvānānayati / kiṃ punarlaukikāṃ mantrām / evamaparimitabalaparākramo 'yaṃ krodharājā / evaṃ sarvamantratantrabhāṣiteṣvapi sarvakarmāṇi kurute / sarvamantrāṇā yathā yathā prayujyate tathā tathā karoti / paṭhitasiddha eṣa krodharājā yamāntako nāma parisamāpta iti //
āryamañjuśrīmūlakalpād bodhisattvapiṭakāvataṃsakānmahāyānavaipulyasūtrāt pañcāśatimaḥ yamāntakakrodharājāsarvavidhiniyamaḥ tṛtīyaḥ paṭalavisaraḥ parisamāpta iti //
namo buddhāya / samāptaṃ ca yamāntakasya krodharājasya kalpamiti //
Atha tripañcāśaḥ paṭalavisaraḥ /
atha khalu bhagavāṃ śākyamuniḥ tasmāt samādhervyutthāya mahāsāgaropamāyāṃ parṣanmaṇḍalaṃ dharmaṃ deśayamānaḥ sarvasattvānāṃ sarvabhūtagaṇānāmagrataḥ sanniṣaṇṇāḥ tatra vajrapāṇipramukhānāmanekabodhisattvasaṅkhyeyasahasrāṃ śāriputrapramukhāṃ anekāsaṅkheyārhatsahasrāṃ vaiśravaṇapramukhāṃ asaṅkhyeyārcacāturmahārājikadevaputrāṃ śakrapramukhāṃ trāyastriṃśāṃ asaṅkhyeyadevaputrāṃ suyāmasantuṣitanirmāṇaratiparanirmitavaśavartibrahmakāyikabrahmapurohitamahābrahmaparīttābhāpramāṇābhāsvarairyāvat puṇyaprasavā bṛhatphalā tṛhātapākaniṣṭhā devānāmantrayate sma / śṛṇvantu bhavanto devasaṅghāḥ sarva bodhisattvāryaśrāvakāḥ
anityāḥ sarvasaṃskārā utpādavyayadharmiṇaḥ /
utpadya hi niruddhyante teṣāṃ vyupaśamaḥ sukham

avidyāprabhāvāḥ sarve utpadyante sahetukāḥ /
sahetuṃ duḥkhamūlaṃ tu skandhā hyuktāḥ samodayāḥ

teṣāṃ nirodhinī vidyā sukhahetusukhakriyām /
duḥkhaprahāṇamityuktaṃ saṃkṣepeṇa nivāraṇā

tadeva trividhaṃ yānaṃ nirdiṣṭaṃ ca mayā iha /
anityaduḥkhamānātmāno kṣaṇikaṃ sarvasaṃskṛtam

śūnyaṃ sadā sarvadā sarvaṃ nirdiṣṭaṃ bhavabandhanam /
tadvirāgā tridhā yānti ye sattvā gotranisṛtā

bodhisattvāstadā buddhā pratyekāṃ bodhiniśritām /
tathā parehyaharahanno vītarāgā maharddhikā

śrāvakīṃ bodhinisṛtya tridhā śāntigatā hi te /
eṣa dharmo samāsena nirdiṣṭo me śubhāśubham

aśubhaṃ varjayennityaṃ sarvadā śubhamācaret /
ahiṃsāṃ sarvabhūtānāṃ yathā dharmo prakāśitaḥ

eka eva bhavenmārga dharmāṇāṃ gatipañcake /
anāśravaśca yo dharmo bhūtakoṭisamāśṛtaḥ

sa eṣa kathito mārgaḥ ādibuddhaiḥ purātanaiḥ /
mayāpi kathitaṃ sarvaṃ śāntanirvāṇagāminam

dharmakoṭiṃ samāsṛtya bhūtakoṭiṃ tu labhyate /
akoṭī sarvadharmāṇāṃ bhūtakoṭimudāhṛtā

eṣa dharmaḥ samāsena dvividhaiva prakāśitam /
śṛṇvantu sarve devā vai bodhisattvā maharddhikāḥ

arhantaḥ śrāvakā mahyaṃ nirvāṇaṃ me yadā bhuvi /
abhūt sālavane madhye himavatkukṣisambhave

nadyāṃ hiraṇyavatyāyāṃ mallānāmupavartate /
yamakaśālakavane madhye nirvāṇaṃ me bhaviṣyati

yāvat saṃjñī tathā nagare caitye makuṭavardhane /
nadītīre sadā ramye nirvāṇaṃ me tadā bhuvi

sarve vai bodhisattvāstu śrāvakāśca maharddhikāḥ /
devā nāgā tathā yakṣā lokapālā maharddhikā

śakrabrahmasuyāmāśca akaniṣṭhādyāstathā pare /
sarveṣāṃ sannipātā vai tasmiṃ sthāne bhaviṣyati

yamakaśālakavane tatra mallānāmupadartate /
gaṅgāyāmuttare tīre mahānadyāstathā pare

himādrerdakṣiṇe bhāge abhūt sālavane vane /
apaścime me tathā śayyā tasmiṃ sthāne bhaviṣyati

nadyā tīre tathā ramye hiraṇyākhye śubhe taṭe /
sarvadevasaṅghādyāṃ sannipāto bhaviṣyati

manujaiḥ nṛpavaraiḥ sarvai manuṣyāmanuṣyasambhavaiḥ /
sarvabhūtaistathā martyai bāliśābāliśaistadā

mahotsavamahotsāhaṃ tasmiṃ sthāne samāgamam /
kṛtamantramahaṃ divyaṃ maccharīre tu sāmiṣe

nirāmiṣaṃ tu tadā sthāpya śāntimāpnoti nirvṛtim /
dharmakoṭiṃ parityajya bhūtakoṭiṃ tu saṃviśet

apaścimā me tathā jātiḥ nagare kapilavāstuke /
śākyānāṃ ca kule mukhye jāto 'haṃ bhavacārake

tato 'haṃ tyajya duḥkhātmyaṃ niryāto 'haṃ gṛhāttathā /
bahutīrthāṃ tathā sevya na ca prāpto mṛtaḥ punaḥ

duḥkaraṃ ca mayā cīrṇaṃ kāyaṃ santāpya taścainam /
ṣaḍābdamuṣitaḥ bhraṣṭadehaṃ vāpi viśuṣkataḥ

na ca kiñcinmayā labdhaṃ yena jñānamavāvṛtam /
tatotthāya mayā tatra āhāraṃ kṛtha śubhodanam

devatāsūcitaṃ mārgaṃ gato 'haṃ tatra bhūtalam /
nadyā nairañjanātīre vṛkṣarāje suśobhane

nānāpuṣpasamākīrṇe tatheraṇye 'tha bhūtale /
mahāvanaphalopete nānāvṛkṣasamudbhave

mahānadī pariveṣṭyānte tarumūle tato hyaham /
yo svakaṃ dṛṣṭamātraṃ tu bhūbhāgaṃ dhṛtisaṃlabhe

tathaivāhaṃ taṃ taruṃ dṛṣṭvā parṇaśākhopaśobhitam /
mahāvṛkṣaṃ mahācchāyaṃ mūlagūḍhopaśobhitam

aśvatthe 'śvatthatāṃ gacchet tarumūle niṣadya vai /
dhṛtiṃ tatrābhivindāmi dhyānaṃ cāpi samādhikam /
prāptaṃ tatra anāśāṃ vai rātryante jātirantakam

māreṇa bahudhā vighnā anekākārasuyojitāḥ /
bhagnasainyaparāvṛtya gato 'sau svabhavanaṃ punaḥ

tadarthe mantratantrā vai bhāṣitā bahudhā punaḥ /
anekākāraprayogāśca dhyānā jñānāśca bhāṣitāḥ

tridhā yānaṃ punastatra caritaṃ sarvasevitam /
pratipakṣā hi doṣāṇāṃ tridhā caiva prakāśitaḥ

tatotthāya punargatvā burubilvāṃ śubhodakām /
snātvāmbhase tatra ṛṣiṃ pravrajya saśiṣyakām

sattvārthaṃ bahudhā kṛtvā prakrānto 'haṃ tataḥ punaḥ /
punaḥ kāśipurīramyāṃ anupūrvyā samāviśet

tatra sthāne tu gatvā vai parā buddhā maharddhikāḥ /
tatrāhaṃ sthito deśe jane kāśijane svayam /
pravartya cakraṃ sādharmyaśāntiṃ nirvāṇakārakam

sasurāsuralokānāṃ gatiṃ pañcāsunisṛtām /
sarvabhūtasukhārthāya tatra dharma prakāśitaḥ

ādibuddhaiḥ purā tatra dharmacakraṃ pravartitam /
mayāpi diśi tatra dharmacakro hyanuttaraḥ

bhavamuktisukhārthāya sattvadoṣanivāraṇā /
pravarttya cakraṃ brāhmāṃ vai kṣemaṃ śāntaparāyaṇam

bhavamārgavināśārthaṃ catuḥsatyasamādhijam /
āryāṣṭāṅgikaṃ mārgaṃ caturbrāhmavibhūṣitam

sapratītya samutpādaṃ dvādaśākārakāritam /
avidyānirodhasaṃyuktaṃ vidyāmutpādanemijam

bhrāmitā koṭitatthyaṃ vai bhūtakoṭisukoṭijam /
anulomavilomābhyāṃ gatimāhātmanemijam

sampradeśaśivaṃ cakraṃ bahusattvā vimokṣa ca /
vimuñcya kāśipurīṃ ramyāṃ śrāvastyāhaṃ tadā game

tīrthikānāṃ tathā varjyā prātihāryairvikurvataiḥ /
śaṅkaśye tathā kṛtvā ṛddhirjanapade tadā

bahutīrthāyatanāṃ sthānāṃ sampratoṣya tadā punaḥ /
agnibhāṇḍe jane kṛtvā devāvataraṇaṃ śubham

trāyastriṃśeṣu deveṣu śakrasaṃyojya dharmatām /
akaniṣṭhādyāṃ tathā devāṃ brahmādīśapurandarām

savaiśravaṇayakṣendrāṃ caturmahārājakāyikāṃ sadā /
mattākaropamāṇāśca trivīṇāṃ māladhāriṇām

devāṃ yaṇagaṇāṃ sarvāṃ bhaumāṃ divyāntarīkṣakām /
āryāṃ yathagaṇādhyakṣāṃ sarvāṃścaiva surāsurām

kṛtvā dharmaphale yuktāṃ nirvāṇānugasatrivām /
śreyasaiva tadā yojyā bahuprāṇāmacittakām

asaṅkhyā gaṇanā teṣāṃ saṃsārāntādanantakām /
mahāsāhasralokānāṃ dhātvādhyāmacittakām

bahu sarvaṃ sadā satye bhūtārthe sanniyojya vai /
ihāhamāgatastatra śuddhāvāsopari sthitaḥ

pravartya mantrasaddharmatridhāyānasamānugam /
sattvānāṃ vinayamāgamya kalparājamidaṃ punaḥ /
prakāśye bahudhā loke mañjughoṣasya dattavāṃ

nirvṛte tu mayā loke śūnyībhūte mahītale /
mañjuśriyo 'tha sattvānāṃ buddhakṛtyaṃ kariṣyati

ārakṣaṇārthaṃ saddharmāṃ jinendrāṇāṃ parinirvṛtā /
satatā rakṣaṇā nityaṃ mañjughoṣo bhaviṣyati

mantraprabhāvanārthaṃ tu kathitaṃ kalpavistaram /
tasmiṃ kāle yugānte vai mahāghore sudāruṇe

narādhipā mahākrirā parasparavadhe ratāḥ /
pāpakarmā durācārā alpabhogā tadā yuge /
bhaviṣyanti na sandeho tasmiṃ kāle yugādhame

mamāgamya ca pūjārthaṃ abhūt sālavane vane /
nadīhiraṇyāvatītīre caitye makuṭabandhane

parinirvṛte śayānaṃ me śāntadhātusamāsṛte /
citāmaropite dehe sambhoge bhogavarjite

dṛṣṭveva tat purā karmaṃ māmebādbhutaceṣṭitam /
mayaiva vinayatāgamye buddhavaineyaceṣṭite

caritaṃ taṃ śubhaṃ citraṃ smṛtvā sarve narādhipāḥ /
sarve pūjāṃ kariṣyanti sadevāsuramānuṣāḥ

samāgatyatha bhūpālāḥ sarve pūjāmahotsavām /
kariṣyanti na sandehaḥ tasmiṃ kāle mamāntike

citāmāropite dehe sāmiṣe guṇamudbhave /
aśubhānte śubhe caiva sarve puṇyavivarjite /
bhūtakoṭyo 'tha śūnyāste pañcaskandhasamodaye

bahusattvā tu taṃ dṛṣṭvā mahāpuṇyārthe tu yojitā /
mahāśrāvakā mahātmānaḥ vītarāgā maharddhikā /
bodhisattvāstu sarve vai daśabhūmisamāśṛtā

parivārya sthitā sarve sarve caivānukampakā /
sarve vai devasaṅghāstu āryā sapṛthagjanā

sarve caitaṃ mahāpuṇyaṃ sthānaṃ caikatra māśritam /
cittaprasādaṃ pratilebhe 'nityaduḥkhārthamāśrayam

sarve bhūtagaṇā tasthuḥ caityānte 'pi samīpataḥ /
pūjāṃ ca mahatīṃ cakre cucukrośa rurodanam

mumucuḥ sāśrubindūni sabāṣpāṇi karuṇeritām /
evaṃ ca krośire sarve anityaṃ duḥkhaśūnyatām /
dharmaṃ dideśitavāṃ buddhaḥ sāmprate 'tha mahītale

saivādya munivarāḥ śreṣṭhaḥ saptamo ṛṣipuṅgavaḥ /
śākyajaḥ sarvasattvāgryo darśanaṃ tasya apaścimam

sa eṣa bhagavāṃ śete anityaduḥkhābhibhāṣiṇaḥ /
śūnyaparamārthamākhyāyī ādiśāntārthabhāṣiṇaḥ /
kimarthaṃ devasaṅghā bho na prabodhayata taṃ prabhum

āgatā iha sarve vai buddhaputrā maharddhikā /
dharmārthikā mahāvīrā śrāvakāśca maharddhikā

sarve vai duḥkhitā sattvā mānuṣāśca surāsurāḥ /
samayo vartate hyatra dharmacakrānuvartane

utthātu bhagavāṃ kṣipraṃ buddhavelānuvartaneḥ /
mahāsāgare cale vollaṅghyā munitadgataiḥ

na cāvamanyāṃ bahūṃ sattvāṃ cirakālaṃ samobhije /
dhyānaṃ vimokṣa saṃsestu śāntanirvāṇamārge

niṣeptuṃ vā bhūtato muniḥ ............ /
evamprakāraṃ hyanekāṃ bahupralāpāṃ pralapavaṃcūre

tūṣṇīmbhūtātha sarve vai devasaṅghā maharddhikā /
ākrandamatulaṃ kṛtvā sapraṇāmā tatasthire

cakūcu viraḥ mutkośya sāśrukaṇṭhā sagadgadā /
saśokācittamanaso brahmādyāḥ sasurāsurāḥ /
manujā narādhipāḥ sarve niṣaṇṇāstatra mahītale

aparaḥ śākyajo muktaḥ vītarāgo maharddhikaḥ /
jñānino devadevasya buddhasyaiva mahātmane

aniruddho nāmato bhikṣuḥ anujo 'sau manujaḥ śubhaḥ /
susūkṣma nipuṇo vyaktaḥ gītanītiviśāradaḥ /
parivārito rahamukhyaistu anekaiścāpi narādhipaiḥ

sa bhāṣe madhurāṃ vācāṃ niśvasantaḥ suceritām /
karuṇārdracetasāṃ kṣiptāṃ mallānāṃ sanarādhipām

mā tāvanmārṣāṃ hyatra citāvagniṃ pradāyatha /
yāvad bhagavataḥ putraḥ agrato dharmatodbhavaḥ

mahākāśyapanāmena śrāvako 'sau maharddhikaḥ /
mahāmune hyagradhījātabrāhmaṇo 'sau nirāmiṣaḥ

magadhānāṃ jane jātaḥ parvate tatra samāhitaḥ /
tiṣṭhate grahapippale nagare rājagṛhe vare

sa evāgamanaṃ kṣipraṃ kariṣyati na cānyathā /
yā tatra devatābhaktā sa ceholkāṃ nivārayet

mā tāvaccitisandīpaṃ kariṣyatha vṛthā śramam /
yāvat so maharddhiko hyagraḥ śrāvako muninaurasaḥ

pradakṣiṇīkṛtya gurave buddhastrailokyapūjite /
mūrdhnā praṇamya pādau śāstuno lokapūjitau

tadāyaṃ citidīpārthaṃ sarve tatra kariṣyatha /
ādīptā caityabhūtād bhaviṣyati tadā imā

sarve mā vṛthā kurvaṃ śramaṃ kevala bho iha /
evamuktāstu te sarve aniruddhena dhīmatā /
niṣaṇṇā sarvamallāstu mānuṣāste sanarādhipāḥ

mānuṣāṇāmutpanno 'haṃ mānuṣaiścāpi vardhitaḥ /
bhogairbahuvidhā cānyaiḥ kalāśilpaśubhodayaiḥ

manuṣyāṇāṃ bodhilabdhā me tarumūle mahītale /
manuṣyāṇāṃ dharmanirdiṣṭaḥ sarvasattvopakārakam

ata eva manuṣyāṇāṃ citā dīpārthayojitā /
manuṣyo 'haṃ sarvabhūtānāṃ agryatvaṃ ca samāgataḥ /
manuṣyaloke ca śānti me parinirvāṇaṃ tu kalpitam

ye kecit sarvabuddhā vai atītānāgatavartinā /
sarve vai manuṣyalokre 'smiṃ manuṣyā dehamudbhavā

jātibodhi tathā cakraṃ sādharmyaṃ carituṃ śubham /
śāntiṃ samāviśet sarve pratyekāmarhatāstridhā /
mānuṣīṃ tanumāśṛtya gatā śāntimanuttarām

upakāraṃ mayā teṣu kṛtaṃ kalpāmacintikām /
āpaścimaṃ mayā śānte śītībhūte nirodaye /
sthāpitā dhātavastatra śūnyībhūte mahītale

manuṣyāṇāṃ hitārthāya pūjānugrahakāmyayā /
sasurāsuralokānāṃ ṛṣiyakṣagarutmatām

rākṣasāṃ pretakūśmāṇḍāṃ piśācāṃ pretamaharddhikām /
sarvāṃścaiva bhūtānāṃ sagrahāścaiva mātarān

sarvāṃścaiva tathā lokāṃ dhātvācintyāmasaṅkhyakām /
sarvaprāṇibhṛtāṃścaiva pūjanārthāya dhātavaḥ /
sthāpitā te tadā kāle śūnyībhūte mahītale

keci dravyāgataiḥ martyaiḥ devarājaiśca cāparaiḥ /
pātālavāsibhiścānyaiḥ dānavendrairmaharddhikaiḥ /
nāgarājaistathā daityaiḥ dhātavo me pṛthak pṛthak

apahṛtya hṛtārthā ye guṇavanto 'tha maharddhikāḥ /
kariṣyanti tadā pūjāṃ nītvā svabhavanaṃ punaḥ

bhaviṣyanti na sandehaḥ sarvabuddhā maharddhikāḥ /
uttamādhamamadhyasthā tridhā cittaprasādataḥ

bhaviṣyanti te tridhā loke buddhakhaḍgararhadgatā /
tridhā yānaṃ tathā loke triprakāraṃ samoditam

mahāyānānuvarṇinaṃ mārgaṃ tatkarmāśṛtanirgatā /
bhaviṣyanti tadā loke pratyekāṃ bodhiniḥśritām

śrāvakāśca pare tatra vītarāgamaharddhikā /
bhaviṣyanti tadā loke tridhā gotravibhūṣitā

mahīpālā mahābhogā mahāsaumyātha cakriṇāḥ /
divyāṃ mānuṣasampattīḥ anubhūya ciraṃ tadā /
kālamāsādya ante vai tridhā śāntiṃ gatā hi te

ādimadbhiḥ purā buddhaiḥ varttamānairhyanāgataiḥ /
sarveṣāṃ eṣa mārgo vai yathāyaṃ samprakāśitaḥ

tatra nirvāṇabhūmā vai niṣaṇṇāḥ sarvadevatā /
vibhinnamanasodvignāḥ sahagadnadabhāṣiṇaḥ

evamāha tadā sarve aho kaṣṭaṃ hyanityatā /
buddhamaharddhikā loke parinirvāṇāsṛtāpi te

evamuktāstu te sarve devarājā maharddhikā /
........ tūṣṇīmbhūtātha tasthire

māgadhānāṃ jane śreṣṭhe kuśāgrapurivāsinām /
parvataṃ tatsamīpaṃ tu vārāhaṃ nāma nāmataḥ /
tatrāsau dhyāyate bhikṣuḥ guhālīno 'tha paipale

śrāvako me suto hyagraḥ auraso dharmatodbhavaḥ /
mahākāśyapanāmāsau niṣaṇṇo guhavare tadā

piṇḍapātaṃ tadā bhuktvā niṣaṇṇaścintayet svayam /
bahukālaṃ mayā buddho vandito 'sau mahāmuniḥ /
sāmprataṃ gantumichāmi svayambhuvaṃ taṃ narottamam

kutra vā tiṣṭhate bhagavāṃ śākyato munisattamaḥ /
samanvāharati tatrasthaḥ mahākāśyapaviprarāṭ

evaṃ samanvāhṛtavāṃ nuṃ cittenaiva muninā munim /
divyena cakṣuṣā lokaṃ sarvalokāṃścāvalokayet

akaniṣṭhādyaṃ tathā lokāṃ avabhāsyā lokadhātavaḥ /
sarvāṃ samagrasattvākhyāṃ mahāsāhasrodbhavodbhavām

śrāvakānāṃ gocaraṃ yāvat paśyate divyacakṣuṣā /
śāsanaṃ nirvṛtaṃ śāntaṃ śītībhūtaṃ nirāmiṣam

parivāritaṃ samantād vai devasaṅghaiḥ maharddhikaiḥ /
manujairnarādhipaiścāpi asurairyakṣarākṣasaiḥ /
sarvabhūtagaṇaiścāpi bodhisattvairmaharddhikaiḥ

mahāyaśaiḥ śrāvakaiścāpi prājñaḥ dhūrdharatāṃ gataiḥ /
sarāgairvītarāgaiśca divyāryairmanujaistadā

citāmāropitaṃ vīraṃ buddhamādityabāndhavam /
devadevaṃ tadā śreṣṭhaṃ munīnāṃ sattamaṃ prabhum

parivārita samantād vai bhūpālairdīpavāsibhiḥ /
tṛṇolkairgṛhītasaṃhastaiḥ mallaiścāpi manujeśvaraiḥ

nādīpayituṃ samarthā te devatābhirnivāritā /
vratinā caivamuktena aniruddhenaiva bhikṣuṇā

sāśrukaṇṭhaṃ sa cotkṛṣṭāṃ vighuṣṭāṃścaiva medinīm /
hāhākāraravaṃ ghoraṃ dundubhīnāṃ ca nāditam

divyaṃ ṛṣigaṇākīrṇaṃ apsarāṃ gaṇasaṃstutam /
siddhavidyādharīgītaṃ kinnarodgītaṃ ca tad vanam

madhurākūjitodghuṣṭaṃ pakṣiṇāṃ ruditaṃ śubham /
citraṃ manojñavāditraṃ divyamānuṣyanāditam

apsarāṃ gaṇasaṅgītaṃ siddhavidyādharocitam /
yogibhiḥ sarvataḥ kīrṇaṃ abhūt sālavanaṃ vanam

samantāt parivṛtaṃ śreṣṭhaṃ śayānaṃ munipuṅgavam /
tatordhvaṃ niḥśvasya saśoko vai vītaśoko

aśrubinduṃ pramuñcaṃ vai śramaṇaḥ kāśyapastadā /
agraśrāvako mahyaṃ pṛthivyā māvartate tadā

vācaṃ cābhāṣate kṣipraṃ aho kaṣṭaṃ pravartate /
yatra nāma tathā buddhāḥ parinirvatya nāśravāḥ

anityaṃ duḥkhaśūnyaṃ tu iha tenaiva bhāṣitam /
na dṛṣṭo me śāśvato viśvaṃ anyajanmānuvartinam

tatotthāya tataḥ kṣipraṃ magadhānāṃ nṛpatiṃ vrajet /
ajātaśatruṃ duḥkhārttaṃ pitṛśokasamarpitam

gṛhaṃ tasya tadā gatvā tamuvāca narādhipam /
nirvṛto 'sau mahārāja sambuddho dvipadottamaḥ

kṣipra yojaya mānaṃ tu gacchāmo śāstumantikam /
dharaṇisthaṃ śayānaṃ vai nirjvaraṃ gatacetasam /
sarvavairabhayātītaṃ sambhogyaṃ kāyasaptamam

śrutvā tadvacanaṃ krūraṃ suduḥkhī sau nṛpatiḥ punaḥ /
antaḥ pralāpaṃ krandantaḥ vācāṃ bhāṣe tadā nṛpa

ubhābhyāmapi bhraṣṭo 'haṃ śāstuno pitarasya ca /
sarvairbāndhavai tyaktvā aviśvāsyo 'haṃ tathā jane /
patito 'haṃ ghoranarakaṃ kaḥ śaraṇyaṃ vṛṇomyaham

paritrāyasva mahāvīra śrāvakaḥ śāstumagrakaḥ /
mahākāśyapo mahātejā nāsti me jīvitaṃ iha

ityevamuktvā tu nṛpo mukhyo māgadhānāṃ narādhipaḥ /
prapatitaḥ tatkṣaṇāmurvyāṃ agraśrāvakapādayoḥ /
niśceṣṭo mūrcchitastatra sahasā śayate mahīm

tvaṃ kumāra tadā kālaṃ mañjughoṣa maharddhika /
samantād vicarase lokāṃ sattvānugrahakāmyayā

citāmāropite dehe mama sthāne vane tadā /
mantra tvaṃ niṣaṇṇo 'bhūd bodhisattvagaṇāvṛtaḥ

maccharīraṃ hi pūjārthaṃ tvayā kṛtveha mahītale /
samantādālokayase bhūtāṃ ko hi duḥkhī kamuddharet

ityahaṃ patito bhūmau kumāro gambhīratathyadhīḥ /
mañjuśriyā tha tvayāvaśya bhūpālasyātiduḥkhite

tatrastho 'pi tvayā tasya tvayaiva vinayino 'sau /
bodhisattvāvagamyo yo na tacchakyaṃ maharddhikaiḥ /
daivatai ṛṣibhiścānyaiḥ pratyekārhaśrāvakaiḥ /
tatrasthaḥ svapnavatpaśyenmañjughoṣaṃ narādhipam

tvayaiva ṛddhimāviṣṭaḥ sa rājā śokamūrcchitaḥ /
paśyate 'sau tadā svapne pratyakṣaṃ ca bālinam /
kumāraṃ viśvamātmānaṃ mañjughoṣa maharddhikam

vikurvantaṃ tathā dharmaṃ bodhisattvaṃ sabālakam /
vicitraṃ acintyatāṃ ṛddhiṃ mañjuśrīḥ tvatprasādataḥ

avīcigamanaṃ nṛpateḥ utthānaṃ ca sattvaram /
vividhāṃ dharmatāṃścaiva apāyaṃ nāśaśobhanam

gatimāhātmyaguṇāṃścaiva sarvaśrāvakavarjitām /
vistareṇa tataḥ kṛtvā sūtrakau kṛtyanāśanam

ajātaśatrornṛpateḥ vinodaṃ cātivistaram /
samāsena idaṃ proktaṃ vistarārthārthabhūṣitam

vacanaṃ sarvabuddhānāṃ ādimadhyāvasāyinām /
sarvasattvahitārthāya bhāṣitaḥ kalpavistaraḥ

tvaṃ kumāra tadā kāle mañjuśrīrvaca sarvataḥ /
vineṣyasi mahīpālāṃ pāpakarmānuvartinām

acintyaṃ te ṛddhiviṣayaṃ vineyaṃ vāpi acintitam /
sarvabhūtagaṇāṃścaiva tvaṃ vinetā bhaviṣyasi

ityevamuktvā mahāvīro buddhānāṃ ca mahādyutim /
mañjughoṣaṃ tadā kāle śuddhāvāsoparisthitam /
uvāca vadatāṃ śreṣṭhaḥ sambuddho dvipadottamaḥ

bhaviṣyasi tvaṃ sambuddhaḥ bahukalpābhinirgataiḥ /
acintyairgaṇanāsaṅkhyairmānuṣairgaṇanāsamaiḥ /
mañjudhvajo 'tha nāmo vai buddhā loke bhaviṣyasi

buddhakṛtyaṃ tadā kṛtvā anupūrveṇa vo sadā /
vimocyatha bahuṃ sattvāṃ parinirvāṇaṃ te bhaviṣyati

ityukta kumāro vai bālarūpī maharddhikaḥ /
sa dīrghaṃ niḥśvasya saṃvignaḥ karuṇāviṣṭacetasā

ciramālokya sambuddhaṃ sāśrubindūn mumūccacu /
sapraṇāmāñjalipuṭaḥ niṣasāda tataḥ punaḥ

tato kṣmātalādhasthaḥ ajātākhyo nṛpottamaḥ /
praṇamya śirasā vipraṃ mahākāśyapamadbhutam

vibuddhaścetanāyātaṃ pādau bandya agraṇaḥ /
niḥśvasya ca ciraṃ kālaṃ vistarārthaṃ nivedya ca

niṣaṇṇo nṛpateḥ putraḥ ajātākhyo magadheśvaraḥ /
mahākāśyapaṃ tato vavre gacchāmostaṃ citālayam

pūjitaṃ caityabimbasthaṃ upakārārhamānuṣām /
tatrasthaḥ śrāvako hyagraḥ ṛddhyā caivamupāgamam

tasyotvahṛte cittaṃ ayuktaṃ mama ṛddhiye /
padbhyāṃ gantumicchāmi mahācaittaṃ samāgamam

apaścime gatiḥ śāstuḥ darśanārthaṃ tu māgamam /
tato 'rdhapathe tasthuḥ saṅghārāte tu sa vratī

yāvat paśyate tatra saṅghārāmanivāsinam /
mahallaṃ bhikṣunavakamumāyasattvaṃ vimohitam

sa dṛṣṭvā upasaṅkrānta mahallo taṃ ciroṣiṇam /
maheśākhyaṃ mahābhāgaṃ śuddhasattvanirāmayam

upasaṅkramya taṃ vipraṃ vanditvā pādayostadā /
uvāca taṃ mahābhāgaṃ svāgataṃ te kimāgatam

kutra vā yāsyate kṣipraṃ udvigno vā kiṃ vatiṣṭhase /
uvāca so taṃ ṛṣiṃ taṃ bālaṃ āyuṣmaṃ na śrutaṃ tvayā

śāstā vai sarvalokasya sambuddho dvipadottamaḥ /
pitā me agradhīḥ buddhaḥ pradīpārciriva nirvṛtaḥ

astaṃ gato mahāvīraḥ śūnyībhūtā hi medinī /
sarvaśūnyāstathā lokāḥ śūnyā bhūtāśca me diśāḥ

tataḥ prahṛṣṭo mahallo 'sau viparīto bālacetanaḥ /
prasahya vacanaṃ cāha nirvṛto 'sau pradīrghakaḥ

pralambabāhuratyuccacchatrākārasamaśiraḥ /
asmākaṃ nāyako hyagraḥ śikṣāśikṣasuvartinaḥ

yatheṣṭaṃ vicariṣyāmi sāmprataṃ tena nirvṛte /
ityevamukto mahallena prahṛṣṭo 'sau maharddhikaḥ

bhṛkuṭiṃ kṛtvā tato vaktre huṅkāro 'sau prayojayet /
ruruṣya tatkṣaṇād vipraḥ bāsanābhāvito yatiḥ

hanyānmahītale tatra pādāṅguṣṭhena tatkṣaṇāt /
sarvaṃ pracalitā urvī parvatoccāḥ samo ravaḥ

kṣubhitāḥ sāgarāḥ sarve sarve vṛkṣāśca parvatāḥ /
kandarā guhavinyastā nāgarājāśca devatā

naṣṭā lokā mahī tasmiṃ kāle candrabhāskarau /
nivātā vā tatastasthuḥ ulkāścāpi papeture

tato 'sau mantramiti khyātaḥ śrāvakāṇāṃ kulodbhavam /
ekākṣaraḥ sahuṅkāraḥ sarvakarmakaraḥ śubhaḥ

asādhito 'pi karotyeṣa jāpamātreṇa mantrarāṭ /
sarvaśastraṃstathā stambhaṃ viṣaṃ sthāvarajaṅgamam

sarveṣāṃduṣṭasattvānāṃ jāpamātreṇa stambhanaḥ /
karoti karmavaicitryaṃ anyāṃścaiva viśeṣataḥ

prapalāno mahallakastatra tūṣṇīmbhūto hyato gataḥ /
ṛddhyā cāvarjitastena vinayitvā ca tatkṣaṇāt

śrāvakeṇa tadrāgreṇa nīto 'sau citisannidhau /
padbhyāṃ gato hi so bhikṣuḥ vītarāgo maharddhikaḥ

gatvāsau paśyate tatra munino dehacitāśritām /
anekadhā daivasaṅghaistu mahāpūjāṃ pravartitām /
vividhākāravaropetāṃ sarvākārasubhūṣitām

citāmāropitaṃ dehaṃ munino gautamasya vai /
dṛṣṭvā tu taṃ mahābhāgaṃ mahākāśyapamadbhutam

sarve te vītadoṣā vai bhikṣavaśca maharddhikāḥ /
sarve devagaṇā bhūtāḥ hāhākāraṃ pramuñcya ca /
ākrandya ca mahacchabdaṃ ravaṃ cāpi suśokajam

pratyudgamya tataḥ sarve devanāgā maharddhikāḥ /
uvāca taṃ mahābhāgaṃ vandasva dvipadottamam

tavaicodīkṣaṇaṃ taṃ viśvā devasaṅghā samānuṣāḥ /
sarve bhūtagaṇāścaiva ṛṣayakṣanarādhipāḥ /
pitādīpanataṃ niṣṭhā aśaktā dīpayituṃ citām

tato 'sau vītadoṣastu mahābhogo maharddhikaḥ /
kṛtvā pradakṣiṇaṃ bāhu bahudhānusmṛtya tathāgatam /
citānte antime bhāge vandate 'sau maharddhikaḥ

āryasīṃ ca tadā droṇīṃ bhitvā pādau vinirgatau /
vanditvā pādayormūrdhnā parāmṛśya punaḥ punaḥ

udvīkṣya bahudhā tatra caraṇau munivare varau /
praviṣṭā bhūyasastatra āyasīṃ droṇimāśritau

niṣaṇṇo 'sau tatotthāya vītarāgo maharddhikaḥ /
parivāro 'tha arhantaiḥ vītarāgairmaharddhibhiḥ

rājā māgadho mukhyaḥ āgato 'sau citāntike /
anupūrvyā tathā yānaiḥ hastyaśvarathavāhanaiḥ

mahāsainyā tha bhūpālāḥ sarve savalavāhanāḥ /
āgatā vandituṃ tatra muniṃ śākyamuniṃ tadā

śayānaṃ bhūtale śānte prānte 'raṇye ......... /
nadyā hiraṇyavatītīre caitye makuṭabandhane

śāntadhātusamāviṣṭe bhūtakoṭisamāsṛte /
māgadho nṛpatistatra mahāsainyasamāgataḥ

so 'pi paśyati taṃ divyaṃ vividhākāraceṣṭitam /
mahānuśaṃsaṃ prabhāvaṃ ca āścaryaṃ bhuvi maṇḍanam

caittadehajaṃ tatra citāmāropitaṃ munim /
ānando nāmato bhikṣuḥ suśaikṣe paricārakaḥ

yameva manujaṃ śreṣṭhaṃ vatsalo me sadā rataḥ /
bhaviṣyati tadā kāle ārtte viklabamānasaḥ

mahākāśyapaṃ tato gatya pādayornipatito bhuvi /
evaṃ covāca duḥkhārtaḥ vepathunte sagadgadaḥ

adya me nirvṛtaḥ śāstā anātho 'haṃ sa sāmpratam /
satimelayanaṃ trāṇaṃ tvameva parikīrttitaḥ

tenaiva municandreṇa vyākṛto 'haṃ tavāntike /
sarvakleśaprahāṇāṃ tu arhatvaṃ tvamantike

rātryāṃ paścime yāme nirdiṣṭaṃ tena jinena vai /
vriyate tubhya nityaṃ vai mayaiva parinirvṛtaḥ

buddha kṛtyārtha tubhyaṃ vai kṛtaṃ tena hitaiṣiṇā /
mayāpi duḥkhitaḥ tyaktvā śāntiyāto mahāmuniḥ

aniruddho nāmato dhīmāṃ samāśvāsayati taṃ yatim /
mā rodantathā śocaṃ mā śokaṃ ca samāviśa /
mā vraja kutra vasthānaṃ etameva samāśraya /
eṣa eva bhavecchāstā nirvṛte lokacakṣuṣe

muninā vyākṛto hyatra buddhakṛtyaṃ kariṣyati /
vayaṃ ca bhavatā sārdhaṃ anuyāsyāma kāśyapam

ṛddhimātraṃ mahābhāgaṃ tejavantaṃ mahādyutim /
dvitīyamiva śāstāraṃ pratibimbaṃ mahītale

mahākāśyapamukhyaṃ tu śrāvakāṇāṃ maharddhikam /
tiṣṭhantaṃ dhriyamāṇaṃ vai mā śokaṃ cettu vai kṛthā

evamālāpinaḥ sarve karuṇāviṣṭā maharddhikā /
vītarāgā mahāyogā muniputrā niṣaṇṇavām

citāmādīpito taistu mallaiścāpi narādhipaiḥ /
ādīpte tu samantā vai bhasmībhūtaṃ tu taṃ citam

taṃ dṛṣṭvā devasaṅghā tu bhogavanto mahoragāḥ /
śāntaye taccitāsthānaṃ candanodakavāriṇā

mahāvarṣaṃ pramuñcantā sthitā bhūyo 'tha tatkṣaṇāt /
mahāpuṣpaughamutsṛjya punareva mahītale

āgatā tatkṣaṇāt sarve jinadhātuṃ supūjanā /
sarve parasparaṃ yuddhaṃ kartumārabdha tatkṣaṇāt

brahmādyā śakrayāmāśca sarvadevagaṇāstathā /
nivāritā vītarāgaistu śrāvakaiśca maharddhikaiḥ

mahākāśyapena vibhajyaṃ vai dhātavo jinamūrtijā /
stokastokāni dattāni pūjanārthāya sarvataḥ /
tridhā yānaparāvṛttiṃ niṣṭhāśānti ca kāraṇāt

mahākāśyapastadā yogī vītarāgo maharddhikaḥ /
cintayāmāsa taṃ bodhyaṃ mahallakasya abhāṣitam /
māhaiva pravacanaṃ kṛtsnaṃ dvādaśāṅgaṃ sukhodayam

sūtravinayābhidharmaṃ vai dhūmakālikatāṃ vrajet /
astaṃ yāte māhavīreṃ vipralopo bhaviṣyati

saṅgātavyamimaṃ kṛtsnaṃ vacanaṃ buddhabhāṣitam /
gacchāmaḥ sahitāḥ sarve vītarāgā maharddhikāḥ /
māgadhānāṃ puraṃ śreṣṭhaṃ rājākhyaṃ nagaraṃ śubham

kuśāgrapure ramye parvate suśiloccaye /
vaiśālyāṃ ca śubhe deśe caitasthāne suśobhane

evamprakārā hyanekāṃśca śāsanārthaṃ tu kāraṇāt /
mallā palāyinaḥ sarve cakrire sa maharddhikā

tasmiṃ kāle yugānte vai astaṃ yāte mayā tu vai /
mahīpālā bhaviṣyanti parasparavidhe ratā

bhikṣavo bahukarmāntā sattvā lobhamūrcchitā /
aśrāddhā yugānte vai upāsakopāsikāstathā /
parasparavadhāsaktāḥ parasparagaveṣiṇaḥ

chidraprahāriṇo nityaṃ savraṇā doṣadastathā /
bhikṣavo hyasaṃyatāstatra munirastaṃ gate yuge

sthāpitā rakṣaṇārthāya śāsanaṃ bhuvi me tadā /
aṣṭau maharddhikā loke vītarāgā nirāśravāḥ

arhantaḥ tadā jyeṣṭhā rāhulādyā prakīrttitā /
teṣāṃ darśanaṃ nāsti tasmiṃ kāle yumādhame

amoghaṃ darśanaṃ teṣāṃ siddhikāle tu mantriṇām /
mayātra sthāpitāḥ sarve ṛddhimantro maharddhikāḥ

praṇihitaṃ mayā teṣāṃ daṇḍakarmamahāyaśām /
ājñollaṅghanaṃ teṣāṃ kiñcicchiṣyā vyatikrame

tiṣṭhadhvaṃ yāvat saddharmaṃ bhūtakoṭiṃ nirāmiṣam /
mama vākyamidaṃ puṇyaṃ yāvad ghuṣyate tale

tataḥ śāntā nirātmanaḥ parinirvātha nirāśravāḥ /
bhaviṣyati tadā kāle śāsanāntarhite munau

bhikṣābhikṣukāḥ sarve bhikṣuṇyaśca sumatsarāḥ /
tarkukāḥ kutsitā nityaṃ paribhūtā tadā yuge

susthitā śāsane mahyaṃ gṛhadāragaveṣiṇaḥ /
upāsakāśca tadā kāle paradārasadāratāḥ sadā

cihnamātraṃ tadā saṃjñā pariśeṣveva caturvidhe /
vairābhyāsaratāḥ sarve parasparaviheṭhakāḥ

tīrthikā krāntabhuyiṣṭhā sarvākrāntā ca medinī /
bhaviṣyanti tadā kāle dvijavarṇaratā janā

mithyācārā tathā mūḍhā prāṇihiṃsāratā narā /
mayā tu parinirvāṇo vyākṛto 'yaṃ kalau yuge

bahunāryā narāścaiva paradāraratāḥ sadā /
akuśaleṣu ratāḥ sarve kuśalārthārthavarjitāḥ /
bahusattvā bhaviṣyanti mayi śāntagate bhuvi

mamaitaccharīrapūjā tu devasaṅghā mahojasā /
manuṣyāścaiva mahātmāno yakṣabhūtagaṇāstathā /
asurā atha gandharvā kinnarāśca maharddhikāḥ

garuḍā atha gandharvā rākṣasā ṛṣayastathā /
siddhā yoginaścaiva ..... mahojasā

vividhākārasattvāstu vividhāṃ gatiyonijāḥ /
bhavasūtranibaddhāstu cchinnabandhanadhīmatā

kariṣyati tadā pūjāṃ śarīre 'smiṃ gatijvare /
nadīhiraṇyavatītīre yamakaśālavane vane

caitye makuṭabandhe tu mallānāmupavartane /
parinirvṛte ca tatrāhaṃ śāntiṃ gacched bhayavarjitām

mamaitad dhātu saṅgṛhya hṛyamāṇaiḥ paraistadā /
devaiśca rasuraiścāpi sarvabhūtagaṇaistathā /
vibhajya sa pṛthag bhāgeṣu vyastaṃ kāritā abhūt

manuṣyarājā mahāsainyaḥ ajātākhyo māgadhastadā /
prarthayāmāsa sarveṣāṃ śrāvakāṃ sumaharddhikām

mamāpyakṛtapuṇyasya piturmaraṇakāriṇaḥ /
abhyuddharatha mahātmānaṃ duḥkhitaṃ patitaṃ tu mām

tato 'gryaḥ śrāvako dhīmāṃ buddhasya sutamaurasaḥ /
mahākāśyapeti vikhyātaḥ prajānāṃ hitakārakaḥ

taṃ tu dṛṣṭvātha vaiklabyaṃ ajātākhyāsya dhīmataḥ /
samanvāharati tatkālaṃ ṛddhyā caivamadhiṣṭhayet

bhāgaikaṃ gṛhṇayāmāsa sadhātūnāṃ jinaniḥśritām /
anyedapahṛtādanyaiḥ bhogibhiśca mahābalaiḥ

anyonyarabhasāt kṣobhaṃ kṛtvā caiva parasparam /
nītvā dhātuṃ tadākāśaiḥ svagṛhaṃ cāpi tasthute

mahākāśyapo tadā bhikṣuḥ agraśrāvakaḥ tadā muniḥ /
cintayāmāsa .........

aho kaṣṭaṃ manuṣyeṣu śūnyo 'yaṃ bhuvi maṇḍale /
buddhaiḥ pratyekabuddhaistu śrāvakaiśca maharddhikaiḥ

ālokahīnā sattvā vai bhavacārakacāriṇā /
te duḥkhāṃ vividhāṃ tīvrāṃ anubhaviṣyati te ciram

dhātuṃ pūjayitvā tu lokanāthasya tāpine /
anubhaviṣyanti te saukhyaṃ devalokamanalpakam

rājyaṃ ca matha bhogāṃśca mantrasiddhisudurlabhām /
prāpsyanti vividhākārāṃ vicitragaticeṣṭitām

lokasyāgrā sampadāmiṣṭāṃ tridhā mokṣabhūṣitām /
pūjayitvā tu dhātūnāṃ prāpnuyāt siddhimuttamām

evaṃ cintayitvā tu brāhmaṇaḥ lokaviśrutaḥ /
śrāvako munivare jyeṣṭhaḥ kāśyapo nāma nāmataḥ

saṅgṛhya ca tadā dhātuṃ saṃbibhartti tadā bhuvi /
stokaṃ datvājātākhye māgadhasyaiva yatnataḥ

evaṃ narādhipeṣu sarveṣu aṣṭeṣvapi mahādyutiḥ /
sarvebhyaḥ sarvato dadyācchrāvako 'sau mahātmanaḥ

punareva bhavastasthau anityasaṃjñamabhāvataḥ /
śocayāmāsa sattvānāṃ karuṇāviṣṭena cetasā

rodiṣyanti ciraṃ sattvā kalpāṃ bahuvidhāṃ tathā /
saddharmintardhite loke śāstuno śākyapuṅgave /
saṅgātavyamimaṃ vācyaṃ māhaivaṃ dhūmakālikam

tato 'bhyutthitavāṃ vīraḥ prabhāvāmṛtacetasaḥ /
āmantrayāmāsa mantrajendraṃ ajātākhyaṃ narādhipam

gacchāmo rājagṛhaṃ nagaraṃ śāstuśāsanasatkṛthā /
gāthakumbhasuvinyastāṃ dhātuṃ prakṣipya yatnataḥ

te 'tra pūrveṇa āyātā kṣipraṃ rājagṛhaṃ tadā /
sthānaṃ veṇuvanaṃ prāpya sthāpayāmāsa jinodbhavām

stūpaṃ mahādbhutaṃ kṛtvāsau lokanāthasya tāpine /
pūjayāmāsa taṃ stūpaṃ vividhākārabhūṣaṇaiḥ

mālyacīvaracchatraiśca cūrṇagandhaistu dhūpanaiḥ /
chatraiḥ patākairvicitraiśca ghaṇṭāmālyavilepanaiḥ /
anekākāravicitraistu dīpamālābhi sragmibhiḥ

pūjāṃ kṛtvā mahīpāla praṇāmagatacetasaḥ /
mūrdhnā praṇamya taṃ stūpaṃ praṇidhiṃ cakrire tadā

lokāgraṃ pūjayitvā tu yanmayā kuśalaṃ bahu /
anekatāthāgatīpūjāṃ prāpnuyāhamacintiyā

utthāya tato rājā mahākāśyapamabravīt /
aśru samparāmṛjya bāṣpākulitalocanaḥ /
kṛpāviṣṭahṛdayaḥ pitaraṃ saṃsmaret tadā

āryo me mahāprājñaḥ sākṣibhūto bhavasva mām /
yanmayā kāritaṃ pāpaṃ niyatāvīciparāyaṇam

tādṛśaṃ dharmarājaṃ tu śāsturvacanapathe sthitam /
ghātayitvā tu taṃ pitaraṃ na śaknomi vinoditum

kalyāṇamitra āryo me dharmārthaṃ deṣṭumarhati /
evamukto mahātmāsau agraśrāvakau jine /
kāśyapo nāmataḥ dhīmāṃ imaṃ vācamudīrayet

mā bhaiṣṭa mahārāja kṛtaṃ te kuśalaṃ bahu /
asti te janmino 'bhyāsaḥ anekaśatadhā purā /
buddhānāmanutpādā pratyekajinasambhavaḥ

nagaryāṃ vārāṇasyāṃ śreṣṭhiputra abhūt tadā /
ajñānād bālacāpalyād rathyāyāṃ niryayau tadā

sa eva bhagavaṃ tatra pratyekajinamāgataḥ /
bhikṣārthī hiṇḍate tatra lokānugrahakāmyayā

bālasya dṛṣṭvā taṃ prasannagatamānasam /
pādayornipatya papraccha kiṃ kariṣyasi tairbhikṣu

tūṣṇīmeva sthito bhagavāṃ khaḍgakalpamasambhava /
tadā tena tu bālena cīvare gṛhyamasthita

gaccha gaccha imaṃ śreṣṭhaṃ mandiraṃ dhvajabhūṣitam /
asmākametadāvāsaṃ pādau prakṣālya bhokṣase /
bhuṃkṣva kṣipraṃ yathākāmaṃ krīḍiṣyāmo yatheṣṭataḥ

tato 'sau vītadoṣastu trimalāntakaghātakaḥ /
anūpūrveṇa yayau tatra parānugrahatatparaḥ /
gatvā dvāramūle 'smiṃ sthita eva mahādyutiḥ

tatastena tu bālena praviśitvā amba ucyate /
dehi bhakṣa mayā amba bhikṣāṃśca vividhāṃ bahūm

mitro me hyāgato hyatra pāṃsukrīḍanakaścirāt /
modiṣyasi ciraṃ tena tiṣṭhate dvāramāgataḥ

tadā sa tvaramānā tu dvāraṃ niryayu tatkṣaṇāt /
paśyate taṃ mahābhāgaṃ śāntaveṣaṃ maharddhikam

tadā sā kṣipramāgatya gṛhītvā bhājanaṃ śubham /
suprakṣālya tato hastau .......

gṛhītvā odanaṃ caukṣamanekarasabhūṣitam /
vividhākārabhakṣāṃśca bhājane nyasya rājate

āgamya ca tadā kṣipraṃ pātre nivedya ca /
pādayornipatitā sā tu sasutā dharmavatsalā

gṛhītvāsau piṇḍapātaṃ tu ākāśe abhyagacchata /
tato 'sau jvalamānastu dīpamāleva dṛśyate

tena teṣāṃ vāciko dharma vidyate khaḍgacāriṇām /
prabhāva ṛddhisattvānāṃ darśayanti mahātmanaḥ

atikāruṇikā te 'pi sattvebhyo gatamatsarāḥ /
paralokārthaṃ tu sattvebhyaḥ ṛddhiṃ sandarśayanti te

tena karmavipākena mātrayā saha bālakaḥ /
pañcajanmasahasrāṇi devatvamatha kārayet

devānāṃ devarājāsau sā eva jananī abhūt /
amanuṣyāṇāṃ cakravarttitvaṃ manujeśa abhūt tadā

anubhūya ciraṃ saukhyaṃ bimbisārasuto iha /
yaste ākarṣito bhagavāṃ cīvarānte 'tha gṛhya ca

vācā durbhāṣitā uktā bhikṣuvādena coditaḥ /
pāṃsukrīḍanako mahyaṃ bhavasveti purā tadā

vāco gatasya karmasya aniṣṭasya kaṭukasya ca /
tīvraṃ pratāpanāduḥkhaṃ anubhūya ciraṃ bahu /
narake patito ghore anīpsako duḥkhaduḥsaham

karmapāśānubaddhāstu sattvā gacchanti durgatim /
hasadbhiḥ kriyate karma rudadbhiranubhūyate

pūrvaṃ bāliśabhāvena pratyekajinatāpine /
vācā niścāritā duṣṭā tasya karmasya īdṛśam

narakebhyaḥ vyasitvā tu manuṣyatvamihāgataḥ /
nārake cetanā hyāsīd vipākajāte narādhipa

tena tīvreṇa roṣeṇa jīvitā te dvatapūrvikām /
pūrvikāṃ vāsanāṃ smṛtvā pratyekajinacāriṇīm /
sammukhaṃ darśito buddhaḥ pūjyaścaivamakāritā

tenaiva hetunā hyāsīd rājyatvamiha kāraya /
evaṃ veṇuvane teṣāṃ anyonyā saṃlaped bhuvi

ekaśca agraśiṣyo me dvitīyaḥ sa narādhipa /
praṇamya śatadhā stūpaṃ svagṛheṇaiva yayau tadā

tato 'sau śiṣyamukhyairme pippalāguhavāsinaḥ /
sannipātya muniṃ sarvāṃ vītarāgāṃ maharddhikām

dvādaśāṅgaṃ pravacanaṃ kṛtsnaṃ vinayaṃ caivamagāyata /
tanmayā kathito dharmaḥ pūrvaṃ jinavaraistathā

sa tena śiṣyavarāgreṇa triprakāraṃ samādiśet /
grathanaṃ sūtrabhedeva vinaye vābhidharmataḥ

tṛbandhānmocayet sattvāṃ tridoṣāṃ cāpi śoṣayet /
tṛduḥkhānmuktavāṃ dhīraḥ triyānaṃ sthāpayet tadā

śāsanārthaṃ tu buddhānāṃ kārayiṣyati agradhīḥ /
mahārājājātavikhyāto māgadheyo narādhipaḥ

yāvadādaṅgaparyantaṃ vāraṇasyāmatatparam /
uttareṇa tu vaiśālyāṃ rājā so 'tha mahābalaḥ

bhaviṣyati na sandehaḥ śāsanārthaṃ kariṣyati /
tvayā kumāra nirdiṣṭaḥ vyākṛtaḥ śāntimuttame

tasyāpi suto rājā ukārākhyaḥ prakīrttitaḥ /
bhaviṣyati tadā kṣipraṃ śāsanārthaṃ ca udyataḥ

tadetat pravacanaṃ śāstu likhāpayiṣyati vistaram /
pūjāṃśca mahatīṃ kṛtvā diksamantānnayiṣyati

na cāsya durgatiṃ cāsya deveṣūpapatsyate /
viṃśad varṣāṇi triṃśacca pitṛṇā saha janminaḥ

velāyāmardharātre tu pañcatvaṃ yāsyate tadā /
gotrajenaiva rogeṇa abhibhūto 'sau bhaviṣyati

mahārogeṇa duḥkhārttaḥ divasāni ṣaḍviṃśati /
samastavyādhigrasto 'sau vividhākāramūrchitaḥ

cyuto 'sau narapatiḥ kṣipra deśeṣūpapatsyate /
niyataṃ prāpsyate bodhi so 'nupūrveṇa yatnataḥ

ete cānye ca bahavaḥ atītā ye 'pyanāgatā /
kṛtvā tu vividhāṃ kārāṃ pratyekajinatāpiṣu

iṣṭāṃ viśiṣṭāṃ sampattiṃ divyāmānuṣikāṃstathā /
te 'nupūrveṇa gacchanti śāntiṃ nirjarasampadam

hīnotkṛṣṭarājāno madhyamāśca narādhipāḥ /
ādye tu yuge kathitā nahuṣādyā pārthivādayaḥ

budhaśukrodayo nityaṃ mantrasiddhā narādhipā /
śāntanuścitrasucitraśca pāṇḍavā sanarādhipāḥ

yātavā vārayatyāśca riṣiśāpāstamitrā tadā /
kārttikaḥ kārttavīryo 'sau daśarathadāśarathī purā

arjunaḥ siddhamantrastu dvidroṇasuto 'paraḥ /
aśvatthāmā paro mantrī sādhayāmāsa mantrarāṭ

śāstumūrjitamantrāstraiḥ kṣmāpatyaṃ kārayet tadā /
samantāt triṣu dvīpeṣu jambūdvīpagatā tadā

devakārāṃścaiva mantrāṇi pārthivādayaḥ /
te 'pi tāthāgatiṃ pūjāṃ anumodyā diviṃ gatāḥ

buddhatvaniyatā te 'pi kecit pratyekayānikā /
śrāvakatvaniyatā kecit sarve te mokṣaparāyaṇāḥ

kālavyasthānurūpeṇa āyuṣaśca vikalpate /
uttamā dīrghamānuṣye madhyā madhyamake tathā

antime tu yuge kaṣṭe kaliprāpte yugādhame /
+ + + + + + + + + + pārthivā tu kalipriyāḥ

anyo 'nya vairasaṃsaktā parasparaviheḍhakāḥ /
nīcotpattimāyātāḥ śastrasampātamṛttavaḥ

śastrapravṛttisamutsāhā paradārābhiratastadā /
bhaviṣyanti na sandehaḥ bhūpālā lokakutsitāḥ

dhūrtā nikṛṣṭakarmāṇaḥ anāryā matsariṇastathā /
bhaviṣyanti tadā kāle madhye dvāparayo kalau

saṃkṣepeṇa tu vakṣyāmi kumārastaṃ nibodhata /
vartamāne tu yatkāle pārthivā bhuvi maṇḍale

teṣāṃ tu rūpacihnāni varṇataśca nibodhatām /
prasenajit kosalo rājā bimbisārastathāparaḥ

udayanaḥ kṣatriyaśreṣṭhaḥ śatānīkasamudbhavaḥ /
subāhuḥ sudhanakhyāto mahendracandrasamastathā

licchavīnāṃ tathā jātaḥ siṃho vaiśālyamudbhava /
udāvidyotamudyotamahāsenaśca kathyate

ujjayanyāṃ tathā caṇḍaḥ kapilāhve pure nṛpaḥ /
rājā śuddhodanaścaiva vairāṭākhyo mahābalaḥ

ityete kṣatriyāḥ proktā mahīpālāḥ śāstu pūjakāḥ /
sammukhaṃ buddha paśyanti śākyasiṃhe narottamam

dharmaṃ śrutvā tataste 'pi ciraṃ prāpsyanti sampadām /
niyataṃ mokṣakāmāstu śāntiṃ prāpsyanti te 'pi tām

ityete lokavikhyātā bhūpālā kṣitimaṇḍale /
varṇataḥ kṣatriyaḥ proktaḥ cihnato nāmasajñitaḥ

pūjayiṣyati te vākyaṃ mayaiva kathitaṃ bhuvi /
tvayaiva vyākṛto loke kumāro bālarūpiṇaḥ

ajātākhyo nāmasau niyataṃ bodhiparāyaṇaḥ /
mayi varṣaśate parinirvṛte bhuvi maṇḍale

nirāloke nirānande ajñānatamasā vṛte /
bhaviṣyati tadā śūnyā medinī jinavarjitā

tasmiṃ kāle mahāghore kusumāhve nagare tadā /
aśoko nāma vikhyātaḥ pārthivo bhuvi pālakaḥ /
tīvrakārī saroṣī ca nirghṛṇo 'sau bhavet tadā

kalyāṇamitramātramya vītarāgaṃ maharddhikam /
bhikṣuṃ śīlasampannaṃ nijvaraṃ gatacetasam /
pūrvavāsanahetuṃ ca pāṃśudānaṃ maharddhikam

niyataṃ kṣetrasampannaṃ pārthivo 'sau mahādhanaḥ /
dharmādharmavicārī ca saghṛṇī kāruṇiko hi sau

hetumuddhāṭayāmāsa vītarāgo maharddhikaḥ /
tvayā hi nṛpateḥ pūrvaṃ ajñānād bālacāpalāt

jine śākyasiṃhasya pāṃsu añjalinā tadā /
pātre bhasme pratiṣṭhāpya prāptā sampattayo divi

devalokaṃ vyavitvā tu pitṛlokamihāgatam /
bhuṃkṣva rājyaṃ mahīpāla jambūdvīpaṃ sakānanam

ārādhya mantraṃ yakṣasya jambhalasya mahātmane /
tato bhūtarathaḥ siddhaḥ kṣitipaśca mahātmanaḥ

yakṣāstasya tiṣṭhante ājño dīkṣitamānasāḥ /
nāgāścaiva tiṣṭhante bhavyāḥ kiṅkarahetavaḥ

evaṃ maharddhikā dharmātmā balacakrī abhūt tadā /
yatheṣṭagamanaṃ tasya niṣeddhā na kvacid bhavet

pūvasthāpitakārye tu jinānāṃ dhātuvarā bhuvi /
nagare rājamukhye tu vane veṇuvane tadā

gṛhya dhātudhare dhātuṃ kuśalālambanamānasaḥ /
pūjayāmāsa taṃ stūpaṃ yathā paurāṇamakāraya

gṛhyantaṃ dhātukumbhaṃ tu vibhajya śatadhā punaḥ /
kṣaṇenaikena medhāvī yakṣāṇāmājñāvinirdiśet

jambūdvīpa imaṃ kṛtsnaṃ stūpālaṅkṛtabhūṣaṇam /
kārayantu bhavanto vai dhātugarbhāṃ vasundharām

ājñāpratīcchate yakṣāḥ ardharātre tu yatnataḥ /
amānuṣeyaṃ kṛtiṃ kṛtvā śilāyaṣṭyocchritāṃ bhuvi

anekastambhasahasrāṇi ropayāmāsa te tadā /
pūjanārthaṃ tu caityānāṃ cihnabhūtaṃ ca dehinām

kṛtvā tu vividhāṃ stūpāṃ lokanāthebhya tāpiṣu /
kṣaṇenaikena te yakṣā nṛpate 'ntikamāgatāḥ

praṇipatya tato mūrdhnā vācā niścāraguhyakām /
yathājñataṃ kṛtaṃ sarvaṃ kiṃ na paśyasi bhūte

tato 'sau pārthivaḥ kṣipraṃ āruroha rathaṃ tadā /
vividhākārapūjārthaṃ anekākāraśobhanām

kāñcanaṃ rājataṃ tāmraṃ vividhāṃstūpabhūṣaṇām /
tato bhūtarathaṃ kṣipraṃ pūrayāmāsa pārthivaḥ

kṣaṇenekana taṃ deśaṃ yatra te dhātudharā jinā /
vicitrākārapūjābhiḥ pūjayeta narādhipaḥ

śobhane medinīṃ kṛtsnāṃ jinadhātudharaistadā /
praṇidhiṃ cakrire rājā dharmāśoko mahātmavān /
anena kuśalārthena buddho bhūmāmanuttaraḥ

evaṃ viditvā mahātmāsau dharmāśoko narādhipaḥ /
mṛto 'sau devatāṃ yāti niyataṃ bodhiparāyaṇaḥ

aśītivarṣāṇi saptaṃ ca pūjaye dhātuvarāṃ bhuvi /
jīved varṣaśataṃ sārdhaṃ kṛtvā rājyamakaṇṭakam

svakarmajanitāstasya vyādhirutpannadehaje /
tenaiva vyādhito duḥkhī mṛtaḥ svargopago bhavet

mahatīṃ sampadaṃ prāpya anubhūya divaukasām /
anupūrveṇa medhāvī bodhiṃ prāpsyati durlabhām /
mantrā siddhyanti tatkāle vajrābjakulayorapi

jambhalādyāstathā yakṣā asmiṃ śāsanavarttinaḥ /
yakṣiṇyaśca samākhyātā hārītyādyā maharddhikāḥ

cakravartisamutpāde mantrā siddhyanti cakriṇaḥ /
jinaistu kathitā ye mantrā vidyārājā maharddhikāḥ

uṣṇīṣaprabhṛtayaḥ sarve ye cānye jinabhāṣitāḥ /
uttamāṃ sādhanāṃ kuryāt tasmiṃ kāle suśobhane

uttamairnādhamāḥ sādhyā uttamāṃ gatimāśṛtaiḥ /
dilīpo nahuṣaścaiva māndhātā sagarastathā

sādhayitvā tu te mantrāṃ cakriṇāṃ jinabhāṣitām /
tejorāśistadā siddhaḥ nahuṣasya mahātmanaḥ

rājā sitātapatrastu siddhastu sagarasya vai /
dilīpasya tathā mantraṃ siddhamekamakṣaram

māndhātasya tathā loke siddha uṣṇīṣamunnataḥ /
jayoṣṇīṣastathā siddho dhundhumāre nṛpottame

kandarpasya tathā rājño vijayoṣṇīṣa kathyate /
prajāpatistasya putro vai tasyāpi locanā bhuvi

prajāpateḥ suto nābhiḥ tasyāpi ūrṇamucyati /
lābhino ṛṣabhaputro vai sa siddhakarma dṛḍhavrataḥ

tasyāpi māṇicaro yakṣaḥ siddho haimavate girau /
ṛṣabhasya bharataḥ putraḥ so 'pi mantrān tadā japet

so 'nupūrveṇa siddhastu mahāvīraṃ bhuvistadā /
ete cā 'nye ca bahavaḥ pārthivā lokaviśrutāḥ /
sādhayitvā tu mantrāṇāṃ rājyaṃ kṛtvā divaṃ gatāḥ

jinendrairye tu uktāni vidyārājā maharddhikāḥ /
te sarve śobhane kāle yuge 'śītisahasrage /
siddhāḥ sādhayiṣyanti mantratantrārthakovidāḥ

ete cānye ca bahavaḥ pārthivā lokaviśrutāḥ /
tato 'śītisahasrāṇi varṣāṇāṃ śatameva vā /
rājyaṃ kṛtvā tataḥ svarga niyataṃ bodhiparāyaṇāḥ

madhyame tu tadā kāle divyāmāścaryamaharddhikāḥ /
mantrāḥ siddhimevāsurabjapāṇisamoditāḥ /
mantribhirnaramukhyaistu bhūṣālaiḥ sārdhabhūmikaiḥ

rājā ca brahmadatto vai vārāṇasyāṃ mahāpure /
siddhaḥ abjapāṇistu lokīśo lokaviśrutaḥ

mahāvīryo mahātmāsau atikāruṇiko mahān /
sattvānāṃ mantrarūpeṇa dideśa dharmadeśanām

rājñā brahmadattena anubhūtaṃ mānuṣaṃ sukham /
tato 'sau siddhamantrastu sadehaḥ svagamāviśet

tasyāpi ca suto dhīmān puṇyakarmā dṛḍhavrataḥ /
tasyāpi siddho mahāvīryo haryākhyeti viśrutaḥ

tena mantraprabhāvena jitaḥ śakra abhūt tadā /
tasyāpi sutaḥ śvetākhyo rājābhūt sarvadastadā

tasyāpi varadā mantrā mahāśvetā nāma nāmataḥ /
sādhayitvā tu tāṃ mantraṃ jīvedū varṣaśatatrayam

tena mantraprabhāvena sukhāvatyā sa gacchati /
niyataṃ bodhimevāsya ye cānye vyāhṛtā mayā

madhyame tu tadā kāle madhyamantrāṃtu sādhayet /
adhame 'tiyuge kaṣṭe mayi buddhatvamāgate /
mantrāḥ siddhiṃ prayāsyanti vajrābjakulayorapi

tvayā kumāra mantrā vai ye pūrvaṃ kathitā bhuvi /
te 'pi siddhiṃ prayāsyanti mantrā vai bhāgahetutām /
itarāṇi tu mantrāṇi laukikāṃ vividhāṃ tathā

kaśmalā vikṛtarūpāśca antarikṣā tu khecarā /
bhaumyā ca matha yakṣiṇyaḥ piśācyā vividhāstathā /
garuḍāḥ kinnarāścaiva pretā rākṣasabhāṣitā

piśācoragarakṣāṇāṃ nāgīnāṃ ca maharddhikā /
mantrā siddhiṃ prayāsyanti yuge kaṣṭe yugādhame

kumārarūpāstu mantrā vai kumārirūpāstu sarvadā /
te 'pi siddhiṃ prayāsyanti tasmiṃ kāle bhayānake

trividhāstu tathā mantrā triprakārāstu sādhanā /
trividhenaiva kālena trividhā siddhiriṣyate /
saṃkṣepeṇa tu vakṣyāmi kathyamānamativistaram

rājñe sau śokamukhyasya pṛṣṭhate ta bhave nṛpaḥ /
viśoka iti vikhyāto loke dharmānucāriṇaḥ

tasya siddhā imā mantrā devī paṇḍaravāsinī /
viśokaḥ sādhayitvā tu ājahāra divaukasām

nākapṛṣṭhe ciraṃ saukhyamanubhūya sa mahānṛpaḥ /
punareva gacchanmānuṣyaṃ dharmaśīlo hi buddhimām

rājyaṃ vividhasampattiṃ anubhūya mahādyutiḥ /
pūjayed dhātuvarāṃ śrīmāṃ varṣāṇi ṣaṭsaptati /
tato jvareṇābhibhūto 'sau bhinnadeho divaṃ gataḥ

tasyāpyanantare rājā śūrasenaḥ prakathyate /
vighuṣṭo dharmacārī ca śāsane 'smiṃ sadā hitaḥ

tenāpi sādhitā mantrā devīstūpamahāśriyā /
tenāpi kāritā śāstuḥ kārā sumahatī tadā /
stūpairalaṅkṛtā sarvā samudrāntā vasundharā

tasya karmavipākena vyādhirutpannadehajā /
pakṣamekaṃ kṣayitvāsau cyutadeho bhaviṣyati

kṛtvā rājya varṣāṇi daśa sapta ca mānavīḥ /
cyuto 'sau svargamāviṣṭo niyataṃ bodhiparāyaṇaḥ

tasyāpyanantaro rājā nandanāmā bhaviṣyati /
puṣpākhye nagare śrīmāṃ mahāsainyo mahābalaḥ

tenāpi sādhito mantra piśāco pīlunāmataḥ /
tasya mantraprabhāvaṃ tu mahābhogo bhaviṣyati

nīcamukhyasamākhyāto tato loke bhaviṣyati /
taddhanaṃ prāpya mantrī sau loke pārthivatāṃ gataḥ

bhaviṣyati tadā kāle brāhmaṇāstārkikā bhuvi /
siddhyābhimānalubdhā vai nagare magadhavāsinaḥ /
bhaviṣyanti na sandeho githyāgarvitamāninaḥ

tebhiḥ parivārito rājā vai ......... /
dharmaśīlo 'pi dharmātmā teṣāṃ dāsyati taṃ dhanam /
kalyāṇamitramāgamya pūje dhātuvarānasau

kevalaṃ tu tadābhyāsād dānāviklabahetunā /
vihārā kāritā tena ṣoḍaśāṣṭau ca dhīmatā

bhaviṣyati tadā kāle nagare puṣpasāhaye /
mantrimukhyo mahātmā vai ghṛṇī sādhu tathā dvijaḥ

sa bhaviṣyati dharmātmā tasyā rājño 'tiśākyinaḥ /
so 'pi siddhamantrastu yakṣiṇī vīramatī bhuvi

tenāpi kāritaṃ śreṣṭhaṃ jinānāṃ dhātuvaro bhuvi /
atiprājño hi saṃvṛto yakṣiṇyāstu prabhāvataḥ

tena vāsanakarmeṇa pūrvavāsanacoditaḥ /
anupūrveṇa medhāvī bodhiṃ prāpsyati durlabhām

strīkṛtena doṣeṇa mṛtyuṃ prāpsyanti mānavāḥ /
vararūcirnāma vikhyāta atirāgī abhūt tadā

nando 'pi nṛpatiḥ śrīmāṃ pūrvakarmāparādhataḥ /
virāgayāmāsa mantrīṇāṃ nagare pāṭalāhvaye

viraktamantravargistu satyasandho mahābalaḥ /
pūrvakarmāparādhena mahārogī bhaviṣyati

mahājvareṇa duḥkhārtaḥ ardharātre bhaviṣyati /
āyustasya ca vai rājñaḥ ṣaṭṣaṣṭivarṣāṃ tathā /
niyataṃ śrāvake bodhau tasya rājño bhaviṣyati

tasyāpyanyatamaḥ sakhyaḥ pāṇinirnāma māṇavaḥ /
niyataṃ śrāvakatvena vyākṛto me bhaviṣyati

so 'pi siddhamantrastu lokīśasya mahātmanaḥ /
sādhayet prajñākāmastu krodhaṃ hālahalaṃ dvijaḥ

tasya rājño 'para khyātaḥ candragupto bhaviṣyati /
japendrayakṣasiddhastu kārayed rājyamakaṇṭakam

mahāyogī satyasandhaśca dharmātmā sa mahīpatiḥ /
akalyāṇamitramāgamya kṛtaṃ prāṇivadhaṃ bahu /
tena karmavipākena viṣasphoṭaiḥ sa mūrchitaḥ

ardharātre ruditvāsau putraṃ sthāpayed bhuvi /
binduvārasamākhyātaṃ bālaṃ duṣṭamantriṇam

tato 'sau candraguptasya cyutaḥ kālagato bhuvi /
pretalokaṃ tadā lebhe gatiṃ mānuṣavarjitām /
mantrābhyāsāt tadā yukto gatiṃ tyaktvā divi gatam

mantrahetusamutpādāt kuśalālambanacetanām /
pratyekaṃ bodhimāyāti so 'nupūrveṇa narādhipaḥ

rājñātha bimbasāreṇa bālenāvyaktacetasā /
purā kāritaṃ caityaṃ siṃhadattena bhavāntare

tasya karmaprabhāvena divaṃ yāto hyaninditaḥ /
pañca janmasahasrāṇi amarebhyo bhuktavān sukham

svargalokāccyavitvā tu manuṣyendropapadyate /
jāto rājakule candraguptasya dhīmataḥ

bāla eva tato rājā prāptaḥ saukhyamanalpakam /
prauḍho dhṛṣṭaśca saṃvṛttaḥ pragalbhaścāpi priyavādinam /
svādhīna eva tad rājyaṃ kuryād varṣāṇi saptati

mantrā keśinī nāma siddhā tasya narādhipe /
kumāra tvadīyamantre tu siddhiṃ gaccheyu te tadā

bhaviṣyati tadā kāle mantrasiddhistvayoditā /
kumārarūpī viśvātmā lokānāṃ prabhaviṣṇavaḥ

bhaviṣyati na sandeho mantrarūpeṇa dehinām /
+ + + + + + + + + + + + + + + hitakāmyayā

tasmiṃ kāle sadā siddhirbhaviṣyanti paṭhitā bhuvi /
mantrī tasya rājñasya bindusārasya dhīmataḥ

cāṇakya iti vikhyātaḥ krodhasiddhastu mānavaḥ /
yamāntako nāma vai krodhaḥ siddhastasya ca durmateḥ

tena krodhābhibhūtena prāṇino jīvitāddhatā /
kṛtvā tu pāpakaṃ tīvraṃ trīṇi rājyāni vai tadā

dīrghakālābhijīvī sau bhavitā dvijakutsitaḥ /
tena mantraprabhāvena sadehamāsurīṃ bhajet /
āsurīṃ tanumāviṣṭa dīrghakālaṃ sa jīvayet

tato 'sau bhinnadehastu narakebhyo vigacchataḥ /
tato 'sau nārakaṃ duḥkhaṃ anubhūyeha durgatiḥ

vividhā nārakāṃ duḥkhāṃ aniṣṭāṃ karmajāṃ tadā /
kalpamekaṃ kṣayitvāsau krodhamantrapracoditam /
cyuto 'sau narakād duḥkhāt tiryagebhyopapadyate

nāgayoniṃ samāpadya bhīmarūpī bhaviṣyati /
nāgarājo mahākrodhī mahābhogī viṣadarpitaḥ

dāruṇaṃ karmacārī ca ........ /
cyuto 'sau duṣṭakarmā tu yamalokamagacchata

sunidā yamarājāsau pretarājo maharddhikaḥ /
evaṃ duḥkhasahasrāṇi anubhūya punaḥ punaḥ

so 'nupūrveṇa durmedhā bhuvimāyāta māṇavaḥ /
mānuṣyaṃ janmamāyātaḥ bhīmarūpī bhaviṣyati /
daridra krodhanaścaiva alpaśākhyo bhaviṣyati

pratyekabuddhā ye loke nirāśāḥ khaḍgacāriṇaḥ /
hīnadīnānukampyāstu vicaranti mahītale /
sattvānāṃ hitakāmyarthaṃ praviṣṭā piṇḍacārikām

te taṃ durmatiṃ dṛṣṭvā vai paracittavidostadā /
te tatra manubaddhāstu kāruṇyānnānyahetavaḥ

tena kulmāṣakhanḍāstu gṛhītā bhakṣahetunā /
krodhamantrābhibhūtena hetumuddhāṭitā tadā

teṣāṃ niryātayed bhikṣaṃ tatraikasya mahātmanaḥ /
idaṃ bhoḥ pravrajitāḥ sarve bhakṣayadhvaṃ yathāsukham /
tasyānukampā buddhebhyaḥ ṛddhiṃ darśitavāṃ tadā

tato 'sau vismayāviṣṭaḥ prabhāvodgatamānasaḥ /
prapatet sarvato mūrdhnā buddhebhyaḥ khaḍgakalpiṣu /
ākāśena gatāḥ sarve vītadoṣā yatheṣṭataḥ

tenāpi kuśalārthena pratyekāṃ bodhicintitām /
yādṛśā hi mahātmānaḥ śāntaveṣā maharddhikāḥ /
tādṛśo 'haṃ bhavelloke mā duḥkhī mā ca durgatiḥ

kṣīṇakarmāvaśeṣastu cyutaḥ svargopagaḥ sadā /
so 'nupūrveṇa dharmātmā pratyekaṃ bodhi lapsyate /
tasmānna kuryānmantrebhyaḥ sādhanamābhicārukam

buddhairbodhisattvaiśca pratiṣiddhamābhicārukam /
atikāruṇikā buddhā bodhisattvāstu maharddhikāḥ /
prabhāvārthaṃ tu mantrāṇāṃ darśitaṃ sarvakarmiṇaḥ

cintāmaṇayo mantrā bhāṣitāstu tathāgataiḥ /
bālarūpā mūḍhacittāstu krodhalobhābhibhūtayaḥ /
parasparaṃ prayojyante ye mantrā ābhicāruke

pratiṣiddhaṃ tathā buddhairbodhisattvaistu dhīmataiḥ /
sarvaprakāra tu mantrāṇāṃ sattvebhyo bhogavardhanam

uttiṣṭhamatha rājyaṃ vai madārakṣāṃ dhanyahetavaḥ /
ākarṣaṇaṃ tu sattvānāṃ vividhāṃ yonimāśritām /
sādhanīyāstu mantrā vai na jīvamuparodhataḥ

tasmiṃ kāle bhaviṣyanti bhikṣavo me bahuśrutāḥ /
mātṛcīnākhyanāmāstu stotraṃ kṛtvā mamaiva tu /
yathā bhūtaguṇoddeśaiḥ yathākāramabhāṣata

prasādya sarvataścittaṃ buddhānāṃ śāsane rataḥ /
mantrasiddhastu durlakṣyaḥ mañjughoṣastavaiva tu

guṇavāṃ śīlasampannaḥ dharmavādī bahuśrutaḥ /
purā tiryaggatenaiva imāṃ stotramabhāṣata

nṛpākhye nagare ramye khaṇḍākhye ca vane vatu /
sārdhaṃ śiṣyagaṇenaiva viharāmi yathāsukham

tatrastho vāyasa āsī māṃ cittaṃ samprasādayet /
prasādya ca mayi cittaṃ bhinnadeho divaṃ gataḥ

devebhyaśca cyavitvā tu manuṣyebhyopapatsyate /
manuṣyebhyopapannastu pravrajecchāsane mama

pravrajitvā mahātmāsau yathābhūtaṃ hi māṃ tadā /
staviṣyati tadā kāle mātṛcīnākhya savratī

stotropahāraṃ yathārthaṃ ca nānādṛṣṭāntarahetubhiḥ /
prakartā sarvabhūtānāṃ hitāyaiva subhāṣitam

anugrahārthaṃ tu sattvānāṃ stotracodanatatparaḥ /
bhaviṣyati tadā kāle yugānte lokanindite /
tena karmavipākena bhinnadeho diviṃ gataḥ

so 'nupūrveṇa medhāvī anubhūya vividhāṃ sukhām /
bodhiṃ prāpsyati sarvajñiṃuttamārthamacintiyām

caturthe varṣaśate prāpte nirvṛte mayi tathāgate /
nāgāhvayo nāma sau bhikṣuḥ śāsane 'smiṃ hite rataḥ /
muditāṃ bhūmilabdhastu jīved varṣaśatāni ṣaṭ

māyūrī nāmato vidyā siddhā tasya mahātmanaḥ /
nānāśāstrārthadhātvarthaṃ niḥsvabhāvārthatattvavit

sukhāvatyāṃ copapadyet yadāsau tyaktakalevaraḥ /
so 'nupūrveṇa buddhatvaṃ niyataṃ samprapatsyate

saṅganāmā tadā bhikṣuḥ śāstratattvārthakovidaḥ /
sūtranītārthaneyānāṃ vibhajya bahudhā punaḥ

lokābhidhāyī yuktātmā tucchaśīlo bhaviṣyati /
tasya siddhā śāladūtīti kathyate

tasya mantraprabhāvena buddhirutpanna śreyasī /
saṅgrahe sūtratattvārthaṃ śāsanasya cirasthite /
jīved varṣaśataṃ sārdhaṃ tyaktadeho diviṃ gataḥ

anubhūya ciraṃ saukhyaṃ dīrghasaṃsārasaṃsaram /
anupūrveṇa cātmāsau bodhiprāpto bhaviṣyati

evaṃ bahuvidhākāro bhikṣavo mayi śāsane /
prajñā dharmaśīlāstu bhavitābhūt tadā yuge

apaścime tu tadā kāle nandanāmataḥ /
so 'pi mantrārthayuktātmā tantrajño 'tha bahuśrutaḥ /
tasya bhadraghaṭaḥ siddhaḥ yakṣamantrapracoditaḥ

mahāyānāgrasūtre tu mayā ca kathitā purā /
tasmiṃ kāle ghaṭe tasmiṃ ujjahāra mahātapā

tasya dṛṣṭasadā tatra pustake 'smiṃ mantrarūpiṇe /
rakṣā na kāritā tatra ghaṭe 'smiṃ yakṣasādhite

anapramādāt smṛtibhraṃśā ghaṭo mūrdhnaṭake hṛtaḥ /
tato 'sau siddhamantrastu bhikṣurmantratapī abhūt

vaṭaṃ nirīkṣayāmāsa nābhipaśyeta tatra vai /
tato 'sau krodharaktāṅgaḥ visphūrjana abhāṣata

ābrahmastambaparyantaṃ śakrādyāṃ samaheśvarām /
mantrenākṛṣyamāneyaṃ nāhaṃ mantrī na mantrarāṭ

ye mantrā buddhaputraistu mantrā jinavaraistathā /
bhāṣitā nigrahārthāya durdāntadamakāpi vā

te tu sarve bhuvirnāsti thadi nākṛṣyāmi corīṇām /
tatotthāya tato mantrī siddhakarmadṛḍhavrataḥ

yathā tu vihite mantre prayogākṛṣṭahetavaḥ /
prayojayāmāsa taṃ dikṣu kṣiprākarṣaṇatatparaḥ

kṣaṇena smṛtamātreṇa kṣiprakarmāyatihyasau /
huṅkārekeṇa mātreṇa brahmādyāmānayed bhuvi

ākṛṣṭā sarvadevāstu brahmādyāḥ saśakrakāḥ /
hāhākāraṃ pramuñcānā ārttā bhairavanādinaḥ /
kiṃ karoma kimānītā nāma yaṃ mantrāparādhinaḥ

śīghraṃ ca tvaramāṇastu bhikṣurdhīmāṃ viśāradaḥ /
divaukasāṃ mantrayāmāsa ghaṭaṃ pratyarpayatha ito iha

anyonyaṃ vai surāḥ sarve sa bhikṣuḥ samprabhāṣataḥ /
kṣipraṃ vadata bhadraṃ vo ye nenāpahṛto ghaṭaḥ /
nirīkṣayāmāsa te devāḥ na dāsyante 'tha samantataḥ

samanvāharati deveśaḥ kenāyaṃ ghaṭako 'pahṛtaḥ /
paśyate vajriṇaḥ śrīmāṃ bodhisattvo mahādyutiḥ

tasyāsti suto ghoraḥ mahāroṣī sudāruṇaḥ /
nirmito vighnarūpeṇa viceruḥ sarvato jagat

tenāsau ghaṭo nīta deveśaḥ samprabhāṣitam /
asti vajrakule vighnaḥ krīḍate līlayā bhuvi

pūjito 'hamimeneti tenāsau ghaṭako hataḥ /
evamuktvā tu deveśaḥ punareva diviṃ gatāḥ

sarve visarjitā devāḥ svamantreṇaiva te tadā /
kṣaṇenaiva tu tatraikaḥ muhūrtasutarānapi

ānayāmāsa taṃ bighnamavaśāt saghaṭaṃ tadā /
tatastena tu vighnena pretānāṃ ghaṭamādade

tato nītena tu vighnena imāṃ vācāmabhāṣitā /
pretaloke ghaṭo nītaḥ na vayaṃ tatra doṣiṇaḥ

ruṣṭo so 'pi mahāmantrī taṃ vighnamabhyabhāṣata /
gaccha gaccha mahāvighna mā bhūyo evamācaret

tatastena tu te pretā ānītāstatkṣaṇādapi /
kṣubhitākrāntamanasaḥ dīnāḥ sūcīmukhā hi te

ārtasvaraṃ ca krandeyurmahāghoratamā hi te /
cukrutuḥ karuṇāṃ vāṇīṃ paritrāyasva mahātmana

ghaṭaṃ vo iha ānītā yatheṣṭa kurute vayam /
mahākāruṇiko mantrīṃ vepathu samprajāyatām

karuṇārdreṇa manasā imāṃ vācāmabhāṣata /
kiṃ duḥkhaṃ bhavatāṃ loke samprabhāṣatha mā ciram

te ūcurdīnamanasā bubhukṣāsmat samprabādhate /
triṣitāḥ pretaloke 'smiṃ ciraṃ kālaṃ mahātmanaḥ

mahākāruṇiko bhikṣusteṣāmeva pradadau ghaṭam /
tataste tuṣṭamanasāḥ sattvarāmālayaṃ gatāḥ /
teṣāṃ cintitamātreṇa annapānaṃ bhaved ghaṭe

bhavitā candanamāle 'smiṃ bhikṣurnandako bhuvi /
tasmiṃ kālādhame prāpte jīved varṣaśatatrayam /
mahātmā bodhinimnastu kṣipraṃ prāpsyati durlabhām

bhaviṣyanti na sandehaḥ tasmiṃ kāle yugādhame /
rājā gomimukhyastu śāsanāntardhāpako mama

prāciṃ diśimupādāya kaśmīre dvārameva tu /
nāśayiṣyati tadā mūḍhaḥ vihārāṃ dhātuvarāṃstathā

bhikṣavaḥ śīlasampannāṃ ghātayiṣyati durmatiḥ /
uttarāṃ diśamāśṛtya mṛtyustasya bhaviṣyati

amānuṣeṇaiva kruddhena sarāṣṭrā paśubāndhavaḥ /
ākrānto 'drikhaṇḍena pātālaṃ yāsyati durmati

adho atha gatistasya narakānnarakataraṃ bhṛśam /
duḥkhā duḥkhataraṃ tīvraṃ samprapatsyati dāruṇam

avīcirnāma vikhyātaṃ narakaṃ pāpakarmiṇā /
mucyate 'sau mahākalpaṃ gomiṣaṇḍo durātmanaḥ /
akalyāṇamitramāgamya kṛtaṃ pāpasudāruṇam

tasmāt sarvaprayatnena śāsane 'smiṃ tathāgate /
prasādyamakhilaṃ cittaṃ samprabhokṣyatha sampadām

buddhatvaniyataṃ mārgam aṣṭāṅgapathayāyinam /
gamiṣyatha sadā sarve aśokaṃ nirjarasaṃ puram

tasyānantare mahīpālaḥ buddhapakṣa iti śrutaḥ /
mahāyakṣo mahātyāgī buddhānāṃ śāsane rataḥ

bhaviṣyati na sandehaḥ tasmiṃ kāle yugādhame /
atiprīto hi nṛpatiḥ śāstuḥ śāsanatatparaḥ /
vihārārāmacaityāṃśca śāsturbimbānanuttamām

vāpyaḥ kūpāśca + + + + + + anekadhāḥ /
kārayitvā mahārājā divaṃ gacched gatāyuṣaḥ

tasya siddho mahāvīryaḥ abjaketurmahītale /
pṛthivāṃ pālanāṃ prārthe bodhisattvasya mahātmane

tasya mantraprabhāvena jīved varṣaśatatrayam /
tena karmāvaśeṣeṇa kṣipraṃ bodhimavāpnuyāt

tasyāpi ca suto rājā mahāsainyo mahābalaḥ /
gambhīrayakṣo vikhyātaḥ pṛthivīmakhiloditām

so 'pi rājātha yuktātmā tasmiṃ kāle bhaviṣyati /
vihārāvasathacaityāṃśca vāpīkūpāṃśca naikadhā /
kārayiṣyati na sandeho bhūpatiḥ sa mahādyutiḥ

tenāpi sādhitaṃ mantraṃ mañjughoṣasya dhīmataḥ /
ṣaḍakṣaraṃ nāma yad vākyaṃ mahārthaṃ bhogavardhanam

tasya mantraprabhāvena mahābhogī bhave hyasau /
anupūrveṇa medhāvī kṣipraṃ bodhiparāyaṇaḥ /
vividhākārakārāṃstu śāsane 'smiṃ tathāgate

bhaviṣyati tadā kāle uttarāṃ diśimāśṛtaḥ /
nepālamaṇḍale khyāte himādreḥ kukṣimāśrite

rājā mānavendrastu licchavīnāṃ kulodbhavaḥ /
so 'pi mantrārthasiddhastu mahābhogī bhaviṣyati

vidyā bhogavatī nāma tasya siddhā narādhipe /
aśītivarṣāṇi kṛtvāsau rājyaṃ taskaravarjitam

tataḥ prāṇātyaye nṛpatau svargaloke jajagmasu /
tatra mantrāśu sidhyanti śītalā śāntikapauṣṭikā

tārā ca lokavikhyātā devī paṇḍaravāsinī /
mahāśvetā parahitodyuktā akhinnamanasāṃ sadā

ityevamādayo proktā bahudhā nṛpatayostadā /
anekadhā bahudhāścaiva nānārūpavivarṇitāḥ

śāstupūjakāste 'pi mleccharājā na hai /
vaviṣaḥ suvṛṣaścaiva bhāvasu śubhasustathā

bhākramaḥ padakramaścaiva kamalaścaiva kīrtyate /
bhāguptaḥ vatsakaścaiva + + + + + paścimaḥ

udayaḥ jihnuno hyante mlecchānāṃ vividhāstathā /
ambhodheḥ bhraṣṭamaryādā bahiḥ prājñopabhojinaḥ

śastrasampātavidhvastā nepālādhipatistadā /
vidyāluptā luptarājāno mlecchataskarasevinaḥ

anekā bhūpatayo proktā nānā caiva dvijapriyā /
bhaviṣyanti tadā kāle cīnaṃ prāpya samantataḥ

rājā hiraṇyagarbhastu mahāsainyo mahābalaḥ /
vistīrṇaśca tantraśca prabhūtajanabāndhavaḥ

mlecchapraṇato vijayī ca śāstuḥ śāsanatatparaḥ /
tenāpi sādhito mantraḥ kumārasyeva mahādyuteḥ

............ vidyārājāmaṣṭa akṣaram /
mahāvīraṃ nāma vikhyātaṃ sampadānāṃ mahāspadam

tena bāladhiyo rājā rājyahetoḥ samāhitaḥ /
yasya smaritamātreṇa buddhatvaṃ niyataṃ padam

so 'lpakāryaniyuñjānaḥ rājyaheto narādhipaḥ /
ākāṃkṣamānayadyevaṃ varadānamanuttamam

brahmādyā devatāṃ kṛtsnāmājñāpayati sarvadā /
kiṃ punarmānuṣāṃ loke itarāṃ bhāvakutsitām

jīvitvā varṣaśataṃ sārdhaṃ divaṃ gacchanmahānṛpaḥ /
so 'nupūrveṇa dharmātmā uttamāṃ bodhimāpnuyāt

tasmiṃ deśa imā vidyā ye kumāreṇa bhāṣitā /
satvarā te 'pi siddhyante nānye vidyā kadācana

bodhisattvo mahādhīraḥ mañjughoṣo mahādyutiḥ /
tasmiṃ deśe tu sākṣād vai tiṣṭhate bālarūpiṇaḥ

siddhikṣetrā 'tha paraṃ divyaṃ mānuṣyaiḥ sādhayiṣyati /
turuṣkanāmā vai rājā uttarāpathamāśṛta

mahāsainyo mahāvīryaḥ tasmiṃ sthāne bhaviṣyati /
kaśmīradvāraparyantaṃ baṣkalodyaṃ sakāviśam
yojanaśatasaptaṃ tu rājā bhuṅkte 'tha bhūtalam /
saptasaptatisahasrāṇi lakṣau dvau tasya bhūpateḥ /
bhaviṣyati na sandeho tasmiṃ kāle yugādhame

so 'pi siddhamantrastu jīved varṣaśatatrayam /
sādhitā keśinī vidyā narādhyakṣeṇa dhīmatā

ātmanā śreyasārthaṃ tu vihārāṃ kārayed bahūn /
ṣaḍāśītisahasrāṇi kuryāt stūpavarāṃstathā

mahāyānāgradharmaṃ tu buddhānāṃ jananīstathā /
prajñāpāramitā loke tasmiṃ deśe pratiṣṭhitā

sa rājā bhinnadehastu svargalokaṃ gamiṣyati /
so 'nupūrveṇa kṣitīpeśaḥ bodhiṃ prāpsyati muttamām

tasyāntare kṣitipateḥ mahāturuṣko nāma nāmataḥ /
dhīmataḥ bahumataḥ khyāto gurupūjakatatparaḥ /
sadā so 'pi sādhe sa mantraṃ vai tārādevīṃ maharddhikām

so 'pi prasiddhamantrastu rājyaheto tha bhūtale /
mahāyakṣā mahāsainyaḥ maheśākṣo 'tha bhūpatiḥ

sammato bandhuvargāṇāṃ rājā so 'pi bhaviṣyati /
aṣṭau sahasravihārāṇāṃ tasmiṃ kāle bhaviṣyati

tasya mantraprabhāvena jīved varṣaśatadvayam /
yadāsau bhinnadehastu tuṣitebhyopapadyate /
sonmatto devaputrāṇāṃ bodhisattvo maharddhikaḥ

so 'nupūrveṇa dharmātmā bodhyaṅga samabhipūrataḥ /
prāpnuyāmatulāṃ bodhiṃ so 'nupūrveṇa yatnataḥ

tatra deśe sadā kālaṃ tiṣṭhate pravaraṃ bahu /
jinaistu kathitaṃ pūrvaṃ adhunā caryayā bhuvi /
vītarāgaiḥ samākrāntaṃ nāgaiścāpi maharddhikaiḥ

lokapālāastathā yakṣāḥ śāstu śāsanarakṣakāḥ /
bhaviṣyanti tadā kāle saddharmā rakṣakā bhuvi

evaṃ bahuvidhāḥ proktāḥ bhūpālā lokaviśrutāḥ /
kathitāḥ kathayiṣyanti tasmiṃ kāle sudāruṇe

paścāddeśaparyantaṃ ujjayanyāmataḥ pare /
samudratīraparyantaṃ lāḍānāṃ janapade tathā

śīlāhvo nāma nṛpatiḥ buddhānāṃ śāsane rataḥ /
purīṃ valabhya samprāpto dharmarājā bhaviṣyati

vihārāṃ dhātuvarāṃ citrāṃ śreyasāṃ prāṇināṃstathā /
kārayiṣyati yuktātmā bhūpatirdharmavatsalaḥ

pūjāṃ ca vividhākārāṃ jinabimbāṃ manoramām /
pūjayeddhātuvarāṃ agryāṃ lokanāthebhyo yaśasviṣu /
nāsau mantrasiddhastu kevalaṃ karmajottamaḥ

tatra deśe samākhyāto bhikṣuḥ piṇḍacārikaḥ /
śīlavāṃ buddhisampanno buddhānāṃ śāsane rataḥ

kālacārī mahātmāsau praviṣṭo piṇḍarācikam /
paśyate rājakulaṃ śreṣṭhaṃ vistīrṇaṃ ca janāvṛtam

praviṣṭo tatra bhikṣārthī kṣudhayā ca samanvitaḥ /
tṛṣito klāntamanaso na lebhe piṇḍakaṃ tadā

gṛhītvāsau puruṣaiḥ kṣipraṃ niryayuḥ tadgṛhāt param /
tato saudvignamanaso rakṣito rājabhaṭaistadā

niryayurnagarāt tasmāt svālayaṃ tatkṣaṇād gataḥ /
kṣudhito tṛṣitaścaiva duḥkhī ca durmatiṃ gataḥ

tato 'sau bhaktacchinnastu ardharātre samupasthite /
prāṇatyāgaṃ tadā cakruḥ yatī sau laghucetasaḥ /
praṇidhiṃ ca tadā cakre lāḍānāmadhipatirbhavet

tato 'sau kālagato bhikṣurdharākhye nṛpatau kule /
utpadyeta mahātmāsau śāstuḥ śāsanapūjakaḥ

daśavarṣāṇi viṃśaṃ ca rājyaṃ kṛtvā makaṇṭakam /
lubdhaḥ svajanaprayogeṇa ajīrṇayatimūrchitaḥ

bhinnadeho tato rājā kālaṃ kṛtvā diviṃ gataḥ /
devā tuṣitavarā nāma maitreyo yatra tiṣṭhati

dharmaśrāvī mahātmāsau tatrāsau upapatsyate /
dharmaṃ śṛṇvanti satkṛtya maitreyasya mahādyuteḥ

so 'nupūrveṇa bodhiṃ ca .... prāpsyati durlabhām /
śīlākhye nṛpatau vṛtte capalastatra bhaviṣyati

varṣārdhapakṣamekaṃ tu pañca māsāṃ tathaiva tu /
rājyaṃ kṛtvā vibhinno 'sau śastribhiḥ śastrajīvibhiḥ

strīkṛtenaiva tu doṣeṇa śastrabhinno adho gataḥ /
tasyāpyanujo dhruvākhyastu dhruvaḥ sthāvaratāṃ gataḥ

sevaka kṛpaṇo mūrkhaḥ lāḍānāmadhipatirbhavet /
śeṣā narādhipāḥ sarve mūrdhāntāstu sevakāḥ

teṣāṃ ca pūrvajā vaṃśāḥ śīlāhvoparate tadā /
bhavitā bhūpatayaḥ sarve ambhoje tīraparṣagāḥ

nṛpaḥ indro sucandraśca dhanuḥ ketustathaiva ca /
puṣpanāmo tataḥ proktā vāravatyāṃ purodbhavaḥ

balabhyāṃ purimāgamya ādyamasyānupūrvakā /
prabhanāmā sahasrāṇi viṣṇunāmā tathaiva ca

anantā nṛpatayo proktā yādavānāṃ kulodbhavāḥ /
teṣāmapaścimo rājā viṣṇunāmā bhaviṣyati

ṛṣiśāpābhibhūtastu sapaurajanabāndhavaḥ /
astaṃ gate nṛpo dhīmāṃ udake plāvitā purī

dvāravatyā tadā tasya mahodadhisamāśritā /
uttarāṃ diśi sarvatra nānārambhanitambayoḥ

anantā nṛpatayaḥ proktā nānājātisamāśṛtāḥ /
śakavaṃśa tadā triṃśat manujeśā nibodhatā

daśāṣṭa bhūpatayaḥ khyātā sārdhabhūtikamadhyamā /
ante nāgasenā tu viluptā te pare tadā

tato viṣṇuharaścaiva kuntanāmājitaḥ paraḥ /
īśānasarvapaṅktiśca grahasuvra tathāparaḥ

tataste viluptarājānaḥ bhraṣṭamaryāda sarvadā /
viṣṇuprabhavau tatra mahābhogo dhanino tadā

madhyamāt tau bhakārādyau mantrimukhyau ubhau tadā /
dhaninau śrīmatau khyātau śāsane 'smiṃ hite ratau /
japtamantrau tathā mantre kumārastvayi mantrarāṭ

tataḥ pareṇa bhūpālo jātānā manujeśvarau /
saptamaṣṭaśatā trīṇi śrīkaṇṭhāvāsinastadā

ādityanāmā vaiśyāstu sthānamīśvaravāsinaḥ /
bhaviṣyati na sandeho ante sarvatra bhūpatiḥ /
hakārākhyo nāmataḥ prokto sārvabhūminarādhipaḥ

tatra deśe ime mantrā siddhiṃ gaccheyu vai tadā /
dharmarājena ye proktā vidyā śāntikapauṣṭikā

vividhāṃ bhogaviṣayāṃ sampadāṃ vividhāṃstathā /
nānā ca rūpadhāriṇyo yakṣiṇyaśca maharddhikāḥ

bhaviṣyanti tatra vai siddhā tasmiṃ kāle yugādhame /
dakṣiṇāṃ diśimāśritya sasamudrāṃ vasundharām

rājā śvetasucandraśca sātavāhana eva tu /
mahendraṃ śaṅkaraścaiva vallabho 'tha mahīpatiḥ

sukeśikeśiśca vikhyātā dakṣiṇāṃ diśi /
maṅgalo vallabhaḥ prokto govindaḥ bṛndakhetuḥ

mutpātaḥ potaścaiva mahendraḥ candra eva tu /
gopendro indrasenaśca pradyumno mādhavastadā

gaṇaśaṅkaraścaiva vyāghraṃ siṃho tathā budhaḥ /
budhaḥ śuddhastathā kumbhaḥ nikumbhaścaiva kīrtyate

mathitaḥ sumitaścaiva .......... /
balaḥ pulinaścaiva sukeśiḥ keśinastathā

anantā bahavo khyātā bhūpālā dakṣiṇāṃ diśi /
atītānāgatā cāpi varttamānā nibodhitā

nānāmṛtyubhave hyete nānāvyādhisamāplutā /
śastrasampātadurbhikṣaiḥ mṛtāḥ kecid diviṃ gatāḥ

ityete nṛpatayaḥ sarve kathitā vipukhastathā /
mahendrānta nṛpotākhyātaḥ tathāsahatistathā

........ bhaviṣyanti tadā abhūt /
tasmiṃ kāle tadā deśe mantrāṇāṃ siddhimicchatām

sādhanīyā imā mantrāḥ krodhādyāḥ kuliśocitāḥ /
ābhicārukakarmeṣu vaśyārtthe ca tathā hitam

mañjuśriyo 'tha māhātmā vai kumāro bālarūpiṇaḥ /
sidhyate ca tadā deśe kaliprāpte ca tadā yuge

parvatavindhyamāśṛtaṃ sāgare lavaṇodake /
kārtikeyeti samākhyātaḥ sattvānāṃ varadāyakaḥ

ājñāṃ bho bodhisattvena mañjughoṣeṇa dhīmatā /
sattvānāṃ hitakāmyarthaṃ nivased dakṣiṇāṃ diśi

kārtikeyasya ye mantrāḥ kathitā mañjubhāṇinā /
tasmiṃ deśe tadā siddhiḥ bhaviṣyati na saṃśayaḥ

śrīparvate tadā deśe vindhyakukṣinitambayoḥ /
dvīpeṣveva ca sarvatra kaliṅgodreṣu kīrtyate

traiguṇyā mlecchadeśeṣu ...... samantataḥ /
ambhodheḥ kukṣitīrāntāḥ nṛpā khyātā anantakāḥ

kāmarūpakalākhyā hi himādreḥ kukṣimāśritāḥ /
bahavo nṛpatayo proktā udrasandhiṣu sarvadā

nānāmlecchagaṇādhyakṣā śāstupūjakatatparāḥ /
indro sucandramahendraśca bhūpāla mlecchavāsinaḥ

kṣmāpālau ubhau tatra ṣoaḍaśārddhā śāsane ratā /
pūjakāḥ śāstubimbānāṃ tvatprasādā ........

bhaviṣyanti na sandeho prasannā śāsane jine /
bahavo nṛpavarāḥ proktāḥ pūrvāyāṃ diśimāśṛtāḥ /
atītānāgatā ye tu varttamānāśca sarvadā

ādyaṃ nṛpavaraṃ vakṣye gauḍānāṃ vaṃśajo bhuvi /
jāto 'sau nagare ramye vardhamāne yaśasvinaḥ

lokākhyo nāma sau rājā bhavati gauḍavardhanaḥ /
māmānutpannaloke 'smiṃ bhavitāsau dharmacintakaḥ

bahavaḥ kṣitipāḥ krāntā vividhā jīvakarmiṇaḥ /
madhyakāle samāsvāsā madhyamā madhyadharmiṇaḥ /
anante va yuge nṛpendrā śṛṇu tattvataḥ

samudrākhyo nṛpaścaiva vikramaścaiva kīrttitaḥ /
mahendranṛpavaro mukhya sakārādyo mataḥ param

devarājākhyanāmāsau ....... yugādhame /
nirddhākhye nṛpaḥ śreṣṭhaḥ buddhimān dharmavatsalaḥ

tasyāpyanujo balādhyakṣaḥ śāsane ca hite rataḥ /
prācīṃ samudraparyantāṃ caityālaṅkṛtaśobhanām

kariṣyati na sandehaḥ kṛtsnāṃ vasumatīṃ tadā /
vihārārāmavāpīśca udyānā maṇḍavakāṃ sadā

kariṣyati tadā śrīmāṃ saṅkramāṃ setukārakaḥ /
śāsturbimbān tadā pūjet tatprasannāṃśca pūjayet

kṛtvā rājyaṃ mahīpālo niḥsapatnamakaṇṭakam /
jīved varṣāṃ ṣaṭtṛṃśattṛṃśāhaṃ pravrajenṛpaḥ

tatotmānaṃ ghātayed rājā dhyāyantaḥ sampramūrcchitaḥ /
putraśokābhisantaptaḥ yativṛttisamāśṛtaḥ

tato 'sau bhinnadehastu narakebhyopapadyata /
trīṇi ekaṃ ca divasāni uṣitvā narakaṃ gatim

dehamutsṛjya diviṃ gacchet sadā nṛpaḥ /
devānāṃ sukṛtināṃ lokaḥ śuddhāvāsa iti smṛtaḥ /
devarājā bhavet tatra śuddhātmā bodhinimnagaḥ

śataśaḥ sahasraśaścaiva anubhūya diviṃ sukham /
punareva mānuṣyaṃ prāpya buddho bhūyo bhavāntare /
tenaiva kāritaṃ karma anyajanmeṣu dehinām

purīmujjayanīṃ khyātā kālavānāṃ jane tadā /
tatrāyanīmukhyaḥ vaṇijo yo mahādhanaḥ

buddhānāmasambhave kāle śūnye loke nirāspade /
pratyekabuddhā loke 'smiṃ viharanti maharddhikāḥ

sattvānāṃ hitakāmāya vicaranti mahītale /
purī ujjayinī prāpya praviṣṭā piṇḍacārikā /
vargacāriṇo mahātmānaḥ rathyāyāmavataratat

vāṇyājeyastustadā saiva duṣṭvā tu saṃmukhāṃ munim /
nimantrayāmāsa tadā bhaktena svagṛhaṃ caiva nayet tadā /
nītvā munivarāṃ kṣipramāsanena nimantrayet

saṅghībhavadhva bhavataḥ bhaktakālo 'yamupasthitaḥ /
te 'pi tūṣṇīṃ mahātmāno na vācāṃ bhāṣire tadā

pātraṃ ca nāmayāmāsa vāṇije yasya sarvadā /
vaṇijā iṅgitajñāśca buddhimanto bhavet tadā

pātraṃ ca pūrayāmāsa vividhākārabhojanaiḥ /
tadāsau svahastenaiva teṣāṃ prāyaccha yatnataḥ

gṛhītvā tu tataḥ sarve prajagmuḥ sarvatonabham /
dīpamāleva dṛśyante vyomamūrttisamāśritāḥ

tato 'sau hṛṣṭaromastu saṃvegabahulastadā /
bhūmyāṃ ca patitastatra ṛddhyā varjitamānasaḥ

praṇidhiṃ ca tadā cakre pravyāhāravabhaṃ yathā /
anena kuśalamūlena yanmayā prāptamadyataḥ

eṣā munivarā magra bhaved buddho hyanuttaraḥ /
daśajanmasahasrāṇi cakravarttī tadā bhuvi

tato 'sau vyuktadehastu koṭiṣaṣṭidivaukasām /
anubhūya ciraṃ saukhyaṃ tyaktvā janma divaukasām

māṇuṣāṇāṃ tadā janma prāpnuyāt paravaśā iha /
tasya rājakule janma bhavatīha tu sarvadā

bālākhyo nāma sau nṛpatirbhavitā pūrvadeśakaḥ /
ājanmasahasrāṇi cirasaukhyamanāvṛtam /
prāpnuvanti yā nṛpatiḥ śrīmāṃ sarvajñatvaṃ ca paścimam

evaṃ bahuvidhaṃ matvā sampado vipulāstathā /
ko nu kuryāt tadā śāstuḥ pūjanādhyeṣaṇāṃstathā /
kārāṃśca śreyasīṃ yuktāṃ bodhimārgaviyojanīm

tasyāpareṇa nṛpatiḥ gauḍānāṃ prabhaviṣṇavaḥ /
kumārākhyo nāmataḥ proktaḥ so 'pi ratyantadharmavām

tasyāpareṇa śrīmāṃ ukārākhyeti viśrutaḥ /
tataḥ pareṇa viśleṣa teṣāmanyonyateṣyate

mahāviśleṣaṇā hyete gauḍā raudracetasaḥ /
tato deva iti khyāto rājā māgadhakaḥ smṛtaḥ

so 'pyatahatavidhvastaripubhiḥ samatā vṛtaḥ /
yasyāpareṇa candrākhyaḥ nṛpatitvaṃ kārayet tadā

so 'pi śastravibhinnastu pūrvacoditakarmaṇā /
tasyāpi suto dvādaśa gaṇanāṃ jīvenmāsaparamparam

so 'pi vibhinnaśastreṇa bāla eva abhūt tadā /
teṣāṃ parasparopavighnacittānāṃ raudrāṇāmahite ratām

bhaviṣyati tadā kāle bhakārākhyo nṛpapuṅgavaḥ /
agraṇīrgauḍalokānāṃ mahāvyādhisamākulaḥ

tenaiva vyādhinā ārttaḥ kālaṃ kṛtvā adho gataḥ /
tasyāpareṇa dakārākhyaḥ katipāyāṃ divasāṃ daśa

bhavitā gauḍadeśe 'smiṃ gaṅgātīrasamāśṛtaḥ /
tasyāpareṇa bhakārākhyastrīṇi divasāni kārayet

tato gopālako rājā bhavitā sarvadastadā /
priyavādī ca so rājā ghṛṇī caiva mahābalaḥ

strīvaśaḥ kṛpaṇo mūrkhaḥ jitaśatrurbhaved yuvām /
kalyāṇamitramāgamya mahātyāgī bhavet tadā

vihārāṃścaityavarāṃ ramyāmārāmāṃ vividhāstadā /
vāpyo 'tha jalasampannā satrāgārāṃ suśobhanām

sevato bahavastasya yaśaḥ kīrtyāthamudyataḥ /
devāyatanaramyāṃ vai guṇāvasathakāriṇaḥ

pāṣaṇḍībhiḥ samākrāntaṃ nānātīrtthikavāsibhiḥ /
ākrāntaḥ so diśaḥ sarvā samudrātīracaryagāḥ

kripī bhogī pramādī ca saṃ rājā dharmavatsalaḥ /
bhaviṣyati na sandehaḥ sa prācīṃ diśi mūrjitaḥ

sadyātīsārasaṃyuktavārddhikye samupasthitaḥ /
gaṅgātīramupāśritya rājyaṃ kṛtvā tu vai tadā /
viṃśad varṣāṇi saptaṃ ca janmanāśītiko mṛtaḥ

tato 'sau bhinnadehastu tiryagebhyo 'pipadyate /
nāgarājā tataḥ śrīmān dharmavatsalaḥ /
yenāsya kāritaṃ caitya śāstubimbaṃ manoramam

vihārāṃ kāritavāṃścātra saṅghasyārthe tadā bhuvi /
tena karmavipākena antime ca bhave śrite

buddhatvaṃ niyataṃ mārgaṃ prāpnuyādacalaṃ padam /
tataḥ pareṇa gauḍānāṃ tīrthikākrāntapuraṃ bhuvi

tā pūrvadeśe 'smin nagare tīrthikasamāhvaye /
bhagavākhye nṛpe khyātaḥ gauḍānāṃ prabhaviṣṇavaḥ

abhiṣikto dakṣiṇātyena pratinā prabhaviṣṇunā /
rājyaṃ kṛtvā tu vai tatra paścimāṃ diśimāgataḥ

praviśya nagarīṃ ramyāṃ sāketāṃ tu yathepsitaḥ /
ariṇā bhūtastu punareva nivartate

prācīṃ samudraparyantāṃ taskaraiśca samāvṛtaḥ /
sastraprahāravidhvastamṛto 'sau pretatāṃ gataḥ

trīṇi varṣāṇi kṛtvāsau bhūpālo rājyamalpakam /
tato dasyubhirgrastaḥ mṛtaḥ pretamaharddhikaḥ /
trīṇi varṣāṇi tatraiva pretebhyo rājyamakārayet

tato 'pi so tyaktadehastu pretalokāṃ sudāruṇām /
tasmānmuktajanmānaḥ svarlokaṃ ca sadā vrajet

tasyādhareṇa nṛpatistu samudrākhyo nāma kīrttitaḥ /
trīṇi divasāni durmedhaḥ rājyaṃ prāpsyati durmatiḥ

tasyāpyanujo vikyātaḥ bhasmamākhyo nāma nāmataḥ /
prabhuḥ prāṇātipātasaṃyuktaḥ mahāsāvadyakāriṇaḥ /
nirghṛṇī apramattaśca svaśarīre tu yatnataḥ

paralokārthine nāsau balisattvadihaiva tu /
akalyāṇamitramāgamya pāpaṃ karma kṛtaṃ bahu

dvijairākrāntatadrājyaṃ tārkikaiḥ kṛpaṇaistathā /
vividhākārabhogāṃśca mānuṣā pitarāstathā

vividhāṃ sampadāṃ so 'pi prāptavān nṛpatistathā /
so 'nupūrveṇa gatvāsau paścimāṃ diśi bhūpatiḥ /
kaśmīradvāraparyantaṃ uttarāṃ diśimāśṛtaḥ

tatrāpi jitasaṅgrāmī rājyaṃ kṛtvā tu vai tadā /
dvādaśābdāni sarvatra māsāṃ pañcadaśastathā

pṛthivyāmārtarogo 'sau mūrchitaśca punaḥ punaḥ /
mahāduḥkhābhibhūtastu bhinnadeha adhogataḥ

teṣāṃ parasparato dveṣe lubdhānāṃ rājyahetunām /
mahāśastropasampātaṃ kṛtvā te tu parasparam

abhiṣicya tadā rājyaṃ sakarākhyaṃ bāladārakam /
cihnamātraṃ tu taṃ kṛtvā punareva nivarttate /
yairdvijātimukyānāṃ bhinnāste 'pi parasparam

māgadhāṃ janapadāṃ prāpya pure udumbarāhvaye /
dvai bālau dvijātimukhyaśca abhiṣecya svayaṃ bhuvi

tato 'nupūrveṇa gatvāsau prācīṃ diśimāśṛtaḥ /
gauḍāṃ janapadāṃ prāpya niḥsapatnā hya vai tadā

ghātitau bālamukhyau tau kaliṅgakṣu durātmanā /
akalyāṇamitramāgamya kṛtaṃ prāṇivadho bahum

pūrvasammānitā ye tu nṛpairvigrahamānibhiḥ /
ghātayāmāsa sarveṣāṃ gauḍānāṃ janavāsinām

somākhyo 'pi tato rājā ekavīro bhaviṣyati /
gaṅgātīraparyantaṃ vārāṇasyāmataḥ param

nāśayiṣyati durmedhaḥ śāsturbimbāṃ manoramām /
jinaistu kathitaṃ pūrvaṃ dharmasetumanalpakam

dāhāpayati durmedhaḥ tīrtthikasya vace rataḥ /
tato 'sau kruddhalubdhastu mitthyāmānī hyasaṃmataḥ

vihārārāmacaityāṃśca nirgranthāṃ vasathāṃ bhuvi /
bhetsyate ca tadā sarvāṃ vṛttirodhamakāraka

bhaviṣyate ca tadā kāle madhyadeśe nṛpo varaḥ /
rakārādyotayuktātmā vaiśyavṛttimacañcalaḥ

śāsane 'smiṃ tathā śakta somākhyasasamo nṛpa /
so 'pi yāti tavāntena nagnajātinṛpeṇa tu

tasyāpyanujo hakārākhya ekavīro bhaviṣyati /
mahāsainyasamāyuktaḥ śūraḥ krāntavikramaḥ

nirdhāraye hakārākhyo nṛpatiṃ somaviśrutam /
vaiśyavṛttistato rājā mahāsainyo mahābalaḥ

pūrvadeśaṃ tadā jagmuḥ puṇḍrākhyaṃ puramuttamam /
kṣatradharmaṃ samāśṛtya mānaroṣamaśīlinaḥ

ghṛṇī dharmārtthako vidvāṃ kuryāt prāṇivadhaṃ bahūn /
sattvānupīḍanaparo nigrahāyaiva so rataḥ

parājayāmāsa somākhyaṃ duṣṭakarmānucāriṇam /
tato niṣiddhaḥ somākhyo svadeśenāvatiṣṭhataḥ

nivartayāmāsa hakārākhyaḥ mleccharājye mapūjitaḥ /
tuṣṭakarmā hakārākhyo nṛpaḥ śreyasā cārthadharmiṇaḥ

svadeśenaiva prayātaḥ yatheṣṭagatināpi vā /
taireva kāritaṃ karma rājyaharṣīsamanvitaiḥ

adhunā prāptavāṃ bhogāṃ rājyavṛttimupāśṛtām /
pūrvaṃ pratyekabuddhāya bhaktācchādanadattavām

pādukau ca tadā dattau cchatracāmarabhūṣitam /
tasya dharmaprabhāvetau mahārājyatṛdevatau

bhuktavāṃ bhogasampattīḥ devamanuṣyasarvadā /
somākhyo dvijāhvayo mahābhogī bhave hyasau

bhogāṃ dvijātiṣu dattvā vai rājyaṃ kṛtvā vai tadā /
........ sārdhaṃ saptamaṃ tathā

varṣāṃ daśa saptaṃ ca māsamekaṃ tathāparam /
divasāṃ saptamaṣṭau ca mukharogasamākulaḥ

kṛmibhirbhakṣamāṇastu kālaṃ kṛtvā adhogati /
amānuṣākrāntavidhvastaṃ tat puraṃ ca abhūt tadā

māṇuṣeṇaiva doṣeṇa jvarārto vyādhimūrcchitaḥ /
mṛto mantraprayogeṇa rājāsau kālagatastadā

avīcīrnāma vikhyātaṃ narakaṃ pāpakāriṇā /
tatrāsau upapadyeta pāpakarmāntacāriṇaḥ

mahākalpaṃ tadā narake pacyate 'sau duṣṭacetasaḥ /
tato ṭaṭaṃ hahavaṃ caiva sañjīvaṃ kālasūtraṃ tu

asipatravanaṃ ghoraṃ anubhūya punaḥ punaḥ /
tiryakpretalokaṃ ca ........ punastathā

evaṃ janmasahasrāṇi saṃsāre saṃsarataḥ punaḥ /
nāsau vindati saukhyāni duḥkhabhājī bhaved sadā

tasmāt sarvaprayatnena śāsane 'smiṃ tathāgate /
prasādyamakhilaṃ cittaṃ gacchadhvaṃ nirjarasampadam

buddhe kārāpakārāṃ ca anantā bhavati karmatā /
buddhe prāsādaḥ kartavyaḥ dharmasaṅghe ca vai tathā

bhavanti loke agrastu cirante pūjakā nṛpā /
maheśākhyamaherājyaṃ mahābhogā dhaneśvarā

prāpnuyād vividhāṃ sokhyāṃ sampadāṃ vipulāṃ nṛpā /
pūjayitvā tu lokāgryāṃ loka īśvaratāṃ vrajet

śakratvamatha yāmyatvaṃ brahmatvaṃ ca punaḥ punaḥ /
pratyekabuddhā buddhatvaṃ śrāvakatvaṃ ca vai bhuvi /
prāpnuvanti triyānamagratvaṃ dvau yātau niḥspṛhatāṃ gataḥ

evaṃ hyacintiyā buddhā buddhajñānopacintiyaḥ /
acintiyo hi phalaṃ teṣāṃ vipāko bhavantyacintiyaḥ

ataḥ pareṇa somākhyo nṛpatau apyastamite bhuvi /
anyonyakṣobhaśīlastu gauḍatantro bhaviṣyati /
sadā udyataśastrāstu anyonyāpi napekṣiṇaḥ

divasā saptamevaṃ tu māsamekaṃ tathāparam /
gaṇajyaṃ tadā tantre bhaviṣyati sadā bhuvi

gaṅgātīre etasmiṃ vihārādhyuṣitamālaye /
tataḥ pareṇa sutastasya somākhyasya ca mānave

māsānyaṣṭau divasā pañca sādhāhe suniśātyantu /
............ vaiśyavarṇaśiśustadā

nāgarājasamāhveyo gauḍarājā bhaviṣyati /
ante tasya nṛpe tiṣṭhaṃ jayādyāvarṇatadviśau

vaiśyaiḥ parivṛtā vaiśyaṃ nāgāhveyo samantataḥ /
durbhikṣopadravāste 'pi paracakropadrutāstadā

teṣāṃ rājyamasamprāptaṃ mahātaskaramākulāḥ /
te taṃ bhraṣṭamaryādā ..........

varṣāṃ pañcakamekaṃ vai bhuṅkte tatra samākulām /
prāṇātyayaṃ tadā cakruḥ kṛtvā prāṇivadhaṃ bahūn

pūrvakarmaparādhena te janā vaiśyavṛttayaḥ /
anyonyakṣobhaśīlāstu bhaviṣyanti tadā abhūt

prabhaviṣṇustadā teṣāṃ kṣatravṛttisamāśritaḥ /
bhaviṣyanti na sandehaḥ gauḍatantre narādhipaḥ

śastrabhinnā tathā kecid vyādhibhiśca samākulāḥ /
kālaṃ kṛtvā tato yātā narakebhyo narādhipāḥ

strīpradhānaṃ śiśustatra punareva narādhipaḥ /
pakṣamekaṃ tathā vai śastrabhinno hatastadā

mahādurbhikṣasampātaṃ paracakrasamākulam /
prācyā janapadā vyastā utrastā gatamānasā /
bhaviṣyanti na sandehaḥ tasmiṃ deśe narādhipāḥ

madhurāyāṃ jātavaṃśāḍhyaḥ vaṇik sūrvī nṛpo varaḥ /
so 'pi pūjitamūrttistu māgadhānāṃ nṛpo bhavet

tasyāpyanujo bhakārākhyaḥ prācīṃ diśi samāśṛtaḥ /
tasyāpi sutaḥ pakārākhyaḥ prāgdeśeṣveva jāyataḥ /
kṣatriyaḥ agraṇī proktaḥ bālabandhānucāriṇaḥ

daśa varṣāṇi saptaṃ ca bandhanasthamadhiṣṭhitaḥ /
gopākhyena nṛpatinā baddho mukto 'sau bhagavāhvaye

paścāddeśasamāyātaḥ akārākhyo mahānṛpa /
prāciṃ diśiparyantaṃ gaṅgātīramatiṣṭhata

śūdravarṇo mahārājā mahāsainyo mahābalaḥ /
so taṃ tīraṃ samāśṛtya tiṣṭhate ca samantataḥ

purīṃ gauḍajane khyātaṃ tīrthāhvati viśrutaḥ /
samākramya rājāsau tiṣṭhate ca mahābalaḥ

tatrau ca kṣatriyo bālaḥ vaṇinā ca tathāgataḥ /
rātrau praviṣṭavāṃstatra rātryante ca prapūjitaḥ

śūdravarṇai nṛpaḥ khyātaḥ punareva nivartayam /
gaṅgātīraparyantaṃ nagare nandasamāhvaye

māgadhānāṃ tadā rājyaṃ sthāpayāmāsa taṃ śiśum /
kāśinaṃ pada prāpya vāraṇasyamataḥ pure

praviśecchūdravarṇastu mahīpālo mahābalaḥ /
mahārāgeṇa duḥkhārtaḥ abhiṣece sa taṃ tadā

abhiṣicya tadā rājyaṃ grahākhyaṃ bāladārakam /
mahārogābhibhūtastu bhūmāvāvarta vai tadā

tatordhvaṃ niḥśvasya yatnena bhinnadeho 'pi tīryataḥ /
tiryebhye vasaṃ māsāṃ aṣṭa saptaṃ ca vai tadā

tato 'sau muktajanmāna devebhyo mupapadyate /
vividhāṃ devasampattiṃ viṃśajanmāni vai tadā

tato 'nupūrveṇa dharmātmā pratyekaṃ bodhimāpnuyāt /
tenaivopārjitaṃ karma pūrvakāleṣu janmani

pratyekabuddho mahātmā vai vastraiḥ samabhicchāditaḥ /
upānahaṃ nāmayāmāsa hastyaśvarathahetunā /
bhojanaṃ ca tadā tasya tasmā dadyuḥ prayatnadhīḥ

tena karmavipākena devarājā śatakratuḥ /
bhavitā devaloke 'smiṃ triṃśatkoṭyāstu janmataḥ /
bhuvimāyāta rājāsau bhavitā iha janmani

parairupārjitaṃ rājyaṃ anubhoktā bhaviṣyati /
tasyāpi ca suto rājā vārāṇasyāṃ tu pratiṣṭhitaḥ

samantāddhatavidhvastaviluptarājyo bhaviṣyati /
dvijakrāntamabhūyiṣṭhaṃ tad rājyaṃ ripubhistadā

pramādī kāmacārī ca sa rājā grahacihnitaḥ /
apaścime tu kāle vai paścācchatruhato mṛtaḥ

māgadho nṛpatisteṣāṃ anyonyāvarodhinaḥ /
somākhye nṛpate vṛtte prāgdeśe samantataḥ

gaṅgātīraparyantaṃ vārāṇasyāmataḥ param /
bhaviṣyati tadā rājā pakārākhyaḥ kṣatriyastadā /
yo 'sau śūdravarṇena akārākhyena pūjitaḥ

nagare nandasamākhyāte gaṅgātīre tu samāśrite /
bhavitā kṣatriyo rājā pūrvakarmaistu coditaḥ /
tenaiva kāritaṃ karma kṛtaṃ cāpyanumoditam

atikrānte tadā kāle kanakāhve śāstusambhave /
vārāṇasyāṃ mahānagaryāṃ śreṣṭhirāsīnmahādhanaḥ

vaṇijaḥ sa suto bālaḥ bāliśaistu samāvṛtaḥ /
pāṃsukrīḍanamarthāya rathyāyāṃ pratipadyate

svagṛhe stūpavaraṃ dṛṣṭvā pitāmātrābhipūjitam /
tadeva manasā varte stūpaṃ kṛtvā tu pāṃsunā

pūjāṃ ca kārayāmāsa nirmālyakusumaistadā /
saṃstavāmāsa taṃ stūpaṃ buddhatvaṃ śrāddhagatismṛtiḥ

krīḍate bālastatra śiśubhiḥ parivāritaḥ /
jine kanakaśāstusya śrāvakāgro tadaikakaḥ

vītadoṣastu yuktātmā traidhātukamuktadhīḥ /
tadāsau vītadoṣastu piṇḍapātamahiṇḍata

praviśate ca tadā nagarīṃ vāraṇasyāṃ suśobhanām /
vītarāgastadādeśaṃ yatra te bāliśā bhuvi

yatra te śaiśavaḥ sarve samantāt parivāritāḥ /
ehi bhikṣu ihāgaccha vanda stvaṃ śāstucaityakam /
asmābhiḥ kāritaṃ yatnāt na tvaṃ paśyasi śobhanam

tataḥ śreṣṭhisuto bālaḥ gṛhītvā tṛṇavartitam /
krīḍayā bandhayāmāsa vītarāgaṃ maharddhikam

samanvāharati tatrāsau vītarāgo maharddhikaḥ /
paśyate bhuvi tatrasthaṃ caityaṃ kāritakaṃ hi taiḥ /
bāliśaṃ mūrdhni māsṛjya evaṃ voca mahātmadhīḥ

muñca dāraka gacchāmo yatra tvaṃ kāritaṃ kṛtiḥ /
āgatā ca tataḥ sarve yatra dhātudharaṃ bhuvi

vanditvā vītarāgā mahātmāsau śiśubhiścaitadāsamaiḥ /
punareva prasthito vīraḥ piṇḍakārthaṃ yathepsataḥ

tataḥ śreṣṭhisuto bālaḥ gṛhītvā cīvarāntikam /
svagṛhaṃ nītavāṃ hyāsīd bhojanārthaṃ ca kārayet

tataḥ śreṣṭhimukhyo 'sau dṛṣṭvā taṃ bāliśam .... /
gṛhītvā cīvarānte tu vītarāgaṃ maharddhikam

bhīto hṛṣṭaromaśca gṛhaṃ me āgato 'grajaḥ /
pādayornipatitaṃ kṣipraṃ muñcāpayati bālakam

gṛhītvā tu sutaṃ tasya kṣamāpayāmāsa yatnataḥ /
pātraṃ tu gṛhītvā vai jine agrajite hite

pūrayāmāsa taṃ pātraṃ śālivyañjanabhakṣakaiḥ /
sutaṃ cāmantrayāmāsa gṛhya mantra prayaccha bhoḥ

tato vālo 'tha saprajño hasto prakṣālya yatnataḥ /
gṛhītvā pātrapūraṃ tu vītarāgāya nāmayet

nāmayitvā tu taṃ kṣipraṃ pādayornipatito bhuvi /
vītarāgo gṛhītvā tu .... bhuktavām /
vītarāgo tadā hyāsīt sukhasaṃsparśaṃ ca labdhavām

aparastatra bālo vai mātsaryāviṣṭamānasaḥ /
kevalaṃ roṣacittena vītarāgo pare 'hani /
prabhūtaṃ khādyabhojyaṃ ca gṛhītvā taṃ prayacchata

yadyasti kuśalaṃ kiñcit tvayi datvā tu piṇḍakam /
anena śreṣṭhisutasyāhaṃ bhavitā āḍhyatamo bhuvi

tataste tīrthikāḥ sarve dvijātivanitā tadā /
sannipatya tadā sarve kalahaṃ nindakaṃ kṛtvā

bāliśastvaṃ na jānāsi muṇḍakānāṃ kuto gatiḥ /
ātmanā asthitā hyete pareṣāṃ kutra nirvṛtiḥ

tasya bālakasattvasya dveṣamutpanna tādṛśam /
nāśayāmāsa eteṣāṃ śāstāreṇopavarṇitām

dharmasetu sadā kīrtti vihārāṃ caityavarāṃ bhuvi /
śreṣṭhimukhyasutasyaiva āghāta caiva kārayet

eteṣāṃ kuṇḍakānāṃ tu dattvā dānaṃ kuto gatiḥ /
kugatigrastacittānāṃ vighātaṃ kārayāmyaham

yo sau vādyatamo bālo somākhyo 'pi nṛpo hyasau /
anubhūya ciraṃ duḥkhaṃ vipākaḥ tasya naiṣṭhikam

śreṣṭhimukhyasya putro 'sau bhinnadeho diviṃ gataḥ /
anubhūya ciraṃ saukhyaṃ divaukasānāṃ tadā tadā

cyuto 'sau devaloke 'smim ...... /
...... tadājanme bandhaṃ setsyati sarvadā

tṛjanmopagato martyaḥ kṣmāpatiḥ bhavitā punaḥ /
punaśca patitaḥ karmeṇa tatra tatra tadā tadā

bhavitā janmaloke 'smiṃ nṛpatitvaṃ kārayed bhuvi /
nirmālyadānaṃ yasstūpe nivedya sau bālacāpalāt

tenāsya bhogā kliṣṭā vai kliṣṭādānasya tat phalam /
duḥkhena bhogāṃstu prāptastu nagnasandhīva sau nṛpaḥ

asthairyā bālavattvacca calacittatayā ca sadā /
kurvīta mahatīṃ pūjāṃ śāsturdhātuvare bhuvi

tena karmavipākena rājyaiśvaryaṃ calatāṃ vrajet /
bhūtvā bhavati rājā abhūtvā pratigacchati

udīcyapratīcyamadhyau so nṛpatitvaṃ kārayed bhuvi /
yo sau muktadhībandhaḥ punarmuktaśca bālakaḥ

tena karmavipākena baddho muktaśca bālakaḥ /
pañcajanmaśatānaiva baddho muktaśca bālakaḥ

apaścime tu tadā janme bandhaṃ chetsyati sarvadā /
pañcapañcāśavarṣastu saptasaptatiko 'pi vā /
prācīṃ samudraparyantāṃ rājāsau bhavitā bhuvi

vindhyakukṣiniviṣṭāstu pratyantamlecchataskarāḥ /
sarve te vaśavarti syāt pakārākhye nṛpatau bhuvi

himādrikukṣisanniviṣṭā tu uttarāṃ diśimāśṛtām /
sarvāṃ janapadāṃ bhuṅkte rājāsau kṣatriyastadā

pāṃsunā kṛtvā stūpaṃ ajñānād bālabhāvataḥ /
māgadheṣu bhaved rājā niḥsapatnamakaṇṭakaḥ /
saimāmaṭavīparyantāṃ prācīsamudramāśṛtaḥ

lauhityāparato dhīmāṃ uttare himavāṃstathā /
paścāt kāśipurī ramyāṃ śṛṅgākhye pura eva vā

atrāntare mahīpālaḥ śāstuśāsanadāyakaḥ /
pañcakesarināmānau jitvā nṛpatinau sau

....... svaṃ rājyamakārayat /
sarvāṃstāṃ siṃhajāste 'pi dhvastonmūlitā tadā

himādrikukṣiprācyāṃ bho daśānūpaḥ tīramāśrayet /
sattvā janapadāṃ bhuṅkte rājāsau kṣaitriyastadā

abhivardhamānajanmastu bhogāstasya ca varddhatām /
vārdhikye ca tadā prokte bhogāṃ niścalatāṃ vrajet

aśītivarṣāṇi jīveyuḥ sapta sapta tathā parām /
tato jīrṇābhibhūtastu kālaṃ kṛtvā diviṃ gataḥ

devaloke 'smiṃ cirasaukhyamanubhūya tathā nṛpaḥ /
punaścavati karmeṇa pūrvasaṅkleśitena tu /
tiryakṣu nvase māsaṃ nāgarājamaharddhikaḥ

tato 'sau bhinnadehastu mānuṣebhyopapadyate /
kṣatriyo dhīmato jato vaṇigjīvī viśāradaḥ

kalyāṇamitramāgamya bhoktāsau jinaśāsane /
sādhayed vidyārājñīṃ tārādeviṃ maharddhikām

siddhamantrastu jino nāsau yatheṣṭagaticāriṇaḥ /
vidyādharāṇāṃ tadā rājā bhavitā sugatastadā

cakravartistadā khyāto nāmnāsau citraketavaḥ /
vidyādharāṇāṃ tadā karma khyāto 'sau matimāṃstathā

aśītivarṣakoṭyāni navasaptāni caitadā /
divyamānuṣyamādyena bhavitā cakravarttinaḥ /
parivārastasya kanyānāṃ ṣaṣṭikoṭyo majāyata

tato 'sau bhinnadehastu tārādevyānucoditaḥ /
devānāmadhipatiṃ gacchet tatra dharmaṃ ca deśayet

so 'nupūrveṇa mahīpāla kṣipraṃ bodhiparāyaṇaḥ /
pakārākhye ca nṛpatau vṛtte tadā kāle yugādhame

bhinnaṃ parasparaṃ tatra mahāvigahamāśṛtāḥ /
bhṛtyastasya tu saptāhaṃ rājyaiśvaryamakārayet

tato 'nupūrveṇa saptāhād vakārākhyo nṛpatistathā /
so 'pyahatavidhvastaḥ prakrameta diśāstataḥ

pakārākhye nṛpatau tatra bhakārādyo mataḥ paraḥ /
so 'pi trīṇi varṣāṇi rājyaiśvaryamakārayet

tasyāpyanujo vakārākhyo vratinā samadhiṣṭhitaḥ /
trīṇi varṣāṇi ekaṃ ca bhavitā rājyavarddhana

ajīrṇitau ubhāvapyetau sadyātīsāramūrcchitau /
......... kālagatau loke yakṣebhyopapadyate /
te 'nūpūrveṇa dharmātmāno pratyekāṃ bodhimāpnuyām

tasyāpyanujo dhakārākhyaḥ kṣatriyo dharmavatsalaḥ /
bhavitā so 'pi rājā vai trīṇi varṣāṇi ....... /
bhavitāsau narādhipaḥ ........

tasyāpi kanyaso rājā dhakārākhyo 'tha viśrutaḥ /
bhavitā tatra deśe 'smiṃ sārvabhūmikabhūpatiḥ

hastyaśvarathayānāni nauyānāni samantataḥ /
jetā ripūṇāṃ sarveṣāṃ samare pratyupasthitām

sa imāṃ janapadāṃ sarvāṃ kṛtsnāṃ caiva vasundharām /
śāstubimbairvihāraiśca jinānāṃ dhātudharaistathā /
śobhāpayati sarvāṃ vai kṛtsnāṃ caiva vasundharām

nṛpapūrvī tathā tasya dvijātiḥ śākyajastathā /
mānī tīkṣṇo 'tha sa prājñaḥ bodhinimno 'tha mānadhīḥ

saivāsya sukhāyatāṃ yāti tasmiṃ kāle yugādhame /
kṣatriyaḥ agradhīḥ proktaḥ rājā vai dharmavatsalaḥ /
jīved varṣaśataṃ viṃśat sapta cāṣṭaṃ ca yatnataḥ

strīkṛtenaiva doṣeṇa kālaṃ kṛtvā diviṃ gataḥ /
so 'nupūrveṇa medhāvī prāpnuyād bodhimuttamām

tataḥ pareṇa vikhyātaḥ śrīnāmātha mahīpatiḥ /
gauḍatantre mahārājā bhavitā dharmavatsalaḥ

gauḍānāṃ ca pure śreṣṭhe bakārādye ca mahājane /
kārayet tatra rājyaṃ vai jitaśu samantataḥ

vihārāṃ kārayāmāsa sapta cāṣṭau ca tatra vai /
dvijamukhyā tathā yukte śākajeti samāśrite

tena sāhāyyatāṃ yāte kuryād rājyaṃ samantataḥ /
aśītirekaṃ ca varṣāṇi jīved tatra narādhipaḥ

bhṛtyadoṣeṇa dharmātmā kālaṃ kṛtvā diviṃ gataḥ /
anupūrveṇa tathā rājyaṃ devānāmapi kārayet

tato 'sau bhinnadehastu svargāt svargatamaṃ vrajet /
paripūrya kuśalāt dharmāṃ bodhi ye tasya hetavaḥ

tasyaiva bhṛtyo rājā vai kuryād rājyamakaṇṭakam /
nāmnā yakārādyastu mahīpālo bhaviṣyati

sapta caikaṃ ca varṣāṇi kuryād rājyaṃ tadā yuge /
saiva ghātyate strībhiḥ ghātitaśca adho gataḥ

punaḥ pakāravaṃśāstu rājā bhavitātha kṣatriyaḥ /
tenāsau bhṛtyavargastu ghātito 'sau nirantaraḥ

akalyāṇamitramāgamya kṛtaṃ prāṇivadhaṃ bahūn /
bhavitā sarvaloke 'smiṃ pratāporjitamūrcchitaḥ

kṣiprakārī capalastu madyapaśca śaṭhapriyaḥ /
madyapramādāt sammūḍhaḥ tadāsau śayane bhuvi

bhinno 'sau śastraghātaistu aribhiśca samudyataiḥ /
tato 'sau bhinnadehastu kālaṃ kṛtvā aghogataḥ

tasyāpyanyatamo bhrātā rakārādyo nāmataḥ smṛtaḥ /
aṣṭacatvāriṃśaddivasāni rājyakarttā sadā bhuvi

datvā draviṇaṃ dvijātibhyaḥ kālaṃ kuryānna saṃśayaḥ /
tataḥ pareṇa bhūpālaḥ svādādyo bhavitā tadā

sa eva śūdravarṇastu vyaṅgaḥ kutsita eva tu /
adharmabhūyiṣṭhaḥ duḥśīlo vigrahe ca sadā rataḥ

dvijātigaṇasāmantāṃ saṃyatāṃ pravrajitāṃstathā /
sa hāpayati sarvā vai nigrahe ca sadā rataḥ

tīvraśāsanakartā ca taskarāṃ ghātakastathā /
niṣeddhā sarvaduṣṭānāṃ pāṣaṇḍavratamāśṛtām

vinirmuktā ca dātā ca rājyaṃ kṛtvā tu vai tadā /
daśavarṣāṇi saptaṃ ca jīved bhūpatistatra vai

kuṣṭhaduḥkhābhibhūtastu kālaṃ kṛtvātha tiryat /
tiryagbhyo nāgarājastu mahābhogī viśāradaḥ

mūrttimāṃ paramabībhatsī sphuṭāṭopī ca vai tadā /
anubhūya ciraṃ duḥkhaṃ dharmatastasya naiṣṭhikam

evamprakārāḥ kathitā bhūpālā lokavarddhanā /
viditā sarvaloke 'smiṃ prācyā ca sthitadehinī

pakārākhyasya nṛpatau vaṃśād vaṃśajo 'paraḥ /
kṣatriyaḥ śūravikrāntaḥ trisamudrādhipatistadā

bhavitā prācyadeśe 'smiṃ mahāsainyo mahābalaḥ /
śāstudhātudharairdivyairvihārāvasathamandiraiḥ

udyānavividhairvāpyaiḥ kūpamaṇḍapasaṅkramaiḥ /
satrāgāratathānityaṃ śobhāpayati medinīm

bhakto 'sau jinaravāṃ śreṣṭhāṃ uttamaṃ yānamāśṛtaḥ /
śākyapravrajitenaiva sa tadā niṣṭhito hyasau

varjayed dakṣiṇāṃ sarvāṃ dakṣiṇāṃ caiva prabhāvayet /
nāmnā kakāravikhyātaḥ smṛtimāṃścaiva viśāradaḥ

rājyaṃ kṛtvā tu bhūpālaḥ varṣāṇyekaviṃśati /
tato 'sau viṣūcikābhiśca kālaṃ kṛtvā diviṃ gataḥ

so 'nupūrveṇa medhāvī kṣipraṃ bodhiparāyaṇaḥ /
tasyaiva śeṣavaṃśāstu parādhīnāyatanavṛttanaḥ

tataḥ pareṇa bhūpālā gopālā dāsajīvinaḥ /
bhaviṣyati na sandeho dvijātikṛpaṇā janā

adharmiṣṭha tadā kāle nirnaṣṭe śāstuśāsane /
mantravādena sattvānāṃ kuśalārthāṃ niyojayet

kumāreṇa tu ye proktā mantrā bhogavarddhanā /
sādhanīyā tadā kāle rājyaiśvaryeṇa hetunā

na sādhyā uttamā siddhiḥ tasmiṃ deśe tu vai tadā /
dharmacakre tathā ramye mahābodhivane tathā

yatrāsau bhagavāṃ śāntiṃ niropadhiṃ ca praviṣṭavāṃ /
tatra sādhyau imau mantrau tārā bhṛkuṭī ca devatā

samudrakūle tathā nityaṃ visphūrjyāṃ saritāvare /
gaṅgātīre tu sarvatra sādhanīyābjasambhavā

yo 'sau bodhisattvastu candranāmātha viśrutaḥ /
sa vai tāramiti proktā vidyārājñī maharddhikā

strīrūpadhāriṇī bhūtvā devī viceruḥ sarvato jagataḥ /
sattvānāṃ hitakāmyārthaṃ karuṇārdreṇa cetasā

sahāṃ ca lokadhātusthāṃ taimbhyākhyamiti vartate /
maharddhiko bodhisattvastu daśabhūmyānantaraprabhuḥ

vineyaḥ sarvasattvānāṃ tārā devī tu kīrtyate /
ayatnasiddhimevāsya rakṣāvaraṇaguptaye

yatnena sādhyate devī bhogaiśvaryavivarddhanā /
bodhisambhārahetuṃ ca .........

anubaddhā tadā devī karuṇāviṣṭā hi dehinām /
mantrarūpeṇa sattvānāṃ bodhisambhārakāraṇā

sarveṣāṃ tuṣṭipuṣṭyarthaṃ pūrvāyāṃ diśimāśritaḥ /
sahasrārdhaṃ punaḥ kṛtvā ātmano bahudhā punaḥ

bhramate vasumatīṃ kṛtsnāṃ catvāro dadhi paryayām /
pūrveṇa tataḥ siddhiḥ vārāṇasyāṃ pareṇa vā

sakṣetrastasya devyā tu pūrvadeśaḥ prakīrtitaḥ /
siddhyate yakṣarāṭ tatra jambhalastu mahādyutiḥ

bhogakāmaiḥ tadā sattvaiḥ tasmiṃ kāle yugādhame /
yakṣarāṭ tārādevyā tu sādhyetau puṣṭikāmataḥ

krodhanāstu tathā mantrāḥ sādhyatāṃ dakṣiṇāpathe /
mlecchataskaradvīpeṣu ambhodhermadhya eva vā

sidhyate ca tadā tārā yakṣarāṭ caiva mahābalaḥ /
harikele karmaraṅge ca kāmarūpe kalaśāhvaye

vividhā dūtigaṇāḥ sarve yakṣiṇyaśca maharddhikāḥ /
mañjughoṣeṇa ye gītā mantrā bhogahetavaḥ /
tatra deśe yathā siddhiḥ nānyasthāneṣu tathā bhavet

pūrvaṃ diśi vidikṣuśca mantrā vividhahetavaḥ /
kathitāstu tadā kāle sādhanīyāstu dehibhiḥ

madhyadeśe tathā mantrī bhūpālā vividhāstathā /
vistarāṃ sattvadaurbalyāṃ alpabuddhiṃ nibodhatām /
saṃkṣepo nṛpatimukhyānāṃ saṅkhyā teṣāṃ nigadyate

makārādyo nakārādyaḥ pakārādyaśca kīrtyate /
dakārādyaśca ikārādyaḥ sakārādyaśva akārādya

grahākhyaśca kīrtyākhyaḥ hakārādyaśca ghuṣyate /
....... śakārādyaśca bhavet tadā

jakārādyo bakārādyo lakārādyaḥ somacihnitaḥ /
hakārādyaścaiva prakhyātaḥ akārādya punastathā

sakāro lakārādyaśca stryākhyayā lokavidviṣaḥ /
sakārādyo makārākhyaḥ lokānāṃ prabhaviṣṇavaḥ

kramataḥ kṛminaḥ cihnaḥ brāhmaṇāśca vaiśyavṛttayaḥ /
adharmakarmā bhūyiṣṭhāḥ vidviṣṭāḥ strīṣu lolupāḥ

prabhūtaparivārā mahīpālāstasmiṃ kāle yugādhame /
bhaviṣyanti na sandehaḥ madhyadeśe narādhipāḥ

viṃśad varṣāṇi śataṃ caiva āyureṣā yugādhame /
manuṣyāṇāṃ tadā kāle dīrghamāyuriti kīrtyate

teṣāṃ madhyotkṛṣṭānāṃ antarā uccanīcatā /
alpāyuṣo nṛpatayaḥ sarve kathitā tu tadā yuge

nadīgaṅgā tathā tīre himādreśca nitambayoḥ /
kāmarūpe tathā deśe bhaviṣyanti tathā nṛpāḥ

ādye madhye tathānte ca aṅgadeśeṣu kathyate /
ādyaṃ vṛtsudhānaśca karmarājā sa kīrttitaḥ

ante 'ṅgapatiḥ tadaṅgaṃ ca subhūtirbhūtireva ca /
sadaho bhavadaśca kāmarūpe ajātayaḥ

subhūmṛgakumārāntā vaiśālyāṃ vakārayoḥ /
tatrāsau munirjātaḥ kapilāhve purottame

śuddhāntā śākyajāḥ proktā nṛpā ādityekṣasambhavā /
śuddhodanāntavikhyātā śākyaṃ śākyavarddhanām

alpavīryāstu mantrā vai kathitā lokapuṅgavaiḥ /
jinaproktāstu ye mantrāḥ sarvaceṭagaṇāstathā

tathā vividhā dūtigaṇāḥ sarve vajrābjakulayorapi /
sādhyamānastu sidhyante mantratantrārthakovidaiḥ

sarve te laukikā mantrāḥ sidhyante 'tra madhyataḥ /
viśeṣato madhyadeśasthāḥ sādhanīyā jinabhāṣitā

vividhākāracihnaistu vividhākārakāraṇaiḥ /
vividhaprayogaprayuktāstu vividhā siddhidehinām

madhyaśede tathā mantrāḥ sādhyā vai bhogavardhanāḥ /
rakṣāhetuparitrāṇaṃ vaśyākarṣaṇadehinām

atītānāgatā proktāḥ madhyadeśe narādhipāḥ /
vividhākāracihnaistu vividhāyuṣyagotrataḥ

sarve narapatayaḥ proktā uttamādhamamadhyamāḥ /
triprakārā tathā siddhiḥ tridhā kāleṣu yojayet

trividhāstu tathā mantrāḥ kathitā munivaraistathā /
anantā nṛpatayaḥ proktā madhyadeśe 'tha paścime

uttarāparapūrvaistu vidikṣuḥ sarvatastathā /
dvīpeṣu bahiḥ sarveṣu caturdhā paricihnitaiḥ

anantā mahīpatayaḥ proktā anantā mantrasādhanāḥ /
anantā diśamāśritya anantā mantrasiddhayaḥ

nigrahānugrahārthāya śāsane 'ntarhite munau /
mantrā nṛpatiṣu kāle vai mañjughoṣeṇa bhāṣitā

krīḍārakṣavikurvārthaṃ kālacaryā tu kathyate /
mantramāhātmyasattvānāṃ gatiyoninṛpāhvaye

deśakālasamākhyātaḥ mantrasādhanalipsunām /
prasaṅgā nṛpatayaḥ kathitāḥ śāsanāntardhite pathe

mantrāṇāṃ guṇamāhātmyaṃ phalamante ca bodhitaḥ /
kathitā dve pare yāne nṛpā pūrvanibodhitāḥ

pratiṣṭhitāstu na sandehaḥ tasmiṃ kāle yugādhame /
kathitā nṛpatayaḥ sarve ye tu diśamāśṛtāḥ

pravrajyā dhruvamāsthāya śākyapravacane tadā /
śāsanārthaṃ kariṣyanti mantravādasadāratā

astaṃ gate munivare laukikāgrasucakṣuṣe /
teṣāṃ kumāra vakṣyāmi śṛṇuṣvaikamanāstadā

yugānte caṣṭa loke śāstupravacane bhuvi /
bhaviṣyanti na sandeho yatayo rājyavṛttinaḥ

tadyathā mātṛcīnākhya kusumārākhyaśca viśrutaḥ /
makārākhye kukārākhyaḥ atyanto dharmavatsalaḥ

nāgāhvaśca samākhyāto ratnasambhavanāmataḥ /
gakārākhyaḥ kumārākhyaḥ vakārākhyo dharmacintakaḥ

akārākhyo mahātmāsau śāstuśāsanadurdharaḥ /
guṇasammato matimām lakārākhyaḥ prakīrtitaḥ

rakārādyo ......... nakārādyaḥ prakīrtitaḥ /
buddhapakṣasya nṛpatau śāstuśāsanadīpakaḥ

akārākhyo yati khyāto dvijaḥ pravrajitastathā /
sāketapuravāstavyaḥ āyuṣāśītikastathā

akārādyastathā bhikṣuḥ rāgī sau dakṣiṇāṃ diśi /
paṣṭivarṣāyuṣo dhīmān kāvyākhyaḥ puravāsinaḥ

thakārādyo yatiścaiva vikhyāto dakṣiṇāṃ diśi /
parapravādiniṣeddhā ca mantrasiddhistathā yatiḥ

aparaḥ pravrajitaḥ śreṣṭhaḥ saihnikāpuravāstavī /
anāryā āryasaṃjñī ca siṃhaladvīpavāsina

parapravādiniṣeddhāsau tīrthyānāmatadūṣakaḥ /
bhaviṣyanti yugānte vai tasmiṃ kāle 'tha bhairave

vakārādyo yatiḥ prokto lakārādyaśca kīrtitaḥ /
rakārādyo vikārādyaḥ bhikṣuḥ pravrajitastathā

bhaviṣyati na sandehaḥ śāstuśāsanatatparaḥ /
bālākau nṛpatau khyāte sakārādyo yatistathā

vihārārāmacaityāṃśca vāpyakūpāṃśca sarvadā /
śāstubimbā tathā cihnā setuḥ saṅkramāśca vai

bhaviṣyati na sandehaḥ śāstubhinnārdhvagaḥ smṛtaḥ /
tataḥ pareṇa makārādyaḥ kakārādyaśca kīrtitaḥ

nakārādyaḥ sudattaśca supeṇaḥ senakīrtitaḥ /
dattako dinakaścaiva parasiddhāntadūṣakaḥ

vaṇikpūrvī vaidyapūrvīṃ ca ubhau dīnārthacintakau /
cakārādyo yatiḥ khyātaḥ rakārādyamata pare

bhakārādyaḥ prathitaśrāddhaḥ śāstubimbārthakārakaḥ /
makārādyo matimān jāto yatiḥ śrāddhastathaiva ca

vividhā yatayaḥ proktā anantāśca bhavitā tadā /
sarve te yatayaḥ khyātā śāstuśāsanadīpakāḥ

nirnaṣṭe ca nirāloke śāsane 'smiṃ tadā bhuvi /
kariṣyati na sandehaḥ śāstubimbāṃ manoramām

sarve vai vyākṛtā bodho agraprāptāśca me sadā /
dakṣiṇīyāastathā loke tribhavāntakarāstathā

mantratantrābhiyogena khyātāḥ kīrtikarāḥ smṛtāḥ /
adhunā tu pravakṣyāmi dvijānāṃ dharmaśīlinām

mantratantrābhiyogena rājyavṛttimupāśritā /
bhavati sarvaloke 'smiṃ tasmiṃ kāle sudāruṇe

vakārākhyo dvijaḥ śreṣṭhaḥ āḍhyo vedapāragaḥ /
semāṃ vasumatīṃ kṛtsnāṃ vicerurvādakāraṇāt

trisamudramahāparyantaṃ paratīrthānāṃ vigrahe rataḥ /
ṣaḍakṣaraṃ mantrajāpī tu abhimukhyo hi vākyataḥ

kumāro gītavāhyāsīt sattvānāṃ hitakāmyayā /
etasyai kalpavisarānmahitaṃ buddhitandritaḥ

jayaḥ sujayaścaiva kīrttimān śubhamataḥ paraḥ /
kulīno dhārmikaścaiva udyataḥ sādhu mādhavaḥ

madhuḥ samadhuścaiva siddhaḥ ....... namastadā /
raghavaḥ śūdravarṇastu śakajātāstathāpare

te 'pi jāpinaḥ sarve kumārasyeha vākyataḥ /
te cāpi sādhakaḥ sarve buddhimanto bahuśrutāḥ

āmukhā mantribhiste ca rājyavṛttisamāśritā /
tasyāpareṇa vikhyātaḥ vikārākhyo dvijastathā

pare puṣpasamākhyātā bhavitāsau krodhasiddhakaḥ /
nigrahaṃ nṛpatiṣu cakre daridrāt paribhavācca vai

mañjughoṣa iha proktaḥ krodharāṭ sa yamāntakaḥ /
sattvānāmatha duṣṭānāṃ durdāntadamako 'tha vai

ahitānivāraṇārthāya hitārthāyopabṛṃhane /
anugrahāyaiva sattvānāṃ tanuprāṇoparodhine

so hi māṇavako mūḍhaḥ daridraḥ krodhalobhitaḥ /
āvarttayāmāsa taṃ krodhaṃ nṛpateḥ prāṇoparodhinaḥ

tasyāpareṇa vikhyātaḥ sakārādyo dvijastathā /
mantrārthakuśalo yuktātmā ...........

prabhuḥ bahutaraḥ khyāto mantrajāpī bhavet tadā /
sādhayāmāsa taṃ mantraṃ vai vaśyārthaṃ nānyakāraṇam

vaśībhūteṣu bhūteṣu dhanamato bhavati tataḥ /
tataḥ pareṇa vai khyāto dvijo dharmārthacintakaḥ

śakārādyo mata ante bhavitāsau mālave jane /
prasanne śāsane hyagro mantrajāpī hi vai bhuvi

vetāḍagrahaduṣṭāṃ ca brahmarākṣasarākṣasām /
sarvapūtanabhūtāṃśca kravyādāṃ vividhāṃstathā

sarve te vaśinastasya viṣāḥ sthāvarajaṅgamāḥ /
sarve vai baśinastasya dvijacihnasya tathāhitaiḥ

tataḥ pareṇa vikhyātaḥ dvijo dakṣiṇāpathe /
vakārādyaḥ samākhyātaḥ śāstuśāsanatatparaḥ

vihārārāmacaityestu śāstubimbe manorame /
alaṅkaroti sarvā vai medinīṃ dvisamudragām

tasyāpareṇa vikhyātaḥ dvijaśreṣṭho mahādhanaḥ /
bhakārādyastathā khyāto dakṣiṇāṃ diśimāśṛtaḥ

mantrarūpī mahātmā vai niyataṃ bodhiparāyaṇaḥ /
madhyadeśe tathā khyātaṃ sampūrṇo nāmata dvijaḥ

vinayaḥ suvinayaścaiva pūrṇo madhuravāsinaḥ /
bhakārādyo dhanādhyakṣo nṛpatīnāṃ mantrapūjakaḥ

ityete dvijātayaḥ kathitāḥ śāstuśāsanapūjakāḥ /
madhyānta ādimukhyāśca vividhāyatanagotrajāḥ

nānādeśadvijātīnāṃ pūjakā te paridvijāḥ /
nānātīrthāśca gotrāśca vividhācāragocarāḥ

samantād yatayaḥ proktā mānavāśca bahuśrutāḥ /
dharmarājā svayaṃ buddhaḥ sarvasattvārtthasādhakaḥ

sarveṣāṃ caiva bhūtānāṃ tṛdevānāṃ ca kīrtitāḥ /
catvāro 'pi mahārājāḥ sarvalokeṣu kīrtitāḥ

virūḍho virūpākṣaśca dhṛtarāṣṭro 'tha yakṣarāṭ /
śakraśca atha devānāṃ niyatāyuḥ prakīrtitaḥ

sujāmā devaputraśca sunirmito vaśavartinaḥ /
rājā santuṣitaḥ proktaḥ kāmadhātvīśvaro 'paraḥ

śakrādya ekanāmnāstu kāmadhātvīśvarāstathā /
ekāśrayā sadā te 'pi ekajāpā maharddhikā

anantāḥ kathitāste 'pi nānārūpadharā surāḥ /
ataḥ ūrdhvaṃ samā sarve te 'pi maharddhikāḥ

evaṃ saṃjñā suraśreṣṭhāḥ ā saṃjñātāḥ prakīrtitāḥ /
na teṣāṃ prabhaviṣṇu syāt tulyavṛttisamāśrayā

ataḥ avīciparyantaṃ na rājā tatra vidyate /
narakāṣṭau ṣoḍaśotsiddhau saparyantā te 'pi kīrtitā

anṛpāḥ karmarājānaḥ yamarājā pretanāṃ vibhu /
suvarṇaḥ pakṣiṇāṃ rājā garutmā sa maharddhikaḥ

kinnarāṇāṃ drumo khyātaḥ bhūtānāṃ rudra ucyate /
vidyādharāṇāṃ nṛpo vidyā citraketurmaharddhikaḥ

asurāṇāṃ tathā hetau vema citrithottamaḥ /
ṛṣīṇāṃ vyāsa ityuktaḥ siddhānāṃ ca mahārathaḥ

nakṣatrāṇāṃ soma nirdiṣṭaḥ grahāṇāṃ bhāskarastathā /
mātarāṇāṃ tathā rājā īśānamabhikīrtitaḥ

divaśānāṃ pratima proktaḥ rāśīnāṃ kanya ucyate /
saritāṃ sāgaraḥ proktaḥ meghānāṃ tu supuṣkaraḥ

airāvato hastīnāmaśvānāṃ harivarastathā /
tīryarājātha sarvatra prahlādaḥ parikīrtitaḥ

anantā gatayaḥ proktā rājānaśca anantakā /
samantāt sarvatasteṣu buddho loke narottamaḥ

uttamāṃ kurumādyaḥ prabhaviṣṇusteṣu na vidyate /
dīpeṣveva pareteṣu pūrvāparayatastathā

jambūdvīpanivāsisyāṃ pūrvāyāṃ sa narādhipāḥ /
anantā ca kriyā proktā caturdvīpā sanarādhipā

saṃkṣepā kathitā hyete katthyamānātivistarā /
prabhūtā bhūtapatayo murvyāṃ tridevāsurajanminām

anantalokadhātusthā anantā guṇavistarā /
anantā kathitā hyatra kalpe 'smiṃ bhūnivāsinaḥ

kathitā mantrasiddhyarthe deśakālasamātyayāt /
siddhyante mantrarājāno vividhā dūtagaṇāstathā

eṣa dharmaḥ samāsena kathitā munipuṅgavaiḥ /
adhunā kathitaṃ hyetat śuddhāvāsoparisthitaiḥ

mañjuśriyo mahāvīraḥ papraccha lokanāyakam /
ya eṣa kathito karma kathaṃ caivaṃ dhārayāmyaham

peyālaṃ vistareṇa kartavyaṃ sarveṣāṃ nṛpatīnāṃ karma svakaṃ ja mahāparinirvāṇasūtraṃ mañjuśriyasya kumārasya muniśreṣṭha /
abhāṣata bodhisattvārthamantrāṇāṃ ca savistarām /
bodhimārgārthabodhyarthaṃ dharmasūtra iti smṛtaḥ

visaraṃ kalpamantrāṇāṃ karma āyūṣi bhūnṛṇām /
nṛpatīnāṃ tathā kālamāyuṣe parikīrtanam

dharmasaṅgrahaṇaṃ nāma piṭakaṃ bodhiparāyaṇam /
mantratantrābhiyogena kathitaṃ bodhinimnagam /
dhārayastvaṃ sadā prājñaḥ mantratantrārthapūrakam