Mahāsubhāṣitasaṃgraha 1-9979 · Verses 8376-8395

kaṇṭakenāpi ye spṛṣṭā yānti kāmapi vikriyām /
te'pi śastranikṛntasya paśormāṃsāni bhuñjate //

kaṇṭakenāpi viddhasya mahatī vedanā bhavet /
cakrabhīṣaṇakhaḍgādyair māryamāṇasya kiṃ punaḥ //

kaṇṭakairiva vidāritapādaḥ padminīparicitairaparādreḥ /
āruroha sarasīruhabandhuḥ skandhamambudhitaṭīgamanāya //
kaṇṭako dārukhaṇḍaṃ ca vitanoti galavyathām /
vyañjanāntarnipatitas tālu vidhyati vṛścikaḥ //

kaṇṭakyakaṇṭakānāṃ vyatyāse'mbhastribhiḥ karaiḥ paścāt /
khātvā puruṣatritayaṃ tribhāgayuktaṃ dhanaṃ vā syāt //

kaṇṭārikāyā anyoktiḥ saṇānyoktirudāhṛtā /
dhattūrapādapānyoktir avadheyā tṛṇoktayaḥ //

kaṇṭhakoṇaviniviṣṭamīśa te kālakūṭamapi me mahāmṛtam /
apyupāttamamṛtaṃ bhavadvapur- bhedavṛtti yadi me na rocate //

kaṇṭhagatairapyasubhiḥ kasyātmā nopasarpate jātu /
mūrkhasya viṣādasya ca garvasya tathā kṛtaghnasya //

kaṇṭhagrahaṃ na vātyeva bhartuḥ kruddhāpi yatnataḥ /
kaṅkaṇaśreṇikevāsau doṣamevāvalambate //

unmatteva pramatteva prahṛṣṭevātureva ca /
na śakyopāsituṃ rāmā prauḍhaṃ yauvanamāśritā //

sukhaduḥkhapradāyinyas tṛtīye yauvane sthitāḥ /
jāyante gahanā rāmāḥ saṃsārasyeva rītayaḥ //

kaṇṭhagrahe śithilatāṃ gamite kathaṃcid yo manyate maraṇameva sukhābhyupāyam /
gacchan sa eṣa na balād vidhṛto yuvābhyām ityujjhite bhujalate valayairivāsyāḥ //

kaṇṭhacchāyamiṣeṇa kalparajanīmuttaṃsamandākinī- rūpeṇa pralayābdhimūrdhvanayanavyājena kalpānalam /
bhūṣāpannagakelipānakapaṭādekonapañcāśa taṃ vātānapyupasaṃharannavatu vaḥ kalpāntaśāntau śivaḥ //

kaṇṭhacchedaviśīryamāṇarudhiraprāgbhārabhagn adyuter yena smeramukhena homaśikhinaḥ saṃdhukṣaṇākāṅkṣiṇā /
bhrūbhaṅgaḥ śitikaṇṭhakaṇṭhaphaṇine phūtkārahetoḥ kṛtaḥ śauṭīryavratatuṣṭadhūrjaṭirasau kiṃ varṇyate rāvaṇaḥ //

kaṇṭhacchede suvarṇaṃ cet kṣuraṃ yadvaddhitaṃ na hi /
bandhurapyapakārī cet sarvaistyājyas tathaiva saḥ //

kaṇṭhamākuñcya hṛdaye sthāpayed dṛḍhamicchayā /
jālaṃdharo bandha eṣa sudhāvyayanivāraṇaḥ //

kaṇṭhaśriyaṃ kuvalayastabakābhirāma- dāmānukārivikaṭacchavikālakūṭām /
bibhrat sukhāni diśatādupahārapīta- dhūpotthadhūmamalināmiva dhūrjaṭirvaḥ //

kaṇṭhaśleṣaṃ samāsādya tasyāḥ prabhraṣṭayānayā /
tulyāvasthā sakhīveyaṃ tanurāśvāsyate mama //

kaṇṭhasaktamṛdubāhubandhanaṃ nyastapādatalamagrapādayoḥ /
prārthayanta śayanotthitaṃ priyās taṃ niśātyayavisargacumbanam //

kaṇṭhas tasyāḥ kuvalaydṛśaḥ kāñcanaḥ ko'pi kambur lāvaṇyāmbusmaranarapaterarghyamāviḥ karoti /
tisro rekhāstribhuvanajayavyañjikās tatra tat kiṃ na syānmadhye trivaliracanā paunaruktyāya dhātuḥ //

kaṇṭhasthā yā bhaved vidyā sā prakāśyā sadā budhaiḥ /
yā gurau pustake vidyā tayā mūḍhaḥ pratāryate //