Mahāsubhāṣitasaṃgraha 1-9979 · Verses 8156-8175

eṣā vrajantī lalitaṃ smayantī sakhījanaiḥ sārdhamatipragalbhā /
surīva nityaṃ suratāsukhāptā vibhāti bhūmīdharapāṭhakastrī //

eṣā sā vindhyamadhyasthalavipulaśilotsaṅgaraṅgattaraṅgā saṃbhogaśrāntatīrāśrayaśabaravadhūśarma dā narmadā ca /
yasyāḥ sāndradrumālīlalitatalamilatsundarīsaṃniruddhaiḥ siddhaiḥ sevyanta ete mṛgamṛditadalatkandalāḥ kūlakacchāḥ //

eṣāsi vayaso darpāt kulaputrānusāriṇī /
keśeṣu kusumāḍhyeṣu sevitavyeṣu karṣitā //

eṣā hi prakṛtiḥ strīṇām āsṛṣṭe raghunandana /
samasthamanurajyante viṣamasthaṃ tyajanti ca //

eṣā hi me raṇagatasya dṛḍhā pratijñā drakṣyanti yanna ripavo jaghanaṃ hayānām /
yuddheṣu bhāgyacapaleṣu na me pratijñā daivaṃ yadicchati jayaṃ ca parājayaṃ ca //

eṣu sparśo varastrīṇāṃ svāntahārī munerapi /
ato'pramattaḥ seveta viṣayāṃs tu yathocitān //

eṣaiva kācana vinidrasaroruhākṣī kāmasya kāpi dayitā tanujānujā vā /
yaḥ paśyati kṣaṇamimāṃ kathamanyathāsau kāmas tamastakaruṇaṃ taruṇaṃ nihanti //

eṣaiva mahatī lajjā sadācārasya bhūpateḥ /
yadakālabhavo mṛtyus tasya saṃspṛśati prajāḥ //

eṣaiva yoṣitāṃ dhanyā śīlaṃ ca labhate sukham /
divā pativratā bhūyo naktaṃ ca kulaṭā yataḥ //

eṣo'gnihotrīti bibharti gāstā vikrīya dugdhaṃ salilaṃ juhoti /
khyāto'sti lokeṣvṛtukālagāmī rajasvalāṃ yāti divāpi veśyām //

eṣojjaṭasya bhavato gṛhiṇī tvaparṇā sthāṇuḥ svayaṃ tava ca sūnurasau viśākhaḥ /
tvattaḥ phalaṃ ka iha vāñchati vāmadeva janmakṣayaḥ paramasau tava darśanena //

eṣottuṅgataraṅgalaṅghitataṭotsaṅgā pataṅgātmajā pūrṇeyaṃ tarirambubhirna hi hareḥ śaṅkā kalaṅkādapi /
kāṭhinyaṃ bhaja nādya sundari vayaṃ rādhe prasādena te jīvāmaḥ sphuṭamātarīkuru giridroṇīvinodotsavam //

eṣo'mbudaniḥsvanatulyaravaḥ kṣībaḥ skhalamānavilambagatiḥ /
śrutvā ghanagarjitamadritaṭe vṛkṣān prati moṭayati dviradaḥ //

eṣo'hamadritanayāmukhapadmajanmā prāptaḥ surāsuramanorathadūravartī /
svapne'niruddhaghaṭanādhigatābhirūpa- lakṣmīphalāmasurarājasutāṃ vidhāya //

eṣṭavyā bahavaḥ putrā guṇavanto bahuśrutāḥ /
teṣāṃ vai samavetānām api kaścid gayāṃ vrajet //

eṣṭavyā bahavaḥ putrā yadyeko'pi gayāṃ vrajet /
yajeta vāśvamedhena nīlaṃ vā vṛṣamutsṛjet //

eṣṭavyā bahavaḥ putrā yadyeko'pi gayāṃ vrajet /
yatrāsau prathito lokeṣv akṣayyakaraṇo vaṭaḥ //

eṣyati mā punarayamiti gamane yadamaṅgalaṃ mayākāri /
adhunā tadeva kāraṇam avasthitau dagdhagehapateḥ //

eṣyanti yāvad gaṇanād digantān nṛpāḥ smarārtāḥ śaraṇe praveṣṭum /
ime padābje vidhināpi sṛṣṭās tāvatya ekāṅgulayo'tra lekhāḥ //

eṣyantyavaśyamadhunā hṛdayādhināthā mugdhā mudhā kuruta mā vividhaṃ vilāpam /
itthaṃ śaśaṃsuriva garjitakaitavena pāthodharāḥ pathikapaṅkajalocanābhyaḥ //