Mahāsubhāṣitasaṃgraha 1-9979 · Verses 9015-9034

kalāratnaṃ gītaṃ gaganatalaratnaṃ dinamaṇiḥ sabhāratnaṃ vidvān śravaṇapuṭaratnaṃ harikathā /
niśāratnaṃ candraḥ śayanatalaratnaṃ śaśimukhī mahīratnaṃ śrīmāñjayati raghunātho nṛpavaraḥ //

kalāvataḥ saiva kalā yayādhaḥkriyate bhavaḥ /
bahvībhiśca kalābhiḥ kiṃ yābhiraṅkaḥ pradarśyate //

kalāvati kṣatatamasi prabhāvati sphuṭodaye jananayanābhinandini /
dadurdūśaṃ śaśini ruṣābhisārikāḥ kvacid bhavatyatisubhago'pi durbhagaḥ //

kalāvati calāṃ dṛṣṭiṃ na kuryās tvaṃ muhurmuhuḥ /
lagno'pi na tathā bāṇo bādhate cālito yathā //

kalāsīmā kāvyaṃ sakalaguṇasīmā vitaraṇaṃ bhaye sīmā mṛtyuḥ sakalasukhasīmā suvadanā /
tapaḥsīmā muktiḥ sakalakṛtisīmāśritabhṛtiḥ priye sīmāhlādaḥ śravaṇasukhasīmā harikathā //

kalā sevātha dharmārthau tṛṣṇādāridryapaddhatī /
santoṣakṣāntikaruṇā vairāgyaṃ tadanu stutiḥ //

kalāstāstāḥ samyagvahasi yadasi tvaṃ dvijapatir dyutis tādṛgnūtnā janirapi ca ratnākarakule /
bahu brūmaḥ kiṃ vā puraharaśiromaṇḍanamasi tvadīyaṃ tat sarvaṃ śaśadhara kalaṅkād viphalitam //

kalikaluṣasaṅkaṭākula- kuṭumbasaṃvalanakhedavikalasya
pratinidhiriva pravāsaḥ saṃsāravirāgasukhasamudrasya //

kalikaluṣe manasi sve kathamiva jagadārjavaṃ labhate /
cakṣurdoṣe jāgrati candradvitvaṃ kuto yātu //

kalikālamiyaṃ yāvad agastyasya munarepi /
mānasaṃ khaṇḍayatyatra śaśikhaṇḍānukāriṇī //

kalitagarimā śroṇirmadhyaṃ vivṛddhavalitrayaṃ hṛdayamudayallajjaṃ majjaccirantanacāpalam /
mukulitakucaṃ vakṣaścakṣurmanāgdhṛtavakrima kramaparigaladbālyaṃ tasyā vapus tanute śriyam //

kalitamambaramākalayan karair mṛditapaṅkajakośapayodharaḥ /
vikasadutpalanetravilokitaḥ sakhi niśāṃ sarasīkurute vidhuḥ //

kalito ruciraṃ na karma cet kriyate'naṅgakṛteḥ kutaḥ phalam /
smarato hṛdi puṇḍarīkadṛg bhajate'sau saphalas tataḥ śramaḥ //

kalindagirinandinītaṭavanāntaraṃ bhāsayan sadā pathi gatāgataśramabharaṃ haran prāṇinām /
latāvaliśatāvṛto madhurayā rucā saṃbhṛto mamāśu haratu śramānatitamāṃ tamāladrumaḥ //
kalindajānīrabhare'rdhamagnā bakāḥ prakāmaṃ kṛtabhūriśabdāḥ /
dhvāntena vairād vinigīryaṃmāṇāḥ krośanti manye śaśinaḥ kiśorāḥ //

kalibhūpe samāyāte dharmo'dharmāyate bhuvi /
adharmaḥ sarvaṃtaḥ puṃsāṃ hanta dharmavadarthyate //

kalimāyāntamutprekṣya vilīyante surā api /
tadāśritasya dharmādeḥ kā kathā jīvane punaḥ //

kalilaṃ caikarātreṇa pañcarātreṇa budbudam /
pakṣaikenāṇḍakaḥ so'tha māsapūrṇe śiro kuru //

kalisāmrājyamāsādya na bhetavyaṃ bhavāntarāt /
dharmānuṣṭhānamūḍhāvāṃ bhītirekāvaśiṣyate //

kaluṣaṃ kaṭukaṃ lavaṇaṃ virasaṃ salilaṃ yadi vāśubhagandhi bhavet /
tadanena bhavatyamalaṃ surasaṃ sasugandhi guṇairaparaiśca yutam //

kaluṣaṃ ca tavāhiteṣvakasmāt sitapaṅkeruhasodaraśri cakṣuḥ /
patitaṃ ca mahīpatīndra teṣāṃ vapuṣi prasphuṭamāpadāṃ kaṭākṣaiḥ //