Mahāsubhāṣitasaṃgraha 1-9979 · Verses 8756-8775

kariṣyate yatra suduścarāṇi prasattaye gotrabhidas tapāṃsi /
śiloccayaṃ cāruśiloccayaṃ tam eṣa kṣaṇānneṣyati guhyakas tvām //

kariṣyāmi kariṣyāmi kariṣyāmīti cintayā /
mariṣyāmi mariṣyāmi mariṣyāmīti vismṛtam //

kariṣye'vaśyamityuktiḥ kariṣyannapi duṣyasi /
dṛṣṭādṛṣṭā hi nāyattāḥ kāryīyā hetavastava //
karī barībharīti ced diśaṃ sarīsarīti kāṃ sthirīcarīkarīti cet na cañcarīkarītikām /
darīdharīti ketakaṃ varīvarīti sārasaṃ jarījarīti mañjarī nirītirītirīdṛśī //

karīṣamadhye nihitaṃ tat sarvaṃ pañcamāsakam /
dravībhūtaṃ tataḥ sarvam uddharet tena lepayet //

karuṇamabhihitaṃ trapā nirastā tadabhimukhaṃ ca vimuktamaśru tābhiḥ /
prakupitamabhisāraṇe'nunetuṃ priyamiyatī hyabalājanasya bhūmiḥ /

karuṇādravameva durjanaḥ sutarāṃ satpuruṣaṃ prabādhate /
mṛdukaṃ hi bhinatti kaṇṭakaḥ kaṭhine kuṇṭhaka eva jāyate //
kare kṛtvā tūlaṃ kucakalaśamūlaṃ vidadhatī sphuṭaṃ vāraṃ vāraṃ taralayati hāraṃ suvadanā /
samīcīnā mīnāyatanayananīlotpaladalā vitanvānā tantūn vikalayati jantūnavikalam //

kare ca dakṣiṇe vyādhiṃ hṛdi rājyādilābhadā /
pṛṣṭhe copadravaṃ hantyudare miṣṭānnabhojanam //

kareṇa kaṇḍūyati dakṣiṇena yakṣo yadā vāmakaraṃ tadānīm /
prabhūtamātaṅgaghaṭāsamṛddhaṃ brūte samantāt pṛthivīpatitvam //

kareṇa kariṇā vīraḥ sugṛhīto'pi kopinā /
asināsūn jahārāśu tasyaiva svaymakṣataḥ //

kareṇa te raṇeṣvantakareṇa dviṣatāṃ hatāḥ /
kareṇavaḥ kṣaradraktā bhānti saṃdhyāghanā iva //

kareṇa dānaṃ munirādadāno bhaktasya saṃketamiti bravīti /
lokadvayecchāphalasaṃpradāne datto mayā dakṣiṇahasta eṣaḥ //

kareṇa vāñcheva vidhuṃ vidhartuṃ yamitthamātthādariṇī tamartham /
pātuṃ śrutibhyāmapi nādhikurve varṇaṃ śrutervarṇa ivāntimaḥ kim //

kareṇa vātāyanalambitena spṛṣṭas tvayā caṇḍi kutūhalinyā /
āmuñcatīvābharaṇaṃ dvitīyam udbhinnavidyudvalayo ghanas te //
kareṇa salilārdreṇa na gaṇḍau nāparaṃ karam /
nekṣaṇe ca spṛśet kiṃ tu spraṣṭavye jānunī śriye //

kareṇurnāhūtā nijakavalabhāgapraṇayinī na cāmṛṣṭaḥ snehāt karakisalayenāpi kalabhaḥ /
sa yenāsau darpāt pratigajajigīṣārabhasataḥ krudhā dhāvan magno hradapayasi kaṣṭaṃ karipatiḥ //
kare dānaṃ hṛdi dhyānaṃ mukhe maunaṃ gṛhe dhanam /
tīrthe yānaṃ giri jñānaṃ maṇḍanaṃ mahatāmidam //
kare vāme vāsastadaparakare hāralatikāṃ vahantyā bimboṣṭhe patidaśanadattavraṇapadam /
parimlānāṃ mālāṃ śirasi śaśikhaṇḍaṃ stanataṭe ratāntottiṣṭhantyā jagadapi na mūlyaṃ mṛgadaśaḥ //

kare vidhṛtyeśvarayā girāṃ sā pānthā pathīndrasya kṛtā vihasya /
vāmeti nāmaiva babhāja sārdhaṃ purandhrisādhāraṇasaṃvibhāgam //

kare vibhāti tanvaṅgyā raṇadvalayasaṃhatiḥ /
manaḥkuraṅgabandhāya pāśālīva manobhuvaḥ //

kare veṇīmeṇīsadṛśanayanā snānaviratau dadhānā harmyāgre haranayanatejohutamapi /
iyaṃ mugdhā dugdhāmbudhibahalakallolasadṛśā dṛśā vāraṃ vāraṃ manasijataruṃ pallavayati //

kare ślāghyas tyāgaḥ śirasi gurupādapraṇamatā mukhe satyā vāṇī vijayi bhujayorvīryamatulam /
hṛdi svacchā vṛttiḥ śrutamadhigataṃ ca śravaṇayor vināpyaiśvaryeṇa prakṛtimahatāṃ maṇḍanamidam //
karairupāttān kamalotkarebhyo nijairvivasvān vikacodarebhyaḥ /
tasyā nicikṣepa mukhāravinde svedāpadeśānmakarandabindūn //

karairvā pramitairgrāmair vatsare prabalaṃ ripum /
toṣayet taddhi dānaṃ syād yathāyogeṣu śatruṣu //

karoti kālaḥ sakalaṃ saṃharet kāla eva hi /
kālaḥ sthāpayate viśvaṃ kālādhīnamidaṃ jagat //