Mahāsubhāṣitasaṃgraha 1-9979 · Verses 9235-9254

kasya karānna skhalitā nīranidhikledapicchilā lakṣmīḥ /
bhṛgucaraṇadhūliparuṣe hṛdi paribaddhā hareḥ sthireyamabhūt //

kasyacij jāyate jantoḥ pādāghātas tavādhvani /
padabhaṅgavyathā śambho jṛmbhate jambhavairiṇaḥ //

kasyacit kimapi no haraṇīyaṃ marmavākyamapi noccaraṇīyam /
śrīpateḥ padayugaṃ smaraṇīyaṃ līlayā bhavajalaṃ taraṇīyam //

kasyacit samadanaṃ madanīya- preyasīvadanapānaparasya /
svāditaḥ sakṛdivāsava eva pratyuta kṣaṇavidaṃśapade'bhūt //

kasyacinna hi durbuddheś chandato jāyate matiḥ /
yādṛśaṃ kurute karma tādṛśaṃ phalamaśnute //

kasya tṛṣaṃ na kṣapayasi pibati na kastava payaḥ praviśyāntaḥ /
yadi sanmārgasarovara nakrī na kroḍamadhivasati //

kasya doṣaḥ kule nāsti vyādhinā ko na pīḍitaḥ /
vyasanaṃ kena na prāptaṃ kasya saukhyaṃ nirantaram //

kasya na dayitaṃ vittaṃ cittaṃ hriyate na kasya vittena /
kiṃ tu yaśodhanalubdhā vāñchanti na duṣkṛtairarthān //

kasya na pratihataṃ bata cakṣur dhvāntasantatibhiraḍḍamarābhiḥ /
kevalaṃ manasijapratihatānāṃ nāvadhūtamabhisāravadhūnām //

kasya na vāhanayogyā mugdhadhiyas tucchasādhane lagnāḥ /
prītatayā praśamarucaś capalāsu strīṣu ye'dāntāḥ //

kasya no kurute mugdhe pipāsākulitaṃ manaḥ /
ayaṃ te vidrumacchāyo marumārga ivādharaḥ //

kasya marau duradhigamaḥ kamale kaḥ kathaya viracitāvāsaḥ /
kaistuṣyati cāmuṇḍā ripavaste vada kuto bhraṣṭāḥ //

kasya mātā kasya pitā kasya bandhurmahāmune /
vibhramaś ca smṛtibhraṃśāt tena muhyanti jantavaḥ //

kasya mātā pitā kasya kasya bhāryā suto'pi vā /
jātau jātau hi jīvānāṃ bhaviṣyantyapare'pare //
kasya vaktavyatā nāsti sopāyaṃ ko na jīvati /
vyasanaṃ kena na prāptaṃ kasya saukhyaṃ nirantaram //

kasya vaśe prāṇigaṇaḥ satyapriyabhāṣiṇo vinītasya /
kva sthātavyaṃ nyāyye pathi dṛṣṭādṛṣṭalābhāya //
kasya syānna skhalitaṃ pūrṇāḥ sarve manorathāḥ kasya /
kasyeha sukhaṃ nityaṃ daivena na khaṇḍitaḥ ko vā //

kasya svargaśriyo vaśyāḥ kasya caindraṃ padaṃ bhuvi /
kaṃ devā bahu manyante saṅgrāme maraṇādṛte //

saṅgrāme maraṇaṃ puṇyaṃ gayāyāṃ maraṇe tathā /
gaṅgāyāṃ maraṇe mokṣaḥ saṅgrāme maraṇaṃ sukham //

yadi vastuṃ manaḥ puṃsāṃ svargastrībhiḥ samaṃ cirāt /
aparāṃ sukhitāṃ kṛtvā saṅgrāme mriyatāṃ tadā //

kasyāṃcid vāci kaiścinnanu yadi vihitaṃ dūṣaṇaṃ durdurūḍhaiś chinnaṃ kiṃ nastadā syāt prathitaguṇavatāṃ kāvyakoṭīśvarāṇām /
vāhāśced gandhavāhādhikavihitajavāḥ pañcaṣāścāndhakhaṃjāḥ kā hāniḥ śeraśāhakṣitipakulamaṇeraśvakoṭīśvarasya //

kasyākhyāya vyatikaramimaṃ muktaduḥkho bhaveyaṃ ko jānīte nibhṛtamubhayorāvayoḥ snehasāram /
jānātyekaṃ śaśadharamukhi prematattvaṃ mano me tvāmevaitacciramanugataṃ tat priye kiṃ karomi //